江旭長老別世
Kang Hiok Tiúⁿ-ló pia̍t-sè
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第1043、1044期合刊 |
| 日期 | 1968/12 |
| 頁數 | 29 |
白話字（原文數位化）
Kang Hiok Tiúⁿ-ló Pia̍t-sè
1968.12.01 1043-1044 ha̍p khan hō P.29
Pún-siā Siā-tiúⁿ So͘ Thian-bêng Bo̍k-su ê lêng-chun Kang Hio̍k Tiúⁿ-ló tī 11 ge̍h 23 hō tī Ko-hiông pia̍t-sè; 28 ji̍t hā-ngō͘ chi̍t tiám tī Sin-heng Kàu-hoē kú-hêng kò-pia̍t lé-pài, hióng-siū 90 hè.
Kò͘ Kang Hio̍k Tiúⁿ-ló chhut-sì tī Muî-san hiong. I ê lāu-pē goân-lâi teh boē hiuⁿ-chek, sìn Chú liáu-āu kái-gia̍p. Kò͘-jîn iā tè lāu-pē sìn Chú. 1897 nî kap So͘ Tuì Lú-sū kiat-hun, ū siⁿ 7 lâm 4 lú. 1912 nî soá-khì Sin-káng-hiong Nâ-á-chhù keng-lông, ti̍t-kàu 1966 nî sin-thé soe-jio̍k chiah khì toà tī Ko-hiông So͘ Bo̍k-su ê só͘-chāi.
Kò͘-jîn soè-hàn chiū chin sàn-chhiah, chin khûn-khiām. Thiaⁿ Chú sim-jia̍t, tī 1896 nî 3 ge̍h 29 ji̍t siū Soan-kàu-su Sòng Tiong-kian Bo̍k-su kiâⁿ soé-lé, ka-ji̍p kàu-hoē, pó-siú sì-chiàⁿ ê sìn-gióng. Sui-jiân siông-siông in-uī sìn-gióng ê iân-kò͘ ū tú-tio̍h toē-hng ê lô͘-moâ kap thó͘-huí pek-hāi, chóng-sī i it-hoat jia̍t-sim. Saⁿ-kap chhòng-siat Sin-káng kap Pak-káng nn̄g keng kàu-hoē, kàu tī lé-pài-tn̂g lo̍k-sêng liáu-āu, iáu-kú put-sî teh koan-sim kàu-hoē ê hoat-tián.
Kò͘-jîn chāi-sè jia̍t-sim kèng-pài Siōng-tè, gâu thiàⁿ le̍k-jīm ê thoân-kàu-chiá, koh chin gâu thiàⁿ chhù-piⁿ, só͘-í chiàu Sèng-keng só͘ èng-ún, i ê ka-cho̍k ū tit-tio̍h Siōng-tè toā-toā ê sù-hok. Kiáⁿ-sun tiong tit-tio̍h Sîn-ha̍k, Im-ga̍k, Kàu-io̍k kap Gú-giân ha̍k se̍k-sū ha̍k-uī ê 4 miâ, tit-tio̍h Bûn-ha̍k, Hoat-ha̍k, Siong-ha̍k, Kang-ha̍k, Sîn-ha̍k kap I-ha̍k ha̍k-sū ha̍k-uī ê ū 12 miâ. Hiān-chāi tī tāi-choan teh tha̍k-chheh ū 7 miâ. Í-goā hiān-chāi teh choè bo̍k-su ê ū 4 miâ, thoân-tō-su 3 miâ, i-su 2 miâ, kiàn-tio̍k-su chi̍t miâ. Tī kàu-io̍k-kài teh ho̍k-bū ê ū 10 miâ. Koh ū Hù-chìn kap Hēng-chìn nn̄g keng ìn-soat-só͘. Kiáⁿ-sun tiong hiān-chāi tam-jīm kàu-hoē kong-chit ê, tiúⁿ-ló ū 9 miâ, chip-sū 7 miâ.
漢羅（Ùi原文改寫）
江旭長老別世
1968.12.01 1043-1044合刊號P.29
本社社長蘇天明牧師的令尊江旭長老佇11月23號佇高雄別世；28日下午一點佇新興教會舉行告別禮拜，享受90歲。
故江旭長老出世佇梅山鄉。伊的老爸原來咧賣香燭，信主了後改業。故人也綴老爸信主。1897年佮蘇對女結婚，有生7男4女。1912年徙去新港鄉林仔厝耕農，直到1966年身體衰弱才去蹛佇高雄蘇牧師的所在。
故人細漢就真散赤，真勤儉。聽主心熱，佇1896年3月29日受宣教師宋忠堅牧師行洗禮，加入教會，保守四正的信仰。雖然常常因為信仰的緣故有拄著地方的鱸鰻佮土匪迫害，總是伊益發熱心。相佮創設新港佮北港兩間教會，到佇禮拜堂落成了後，猶過不時咧關心教會的發展。
故人在世熱心敬拜上帝，gâu疼歷任的傳教者，閣真gâu疼厝邊，所以照聖經所應允，伊的家族有得著上帝大大的賜福。囝孫中得著神學，音樂，教育佮語言學碩士學位的4名，得著文學，法學，商學，工學，神學佮醫學學士學位的有12名。現在佇大專咧讀冊有7名。以外現在咧做牧師的有4名，傳道師3名，醫師2名，建築師一名。佇教育界咧服務的有10名。閣有Hù-chìn佮Hēng-chìn兩間印刷所。囝孫中現在擔任教會公職的，長老有9名，執事7名。