明有德牧師的請安
Bêng Iú-tek Bo̍k-su ê chhéng-an
文獻資訊
| 項目 | 資料 |
|---|---|
| 作者 | 明有德 Bêng Iú-tek |
| 卷期 | 台灣教會公報 |
| 卷期 | 第1043、1044期合刊 |
| 日期 | 1968/12 |
| 頁數 | 28 |
白話字（原文數位化）
Bêng Iú-tek Bo̍k-su ê chhéng-an
明有德牧師請安信
1968.12.01 1043-1044 ha̍p khan hō P.28
Só͘ kèng-thiàⁿ, Tâi-oân ê pêng-iú, pêng-an:
Chi̍t nî kè chi̍t nî, sui-jiân choân sè-kài chin jiáu-loān, choân jîn-luī chin kiaⁿ-hiâⁿ, hit ê keng-kè chhin-chhiūⁿ chin kín kap chin khoài!! Kàu-hoē Kong-pò iā sī teh tè sî-kan khì, ta̍k ge̍h ji̍t nn̄g pái chhut-lâi pò hó siau-sit, chiū-sī pò Tâi-oân hiaⁿ-chí (he̍ksī lāu-lâng, chheng-liân kap gín-ná) kè-sio̍k ēng thiàⁿ-sim saⁿ-kap choè Chú ê sèng-kang.
Teh beh kàu nî-bé ê sî (12 ge̍h bé) Kong-pò ta̍k nî teh chún-pī lâi pò lán TĒ IT TOĀ kap TĒ IT PÓ-POÈ ê hó siau-sit. Khah siông lī-iōng sèng-hoē toā-miâ ê sìn-tô͘ LŌ͘-KA I-seng só͘ siá kì-lio̍k ê oē choè pò-kò ê tiong-sim. Hit ê oē sī ēng soaⁿ-nih teh kò͘-iûⁿ ê I-sek-lia̍t lâng tuì thiⁿ-nih só͘ thiaⁿ-kìⁿ ê siaⁿ, kóng,
“Bo̍h-tit kiaⁿ, in-uī goá pò lín toā hoaⁿ-hí ê hó siau-sit, hō͘ peh-sìⁿ lóng ū hūn…… uī-tio̍h lín síⁿ chi̍t ê chín-kiù ê, chiū-sī Chú Ki-tok.”
Hiān-sî tī choân sè-kài kiáu-jiáu ê sî-tāi, hō͘ choē-choē lâng toā bô hoaⁿ-hí í-keng kè-liáu sî-tāi ê lâng só͘ lâu ê hong-sio̍k kap liû-thoân. In chin sit-chì. Chóng-sī goá só͘ tha̍k Kong-pò só͘ siá ê, Tâi-oân chheng-liân khah bô chhin-chhiūⁿ chit-khoán; in khah ū ì-hiòng tī sin ê nî, (chhin-chhiūⁿ sin sî-tāi) só khui ê lō͘, hō͘ in thang ji̍p-khì lâi oa̍h-tāng, án-ni chin kám-siā Siōng-tè! Beh cháiⁿ-iūⁿ seh-bêng chit-khoán cheng-sîn? Kiám m̄-sī in-uī ū chheng-liân CHÍN-KIÙ Ê CHÚ KI-TOK TEH CHÍ-TŌ kap siúⁿ-sù khuì-la̍t?
Lī-khui Tâi-oân liáu-āu, goán só͘ siàu-liām ê Tâi-oân pêng-iú ū-sî oāⁿ chū-só͘, só͘-í kià “Christmas Card” lâi piáu-bêng SÈNG-TÀN ê chiok-hok sī khah uî-lân. In-uī án-ni pài-thok Kong-pò lo̍h goá sim-lāi chhéng-an ê oē hō͘ tha̍k Kong-pò ê hó pêng-iú tit-tio̍h. Siāng-sî pài-thok the̍h lāi-bīn ê $3.00 choè koh chi̍t nî kè-sio̍k Kong-pò ê lō͘-ēng.
GOĀN CHÚ KAP LÍN TĪ-TEH
Pêng-an,
Bêng Iú-tek.
Bêng Bo̍k su ê toē-chí sī:
425 Avenue Road (apt 304)
Toronto, 7, Canada.
漢羅（Ùi原文改寫）
明有德牧師的請安
明有德牧師請安信
1968.12.01 1043-1044合刊號P.28
所敬疼，台灣的朋友，平安：
一年過一年，雖然全世界真擾亂，全人類真驚惶，彼个經過親像真緊佮真快！！教會公報也是上帝時間去，逐月日兩擺出來報好消息，就是報台灣兄姊(或是老人，青年佮囡仔)繼續用疼心相佮做主的聖工。
咧欲到年尾的時(12月尾)公報逐年咧準備來報咱第一大佮第一寶貝的好消息。較常利用聖會大名的信徒路加醫生所寫記錄的會做報告的中心。彼的話是用山裡咧顧羊的以色列人對天裡所聽見的聲，講，
「莫得驚，因為我報恁大歡喜的好消息，予百姓攏有份……為著恁生一个拯救的，就是主基督。」
現時佇全世界攪擾的時代，予濟濟人大無歡喜已經過了時代的人所留的風俗佮流傳。In真失志。總是我所讀公報所寫的，台灣青年較無親像這款；in較有意向佇新的年，(親像新時代)所開的路，予in通入去來活動，按呢真感謝上帝！欲怎樣說明這款精神？ Kiám毋是因為有青年拯救的主基督咧指導佮賞賜氣力？
離開台灣了後，阮所數念的台灣朋友有時換住所，所以寄「Christmas Card」來表明聖誕的祝福是較為難。因為按呢拜託公報落我心內請安的話予讀公報的好朋友得著。Siāng時拜託提內面的$3.00做閣一年繼續公報的路用。
願主佮恁佇咧
平安，
明有德。
明牧師的地址是：
425 Avenue Road (apt 304)
Toronto，7，Canada。