黃執事ê小傳
N̂g chip-sū ê Sió-toān
文獻資訊
| 項目 | 資料 |
|---|---|
| 作者 | 楊世註 Iûⁿ Sè-chù |
| 卷期 | 台南府城教會報 |
| 卷期 | 第483卷 |
| 日期 | 1925/6 |
| 頁數 | 15 |
白話字（原文數位化）
N̂g Chip-sū ê Sió-toān
1925.06 483 koàn p.16
(Iûⁿ Sè-chù)
Kui-jîn-pak ê Chip-sū N̂g Pi-hiaⁿ, saⁿ goe̍h ji̍t chêng ū seⁿ hì-eng, i-liáu bô hó, tī sì goe̍h 26 ji̍t lī-khui sè-kan, hióng-siū 55 hoè.
Lūn i ê sū kán-lio̍k kóng tām-po̍h: ─
1.Kài-chá. Kài-chá thiaⁿ tō-lí, chiū-sī Kui-jîn-pak boē chiâⁿ kàu-hoē i chiū sìn Chú, sī Ńg Chín-tek Sian-siⁿ tī Soaⁿ-á-kha teh thoân ê sî kàu taⁿ. I ia̍h kài-chá chò chip-sū.
2.Tio̍h-boâ. Jī-cha̍p goā nî chêng bat siū-phài toà Sin-lâu I-koán chò kang. Bat kap Tio̍h-á-chek khì sì-kè bē chheh pò͘-tō. Nā chhiáⁿ i kóng tō-lí, i bô the-sî, nā bô phoà-pīⁿ i kài siông lâi lé-pài, siú nn̄g po͘. Hù sàng-chóng-hoē, i kài kut-la̍t, tàu siat-hoat lóng bô kiaⁿ.
3.Tê-iân. I put-chí ài. Khí Lé-pài-tn̂g, i hiàn kuí-nā pha-kho͘. I kóng kú-kú chiah khí chit keng; nā m̄-hiàn, í-āu kiaⁿ-liáu bô ki-hoē.
4.Kài hó-liāng. Hō͘ i ke-lāi ê lâng suî lâng thang chú-ì. Hō͘ hoē-goā ê lâng piān-pok tō-lí, í-ki̍p hoē-lāi ê lâng hiâm, o-ló, i lóng chhìn-chhái hó.
5.Ū pī-pān. I ta̍uh-ta̍uh kóng, sè-kan m̄-sī khoàⁿ-oa̍h; nā ē lī-khui sè-kan khì kìⁿ Chú, i sǹg chò toā hok-khì. I ū téng-bīn só͘ kóng hiah-ê chò i sìn Chú ê pîn-kù. Ū pi-só teh chò kim-á-tiàm gâu keng-êng. Koh ū toā-kiáⁿ Thô͘-kat, jī-kiáⁿ Chheng-in teh pang-chān; ū sim-pū, cha-bó͘-kiáⁿ kuí-nā ê, ū toā-sun, sè-sun, chi̍t ke chiâⁿ-cha̍p lâng lóng pài Siōng-tè.
漢羅（Ùi原文改寫）
黃執事ê小傳
1925.06 483卷 p.16
(楊世註)
歸仁北 ê執事黃Pi-hiaⁿ,3月日前有生肺癰，醫了無好，tī 4月26日離開世間，享壽55歲。
論伊ê事簡略講淡薄:—
- Kài早。Kài早聽道理，就是歸仁北未成教會伊就信主，是黃振德先生tī山仔腳teh傳ê時到今。伊亦kài早做執事。
2.著磨。20外年前bat受派toà新樓醫館做工。Bat佮Tio̍h仔叔去四界賣冊佈道。若請伊講道理，伊無推辭，若無破病伊kài常來禮拜，守兩晡。赴送葬會，伊kài 搰力，鬥設法攏無驚。
3.題iân。伊不止ài。起禮拜堂，伊獻幾若百箍。伊講久久才起chit間，若m̄ 獻，以後驚了無機會。
4.Kài好量。Hō͘ 伊家內ê人隨人thang主意。Hō͘會外ê人辯駁道理，以及會內ê人嫌、o-ló,伊攏凊采好。
5.有備辦。伊ta̍uh-ta̍uh 講，世間m̄是快活；若會離開世間去見主，伊算做大福氣。伊有頂面所講hiah-ê做伊信主ê憑據。有Pi 嫂teh做金仔店gâu 經營。Koh 有大子Thô͘-kat 、二子Chheng-in teh幫贊，有新婦、查某子幾若個，有大孫、細孫，1家成10人攏拜上帝。