Hái-goā Soan-kàu-su Thong-sìnPermalink

文獻資訊Permalink

白話字（原文數位化）Permalink

HÁI-GOĀ SOÀN-KÀU-SU THONG-SÌN

Tân Hāu-chàn

1968.09.15  1038 hō  P.10

Tī-Chú lāi-bīn só͘ siàu-liām chhin-ài ê hiaⁿ-tī chí-bē pêng-an.

Sió-tī tāi-seng tāi-piáu tiàm-tī Sin-ka-pho ê Táng Kûn-ka Bo̍k-su, Má-lâi-se-a Khu Í-chèng Bo̍k-su kap goán choân-ke tì-ì hiòng kok uī chhéng-an. Goán siū phài lâi tī Seng Má ê soan-kàu-su, tī chêng ji̍t ū saⁿ-kap chham-siông, 3 lâng lûn-liû ta̍k-ge̍h pò goán tī chia ê kang-chok, siau-sit hō͘ chu-uī chai, ǹg-bāng tāi-ke khah oē koan-sim, saⁿ thoè kî-tó.

Taⁿ goá hū-tam 8 ge̍h hūn ê siau-sit. 8 ge̍h sī goán chia choè nāu-jia̍t, lâng-kheh siāng choē, tē it bô-êng, iā tē it khoài-lo̍k ê ge̍h, in-uī 8 ge̍h sī chia ê pàng-kè (lán Tâi-oân ê hioh-joa̍h, chóng-sī chia thong-nî lóng-sī joa̍h-thiⁿ, bô kóng hioh-joa̍h), koh hái-éng siāng chēng, ū sè-kài ê tē it toā ê ku tī goán chia siⁿ nn̄g, tuì Sin-ka-pho á-sī sai hái-hoāⁿ; chiâⁿ-chheng chiâⁿ-bān ê lâng, lâi kàu chin chió lâng, chin an-chēng ē tang hái-hoāⁿ goán chia.

I. Bô-êng.

Kap lán Tâi-oân sio-siāng, lī-iōng pàng-kè, ū tāi-hoē sèng ê chheng-liân chìn-siu-hoē (12-17 ji̍t) tī Sin-ka-pho. goá tio̍h sái-chhia chài chheng-liân lâng cháu chi̍t-ji̍t (370 eng-lí) ê lō͘ khì chham-ka. Tńg-lâi chiap-soà ū Khu-hoē (Tiong-hoē) sèng ê chheng-liân chìn-siu-hoē (8 ge̍h 23 ji̍t) tī lī goá chia iok ū Pîn-tong kàu Tâi-tiong ê hn̄g ê Wakaf Bharuh ê só͘-chāi khui-hoē. Hit-ji̍t iā-sī Wakaf Bharuh sin lé-pài tn̂g ê hiàn-tn̂g-sek, hit-àm ū Khu-hoē ê Siông-uí-hoē, hoē-āu tńg lâi kàu chhù tú-tú poàⁿ-mî 2 tiám. Kin-nî iā-sī goá chò Khu-hoē ê chú-se̍k (gī-tiúⁿ), só͘-í chū-jiân chek-jīm tāng, hū -chek choē-choē kang. Tī ge̍h-boé (31 ji̍t) Má-lâi-a To̍k-li̍p ji̍t, iā-sī tī Wakaf Bahruh kàu-hoē beh khui Khu-hoē sèng ê Hū-lú chìn-siu-hoē. Goán chia ū 20 goā miâ beh chham-ka, só͘-í tio̍h 5 tâi chhia khì, M̄-nā goá, liân Bo̍k-su-niû iā tio̍h sái tiám-goā-cheng ê chhia, chài hù-hoē ê lâng. Soan-kàu-su-niû m̄-nā tio̍h choè sái-chhia-ê iā tio̍h choè káng-su, choè niá-tāi, boē sán mā tio̍h sán, boē o͘ mā tio̍h o͘.

II. Chia ê bêng-sèng:

a. Chheng-chēng chhin-chhiūⁿ ô͘-chuí ê hái-piⁿ, ū iâ-chí chhiū lîm, bo̍k-moâ-hông ê chhong-lîm, boē kè-tit koan-kong lú-kheh chheng chin-chiàⁿ sī thian-jiân ê suí. Tīⁿ Choân-seng Bo̍k-su, Ô͘ Bō͘-seng Bo̍k-su tī chêng-ge̍h ji̍t lóng ū hióng-siū hit ê Siōng-tè só͘ chhòng-chō bí-lē uí-tāi ê toā chū-jiân. Tī chit ê khoân-kéng tiong it-chhè ê kan-khó͘ lóng siau bô-khí.

b. Toā-ku siⁿ nn̄g.

Muí chi̍t nî ê 7. 9 ge̍h, tī lī goá chia 39 eng-lí ê hái-kîⁿ, it-tēng ta̍k mî ū chi̍t chheng kin í-siōng ê toā-ku khí lâi siⁿ-nn̄g. Chi̍t chiah pêng-kun siⁿ 100 lia̍p, tio̍h ēng pò͘-tē té. Chit-khoán ku, tuì tò-uī lâi, hiān-sî iáu-kú gián-kiù tiong. Chiàu ha̍k-chiá kóng chit-Chióng ku chí-ū tī chia siⁿ-nn̄g. Si̍t-chāi chin kî-biāu, ta̍k nî siāng sî-chūn, in oē tńg lâi siāng só͘-chāi, goá kap Ô͘ Bō͘-seng Bo̍k-su só͘ khoàⁿ ê hit chiah sī Í64 hō (chèng-hú jîn-oân ū choè kì-hō teh thóng-kè) Ô͘ Bō͘-sêng Bo̍k-su kóng U-la-ma tha-ló͘ ê kò͘-sū ê ku, poh-káⁿ sī chit-khoán ê ku”. Goá siūⁿ sī, in-uī 2, 3 lâng peh khí khì chē i iā lóng bô kám-kak tāng, kā lí phāiⁿ khì hái-nih. M̄-chai ū sím-mi̍h lâng ài khì liông-ông kiong, chhiáⁿ lín lâi goán chia, goá oē kā lí kài-siāu.

Má-lâi-a, Teng-ka-lô͘

Tân Hāu-chàn siá.

漢羅（Ùi原文改寫）Permalink

海外宣教師通訊

陳效贊

1968.09.15  1038號P.10

佇主內面所數念親愛的兄弟姊妹平安。

小弟代先代表踮佇新加坡的董Kûn-ka牧師，馬來西亞邱Í-chèng牧師佮阮全家致意向各位請安。阮受派來佇星馬的宣教師，佇前日有相佮參詳，3人輪流逐月報阮佇遮的工作，消息予諸位知，向望大家較會關心，相替祈禱。

今我負擔8月份的消息。8月是阮遮做鬧熱，人客上濟，第一無閒，也第一快樂的月，因為8月是遮的放假(咱台灣的歇熱，總是遮通年攏是熱天，無講歇熱)，閣海湧上靜，有世界的第一大的龜佇阮遮生卵，對新加坡抑是西海岸；成千成萬的人，來到真少人，真安靜的東海岸阮遮。

I. 無閒。

佮咱台灣相siāng，利用放假，有大會聖的青年進修會(12-17日)佇新加坡。我著駛車載青年人走一日(370英里)的路去參加。轉來接紲有區會(中會)聖的青年進修會(8月23日)佇離我遮約有屏東到台中的遠的Wakaf Bharuh的所在開會。彼日也是Wakaf Bharuh新禮拜長的獻堂式，彼暗有區會的常委會，會後轉來到厝拄拄半暝2點。今年也是我做區會的主席(議長)，所以自然責任重，負責濟濟工。佇月尾(31日) 馬來亞獨立日，也是佇Wakaf Bahruh教會欲開區會聖的婦女進修會。阮遮有20外名欲參加，所以著5台車去，毋但我，連牧師娘也著駛點外鐘的車，再赴會的人。宣教師娘毋但著做駛車的也著做講師，做領隊，袂瘦嘛著瘦，袂烏嘛著烏。

II. 遮的名勝：

a. 清靜親像湖水的海邊，有椰子樹林，木麻黃的chhong-lîm，袂過得觀光旅客稱真正是天然的媠。鄭泉聲牧師，胡茂生牧師佇前月日攏有享受彼个上帝所創造美麗偉大的大自然。佇這個環境中一切的艱苦攏消無起。

b. 大龜生卵。

每一年的7.9月，佇離我遮39英里的海墘，一定逐暝有一千斤以上的大龜起來生卵。一隻平均生100粒，著用布袋貯。這款龜，對佗位來，現時猶過研究中。照學者講這種龜只有佇遮生卵。實在真奇妙，逐年siāng時陣，in會轉來siāng所在，我佮胡茂生牧師所看的彼隻是Í64號(政府人員有做記號咧統計)胡茂生牧師講U-la-ma tha-ló͘的故事的龜，卜敢是這款的龜」。我想是，因為2，3人peh 起去坐伊也攏無感覺重，共你揹去海裡。毋知有甚物人愛去龍王宮，請恁來阮遮，我會共你介紹。

馬來亞，Teng-ka-lô͘

陳效贊寫。