真正ê價值

Chin-chiàⁿ ê kè-ta̍t

文獻資訊

項目	資料
作者	無lo̍h名
卷期	台灣教會公報
卷期	第1049、1050號合刊
日期	1969/3
頁數	12

白話字（原文數位化）

1969 nî 3 goe̍h p.12

CHIN-CHIÀN Ê KÈ-TA̍T

(Kat-lí-hān chok)

Sui-jiân Ki-tok bat kóng, “Lán ê oa̍h-miā put-chāi tī i só͘ chek-chū-ê”.Chong-sī lán kim-ji̍t ê kàu-hoē í-keng kiâⁿ kàu chit-chióng hui-siông guî-hiám ê toē-pō͘, Ta̍k só͘-chāi kà-sī lâng kóng oa̍h-miā tiong choè tiōng-iàu ê chiū-si8 iông-u choē-choē mi̍h-kiāⁿ, ná choē ná hó.

Goá bat toà kè Bí-kok choè sàn-chhiah ê khu-he̍k A-poàⁿ-la̍h-khè soaⁿ-khu. Goá bat hiah ê ka-têng, in tong-jiân bô chhin-chhiūⁿ Liú-iok á-sī Huì-siâⁿ ê ka-têng hiah-nih ū chîⁿ, nā chiàu Hoâ-ní-ke ê phiau-chún lâi hóng, in sī chin sàn-chhiah-ê. Chóng-sī in ê sim-nih ū hí-lo̍k; in ê bīn ū chhiò-iông, koh ū chhin-chhiūⁿ tèng-kun tī in sio̍k-lêng ê sìn-gióng siōng ê pêng-an. In ê sìn-gióng hō͘ in tit boán-chiok kap pêng-an. Goá iā bat tī Bí-kok toā to͘-chhī nih choē-choē pah-bān hù-ong, chiah ê lâng in-uī siū boē-khí seng-oa̍h siōng ê ap-pek, chha-put-to suî-sî ū hoat-kông ê khó-lêng. Chī-chuī sī choè pù-ū ê lâng nih? Chī-chuī sī khah ū chîⁿ nih?

Pó-lô sui-jiân koaiⁿ tî kaⁿ-nih, sè-chiūⁿ iáu ū pí Lô-má ê toē-hā kaⁿ-ga̍k khah bái ê só͘-chāi mah? tī hia ū niáu-chhú, sip koh léng.

Lán kim-ji̍t ê kàu-hoē chha-put-to beh chiong Hòng-tōng-chú ê kò͘-sū tian-tò siá chhut-lâi. Iâ-so͘ kóng, hòng-tōng-chú hoé-kái, kī-khui īⁿ-hiong, hoê kàu Siōng-tè ê hoâi-pau. Lán ê kàu-hoē kim-jit só͘ choè ê m̄-sī beh chhē hòng-tōng-chú tuì īⁿ-hiong chhoā tò-lâi, chiū-sī siūⁿ pān-hoat hō͘ hòng-tōng-chú oē-thang tī sè-kài ê ti-tiâu-nih, kè-tit sóng-khoài koh khoài-lo̍k.

漢羅（Ùi原文改寫）

真正ê價值

雖然基督bat講， “咱ê活命不再tī伊所chek-chū--ê”。總是咱今日ê教會已經行到這種非常危險ê地步，逐所在教示人講活命中最重要ê就是陽物濟濟物件，nā濟nā好。

我bat toà過美國最散赤ê區域A-poàⁿ-la̍h-khè山區。我bat hiah ê家庭，in當然無親像紐約抑是費城ê家庭hiah-nih有錢，nā照華爾街ê標準來講，in是真散赤--ê，總是in ê心nih有喜樂；in ê面有笑容，koh有親像釘根tī in 屬靈ê信仰上ê平安。In ê信仰hō͘ in 得滿足kap平安。我也bat美國大都市裡濟濟百萬富翁，chiah ê人因為受boē起生活上ê壓迫，差不多隨時有發狂ê可能。Chī-chuī是最pù-ū ê人nih？Chī-chuī是khah有錢nih？

保羅雖然關tī監裡，世上iáu有比羅馬ê地下監獄khah bái ê所在mah？tī hia有niáu鼠，濕koh冷。

咱今日ê教會差不多beh將放蕩子ê故事顛倒寫出來。耶穌講，放蕩子悔改，離開異鄉，回到上帝ê懷抱。咱ê教會今日所做ê m̄是beh chhoē放蕩子對異鄉chhoā倒來，就是想辦法hō͘放蕩子會thang tī世界ê豬tiâu--nih，過得爽快koh快樂。