世紀的大運動P.K.U.
Sè-kí ê toā ūn-tōng P.K.U.
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第790號 |
| 日期 | 1954/10 |
| 頁數 | 4-5 |
白話字（原文數位化）
Sè-kí ê toā ūn-tōng P. K. U.
- 10, no. 790, pp. 4-5
Kin-nî ê Lâm-pō͘ Tāi-hoē ū koat-gī beh khai-sí chi̍t ê toā ūn-tōng, kiò-chò “Siat-kàu pah chiu-nî kì-liām kàu-hoē poē-ka ūn-tōng,” kán-chheng P. K. U. Tī chhú-khì 11 nî lāi, lâi oân-sêng chit ê ūn-tōng. Kàu 1965 nî, chiū-sī Lâm-pō͘ kàu-hoē siat-kàu chi̍t-pah chiu-nî, hit nî ǹg-bāng ū pí kin-á-ji̍t têng-poē ê kàu-hoē sò͘, chiū-sī 300 keng, lâi hiàn hō͘ Chú, chò in siat-kàu 100 chiu-nî kì-liām ê lé-phín.
- Che sī khong-chiân ê toā ūn-tōng.
Khoàⁿ Lâm-pō͘ kàu-hoē-sú ê tiong-kan, choè tē-it cheng-chhái ê chi̍t toāⁿ, chiū-sī 1896-1906 chí 10 nî kan, tiong-pō͘ tē-khu hàn-jîn saⁿ keng ê kàu-hoē chìn-pō͘ kàu 20 keng; sìn-tô͘ sò͘ tuì 500 chìn kàu 3000. iā pêⁿ-po͘ ê kàu-hoē pún 6 keng, ke chi̍t keng; sìn-tô͘ tuì 800 chìn kàu 1200 (khoàⁿ Bān Bo̍k-su ê Kàu-hoē-sú 137 bīn). án-ni tī chit 10 nî kú, chí-ū tī tiong-pō͘ tē-khu ke siat 18 keng kàu-hoē, sǹg sī koè-khì choè toā sêng-kong ê chi̍t chām.
Nā-sī chhú-khì chí-ū 10 nî kú, chit ê ūn-tōng àn-sǹg beh ke siat 150 keng. Si̍t-chāi sī khong-chiân ê toā ūn-tōng. Tāi-hoē beh koat-gī chit hāng ê sî, ēng chin giâm-siok, kèng-khiân ê sim-chêng, chèng gī-oân ēng chin toā ê koat-sim kap jia̍t-chêng lâi chhái-koat chit ê sè-kí ê toā ūn-tōng. Siong-sìn chit ê koat-gī sui-jiân sī khong-chiân, iáu-kú m̄-sī khong-sióng ê ūn-tōng. In-uī ū tiû-bi̍t ê chún-pī, kū-thé-tek kap ha̍p-lí-tek ê kè-e̍k. Tāi-hoē ū phài chi̍t ê uí-oân-hoē, chhui-tài Tāi-hoē Gī-tiúⁿ Khó͘ Iú-châi Bo̍k-su chò uí-oân-tiúⁿ, koh Jīm-bēng N̂g Chóng-kàu-sū kiam kàu-sū, chek-ke̍k lo̍h-khì chhui-hêng.
Uí-oân-hoē uī-tio̍h beh kî-sêng i ê hāu-kó, ū chiong chit ê ūn-tōng hun chò 7 pō͘ ê kang; kok-pō͘ ū thán-hoâiⁿ ê liân-lo̍k, hun kang hia̍p-chok, thang lo̍h-khì oa̍h-tāng. Taⁿ ta̍k pō͘ í-keng tio̍k-tio̍k teh chún-pī, ǹg-bāng tuì āu goe̍h-ji̍t khí, ē thang khoàⁿ-kìⁿ in ê sêng-kó.
- Che sī chin ha̍p sî-gî ê ūn-tōng.
Chho͘-tāi ê sù-tô͘ (kàu-hoē ê léng-siù ) án-ni kóng, “Goán chiong Siōng-tè ê tō-lí pàng hē-teh, lâi pān-lí chia̍h-si̍t, m̄ ha̍p-gî” (Hēng-taōn 6:2).
Nā-sī lán kin-á-ji̍t chū-chheng kàu-hoē ê léng-siù--ê, chiong Siōng-tè ê tō-lí pàng hē-teh, lâi pān-lí chit-hāng, hit-hāng ê sū chò ha̍p-gî ê khoán. Sū-si̍t teh chèng-bêng, muí-hoê Tāi, Tiong-hoē ê chū-chi̍p, sī pān-lí kàu-hoē ê chèng-tī būn-tê khah chē, lūn thoân-tō, siat-kàu ê sū khah chió. Khoàⁿ ta̍k hoê ê kì-lio̍k chiū chai, thoân-tō siat-kàu ê sū, bô choân kì-lio̍k ê pah-hūn-chi̍t?
Ū lâng kóng Thoân-tō-kio̍k tio̍h kái miâ chò Jîn-sū-kio̍k. Sī án-choáⁿ? Bo̍k-koài! In-uī pān jîn-sū būn-tê sī ū, nā-sī thoân-tō siat-kàu ê sū chiū bô lah (ū iā chin chió).
Chit chūn m̄-sī chē-teh pān tāi-chì ê sî lah! Sī peh khí-lâi, io hâ phoê-toà, kia̍h koáiⁿ-á chhut-khì ê sî lah!
Chū-chheng chò léng-siù--ê à! Lí nā iáu lia̍h chē-teh pān-lí tāi-chì chò ha̍p-gî, beh chiong Siōng-tè ê tō-lí pàng hē-teh! Chiū m̄-nā Siōng-tè beh chiong lí pàng hē-teh, liân chêng kàu taⁿ toè lí ê lâng iā beh chiong lí pàng hē-teh, chò in khì kiâⁿ in ka-kī ê lō͘!
Hōng-kiàm sî iáu sī ji̍t--sî, eng-kai tio̍h chò chhe lán ê ê kang.
iū-khoh án-ni chiah sī khèng-chiok pah chiu-nî ê lé-mi̍h.
Só͘-í kóng che sī ha̍p sî-gî ê ūn-tōng/
- Che sī phoe-miā ê ūn-tōng.
M̄-sī chi̍t lâng ê phoe-miā, sī choân Tāi-hoē ê phoe-miā, kàu-hoē ê phoe-miā ê ūn-tōng. Chit ê ūn-tōng it-tàn khai-sí, hō-lēng it-tàn chhut, sī ē-ēng-tit sêng-kong, bē-ēng-tit sit-pāi tit ê.
Oāⁿ oē lâi kóng, nā sêng-kong chiū hó; nā sit-pāi, chiū chò í-āu bān-sè ê chhiò-pèⁿ. Í-āu ê lâng beh kóng, á-sī le̍k-sú beh chhiò kóng, “Lâm-pō͘ Tāi-hoē à! Lí ē chò sím-mi̍h? Chá-chêng kiám bô hiah jia̍t-chhiat koat-gī hit ê khong-chiân ê toā ūn-tōng. ài à! Taⁿ tī tó-lo̍h? Kiám ū sêng-kong mah? Kèng-jiân chhin-chhiūⁿ thài-san bêng-tōng, nā-sī cháu bô chi̍t chiah niáu-chhú-á kiáⁿ?”
Só͘-í Lâm-pō͘ kàu-hoē à! Kì-jiân án-ni khui-chhia khì, chiū tio̍h phoe-miā lah! Taⁿ m̄-sī chi̍t lâng, á-sī chi̍t kàu-hoē, á-sī chi̍t Tiong-hoē ê būn-tê lah! Chiū-sī choân Tāi-hoē, choân Lâm-pō͘ ê sèⁿ-miā lah! Tio̍h sêng-kong, m̄-thang sit-pāi!
Pún Pò iā put-jím chò chi̍t ê pông-koan-chiá, siù chhiú pông-koan, kam-goān chò lí chi̍t ê ūn-tōng ê ke-si, chham-ka lí chit ê sè-kí ê toā ūn-tōng, èng lí ê hō-tiàu lâi māi-chìn. Kàu tī 1965 nî lí sêng-kong ê ji̍t.
漢羅（Ùi原文改寫）
世紀的大運動P.K.U。
1954.10，no.790，pp.4-5
今年的南部大會有決議欲開始一个大運動，叫做「設教百週年記念教會倍加運動，」簡稱 P.K.U。佇此去11年內，來完成這个運動。到1965年，就是南部教會設教一百週年，彼年向望有比今仔日重倍的教會數，就是300 間，來獻予主，做in設教100週年記念的禮品。
- 這是空前的大運動。
看南部教會史的中間，最第一精彩的一段，就是1896-1906 止10年間，中部 地區漢人三間的教會進步到20 間；信徒數對500進到3000。也平埔的教會本6 間，加一間；信徒對800進到1200 (看萬牧師的教會史 137面)。按呢佇這10年久，只有佇中部地區加設18 間教會，算是過去最大成功的一chām。
但是此去只有10年久，這个運動按算欲加設150 間。實在是空前的大運動。大會欲決議這項的時，用真嚴肅，敬虔的心情，眾議員用真大的決心佮熱情來採決這个世紀的大運動。相信這个決議雖然是空前，iáu-kú毋是空想的運動。因為有稠密的準備，具體的佮合理的的計畫。大會有派一个委員會，chhui-tài大會議長許有財牧師做委員長，閣任命黃總教士兼教士，積極落去推行。
委員會為著欲kî-sêng伊的效果，有將這个運動分做 7 部的工；各部有坦橫的連絡，分工協作，通落去活動。今逐部已經逐逐 teh準備，向望對後月日起，會通看見in 的成果。
- 這是真合時宜的運動。
初代的使徒(教會的領袖)按呢講，「阮將上帝的道理放hē-teh，來辨理食食，毋合宜」(行傳 6：2)。
但是咱今仔日自稱教會的領袖--的，將上帝的道理放hē-teh，來辨理這項，彼項的事做合宜的款。事實teh證明，每回大、中會的聚集，是辨理教會的政治問題較濟，論傳道，設教的事較少。看逐回的記錄就知，傳道設教的事，無全記錄的百分一？
有人講傳道局著改名做人事局。是按怎？莫怪！因為辦人事問題是有，若是傳道設教的事就無lah (有也真少)。
這陣毋是坐teh辦代誌的時lah！是peh起來，腰hâ皮帶，kia̍h柺仔出去的時lah！
自稱做領袖--的啊！你若猶掠坐teh辨理代誌做合宜，欲將上帝的道理放hē-teh！就毋但上帝欲將你放hē-teh，連前到今綴你的人也欲將你放hē-teh，做in去行in家己的路！
況兼時猶是日--時，應該著做差咱的的工。
又閣按呢才是慶祝百週年的禮物。
所以講這是合時宜的運動。
- 這是phoe-miā的運動。
毋是一人的 phoe-miā，是全大會的 phoe-miā，教會的 phoe-miā的運動。這个運動一旦開始，號令一旦出，是會用得成功，袂用得失敗得的。
換話來講，若成功就好；若失敗，就做以後萬世的笑柄。以後的人欲講，抑是歷史欲笑講，「南部大會啊！你會做啥物？早前kiám無hiah熱切決議彼个空前的大運動。愛啊！今佇佗落？kiám有成功mah？竟然親像泰山bêng-tōng，但是走無一隻老鼠仔囝？」
所以南部教會啊！既然按呢開車去，就著phoe-miā lah！今毋是一人，抑是一教會，抑是一中會的問題lah！就是全大會，全南部的性命lah！著成功，毋通失敗！
本報也不忍做一个旁觀者，袖手旁觀，甘願做你一个運動的家私，參加你這个世紀的大運動，應你的號召來邁進。到佇1965年你成功的日。