Chong-kàu siáu-soat：I koan-sim tī líPermalink

文獻資訊Permalink

白話字（原文數位化）Permalink

退休宣教師--滿雄才牧師略歷

西曆1895年就是日本領台hi̍t年，有3 位英國ê 宣教師siāng日到台南，就是蘭醫生， 梅牧師kap Liâm牧師。 1909年11月17日koh三個宣教師siāng時到台灣，就是滿雄才牧師，Liân Má-gio̍k姑娘 (就是後來ê老蘭醫生娘) kap Bín 姑娘(Miss. Beⁿing)。 滿雄才牧師(滿雄才牧師Rev. W. E. Montgomery) 1909年來台灣， 1936年回國， 1968年別世，享受87 歲。

伊tī台灣40年久，所做ê事大略記幾nā項:

Taⁿ-chiah來台灣iáu是一位青年，經過幾年久ê訓練，後來成做有為 ê宣教師。伊bat受派做台灣第一回 (1912年) ê議員(南北各20名)。 Bat擔任教會公報ê主筆兼經理； koh也bat做傳道局長，長老教中學ê校長，台南神學院ê院長等chiah ê 要職。

Tī長老教中學做校長ê時， 黃Sū-bēng牧師tī hia做宗教主任。有一擺 tú著學生罷學， 黃Sū-bēng牧師趕緊走去kā伊講， “滿牧師ah！ khah緊來去，學生beh 罷學lah！” hit時滿牧師tú好teh食飯； the̍h土豆一粒一粒下入嘴， 勻勻仔食。 黃牧師著急講：”khah緊來去”。 滿牧師講：”天堂我ài去， khah慢chiah來去”。 Chiah ê話是黃牧師親身對我講，顯明滿牧師臨危 (臨危)也無著急，真chāi-pō͘。伊ê身軀勇，當時教學生hàiⁿ鐵枝， koh 教用雙手tī柴架頂運動，這當時iáu是新款ê法度。

做宣教師四界巡教會，不止知影教會kap傳教ê狀況。伊bat擔當傳道局ê局長來參詳派遣傳道師，以及處理有關ê事務。有一擺Liâm Tek-lia̍t牧師做傳道局ê 局長， tī台中開會。議事無啥進行濟濟人講意見真延chhiân。 Hit時滿牧師用英語對Liâm牧師講：”What are we doing now？”伊án-ni做是ài促進議事， m̄-kú無用台灣話，來hō͘連牧師失體面。

滿牧師1926年擔任台南神學校ê校長。 1926是台南神學校創設50週年，所以有舉行盛大ê慶祝會。教會tuì hit年以後koh-khah關心神學教育ê事。 1932年頭擺開男kap女神學ê聯合畢業典禮。設法提高學校ê程度， ài 充實圖書室；所以1932年tī台南公會堂開慈善音樂會。因為有滿牧師娘gâu 教鋼琴kap以外ê樂器， koh指導合唱，所以beh開音樂會真容易。

1937年日本政府通知台南神學校，教學tio̍h用日語， 滿牧師就tuì日本請Hé-liân博士(Dr。 Haden)來，因為伊toà日本做宣教師會講日語。 滿牧師kap牧師娘1939 年 3月倒去歇睏， Hi Lé-tì牧師做代理校長。學校順序進行不止好勢。經過一年goā，無拍算台南教育當局叫Hi牧師去，講台北神學校已經換日本人做校長，所以恁也tio̍h換。為著 án-ni，經過詳細議論慎重考慮ê結果，教事會將神學校閉鎖，將學生送去入台北神學校。

第2次世界大戰結束了後， 母會koh派滿牧師kap牧師娘tī 1946年7月koh來台南。經過一段ê時間， 滿牧師去台灣神學院參加教學，因為iáu有南部ê神學生tī hia。

1948年南部大會tī 斗六開會，議論著koh開台南神學院。 Hit時黃Chiong-hui牧師無贊成，伊講， “聯合會khiā在，分開會倒壞。” 滿牧師講：”恁若ài koh開這間學校， 這個責成恁tio̍h家己擔當。”大會滿場議決，台南神學院再開辦。 滿牧師soà hō͘大會選做院長。

Koh做院長了後， tī各方面盡心設法。 iáu-kú因為經濟問題，伊真細膩開用， m̄敢siuⁿ hō͘教會艱苦。若有門窗ê網仔紗pháiⁿ，人ài修理， 滿牧師就去看，用指頭仔輕輕ji̍h；有時講這iáu會用得m̄免換。畢業典禮抑是其他beh 歙相ê時，伊真細膩分派座位。聖誕節ê時陣， 滿牧師娘穿紅衫分禮物， the̍h一罐家己做ê 醬料來送我，因為寫beh送黃Chú-gī牧師，所以the̍h倒去beh kā伊換，伊講， “無要緊，兩人ê攏相像，”這拍算有甚麼意思。 In兩位有幸福ê家庭生活。一擺人聽見滿牧師beh出外，就問伊看牧師娘有beh去無？伊講， “牧師娘無去。 Beh thài有心適！”

因為滿牧師患著香港腳，醫生講tio̍h倒去。所以tī 1949年8月22頂晡設立黃Chiong-hui牧師來接做台南神學院ê院長； siāng hit日下晡tī太平景開滿牧師在台傳道40年紀念兼送別會。我代表南部大會，將一隻銀竹排送伊做紀念， kā伊講， “後擺你chiah koh坐這隻來。”了後，我kā伊講， án-ni對你真失禮。伊講， “Boē， án-ni真心適。”

滿牧師是一位真深沉ê人，做事認真無隨便。伊ê講道雖然m̄是雄辯， iáu-kú充分ê準備， hō͘人聽了得著利益koh有深刻ê印象。伊tī教室ê 講義也真有準備，受濟濟學生ê稱讚。伊做神學校長ê時代， tī台南受造就出身，後來成做台灣總會議長ê有4名，總會總幹事2名，總會書記kap 幹事5名； 幾nā名大會議長，中會議長 8名； koh也有神學教授kap 有名ê佈道家幾nā人攏bat做滿牧師ê學生。 Chiah ê以外koh有幾nā 間大教會出名ê牧師攏tī 滿牧師做校長ê時代受造就。

滿牧師in兩位tī 8月26離開台灣，去tiàm tī加拿大ê 南部， in kap 戴仁壽醫生toà beh作伙。 戴醫生koh來， tī 講演中講：”我有一張車， 滿牧師有洗衫機；我若beh出門就用一個記號報滿牧師知， hō͘伊若ài出去thang來坐我ê車。也我若有衫ài洗，就the̍h去下tī 滿牧師ê洗衫機。”無拍算戴醫生十goā年前先歸天。

滿牧師平時愛運動， tī台南ê時也逐日kia̍h柺仔出去散步，伊toà tī加拿大也是án-ni。 1968年12月13日滿牧師寫批kā 筆者講：”我87 歲ê生日beh到lah，也牧師娘 85，我ê人生路程teh-beh結束，我teh chhē hit個kā亞伯拉罕所備辦有地基ê城，是上帝所經營起造。聖誕節ê時李Hông-lîn牧師beh來chia tiàm 幾nā日。”無拍算後來接著李Hông-lîn牧師通知講：”滿牧師tī 12月27早起倚10點半，出去散步，soà昏倒tī一間銀行邊，攏無koh醒。”

照頂面所講滿牧師有感覺日子已經beh結束，總是忽然別世， bē免得hō͘咱m̄甘。受託寫chiah ê hō͘咱數念伊。

漢羅（Ùi原文改寫）Permalink

宗教小說：伊關心tī你

賴仁聲

翠霞 tuì好景日光普照ê山尖，忽然摔落去萬丈ê深淵ê一個少婦，實在攏烏暗天地，四面看無路， 人亡家散(人亡家散)，人無去啦， 陳家散去啦， 土話俗語講起有影， “日頭chhiah iāⁿ-iāⁿ， 隨人顧性命”， 大難臨頭各自飛(大難臨頭各自飛)。 Taⁿ中心人物無去啦 ， 限一月日內tio̍h 繳還開業執照， 陳齒科只好關門大吉。當紅，當chhèng， 生理lōng-lōng滾，治療床kuí-nā張，甚麼人m̄知瑞鹿陳齒科。忽然tio̍h關店， koh tio̍h繳牌。 Ah！氣勢一落千丈(氣勢一落千丈)，啼笑皆非(啼笑皆非)，真正是beh怎樣講？大兄踏大孫，家伙做4份分，翠霞分1 份， 幾分田koh一khám 店， 田縛人作，收 m̄成物，一khám店， 店口soè人開布店，後面母仔囝家己toà。 助產士因為餒志無ài出去見人， koh 囡仔細漢纏leh，soà放hoè-hoè。將án-ni beh 度5 ê 某囝，經濟實在有夠艱苦。

精神上leh， koh khah慘！眾人攻擊ná 萬箭穿心；昨昏ê大伯，小叔，大姆，小嬸，哥，姨，舅，kīm，親戚五十，厝邊朋友，相 tú頭，面oa̍t tuì邊仔，有ê bih嘴，有ê冷笑，有ê譏刺。照in ê意思， 今仔日陳家會 tú著這個災厄，攏是tuì翠霞，伊是煞星，落教婆仔， 帶鉸刀柄，鐵掃帚， 母守寡，有chéng-傳， taⁿ伊也煞死翁，鐵掃帚陳家今仔日hō͘伊掃一下三分五裂。 鴻運攏落衰啦，一切ê罪攏歸hō͘伊。翠霞只有恬恬boē曉分訴，也無tàng分訴起；所以常常關tī內面哮，真無ài出來，無ài見人，無ài講話，真正是kia̍h頭m̄起。一時soà僥疑自細tuì熱心ê老母所接受ê上帝。 Kiam有影有上帝？上帝kiám有影逐所在tī-teh？ kiám有影至公，至義，也是慈悲憐憫ê上帝？ Ná想ná僥疑，若有影有上帝，伊thài無看顧我？ I thài hō͘我tú著án-ni？我犯著甚麼？ Ná想ná僥疑， kiám有影是無所不知，全能ê天父？若有影我tī chia 孤鳥入狼群，魔鬼逞威親像哮獅beh吞食，我暝日哀哭求叫伊ê名，伊ná m̄知，主耶穌講伊是救主，上帝講是天父，到時攏m̄-bat你， án-ni koh敬拜kiám有利益？

心常常cha̍t-cha̍t真餒志，平時tiāⁿ teh吟ê聖詩，伊這tia̍p讀m̄-bat，也無意思ài koh吟。

親像聖詩講:

“天父我知一生光陰，

是你為我安排，

所以將來雖有反覆，

我願照主所ài，

Taⁿ求天父現時贊我，

專務服侍敬拜。”

這節詩伊一時讀無？

1. 上帝若是天父，我自細就敬拜，老母是熱心ê長老，暝日teh傳道理，我過來世俗中， m̄-tio̍h hō͘我大發展thang榮光上帝ê名。 án怎樣kā我安排少年tio̍h守寡，講是，”是你為我安排，”伊家己想我有甚麼得罪上帝到hiah thiám， tio̍h hō͘上帝到hiah thiám， tio̍h hō͘上帝安排án-ni？

2. “所以將來雖有反覆，我願照主所ài。”伊家己想是十二萬分ê無得ta-oâ，心肝真m̄願順服，真埋怨命歹，上帝ê憐憫tī tó位？真m̄願。

3. “Taⁿ求上帝現時贊我，專務服侍敬拜。” 在伊teh想，我現時心亂-chhau-chhau四面看無lô͘，頭前有滿滿ê苦難試煉，我beh按怎來拖這4 ê囝，渡過這個苦海， chhiâⁿ hō͘ in成人？我iáu有心thang kap你”專務服侍敬拜”。 在伊想這是順境ê人teh講ê涼風話。

世間真現實，伊iáu少年這擺伊tú著啦，俗語講：”富者深山有遠親，貧者路邊無近人”(富者深山有遠親，貧者路邊無近人)。 Koh講：”錦上再添花，雪中不送炭”(錦上再添花，雪中不送炭)。實在是án-ni，好額人toà tī深山to有親戚， 散窮人tī路邊to無人beh近倚。 錦綢to自底suí啦， chiah koh kā伊an 金花，散人tī霜雪中teh寒也無人beh送火炭，這是世間ê平常。

伊感覺”世間人情冷暖無常”(世間人情冷暖無常)，益發餒志。這時soà無ài去禮拜，攏tu分ê查某囝淑卿去禮拜， thang soà kap外家ê生母連絡，淑卿若來禮拜，外媽就問，”阿母thài無來？” 淑卿總是應講， “阮阿母講無閒”， m̄就講：”頭殼疼”，”囡仔無乖”， 足濟理由thang推。總講見笑無ài見人ê面，也soà無ài見上帝ê面。 án-ni靈性ná墮落，有平安無？無，ná無平安，心ná艱苦。 Hit時翠霞 siông吐氣， taⁿ我到底 tio̍h怎樣？

(待續)