故黃李紡絲別世
Kò͘ N̂g Lí Pháng-si Pia̍t-sè
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第1038期 |
| 日期 | 1968/9 |
| 頁數 | 17 |
白話字（原文數位化）
Kò͘ N̂g Lí Pháng-si Pia̍t-sè
Lí Tiông-ku̍t
1968.09.15 1038 hō P.17
N̂g Lí Pháng-si pia̍t-sè
黃李紡絲女士別世
Kò͘ N̂g Lí Pháng-si Lú-sū tī Chú-āu 1968 nî 8 ge̍h 23 ji̍t siōng-ngó͘ 7 tiám siū Chú kéng-tiàu êng-kui thiⁿ-siâⁿ. Hióng-nî 71 hè. Pháng-si Lú-sū sī hiān-jīm Thài-pêng kéng kàu-hoē ê N̂g Siū-huī Tiúⁿ-ló ê hū-jîn-lâng.
Pháng-si Lú-sū chhut-sì tī Phîⁿ-ô͘, sī Má-keng kàu-hoē ê thâu chi̍t ê tiúⁿ-ló Lí Kí ê tē jī cha-bó͘-kiáⁿ. Lí Tiúⁿ-ló ê ka-têng sàn-chhiah, chóng-sī i thiàⁿ Chú ê jia̍t-chêng kap sìn-sim si̍t-chāi iâⁿ-kè bu̍t-chit ê khùn-lân. Lí Tiúⁿ-ló ēng Sèng-keng kap sìn-gióng ê keng-giām lâi kà-sī i ê choân-ke, hō͘ in ê lāi-sim lóng ū Iâ-so͘ ê Sîn.
Tī 1911 nî Sòng Tiong-kian Bo̍k-su-niû kàu Má-keng hā-kuì ê kang-chok, hoat-kiàn tio̍h Pháng-si chí-bē ê thian-châi kap phín-hēng, chiū kā i chhut chióng-ha̍k-kim, hō͘ i lâi Hú-siâⁿ Lú-o̍h tha̍k-chheh. Tī ha̍k-hāu ê sî, Pháng-si Lú-sū chin siū su-tióng ê ài-hō͘ kap tông-ha̍k ê khim-gióng, i tē jī miâ lâi pit-gia̍p Lú-o̍h. āu-lâi lâu tī ha̍k-hāu choè sian-siⁿ kà-chheh.
Í-āu i kap N̂g Siū-huī Thoân-tō-su kiat-hun, sian-āu tī Toā-tō͘ kap Kiâm-chuí kàu-hoē choè kang 5 nî kú. N̂g Thoân-tō-sū choè oân 5 nî ê gī-bū āu, kàu Ji̍t-pún chìn-siu khí-kho, tī hit tiong-kan, i ia̍h chin khó͘-sim tī-ke, kà kiáⁿ tàu thàn-chîⁿ. iā ēng hit ê sî-kan siu-oân chō͘-sán-sū ê hùn-liān. Í-āu i pí i ê tiōng-hu seng tò-tńg lâi Tâi-lâm, thàn-chîⁿ kià hō͘ i ê tiōng-hu oân-sêng ha̍k gia̍p. I keng-kè tī sìn-sim kap seng-oa̍h ê khó͘-tò͘, hùn-liān ka-kī, pang-chān tiōng-hu kap ka-têng.
Pháng-si Chí-bē tēng-ku tī Tâi-lâm í-āu, choè Thài-pêng-kéng kàu-hoē ê chip-sū sian-āu 40 nî, lâi hoāⁿ châi-chèng ê chit-bū, i tuì kàu-hoē ê kòng-hiàn si̍t-chāi chin toā.
Sui-jiân tī i ê jio̍k-thé ū toà sim-chōng-pīⁿ ê chhì 17 nî kú, N̂g Tiúⁿ-ló lóng bô poàⁿ kù ê oàn-giân, sî-sî tī i ê sin-piⁿ lâi chiàu-kò͘ i, hō͘ i an-sim tò-khì Chú ê chhù. Kò-pia̍t-sek tī 8 ge̍h 27 ji̍t hā-ngó͘ 2 tiám, tī Thài-pêng-kéng kàu-hoē, ū 300 goā lâng lâi hù-hoē.
漢羅（Ùi原文改寫）
故黃李紡絲別世
李長貴
1968.09.15 1038號P.17
黃李紡絲別世
黃李紡絲女士別世
故黃李紡絲女士佇主後1968年8月23日上午7點受主揀召榮歸天城。享年71歲。紡絲女士是現任太平境教會的黃受惠長老的婦人人。
紡絲女士出世佇澎湖，是馬公教會的頭一個長老李Kí的第二查某囝。李長老的家庭散赤，總是伊疼主的熱情佮信心實在贏過物質的困難。李長老用聖經佮信仰的經驗來教示伊的全家，予in的內心攏有耶穌的神。
佇1911年宋中堅牧師娘到馬公下跪的工作，發見著紡絲姊妹的天才佮品行，就共伊出獎學金，予伊來府城女學讀冊。佇學校的時，紡絲女士真受師長的愛護佮同學的欽仰，伊第二名來畢業女學。後來留佇學校做先生教冊。
以後伊佮黃受惠傳道士結婚，先後佇大肚佮鹹水教會做工5年久。黃傳道士做完5年的義務後，到日本進修齒科，佇彼中間，伊亦真苦心佇家，教囝鬥趁錢。也用彼個時間修完助產士的訓練。以後伊比伊的丈夫先倒轉來台南，趁錢寄予伊的丈夫完成學業。伊經過佇信心佮生活的苦鬥，訓練家己，幫贊丈夫佮家庭。
紡絲姊妹定居佇台南以後，做太平境教會的執事先後40年，來hoāⁿ財政的職務，伊對教會的貢獻實在真大。
雖然佇伊的肉體有帶心臟病的刺17年久，黃長老攏無半句的怨言，時時佇伊的身邊來照顧伊，予伊安心倒去主的厝。告別式佇8月27日下願2點，佇太平境教會，有300外人來赴會。