介紹艋舺教會伉儷團契
Kài-siāu Báng-kah kàu-hoē khòng-lē thoân-khè
文獻資訊
| 項目 | 資料 |
|---|---|
| 作者 | 許德謙 Khó͘ Tek-khiam |
| 卷期 | 台灣教會公報 |
| 卷期 | 第1040期 |
| 日期 | 1968/10 |
| 頁數 | 14-15 |
白話字（原文數位化）
Kài-siāu Báng-kah kàu-hoē khòng-lē thoân-khè
Khó͘ Tek-khiam
1968.10.15 1040 hō P.14-15
Tâi-oân kàu-hoē chìn-ji̍p soan-kàu tē 2 sè-kí, ū sin sè-kí soan-kàu ūn-tōng teh kek-sin-hoē, iā ū kuí nā khoán ê thoân-khè teh poê-iúⁿ kàu-io̍k sìn-tô͘ ê seng-oa̍h. T. K. C., Siàu-liân thoân-khè, Hiaⁿ-tī thoân-khè, Lú Soan-tō-hoē (chí-bē thoân-khè), Ha̍k-seng thoân-khè téng tī kok kai-chân teh oa̍h-tāng, chin kám-siā. Put-kò tī Ki-tok-hoà ka-têng ê kiông-hoà, ū su-iàu hu-hū tâng-sim ê “Kòng-lē” thoân-khè. In-uī pē-bú nā bô it-tì ū hó ê sìn-gióng kap léng-tō, boē thang pang-chān chú-lú ê seng-oa̍h, chiū siⁿ-chhut būn-toê chheng-liân. Iû-kî-sī tong-kim ê sî-sè siâ-o̍k, siā-hoē tō-tek hú-pāi, ka-têng hu-hū hoat-seng choē-choē būn-toê, lī-hun ê hong-khì ná lâi ná choē, hu-hū nā bô hó ê sìn-gióng, boē thang kiàn-siat Ki-tok-hoà ê ka-têng.
Chiam tuì chit hong-bīn ê su-iàu Tâi-pak Báng-kah Kàu-hoē ê Khòng-lē thoân-khè ta̍t-tit hō͘ lán thang chù-ì khoàⁿ-choê in ê oa̍h-tāng. Kai-hoē Tè Pek-hok Bo̍k-su í-ki̍p Hoē-tiúⁿ Tân Peng-êng Sian-siⁿ ê léng-tō hā, in ê Khòng-lē thoân-khè ū hoat-tián, chìn-pō͘, pèng pang chān kàu-hoē ê thoân-tō sū-kang. Só͘-í kàu-hoē chó͘-chit Khòng-lē thoân-khè sī ke̍k ū ì-gī ê sū; hō͘ hu-hū tâng-sim tī kàu-hoē uī Chú choè kang, tī ka-têng choè chú-lú ê bô͘-iūⁿ, tī siā-hoē ū hó ê kiàn-chèng. Kiat-kó ka-têng kiān-choân, kàu-hoē-iā heng-ōng. Lí khoàⁿ, chho͘-tāi kàu-hoē ū choē-choē hu-hū tâng-sim ho̍k-bū tī kàu-hoē, hō͘ kàu-hoē ê thoân-tō sū-kang chìn-tián. Kî-tiong tē it tù-hiān ê sī Pek-ki-lah kap A-ku-lah khòng-lē tī kàu-hoē oa̍h-tāng, pang-chān Pó-lô ê bo̍k-hoē thoân-tō (Hēng-toān 18:1－4; Lô-má 16:3－4).
Báng-kah Kàu-hoē ê Khòng-lē thoân-khè ū hó ê chó͘-chit, muí ge̍h ū khui uí-oân-hoē kap lē-hoē. Lē-hoē ū sî chū-chhan tī kàu-hoē, á-sī thoân-khè-oân ê ka-têng, ke-thiⁿ chhin-bo̍k, ū sî khòng-lē ha̍k-si̍p liāu-lí, put-tàn hū-jîn-lâng o̍h liāu-lí, tiōng-hu iā khah lí-kái hū-jîn-lâng liāu-lí ê sin-khó͘ thang saⁿ thé-thiap. Koh tāi-ke ha̍p-si̍p eng-ióng, tāi-ke pó-chhî kiān-khong. Muí hoê ê lē-hoē lóng ū lé-pài, chhiáⁿ bo̍k-su káng-tō á-sī chhiáⁿ kiàn-chèng. In ê thoân-khè put-tàn koan-sim ka-kī ê lêng-siu kau-poê, iā koan-sim kàu-hoē ê kok ki-koan. In ū sî chióng-lē Chú-ji̍t-o̍h kàu-oân, khui chō-tâm-hoē, hō͘ kàu-oân kap soè-kiáⁿ ê pē-bú ū liân-lo̍k, iā siông-siông uì-lô kàu-oân. Hō͘ kàu-hoē ê kàu-io̍k oē thang chìn-pō͘. Koh choè-kūn ū pang-chān kàu-hoē kiàn-tiok chi̍t keng tông-hông ha̍p-iōng ê 4 chàn kàu-io̍k-koán, thang chiông-sū Ki-tok-hoà kàu-io̍k, pēng-chhiáⁿ iā ka-kiông kàu-hoē tô͘-su í-ki̍p io̍k-lo̍k ê si-siat. In ê thoân-khè iā ū chhut khòng-lē ê te̍k-khan. ióng-sêng hoē-oân siá-chok hoat-piáu. ka-kiông hoē-oân ê liân-hê. In ê thoân-khè bo̍k-tek kap kháu-hō sī, “Hu chhiòng, hū suî, pek-liân kai-ló, tâng-sim ho̍k-sāi Chú (夫唱婦隨，百年偕老，同心服事主). Goān kok kàu-hoē heng-khí Khòng-lē thoân-khè tī kok kàu-hoē i-chiàu chit khoán ê cheng-sîn lâi ka-kiông Ki-tok-hoà ka-têng ê kiàn-siat kap heng-ōng kàu-hoē. (Nā ài chai-iáⁿ khah siông-sè ê loē-iông, ài siat Khòng-lē ê kàu-hoē, thang siá phoe sûn-būn: 台北市貴陽街二段九四號，艋舺教會伉儷團契會長陳水榮先生).
漢羅（Ùi原文改寫）
介紹艋舺教會伉儷團契
許德謙
1968.10.15 1040號P.14-15
台灣教會進入宣教第2世紀，有娠世紀宣教運動咧革新會，也有幾若款的團契咧培養教育信徒的生活。T.K.C.，少年團契，兄弟團契，女宣道會(姊妹團契)，學生團契等佇各階層咧活動，真感謝。不過佇基督化家庭的強化，有需要夫婦同心的「伉儷」團契。因為爸母若無一致有好的信仰佮領導，袂通幫贊子女的生活，就生出問題青年。尤其是當今的時勢邪惡，社會道德腐敗，家庭夫婦發生濟濟問題，離婚的風氣來那濟，夫婦若無好的信仰，袂通建設基督化的家庭。
針對這方面的需要台北艋舺教會的伉儷團契值得予咱通注意看齊in的活動。該會戴伯福牧師以及會長陳Peng-êng先生的領導下，in的伉儷團契有發展，進步，並幫贊教會的傳道事工。所以教會組織伉儷團契是極有意義的事；予夫婦同心佇教會為主做工，佇家庭做子女的模樣，佇社會有好的見證。結果家庭健全，教會也興旺。你看，初代教會有濟濟夫婦同心服務佇教會，予教會的傳道事工進展。其中第一著現的是百基拉佮亞居拉伉儷佇教會活動，幫贊保羅的牧會傳道(行傳18：1－4；羅馬16：3－4)。
艋舺教會的伉儷團契有好的組織，每月有開委員會佮例會。例會有時聚餐佇教會，抑是團契員的家庭，加添親睦，有時伉儷學習料理，不但婦人人學料理，丈夫也較理解婦人人料理的辛苦通相體貼。閣大家學習英勇，大家保持健康。每回的例會攏有禮拜，請牧師講道抑是請見證。In的團契不但關心家己的靈修交陪，也關心教會的各機關。In有時獎勵主日學教員，開座談會，予教員佮細囝的爸母有連絡，也常常慰勞教員。予教會的教育會通進步。閣最近有幫贊教會建築一間堂皇合用的4層教育館，通從事基督化教育，並且也加強教會圖書以及育樂的施設。In的團契也有出伉儷的特刊。養成會員寫作發表。加強會員的連繫。In的團契目的佮口號是，「夫唱，婦隨，百年偕老，同心服侍主。願各教會興起伉儷團契佇各教會依照這款的精神來加強基督化家庭的建設佮興旺教會。(若愛知影較詳細的內容，愛設伉儷的教會，通寫批詢問：台北市貴陽街二段九四號，艋舺教會伉儷團契會長陳水榮先生)。