故楊招義牧師略歷
Kò͘ Iûⁿ Chiau-gī bo̍k-su lio̍k-le̍k
文獻資訊
| 項目 | 資料 |
|---|---|
| 作者 | 楊士養 Iûⁿ Sū-ióng |
| 卷期 | 台灣教會公報 |
| 卷期 | 第1040期 |
| 日期 | 1968/10 |
| 頁數 | 16 |
白話字（原文數位化）
Kò͘ Iûⁿ chiau-gī bo̍k-su lio̍k-le̍k
Iûⁿ Sū-ióng
1968.10.15 1040 hō P.16
Iûⁿ Chiau-gī kun 1894 nî (Bîn-kok chêng 18 nî) 3 ge̍h ji̍t chhut-sì tī Tâi-lâm koān Ka-lí tìn ê Hoan-á-liâu. I ê lāu-pē Iûⁿ Chin Sian-siⁿ (Hàn-i), lāu-bú Iûⁿ Chiā Chhiò. In āu-lâi poaⁿ khì Hô-sīn, pē-kiáⁿ chiū siông-siông tuì hia khì An-sūn Kàu-hoē lé-pài. Jiân-āu poaⁿ-soá kàu An-sūn, khí-chhù tī lé-pài-tn̂g ê tuì-bīn. Chiau-gī kun siū sió-ha̍k kàu-io̍k liáu, chiū khì Tâi-lâm Tiúⁿ-ló-kàu Tiong-o̍h tha̍k-chheh. Jiân-āu tī Thài-pêng-kéng Kàu-hoē hū-siat ê sió-o̍h choè kàu-oân. Hit-sî 李以彰先生 kap 洪賜先生sī Iûⁿ Chiau-gī Sian-siⁿ ê tông-sū. Âng Sù Sian-siⁿ hiān-chāi iáu-kú ióng-kiāⁿ. Chiau-gī Sian-siⁿ 21 hè ê sî kap 施烈女士 kiat-hun. 1915 nî 4 ge̍h ji̍p Tâi-lâm Sîn-ha̍k-hāu, kuí-nā nî kú gián-kiù Sîn-ha̍k, pī-pān chiong-lâi beh choè Chú ê chhe-ēng. 1919 nî 3 ge̍h pit-gia̍p, 4 ge̍h 15 ji̍t siū jīm-bēng choè thoân-tō-su, khì toà Tang-āu-liâu Kàu-hoē. āu-lâi keng-kè chi̍t toāⁿ ê sî-kan chiū choán-jīm kàu Toā-tō͘, Siān-hoà, An-sūn, Moâ-tāu. Chāi-jīm tī Moâ-tāu ê sî siat-li̍p choè kàu-su.
1932 nî 3 ge̍h 18 ji̍t siū àn-chhiú hō͘ Kiâm-chuí chhiáⁿ choè bo̍k-su. Tī Kiâm-chuí Kàu-hoē chāi-jīm 17 nî kú. I tī chia bo̍k-hoē ê sî hoē-iú choē, sìn-tô͘ só͘ tiám ê chng-siā chin soàⁿ koh hn̄g, khiâ kha-ta̍h-chhia sûn-sī chin-chiàⁿ ū khùn-lân. Sî Kiâm-chuí liáu-āu, siū Tang-āu-liâu Kàu-hoē phèng-chhiáⁿ choè bo̍k-su, tiàm 4 nî poàⁿ kú. án-ni Chiau-gī Bo̍k-su chêng-āu bat tiàm Tang-āu-liâu nn̄g pái. Lī-khui Tang-āu-liâu, siū Sin-iâⁿ Kàu-hoē phèng-chhiáⁿ, chāi-jīm 5 nî. Choè-āu siū Ka-gī Sîn-ha̍k-īⁿ phèng-chhiáⁿ, tī hia kà chheh 3 nî kú. án-ni Iûⁿ Chiau-gī Bo̍k-su tī kàu-hoē kap kàu-hoē ki-koan choè kang, kiōng 10 uī khîn-sio̍k 40 nî khah ke. Chióng-uì-hoē sàng gûn-tún hō͘ khûn-sio̍k 30 nî í-siōng ê thoân-kàu-su, hit sî Chiau-gī Bo̍k-su iā tit-tio̍h chi̍t ê.
Thoè-hiu í-āu, uī-tio̍h ài kap i ê kiáⁿ-jî saⁿ-kap toà, ū poaⁿ-soá toà O͘-chhiū-nâ thn̂g-chhiúⁿ, chiah kàu kiàm-thâm. Toà tī Kiàm-thâm ê sî, i ê hāu-siⁿ Iûⁿ Chiong-hùn Bo̍k-su bat poaⁿ chhiáⁿ i khì Ji̍t-pún tiàm poàⁿ-nî kú; ū kàu choē-choē bêng-só͘ koan-kong. Tuì Ji̍t-pún tò-lâi liáu toà Saⁿ-têng-chhī (3 nî), chiah soá lâi Tâi-pak Ha̍p-kang-koe khiā-khí chi̍t tang kú.
Pún-nî 9 ge̍h 26 chá-khí siá phoe kià hō͘ pit-chiá. Chit tiuⁿ phoe goá 27 tiong-tàu chiap-tio̍h, bô phah-sǹg tông-ji̍t ē-po͘ 4 tiám goā chiap-tio̍h i ê toā-kiáⁿ ê tiān-pò, kóng ka-hū pia̍t-sè. Si̍t-chāi chin ì-goā. I sī in-uī sim-chōng bâ-pì kè-sin.
Kò͘ Iûⁿ Chiau-gī Bo̍k-su sī pâi siāng toā, ū 6 ê sió-tī, 3 ê sió-bē. I pún-sin iā ū 7 ê hāu-siⁿ, 3 ê cha-bó͘-kiáⁿ; tû-khì tē 2 hāu-siⁿ soè-hàn ê sî sí-khì, í-goā lóng iáu tī-teh－ū i-seng, ū bo̍k-su, ū kàu-oân kap kong-bū-oân téng, lāi-goā sun kiōng 34 miâ. Si̍t-chāi ū tit-tio̍h Siōng-tè si-un sù-hok. Chiau-gī Bo̍k-su ê bí-tek kuí-nā hāng:－
-
It-seng uī Chú tiong-khûn chīn-chit, iā bat tam-jīm Ka-gī Tiong-hoē gī-tiúⁿ.
-
Choè lâng tiong-ti̍t ngī-khì, sêng-si̍t kèng-khiân.
-
Tì-ì ka-têng chong-kàu kàu-io̍k; tit-tio̍h jî-lú ê hàu-sūn.
1968 nî 9 ge̍h 27 siōng-ngó͘ 10 tiám an-jiân kui-thian, 10 ge̍h 15 téng-po͘ 10 tiám tī Tâi-pak Sin-seng Ki-tok Kàu-hoē kú-hêng tui-su lé-pài. An-chòng tī 陽明山第一公墓.
漢羅（Ùi原文改寫）
故楊招義牧師略歷
楊士養
1968.10.15 1040號P.16
楊招義君1894年(民國前18年) 3月日出世佇台南縣佳里鎮的番仔寮。伊的老爸楊真先生(漢醫)，老母楊謝笑。In後來搬去和順，父囝就常常對遐去安順教會禮拜。然後搬徙到安順，起厝佇禮拜堂的對面。招義君受小學教育了，就去台南長老到中學讀冊。然後佇太平境教會附設的小學做教員。彼時李以彰先生佮洪賜先生是楊招義先生的同事。洪賜先生現在猶過勇健。招義先生21歲的時佮施烈女士結婚。1915年4月入台南神學校，幾若年久研究神學，備辦將來欲做主的差用。1919年3月畢業，4月15日受任命做傳道師，去蹛東後寮教會。後來經過一段的時間就轉任到大肚，善化，安順，麻豆。在任佇麻豆的時設立做教師。
1932年3月18日受按手予鹹水請做牧師。佇鹹水教會在任17年久。伊佇遮牧會的時會友濟，信徒所點的庄社真散閣遠，騎腳踏車巡視真正有困難。時鹹水了後，受東後寮教會聘請做牧師，踮 4年半久。按呢招義牧師前後捌踮東後寮兩擺。離開東後寮，受新營教會聘請，在任 5年。最後受嘉義神學院聘請，佇遐教冊3年久。按呢楊招義牧師佇教會佮教會機關做工，共10 位勤屬40年較加。獎慰會送銀盾予勤屬30年以上的傳教師，彼時招義牧師也得著一个。
退休以後，為著愛佮伊的囝兒相佮蹛，有搬徙蹛烏樹林糖廠，才到劍潭。蹛佇劍潭的時，伊的後生楊彰奮牧師捌搬請伊去日本踮半年久；有夠濟濟名所 觀光。對日本倒來了蹛三重市 (3年)，才徙來台北合江街徛起一冬久。
本年9月26早起寫批寄予筆者。這張批我27中晝接著，無扑算同日下晡4點外接著伊的大囝的電報，講家父別世。實在真意外。伊是因為心臟麻痺過身。
故楊招義牧師是排siāng大，有6个小弟，3个小妹。伊本身也有7 个後生，3个查某囝；除去第2後生細漢的時死去，以外攏猶佇咧－有醫生，有牧師，有教員佮公務員等，內外孫共34名。實在有得著上帝施恩賜福。招義牧師的美德幾若項：－
1. 一生為主忠勤盡職，也捌擔任嘉義中會議長。
2. 做人忠直硬氣，誠實敬虔。
3. 致意家庭宗教教育；得著兒女的孝順。
1968年9月27上午10點安然歸天，10月15頂晡10點佇台北新生基督教會舉行追思禮拜。安葬佇陽明山第一公墓。