價值推行的一項事工
Kà-tit chhui-hêng ê chi̍t hāng sū-kang
文獻資訊
| 項目 | 資料 |
|---|---|
| 作者 | 編輯室 Phian-chhip-sek |
| 卷期 | 台灣教會公報 |
| 卷期 | 第1040期 |
| 日期 | 1968/10 |
| 頁數 | 13-14 |
白話字（原文數位化）
Kà-tit chhui-hêng ê chi̍t hāng sū-kang
PHIAN-CHHIP-SEK
1968.10.15 1040 hō P.13-14
Tī kin-nî 7 ge̍h só͘ tiàu-khai ê Sin Soan lông-chhoan-nî gián-kiù-hoē, í-ki̍p tē 15 kài tē 2 chhù ê Chóng Uí hoē, lóng ū lūn-khí “Thû-thiok hō͘-chō͘-siā” ê būn-toê.
Mê-nî sī Sin Soan lông-chhoan nî, chiàu chhu-sè, Thû-thiok hō͘-chō͘-siā ê kó͘-bú eng-kai chiâⁿ-choè tiōng-iàu chhui-hêng ê chi̍t-hāng bo̍k-phiau.
Chit ê hō͘-chō͘-siā sī tī 1848 nî tī Tek-kok sêng-li̍p ê. Tng-sî ê bo̍k-te̍k sī “Hui êng-lī, hui kiù-chè, sī uī ho̍k-bū” (非為營利, 非為救濟, 乃為服務). Bo̍k-te̍k chiàⁿ, chú-chí hó, só͘-í tī 20 nî kan thoân kàu choân-kiû 80 ê kok-ka, kiōng ū sêng-li̍p 4 bān 9 chheng goā ê hō͘-chō͘-siā, sêng-chek hui-siông hó.
Lán Tiong-kok sī Thian-chú-kàu tāi-seng hióng-èng; tī Bîn-kok 53 nî, Sin-tek chhī Sai-mn̂g-teng Thian-chú-kàu sêng-li̍p thâu ê hō͘-chō͘-hoē, hiān sêng-li̍p thâu chi̍t ê hō͘-chō͘-hoē, hiān-chāi í-keng ū 90 goā ê. Lán Chóng-hoē tī 3 nî chêng chiah tuì san-toē khai-sí kó͘-bú, choè-kūn pîⁿ-toē kàu-hoē iā ū kuí-nā uī teh khai-sí. Hiān-chāi ū chó͘-chit ê só͘-chāi lóng tit-tio̍h toā lī-ek. In-uī chit ê hō͘-chō͘-siā, m̄-nā kà-lâng cháiⁿ-iūⁿ chiat-iok, thû-thiok, iōng-chîⁿ, iā kàu-tō lâng poê-iúⁿ chū-sìn chū-chun, gâu hū-chek; poê-iúⁿ hō͘-chō͘ sìn-nāi, kap lâng chin-sêng ha̍p-chok ê cheng-sîn.
Thû-thiok hō͘-chō͘-siā m̄-sī chong-kàu thoân-thé, chóng-sī i ê tiâu-kiāⁿ tī kàu-hoē lâi si̍t-si chin sek-ha̍p. Lán kiò sìn-tô͘ m̄-thang lim-chiú, chia̍h-hun, chóng-sī bô kà in khah chek-ke̍k, chiong chiah ê chîⁿ cháiⁿ-iūⁿ lī-iōng. Lán chi̍t lé-pài chū-chi̍p chi̍t pái, thang chéng-lí kap pò-kò. M̄-nā bô chó͘-tòng kàu-hoē ê kang-chok, hoán-tńg pang-chān sìn-tô͘ ê ha̍p-chok, lé-pài chhut-se̍k ê cheng-ka, sìn-sim ê cheng-chìn; siau-bia̍t pîn-kiông kap gû-gōng.
In-uī án-ni lán chhiah-sêng hi-bāng Chóng-hoē iú-koan ki-kò͘, kó͘-bú Tiong-hoē sêng-li̍p “Thû-thiok hō͘-chō͘-siā chhui-hêng uí-oân-hoē,”thang choân-bīn-te̍k hú-tō sêng-li̍p hō͘-chō͘-siā, thang hō͘ kok kàu-hoē chià chit ê, hùn-liān sìn-tô͘ ū ha̍p-chok ê cheng-sîn, í-ki̍p kiān-choân ê keng-chè seng-oa̍h.
Thian-chú-kàu
Kìm-chí jîn-kang chiat-io̍k
Kok-toē piáu-sī hoán-tuì
天主教禁止人工節育，各地表示反對
Thian-chú-kàu Kàu-chong Pó-lô 6 sè tī kin-nî 7 ge̍h 29 ji̍t siông-pò͘ “Jîn-luī seng-bēng thong-jū” (人類生命通諭). Loē-iông chiū-sī kìm-chí it-chhè jîn-kang pī-īn hong-hoat (人工避孕方法).
Chit ê thong-jū hoat-piáu āu, kok-toē ê Thian-chú-kàu iú hoán-èng put tông. Ū ê piáu-sī choa̍t-tuì ho̍k-chiông kàu-chong ê koân-ui; tàn-sī toā-pō͘-hūn piáu-sī hoán-tuì. Sui-jiân Thian-chú-kàu pò-choá it-chài ho͘-io̍k tio̍h it-tì, ho̍k-chiông kàu-hoē choè-ko koân-ui; iáu-kú hoán-tuì ê siaⁿ jú lâi jú toā. Chiàu Ko-pún-ha̍p-kun ê siau-sit, Í-tāi-lī ê chi̍t uī Chhu-ki chú-kàu kóng, “Bī-lâi ê kàu-chong tī chiat-chè seng-io̍k hong-bīn, kiám-chhái oē kap Kàu-chong Pó-lô 6 sè ê khoàⁿ-hoat put-tông.” Tek-kok lâi ê siau-sit kóng, ū iû-kiú le̍k-sú ê Tek-kok Thian-chú-kàu Kàu-iú tāi-hoē, piáu-sī bô hoat-tō͘ chàn-sêng Kàu-chong Pó-lô 6 sè ê “hoán-tuì sú-iōng jîn-kang chiat-io̍k.” Ka-ná-tāi To-lûn-to ū 82 uī tì-sek kai-chân ê Thian-chú kàu-iú hiòng chú-kàu iau-kiû têng-chheng tuì chiat-chè seng-io̍k ê li̍p-tiûⁿ. In-uī ū koá Sîn-hū tī Bí-sat ê káng-tō tiong kóng “jîn-kang chiat-io̍k sī ū choē--ê.” Niú-iok lâi ê siau-sit kóng, tē 3 kài Sè-kài Kàu-iú Tāi-hoē (36 uī gī-oân kap 17 uī choan-ka) chham-ka-chiá tiong tī Bí-kok ê 11 uī tāi-piáu kap 9 uī chhoan-ka, tuì Pó-lô 6 sè ê “Khiàn-chek jîn-kang chiat-io̍k ê li̍p-tiûⁿ” piáu-sī īⁿ-gī. Sīm-chì Bí-kok ū 3 chheng ê tāi-piáu chham-ka ê, Kok-ka Kàu-bū kek-sin hia̍p-hoē, iau-kiû Kàu-chong Pó-lô 6 sè, tiàu-khai tē 3 chhù Tāi-kong hoē-gī; thang kái-tû tē 2 chhù Tāi-kong hoē-gī í-āu ê hun-kî (分歧).
漢羅（Ùi原文改寫）
價值推行的一項事工
編輯室
1968.10.15 1040號P.13-14
佇今年7月所召開的新宣農村年研究會，以及第15屆第2次的總Uí會，攏有論起「儲蓄互助社」的問題。
明年是新宣農村年，照趨勢，儲蓄互助社的鼓舞應該成做重要推行的一項目標。
這個互助社是佇1848年佇德國成立的。當時的目的是「非營利，非救濟，是為服務」(非為營利，非為救濟，乃為服務)。目的正，主旨好，所以佇20年間傳教全球80的國家，共有成立4萬9千的互助社，成績非常好。
咱中國是天主教代先響應；佇民國53年，新竹市西門町天主教成立頭的互助會，現成立頭一個互助會，現在已經有90外個。咱總會佇3年前才對山地開始鼓舞，最近平地教會也有幾若位咧開始。現在有組織的所在攏得著大利益。因為這個互助社，毋但教人怎樣節約，儲蓄，用錢，也教導人培養自信自尊，gâu負責；培養互助信賴，佮人真誠合作的精神。
儲蓄互助社毋是宗教團體，總是伊的條件佇教會來實施真適合。咱叫信徒毋通啉酒，食薰，總是無教in較積極，將遮的錢怎樣利用。咱一禮拜聚集一擺，通整理佮報告。毋但無阻擋教會的工作，反轉幫贊信徒的合作，禮拜出席的增加，信心的精進；消滅貧窮佮愚戇。
因為按呢咱chhiah-sêng希望總會有關機構，鼓舞中會成立「儲蓄互助社推行委員會，」通全面的輔導成立互助會，通予各教會藉這個，訓練信徒有合作的精神，以及健全的經濟生活。
天主教禁止人工節育，各地表示反對
天主教教宗保羅6世佇今年7月29日詳佈「人類生命通諭」。內容就是禁止一切人工避孕方法。
這個通諭發表後，各地的天主教有反應不同。有的表示絕對服從教宗的權威；但是大部份表示反對。雖然天主教報紙一再呼籲著一致，服從教會最高權威；猶久反對的聲愈來愈大。照哥本哈根的消息，義大利的一位樞機主教講，「未來的教宗佇節制生育方面，檢采會佮教宗保羅6世的看法不同。」德國來的消息講，有悠久歷史的德國天主教教友大會，表示無法度贊成教宗保羅6世的「反對使用人工節育。」加拿大多倫多有82位智識階層的天主教友向主教要求澄清對節制生育的立場。因為有寡神父佇彌撒的講道中講「人工節育是有罪的。」紐約來的消息講，第3屆世界教友大會(36位議員佮17位專家)參加者中佇美國的11位代表佮9位專家，對保羅6世的 「譴責人工節育的立場」表示異義。甚至美國有3千的代表參加的，國家教務革新協會，要求教宗保羅6世，召開第3次大綱會議；通解除第2次大綱會議以後的分歧。