海外宣教師通訊
Hái-goā soan-kàu-su thong-sìn
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第1039期 |
| 日期 | 1968/10 |
| 頁數 | 12 |
白話字（原文數位化）
Hái-goā soan-kàu-su thong-sìn
KHU Í-CHÈNG
1968.10.01 1039 hō P.12
Chu-uī kèng-ài Tâi-oân Kàu-hoē ê hiāⁿ-tī chí-moē pêng-an.
Chit-pang thang chià-tio̍h Kong-pò kap tāi-ke kìⁿ-bīn, chhim-chhim kám-siā Siōng-tè, iā kám-siā Chú-pit Tân Bo̍k-su. Tông-sî iā kám-siā tāi-ke tuì goán ê chi-chhî kap tāi-tó, hō͘ goán thang pêng-an uī Chú choè-kang. Tì-ì kám-siā tī goán kū-nî 1967 tńg-khì tō͘-ká ê sî pang-chān goán ê hó pêng-iú kap kó͘-lē goán ê hiaⁿ-ché, tâng-kang.
Hiān-chāi goá lâi kài-siāu goán kong-chok ê só͘-chāi, sī Má-lâi-a ê lâm-pêng Jiu-hut-chiu ê Moa-pho (Muar). Lī-khui Malacca ū 28 Eng-lí, Singapore 130 Eng-lí. Jîn-kháu iok 5 bān lâng, kî-tiong Hoâ-jîn iok 1 chheng lâng: Ū 2 keng ê Tiúⁿ-ló-hoē, iā ū kî-thaⁿ ê kàu-hoē. Put-kò lán ê kàu-hoē khah toā. Goán só͘ hū-chek ê sī Sam-it-tn̂g (Trinity Church) ēng Hok-kiàn-oē; koh chi̍t-keng sī oa̍h-chuí-tn̂g (Living Water Church) ēng Tiō-chiu-oē. Nā-sī saⁿ lī bô hn̄g. Goán ê hoē-iú sī 170 lâng, ū 78 hō͘. Lé-pài-ji̍t chū-hoē ê jîn-sò͘ sī pêng-kin 120 goā lâng; nā ká-kî chiū ū kàu 140 lâng í-siōng. (in uī goán sī hioh pài 5, Lé-pài-ji̍t tio̍h choè-kang koh ha̍k-seng tio̍h khì tha̍k-chheh).
Keng-siông chiu-kan ê chū-hoē sī chhin-chhiūⁿ ē-bīn:
Pài 3 ē-po͘ 2,30 sī Hū-lú-thoân-khè ê chū-hoē…… 30 lâng chó-iū.
Pài 4 àm 8,00 sī Ka-têng lé-pài……50 lâng chó-iū.
Pài 5 àm 8,00 sī Chheng-liân-thoân-khè ê chū-hoē…60 lâng chó-iū.
Pài 6 àm 7,30 sī Chheng-liân Eng-bûn cha-keng……40 lâng chó-iū.
8,00 sī Sèng-koa-thoân ê liān-si̍p, (í-siōng sī ta̍k lé-pài kú-hêng ê).
Lé-pài-ji̍t; Siōng-ngó͘ 9,00 Chú-ji̍t-o̍h……120 lâng. 10,00 Toā-lâng lé-pài……120 lâng. Hā-ngó͘ 2,00 Sin-chhoan ê lé-pài. 3,30 Hoâ-bûn chheng-liân chū-hoē…….20 lâng. 8,00 Eng-gú lé-pài. (thok-lâng hū-chek).
Goán kàu-hoē ū 4 uī ê tuí-ló, 5 uī ê chip-sū teh pang-chān kàu-hoē ê kang. In lóng chin chhut-la̍t tī kàu-hoē. Goá iā ū hū-siat sió-o̍h kap Iù-tī-hn̂g, ha̍k-seng chiong-kīn 400 lâng. Khó-sioh hiān-chāi ê kàu-io̍k hoat-lēng m̄-chún lán choè chong-kàu ê oa̍h-tāng. Choè-kīn goán ū oân-sêng chi̍t-chō sin ê hāu-sià, kiàn-tiok huì-iōng chha-put-to ài Tâi-pè 1 pah-bān; kám-siā Chú hō͘ goán bô tú-tio̍h khiàm khiàm khoeh. Goán chi̍t-ke toā-sè 7 lâng lóng ū pêng-an, ta̍k-ji̍t chīn pún-hūn oân-sêng só͘ kau-thok--ê; bô ko͘-hū Chú ê thiàⁿ kap tāi-ke ê koan-sim.
Goán chin ǹg-bāng lín tī kî-tó ê tiong-kan bô kì-tit goán, iā koan-sim tī hái-goā ê kong-chok, hō͘ lán Hái-goā soan-tō-hoē tit kiān-choân BÊNG-HÛ KÎ SI̍T.
漢羅（Ùi原文改寫）
海外宣教師通訊
邱以正
1968.10.01 1039號P.12
諸位敬愛台灣教會的兄弟姊妹平安。
這幫通藉著公報佮大家見面，深深感謝上帝，也感謝主筆陳牧師。同時也感謝大家對阮的支持佮代禱，予阮通平安為主做工。致意感謝佇阮舊年1967轉去度假的時幫贊阮的好朋友佮鼓勵阮的兄姊，同工。
現在我來介紹阮工作的所在，是馬來亞的南爿Jiu-hut-chiu的Moa-pho(Muar)。離開Malacca有28英里，新加坡130英里。人口約5萬人，其中華人約1千人：有2間的長老會，也有其他的教會。不過咱的教會較大。阮所負責的是三一堂(Trinity Church)用福建會；閣一間是活水堂(Living Water Church)用Tiō-chiu-會。若是相離無遠。阮的會友是170人，有78予。禮拜日聚會的人數是平均120外人；若假期就有到140人以上。(in為阮是歇拜5，禮拜日著做工閣學生著去讀冊)。
經常週間的聚會是親像下面：
拜3下晡2，30是婦女團契的聚會…… 30人左右。
拜4暗8，00是家庭禮拜……50人左右。
拜5暗8，00是青年團契的聚會…60人左右。
拜6暗7，30是青年英文查經……40人左右。
8，00是聖歌傳的練習，(以上是逐禮拜舉行的)。
禮拜日；上午9，00主日學……120人。10，00大人禮拜……120人。下午 2，00新村的禮拜。3，30華文青年聚會……。20人。8，00英語禮拜。(託人負責)。
阮教會有4位的長老，5位的執事咧幫贊教會的工。In攏真出力佇教會。我也有附設小學佮幼稚園，學生將近400人。可惜現在的教育發令毋准咱做宗教的活動。最近阮有完成一座新的校舍，建築費用差不多愛台幣1百萬；感謝主予阮無拄著欠欠缺。阮一家大細7人攏有平安，逐日盡本份完成所交託的；無辜負主的疼佮大家的關心。
阮真向望恁佇祈禱的中間無記得阮，也關心佇海外的工作，予咱海外宣道會得健全名副其實。