聖經佮聖經公會
Sèng-keng kap Sèng-keng Kong-hoē
文獻資訊
| 項目 | 資料 |
|---|---|
| 作者 | 賴炳烔 Loā Péng-tông |
| 卷期 | 台灣教會公報 |
| 卷期 | 第1042期 |
| 日期 | 1968/11 |
| 頁數 | 5-6 |
白話字（原文數位化）
SÈNG-KENG KAP SÈNG-KENG KONG-HOĒ
Loā Péng-tông
1968.11.15 1042 hō P.5-6
1) CHoè chá ê Sèng-keng,
Hiān-chāi lán só͘ teh ēng ê Sèng-keng sī 1450－1456 nî ê tiong-kan tī Tek-kok ēng Lia̍p-teng-gú chhut-pán ê kiò-choè “Bú-ka-tāi e̍k-pún,” chit khoán thâu chi̍t pún ê Sèng-keng, hiān-chāi choân sè-kài chí-ū chhun 4, 50 pún nā-tiāⁿ, hit ê kè-ta̍t iok ta̍t Tâi-pè 1,000 goā bān.
2) Sèng-keng ê hoan-e̍k.
Sèng-keng sī Siōng-tè tuì lâng ê ho͘-tiàu, só͘-í muí chi̍t ê lâng to ū koân-lī thang tha̍k.
uī-tio̍h án-ni, chin-choē kàu-hoē iau-kiû ài ū chhián-bêng koh pan-gî ê Sèng-keng, só͘-í tī ta̍k só͘-chāi to ū hoan-e̍k Sèng-keng ê kang-chok. Kàu tī 1967 nî té, choân sè-kài í-keng ū hoan-e̍k 1326 chióng gú-giân ê Sèng-keng, kî-tiong Sin Kū-iok ū 242 chióng, Sin-iok 307 chióng, tan-hêng-pún 777 chióng, chiah ê chha-put-to ū chiàm choân sè-kài jîn-kháu ê 100 hūn chi 97 lóng oē thang tha̍k in ka-kī ê gú-giân ê Sèng-keng. Chóng-sī kî-thaⁿ ê 100 hun chi 3 ê jîn-kháu tiong, iáu-kú ū 1,500 goā chióng ê gú-giân iáu-bē hoan-e̍k, che sī Sèng-keng Kong-hoē ê choè-toā ê sū-kang.
3) Sèng-keng ê chhui-siau.
1967 nî choân sè-kài ū boē chhut chi̍t ek 480 bān pún ê Sèng-keng, pêng-kun muí ji̍t ū boē chhut 29 bān pún, muí bió cheng ū boē-chhut saⁿ pún khah ke, thang kóng bô ū chi̍t pún chheh thang pí-tit Sèng-keng ê boē chhut.
Tâi-oân tī 1968 nî, lóng-chóng ū boē-chhut 1,822,179 pún ê Sèng-keng, chiah ê chiū-sī keng-kè ē-bīn ê hong-hoat só͘ boē chhut ê.
A. Kàu-hoē su-kio̍k.
Hiān-chāi choân-séng kok toē lóng-chóng ū 40 goā keng ê kàu-hoē su-kio̍k teh keng-siau pún-hoē kok chióng ê Sèng-keng, tī kin-nî keng-kè in ê chhiú só͘ boē chhut ê, Sin-iok kap Sin Kū-iok ū chiàm choân nî só͘ boē chhut ê 25%.
B. Siû keng pò-tō-oân.
Hiān-chāi ū 7 ê pò͘-tō-oân hun-soàⁿ tī ta̍k só͘-chāi, ta̍k ji̍t àn hō͘ hóng-būn teh chhui-siau Hok-im-su, in ê tuì-siōng sī choân-pō͘ ǹg bī-sìn-chiá. Keng-kè in ê chhiú, tī kin-nî ū chiong 324,841 pún ê Hok-im-su boē kàu tī bī-sìn-chiá ê chhiú-tiong. Kám-siā Chú, tī kin-nî 8 ge̍h ū tit-tio̍h Chiu iàn-choân Bo̍k-su ê hia̍p-chō͘ lâi tam-jīm pò͘-tō-oân tok-tō ê kang-chok, siong-sìn tī i ê léng-tō ê kang-chok, siong-sìn tī i ê léng-tō hā, kim-āu tīn-iông oē kèng-ka ka-kiông.
C. Gī-bū siû-keng pò͘-tō-oân.
Keng-siông tuì kok toē kàu-hoē kó͘-bú jia̍t-sim uī Chú ho̍k-bū ê hiaⁿ-chí lâi chham-ka chit khoán ê kang-chok. In thang lī-iōng in ū êng ê sî-kan, suî-sî suî-toē chhui-siau Hok-im-su. Kè-khì goán ū tit-tio̍h 200 goā uī hiaⁿ-chí lâi hia̍p-chō͘. Tī kin-nî keng-kè in ê chhiú ū boē chhut 800,357 pún ê Hok-im-su kap pò͘-tō thoân-toaⁿ.
D. Tāi-choan ha̍k-seng kang-chok-tuī.
Muí nî ê sú-kà, uī-tio̍h ài kó͘-lē jia̍t-sim thiàⁿ Chú ê chheng-liân ha̍k-seng ū hūn tī thoân hok-im ê sèng-kang. nî nî ū kú-pān Tāi-choan ha̍k-seng kang-chok-tuī, muí nî tō lóng ū chin-choē chheng-liân lâi chham-ka, tī kin-nî ū tuì 22 keng Tāi-choan ĪN-hāu ê lâm lú ha̍k-seng 58 miâ lâi chham-ka. Tī té-té ê 10 ji̍t kú, in ū keng-giām tio̍h thoân hok-im só͘ tú-tio̍h kam, khó͘, sng, loa̍h ê choē-choē chu-bī. Lēng-goā chi̍t hong-bīn iā thé-giām tio̍h uī Chú choè kang só͘ tit bô-hān ê hí-lo̍k.
Kin-nî keng-kè in ê chhiú ū chiong 92,826 pún ê Hok-im-su hun-hoat kàu tī bī-sìn-chiá ê tiong-kan. ǹg-bāng choē-choē ka-tiúⁿ oē thang kó͘-lē lín ê chú-toē ióng-io̍k lâi chham-ka chit hāng ū ì-gī ê kang-chok.
4) Sèng-keng Kong-hoē kap Tâi-oân kàu-hoē.
Tâi-oân Kàu-hoē thoân-kàu í-keng chìn-ji̍p tē 2 sè-kí, tī chit tiong-kan Sèng-keng Kong-hoē put-toān teh kióng-kip choē-choē ê Sèng-keng. uī-tio̍h an-ni, Kong-hoē muí nî tī boē Sèng-keng hong-bīn tio̍h ài pó͘-thiap chin-choē chîⁿ, pêng-kun muí-nî iok ài 60 goā bān.
Hiān-chāi Kong-hoē só͘ ū it-chhè ê keng-chè hū-tam, choân-pō͘ sī tuì kok-goā Sèng-keng Kong-hoē ê chi-oān. Tâi-oân choân-pō͘ ê kàu-hoē choân nî ê hōng-hiàn. Chí-ū sī chiàm pún hoē choân nî keng-huì ê 10%.
Tiúⁿ-ló kàu-hoē choân-pō͘ ū iok 900 keng kàu-hoē, tī kū-nî ū tit-tio̍h 235 keng ê kàu-hoē ê hōng-hiàn chiàm choân-pō͘ ê 25%, kim-gia̍h chí-ū 26.663.20 Chiàu bo̍k-chiân chit khoán chêng-hêng, Tâi-oân kàu-hoē thang kóng iáu bô lêng-le̍k thang chū-kip Sèng-keng. Ji̍t-pún Sèng-keng Kong-hoē kin-nî khí í-keng oân-choân to̍k-li̍p. ǹg-bāng Chú-lāi tâng-kang hiaⁿ-chí ê hia̍p-chō͘ tāi-tó í-ki̍p hōng-hiàn; kî-thāi tī bô kú ê chiong-lâi, iā oē thang kap kî-thaⁿ ê Sèng-keng Kong-hoē tâng-téng ê tē-uī, chiū-sī to̍k-li̍p.
漢羅（Ùi原文改寫）
聖經佮聖經公會
賴炳烔
1968 .11.15 1042號P.5-6
1) 最早的聖經，
現在咱所咧用的聖經是1450－1456年的中間佇德國用拉丁語出版的叫做「Bú-ka-tāi譯本，」這款頭一本的聖經，現在全世界只有賰4，50本若定，彼个價值約值台幣1，000外萬。
2) 聖經的翻譯。
聖經是上帝對人的呼召，所以每一个人都有權利通讀。
為著按呢，真濟教會要求愛有淺明閣便宜的聖經，所以佇逐所在都有翻譯聖經的工作。到佇1967年底，全世界已經有翻譯1326種語言的聖經，其中新舊約有242種，新約307種，單行本777種，遮的差不多有佔全世界人口的 100分之97攏會通讀in家己的語言的聖經。總是其他的100分之3的人口中，猶過有1，500外種的語言猶袂翻譯，這是聖經公會的最大的事工。
3) 聖經的推銷。
1967年全世界有賣出一億480萬本的聖經，平均每日有賣出29萬本，每秒鐘有賣出三本較加，通講無有一本冊通比得聖經的賣出。
台灣佇1968年，攏總有賣出1，822，179本的聖經，遮的就是經過下面的方法所賣出的。
A. 教會書局。
現在全省各地攏總有40外間的教會書局咧經銷本會各種的聖經，佇今年經過in的手所賣出的，新約佮新舊約有佔全年所賣出的25%。
B. 售經佈道員。
現在有7 个佈道員分散佇逐所在，逐日按予訪問咧推銷福音書，in的對象是全部向未信者。經過in的手，佇今年有將324，841本的福音書賣到佇未信者的手中。感謝主，佇今年8月有得著周燕全牧師的協助來擔任佈道員督導的工作，相信佇伊的領導的工作，相信佇伊的領導下，今後陣容會更加加強。
C. 義務售經佈道員。
經常對國地教會鼓舞熱心為主服務的兄姊來參加這款的工作。In通利用in有閒的時間，隨時隨地推銷福音書。過去阮有得著200外為兄姊來協助。佇今年經過in的手有賣出800，357本的福音書佮佈道傳單。
D. 大專學生工作隊。
每年的暑假，為著愛鼓勵熱心疼主的青年學生有份佇傳福音的聖工。年年有舉辦大專學生工作隊，每年都攏有真濟青年來參加，佇今年有對22間大專院校的男女學生58名來參加。佇短短的10日久，in有經驗著傳福音所拄著甘，苦，酸，辣的濟濟滋味。另外一方面也體驗著為主做工所得無限的喜樂。