Chheng-liân kui Chú nâ-kiû-tuī lâi Hó͘-béPermalink

文獻資訊Permalink

白話字（原文數位化）Permalink

Chheng-liân kui Chú nâ-kiû-tuī lâi Hó͘-bé

1968.06.01  1031 hō  P.15

Tī 5 ge̍h 19 siōng-ngó͘ Kui Chú Nâ-kiû-tuī tī Lí Sìn-chiong Sian-siⁿ léng-tō ê ē-bīn lâi pún-hoē chham-ka lé-pài.  Hit chá-khí ê lé-pài iû An Tek-seng Bo̍k-su káng-tō, liáu-āu ū Lí Sian-siⁿ ê kán-tan kài-siāu.  Jiân-āu in ū chiong in chin suí ê siaⁿ-sim phoè-ha̍p in ê ga̍k-khì, chhiùⁿ chhut chin hó thiaⁿ ê si-koa, lâu chin chhim ê ìn-siōng tī hoē-chiòng ê náu-tiong.

Lé-pài soah ū kap pún-hoē ê chheng-liân kap tióng-chip choè chin-hó ê kau-poê.  Tī 5 ge̍h 20 ji̍t tiong-ngó͘, Kui Chú Nâ-kiû-tuī ū kap 省立虎尾中學ê hāu-tuī choè iú-gî-sài, in-uī chin chá chiū tiû-pī, só͘-í iā ū hùn-kūn ê ha̍k-hāu phài tāi-piáu lâi chham-koan.  Tuì tī in ū iu-bí ê ki-su̍t, koh ū chin hó ê tiâu-kiāⁿ, só͘-í in ê kiû-gē piáu-hiān liáu chin suí, hō͘ chham-ka ê ha̍k-seng lóng khim-phoè in ê cheng-sîn kap kī-su̍t.

Tī hit tiong-kan, in iû-goân hián-chhut in iu-bí ê siaⁿ-im kap in thiàⁿ Chú ê jia̍t-chêng, chiong Chú ê thiàⁿ pun hō͘ chham-ka ê ha̍k-seng nn̄g chheng kuí miâ, koh chiong ū ì-gī ê hok-im-toaⁿ pun hō͘ muí chi̍t uī chham-ka ê lâng.  Tī nn̄g tiám poàⁿ kiat-sok!

漢羅（Ùi原文改寫）Permalink

青年歸主籃球隊來虎尾

1968.06.01  1031號P.15

佇5月19上午歸主籃球隊佇李信彰先生領導的下面來本會參加禮拜。彼早起的禮拜由 安德生牧師講道，了後有李先生的簡單介紹。然後in有將in真媠的siaⁿ-sim配合in 的樂器，唱出真好聽的詩歌，留真深的印象佇會眾的腦中。

禮拜煞有佮本會的青年佮長執做真好的交陪。佇5月20日中午，歸主籃球隊有佮省立虎尾中學的校隊做友誼賽，因為真早就籌備，所以也有附近的學校派代表來參觀。對佇in有優美的技術，閣有真好的條件，所以in的球藝表現了真媠，予參加的學生攏欽佩in的精神佮技術。

佇彼中間，in猶原顯出in優美的聲音佮in疼主的熱情，將主的疼分予參加的學生兩千幾名，閣將有意義的福音段分予每一位參加的人。佇兩點半結束！