感恩節的請安
Kám-un-choeh ê chhéng-an
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第1042期 |
| 日期 | 1968/11 |
| 頁數 | 3-4 |
白話字（原文數位化）
Kám-un-choeh ê chhéng-an
Lông-chhoan Thoân-tō Uí-oân-hoē.
Chú-se̍k: Lâu Hoâ-gī.
Uí-oân: Sun Hông-tìn, Tân iāu-hông, Tân En̂g-siông, Âng Kong-iām, Khó͘ Ji̍t-sin, Chhî Bô͘-hiông.
1968.11.15 1042 hō P.3-4
Tī Chú ê thiàⁿ-thàng khiā-khí tī lông-chhoan ê chu-uī hiaⁿ-chí,goān lín pêng-an!
Lán ēng sìn-gióng kap ǹg-bāng ta̍h-ji̍p ê 1968 nî, ba̍k-nih-kú chiū kàu Kám-un-choeh lah! Ji̍t-chí teh kè chin kín, ná chuí teh lâu, hō͘ lâng kám-kak iā iu-būn. Hoê-sióng kè-khì ê ji̍t-chí, lâu hō͘ lán ê, ū chin-choē ê lô-khó͘, iā ū toà ba̍k-sái ê hoaⁿ-hí. Bô-lūn khó͘ á-sī tiⁿ, lán lóng ū kám-kak Siōng-tè hong-sēng ê lîn-bín kap kóng boē chīn ê un-huī teh si-lo̍h tī lán ê téng-bīn. Koh I ēng I ê chiàⁿ-chhiú teh ín-chhoā lán kè chit ê khi-khu ê lō͘-tô͘, che tú-tú chiàu lán ê Chú só͘ kóng “Goá ji̍t-ji̍t kap lín tī-teh, kàu sè-kan ê lō͘-bé.” Sèng-keng iā kóng “Lí tio̍h ióng-kám chòng-táⁿ, bo̍h-tit kiaⁿ, iā bo̍h-tit lún, in-uī lí bô-lūn toh-lo̍h khì Iâ-hô-hoa lí ê Siōng-tè kap lí tī-teh.”
Tī kin-nî tiong chu-uī ê hiaⁿ-chí lóng ū bô saⁿ-tâng ê cho-gū, ū-ê ū moá-moá hoaⁿ-hí ê siu-sêng, ū-ê tú-tio̍h sún-sit, sī tuì hong chuí kap pīⁿ-thâng hāi lâi ê. Goán kā siū-hok ê hiaⁿ-chí kiong-hí, ǹg-bāng lín koh-khah chhut-la̍t lâi kám-siā Chú, o-ló Chú; iā kā siū-khó͘ ê hiaⁿ-chí kóng m̄-bián sit-chì, in-uī bān-sū sī tī Chú ê chí-ì, tek-khak iā ū lī-ek, chhin-chhiūⁿ Sèng-si kóng:
Chhut-ji̍t lo̍h-hō͘ sī Chú só͘ tēng;
Nn̄g hāng lóng sī hoe-ba̍k khiàm-ēng.
Iu-būn, hoaⁿ-hí lóng ū lī-ek;
iún-chhī lêng-hûn kian-kò͘ sìn-tek.
Sù-hok, kàng-chai, lí só͘ chù-tiāⁿ;
Thiⁿ-pē, goān Lí chí-ì tit-chiâⁿ.
(312 siú)
Chhiáⁿ lí koh ke gîm chi̍t-piàn, nn̄g-piàn lâi gím-mī, chiū beh thé-giām Chú ê hó chí-ì.
Tī chit ê sî-tāi lán khoàⁿ-tio̍h chin-choē ê sū. Chhin-chhiūⁿ Chú kóng tī boa̍t-sè ê sî-tāi ū ké sian-ti beh chhut-lâi bê-he̍k lâng, lâng ê thiàⁿ-sim beh léng-tām……
Koh-khah hō͘ lán tio̍h-kiaⁿ ê, chiū-sī phó͘-phiàn sìn-tô͘ ê sìn-sim sòng-sit, teh keng-kè bô Siōng-tè ê ji̍t-chí, bô oa̍h-miā, bô kiàn-chèng ê seng-oa̍h. iā ū choē-choē chheng-liân uī-tio̍h tha̍k-chheh kap chiū-chit, lī-khui khì to͘-chhī tô͘-bô͘ hoat-tián, che kèng-ka hō͘ lông-chhoan ê kàu-hoē soe-bî. iáu-kú chhiáⁿ lán bô loé-chì, goán thoè lín iā pek-chhiat kî-tó, hō͘ Chú Iâ-so͘ koh oa̍h ê Siōng-tè thiaⁿ lín ê kî-tó lâi choè kang ho̍k-heng lông-chhoan ê kàu-hoē.
Lán ê kàu-hoē tī Tâi-oân ū 100 goā nî ê le̍k-sú, thang kóng sī chin chòng-táⁿ ê sū. M̄-kú nā bô kín-sīn kap pó-chhî sìn-sim, Chú tek-khak beh tuì chhuì-tiong kā lán thò͘-chhut. uī-tio̍h án-ni Sin Soan ê siaⁿ toā hiáng, khó-sioh sim bâ-pì ê sìn-tô͘ iā bô chió, tì-kàu hióng-èng bô chin jia̍t-lia̍t. Goán beh koh chi̍t pái sêng-si̍t tuì lín kóng, sio̍k sìn ê hiaⁿ-ché, tio̍h khí-lâi, lâi uī Chú choè chit hāng sū. Mê-nî sī Lông Thoân nî, lán kiám bô koh khah chek-ke̍k lâi chún-pī èng-hù mah! lán tio̍h tì-ì tha̍k keng, kî-tó, hōng-hiàn, kiàn-chèng, chiah boē ko͘-hū Chú ê chín-tiàu kap chiok-hok. Chhiáⁿ lán m̄-nā kan-ta thiaⁿ, iā tàu chhut siaⁿ chhut la̍t, hō͘ lán ê lîn-iū lóng pìⁿ-chiâⁿ choè Ki-tok-tô͘, hō͘ lé-pài-tn̂g moá chhut-lâi.
Tī Kám-un-choeh ê sî, ài lín hoán-séng tuì Siōng-tè lâi ê thiàⁿ-thàng kap chiok-hok, koh ǹg-bāng ū hōng-hiàn lâi pò-tap Chú ê un, iā li̍p sin ê koat-sim thang kiâⁿ Chú ê lō͘.
Goān Siōng-tè iā chiok-hok tī mê-nî ê kang-chok.
漢羅（Ùi原文改寫）
感恩節的請安
農村傳道委員會。
主席：劉華義。
委員：孫鴻鎮，陳iāu-hông，陳En̂g-siông，洪Kong-iām，許日新，徐茂雄。
1968.11.15 1042號P.3-4
佇主的疼痛徛起佇農村的諸位兄姊，願恁平安！
咱用信仰佮向望踏入的1968年，目nih久就到感恩節啦！日子咧過真緊，那水咧流，予人感覺也憂悶。回想過去的日子，留予咱的，有真濟的勞苦，也有帶目屎的歡喜。無論苦抑是甜，咱攏有感覺上帝豐盛的憐憫佮講袂盡的恩惠咧施落佇咱的頂面。閣伊用伊的正手咧引chhoā咱過這个崎嶇的路途，這拄拄照咱的主所講「我日日佮恁佇咧，到世間的路尾。」聖經也講「你著勇敢壯膽，莫得驚，也莫得忍，因為你無論叼落去耶和華你的上帝佮你佇咧。」
佇今年中諸位的兄姊攏有無相同的遭遇，有的有滿滿歡喜的收成，有的拄著損失，是對風水佮病蟲害來的。阮共受福的兄姊恭喜，向望恁閣較出力來感謝主，呵咾主；也共受苦的兄姊講毋免失志，因為萬事是佇主的旨意，的確也有利益，親像聖詩講：
出日落雨是主所定；
兩項攏是花木欠用。
憂悶，歡喜攏有利益；
養飼靈魂堅固信德。
賜福，降災，你所註定；
天爸，願你旨意得成。
(312首)
請你閣加吟一遍，兩遍來gím-mī，就欲體驗主的好旨意。
佇這个時代咱看著真濟的事。親像主講佇末世的時代有過先知欲出來迷惑人，人的疼心欲冷淡……
閣較予咱著驚的，就是普遍信徒的信心喪失，咧經過無上帝的日子，無活命，無見證的生活。也有濟濟青年為著讀冊佮就職，離開去都市圖謀發展，這更加予農村的教會衰微。猶過請咱無餒志，阮替恁也迫切祈禱，予主耶穌閣活的上帝聽恁的祈禱來做工復興農村的教會。
咱的教會佇台灣有100外年的歷史，通講是真壯膽的事。毋過若無謹慎佮保持信心，主的確欲對喙中共咱吐出。為著按呢新宣的聲大響，可惜心麻痺的信徒也無少，致到響應無真熱烈。阮欲閣一擺誠實對恁講，屬信的兄姊，著起來，來為主做這項事。明年是農傳年，咱kiám無閣較積極來準備應付嘛！咱著致意讀經，祈禱，奉獻，見證，才袂辜負主的chín召佮祝福。請咱毋若干焦聽，也鬥出聲出力，予咱的鄰右攏變成做基督徒，予禮拜堂滿出來。
佇感恩節的時，愛恁反省對上帝來的疼痛佮祝福，閣向望有奉獻來報答主的
恩，也立新的決心通行主的路。
願上帝也祝福佇明年的工作。