台灣神學院紀念日請安
Tâi-oân Sîn-ha̍k-īⁿ Kì-liām-ji̍t chhéng-an
文獻資訊
| 項目 | 資料 |
|---|---|
| 作者 | 陳皙宗 Tan8 Sek-chong |
| 卷期 | 台灣教會公報 |
| 卷期 | 第1039期 |
| 日期 | 1968/10 |
| 頁數 | 4-5 |
白話字（原文數位化）
Tâi-oân Sîn-ha̍k-īⁿ kì-liām-ji̍t chhéng-an
Kì-liām-ji̍t chhéng-an
ĪN-tiúⁿ Tân Sek-chong
1968.10.01 1039 hō P.4-5
Kok-uī bo̍k-tióng, kok-uī tâng-tō pêng-an:
Kám-siā Siōng-tè ê ín-chhoā, kám-siā kok-uī ê tāi-tó kap hōng-hiàn, hō͘ goán Tâi-oân Sîn-ha̍k-īⁿ ê kàu-chit-oân, oē thang keng-kè koh chi̍t nî ê sî-kan, lâi choè sîn-ha̍k kàu-io̍k iàu-kín ê kang. Chin hi-bāng kok-uī bo̍k-tióng, kok-uī tâng-tō it-hoat uī-tio̍h Tâi-oân Sîn-ha̍k-īⁿ, tuì Tâi-pak toē-khu hiòng choân sè-kài só͘ teh chhui-hêng ê sèng-kang, tāi-tó kap hōng-hiàn.
Tâi-oân Sîn-ha̍k-īⁿ tuì 1882 í-lâi, kè-sio̍k sán-seng choē-choē Chú tiong-si̍t, lêng-kàn ê kang-lâng, sì-soàⁿ tī choân-tó thoân Siōng-tè kok ê hok-im; pang-chān choē-choē lâng tī Chú Iâ-so͘ Ki-tok tit-tio̍h kap Siōng-tè kap lâng koh hô ê thé-giām.
Tâi-oân Sîn-ha̍k-īⁿ ê pit-gia̍p-seng put-tàn tī choân-tó choè-kang, siōng-chhiáⁿ iā kàu hái-goā khì thoân hok-im. Lán Chóng-hoē ê Hái-goā Soan-tō-hoē ê le̍k-sú iáu té, chóng-sī soan-kàu-su chhut-khì Sin-ka-pho, Má-lâi-se-a, Thài-kok, Mauritius, choē-choē sī Tâi-oân Sîn-ha̍k-īⁿ ê pit-gia̍p-seng.
Chêng-jīm ê īⁿ-tiúⁿ Sun Ngá-kok Bo̍k-su kè-óng liáu-āu, Hûn-kek Hái-goā Soan-tō-hoē ū sêng-li̍p; tī kàu-phài ha̍p-chok tiong beh sàng san-toē tông-pau hiòng Lâm-iûⁿ ê chāi-toē-lâng thoân hok-im. Í-keng ū 4 uī ê san-toē tông-pau beh khì Sarawak choè soan-kàu-su, iā in lóng sī Tâi-oân Sîn-ha̍k-īⁿ ê pit-gia̍p-seng.
Tâi-oân Sîn-ha̍k-īⁿ put-tàn ū choē-choē pit-gia̍p-seng tī hái-goā teh choè kang (pau-hâm Hân-kok kap Ji̍t-pún), siōng-chhiáⁿ choē-choē Hoâ-kiâu, tuì hái-goā lâi pún tha̍k sîn-ha̍k (tuì Ka-ná-tāi, Hui-li̍p-pin, kap Thài-kok). Só͘-í Tâi-oân Sîn-ha̍k-īⁿ si̍t-chit-siōng tī kè-khì kap hiān-chāi, tuì toē-hng kàu-hoē, tuì hái-goā ê soan-tō, tuì kiâu-seng ê poê-iúⁿ, ū put-siáu ê kòng-hiàn!
Chiàu chit khoán hó koh oa̍h ê thoân-thóng, kin-á-ji̍t Tâi-oân Sîn-ha̍k-īⁿ kè-sio̍k teh kiông-hoà kàu-siū tīn-iông; pī-pān ū ha̍k-le̍k, ū sìn-gióng, ū jîn-keh ê kang-lâng thang kap Sèng Sîn tâng-kang; pang-chān choē-choē lâng kiàn-li̍p sin ê jîn-seng tī lâng só͘ ū it-chhè ê chó͘-chit ê tiong-kan.
Kin-nî, īⁿ-tiúⁿ tńg-lâi hù-jīm í-goā, ū 5 uī ê jîn-châi beh kiông-hoà kàu-ha̍k ê loē-iông. Chiah ê lâng chiū-sī:
1) Lo̍k Î-jîn Phok-sū. I í-keng tit-tio̍h Princeton ê Sin-iok ha̍k ê phok-sū ha̍k-uī, keng-iû Au-chiu kap Sèng-toē choè-kūn kàu Tâi-oân. 2)Ko Thian-hiong Lú-sū: Tâi-oân Tāi-ha̍k Goā-bûn-hē pit-gia̍p, Princeton ê Ki-tok-kàu Kàu-io̍k se̍k-sū. 3) Chhî Khiam-sìn Bo̍k-su: Ji̍t-pún Sîn-ha̍k Tāi-ha̍k siu-sū, sī choan kong le̍k-sú. 4) So͘ Hui-kheng Lú-sū: Tong-hái Tāi-ha̍k Goā-bûn-hē pit-gia̍p, Toronto Tāi-ha̍k Eng-bûn-ha̍k ê se̍k-sū. 5) Lîm Siok-kheng Lú-sū: Toronto ê A.R.C.T. chiū-sī kà kǹg-khîm ê chu-keh, New York Hia̍p-hô Sîn-ha̍k-īⁿ ê Sèng-ga̍k se̍k-sū. Chiah ê lâng lóng sī tuì hó ê sìn-gióng ka-têng chhut, koh ū hó ê ha̍k-le̍k. In oân-sêng ha̍k-gia̍p kap siā-hoē keng-giām. án-ni 1968 nî īⁿ-tiúⁿ í-goā koh ū 5 uī ê jîn-châi thang kòng-hiàn tī sîn-ha̍k kàu-io̍k. Che thang kóng sī bī-cheng-iú ê hiān-siōng.
Put-kò in-uī hut-jiân ke-thiⁿ choē-choē jîn-châi, ha̍k-īⁿ ê keng-chè hū-tam tong-jiân ke chin tāng. Nā beh chiàu kin-nî ū-soàn lâi kóng, keng-siông-huì chha-put-to ū khiàm 10 bān kho͘. Chin hi-bāng kok-uī bo̍k-tióng, kok-uī tâng-tō, chhut-la̍t hōng-hiàn. ǹg-bāng thong-kè lâng ê ló͘-le̍k kap ha̍p-chok, Siōng-tè oē pó͘-moá goán ê khiàm-kheh. Goán chí-ū khò sìn-sim lâi hiòng-chêng. Chhiáⁿ thoè goán kî-tó!!!
Tâi-oân Sîn-ha̍k-īⁿ ê ha̍k-seng sī tuì lâm-pō͘, tiong-pō͘, tang-pō͘ kok toē-hng lâi ê. In hui-siông su-iàu kok-uī bo̍k-tióng, kok-uī tâng-tō ê koan-sim kap keng-chè oān-chō͘. Chhiáⁿ siông-siông thoè in kî-tó, hō͘ in tī keng-chè kap ha̍k-gia̍p ê ap-le̍k ē, oē tàng khek-ho̍k bān-poaⁿ ê khùn-lân, bô thang ho̍k bān-poaⁿ ê khùn-lân, bô kú thang kàu tē-it-soàⁿ choè Siōng-tè kok ê cheng-peng, lâi thoân Ki-tok tiông-seng, jîn-ài, kong-gī hô-kái ê hok-im. Chin to-siā.
Í-má-loē-lī.
Kàu-boa̍t Tân Sek-chong
漢羅（Ùi原文改寫）
台灣神學院
紀念日請安
院長陳皙宗
1968.10.01 1039號P.4-5
各位牧長，各位同道平安：
感謝上帝的引chhoā，感謝各位的代禱佮奉獻，予阮台灣神學院的教職員，會通經過閣一年的時間，來做神學教育要緊的工。真希望各位牧長，各位同道益發為著台灣神學院，對台北地區向全世界所咧推行的聖工，代禱佮奉獻。
台灣神學院對1882以來，繼續產生濟濟主忠實，能幹的工人，四散佇全島傳上帝國的福音；幫贊濟濟人佇主耶穌基督得著佮上帝佮人閣和的體驗。
台灣神學院的畢業生不但佇全島做工，尚且也到海外去傳福音。咱總會的海外宣道會的歷史猶短，總是宣教師出去新加坡，馬來西亞，泰國，Mauritius，濟濟是台灣神學院的畢業生。
前任的院長孫雅各牧師過往了後，Hûn-kek海外宣道會有成立；佇教派合作中欲送山地同胞向南洋的在地人傳福音。已經有4位的山地同胞欲去Sarawak做宣教師，也in攏是台灣神學院的畢業生。
台灣神學院不但有濟濟畢業生佇海外咧做工(包含韓國佮日本)，尚且濟濟華僑，對海外來本讀神學(對加拿大，菲律賓，佮泰國)。所以台灣神學院實質上佇過去佮現在，對地方教會，對海外的宣道，對僑生的培養，有不少的貢獻！
照這款好閣活的傳統，今仔日台灣神學院繼續咧強化教授陣容；備辦有學歷，有信仰，有人格的工人通佮聖神同工；幫贊濟濟人建立新的人生佇人所有一切的組織的中間。
今年，院長轉來赴任以外，有5位的人才欲強化教學的內容。遮的人就是：
1) 陸Î-jîn博士。伊已經得著Princeton 的新約學的博士學位，經由歐洲佮聖地最近到台灣。2)高Thian-hiong女士：台灣大學外文系畢業，Princeton的基督教教育碩士。3)徐謙信牧師：日本神學大學修士，是專攻歷史。4) 蘇Hui-kheng女士：東海大學外文系畢業，Toronto大學英文學的碩士。5) 林Siok-kheng女士：Toronto 的A.R.C.T。就是教鋼琴的資格，New York協和神學院的聖樂碩士。遮的人攏是對好的信仰家庭出，閣有好的學歷。In完成學業佮社會經驗。按呢1968年院長以外閣有5位的人才通貢獻佇神學教育。這通講是未曾有的現象。
不過因為忽然加添濟濟人才，學院的經濟負擔當然加真重。若欲照今年預算來講，經常費差不多有欠10萬箍。真希望各位牧長，各位同道，出力奉獻。向望通過人的努力佮合作，上帝會補滿阮的欠缺。阮只有靠信心來向前。請替阮祈禱！！！
台灣神-學院的學生是對南部，中部，東部各地方來的。In非常需要各位牧長，各位同道的關心佮經濟援助。請常常替in祈禱，予in佇經濟佮學業的壓力下，會當克服萬般的困難，無通服萬般的困難，無久通到第一線做上帝國的精兵，來傳基督終生仁愛，公義和解的福音。真多謝。
以馬內利。
到末 陳皙宗