Tân Sek-chong phok-sū chiū-jīm Tâi-oân sîn-ha̍k-īⁿ īⁿ-tiúⁿPermalink

文獻資訊Permalink

白話字（原文數位化）Permalink

Tân Sek-chong phok-sū chiū-jīm Tâi-oân sîn-hak-iⁿ7 īⁿ-tiúⁿ

1968.06.01  1031 hō  P.7

Tâi-oân Sîn-ha̍k-īⁿ chhòng-siat 86 nî lâi, thâu chi̍t pái iû pún-toē lâng choè īⁿ-tiúⁿ ê Tân Sek-chong Bo̍k-su, 5 ge̍h 9 ji̍t hā-ngó͘ nn̄g tiám tī kai īⁿ lé-pài-tn̂g kú-hêng chiū-jīm tián-lé.  Tián-lé iû Pak-pō͘ Tāi-hoē Gī-tiúⁿ Gô͘ Chheng-ek Bo̍k-su chú-chhî.  Lâi-pin ê tiong-kan lâi koan-lé kap tāi-piáu tì-sû ê ū:  Chóng-hoē Chóng-kàn-su Chiong Bō͘-sêng Bo̍k-su, Tâi-lâm Sîn-ha̍k-īⁿ ĪN-tiúⁿ Sòng Choân-sēng Bo̍k-su, kap oē-lí-kong-hoē ê tāi-piáu téng 200 goā miâ.

Tân Sek-chong Bo̍k-su chiū-jīm Tâi-oân Sîn-ha̍k-īⁿ ê īⁿ-tiúⁿ í-āu, i ū hoat-piáu chi̍t phiⁿ chiū-jīm ián-káng, tī ián-káng ê tiong-kan i kóng,”Kàu-hoē chiū-sī thoân Siōng-tè tī Iâ-so͘ Ki-tok lāi-bīn, Tō chiâⁿ jio̍k-thé ê hok-im; lâng nā tiàm tī Iâ-so͘ Ki-tok ê lāi-bīn, chiah ū ǹg-bāng kap oa̍h-miā.”Tân ĪN-tiúⁿ koh kóng,”Kim-ji̍t Sîn-ha̍k kàu-io̍k ê guî-ki chiū-sī chí-ū chù-tiōng ha̍k-būn, lí-sèng ê gián-kiù, hut-lio̍k sìn-gióng ê chō-chiū.  Só͘-í kim-āu ê Sîn-ha̍k kàu-io̍k tio̍h tiong-si̍t tī Sèng-keng ê khó-chhat.  Siāng-sî iā tio̍h phoè-ha̍p lûn-lí tō-tek, sìn Siōng-tè, thoân Siōng-tè.  Í-goā iā su-iàu thiàⁿ ê kàu-io̍k kap si̍t-hêng thiàⁿ ê kà-sī.  án-ni chō-chiū chhut-lâi ê kang-lâng chiah oē thang kòng-hiàn siā-hoē, êng-kng Siōng-tè, lī-ek chèng-lâng.”

Tián-lé soah, Tâi-oân Sîn-ha̍k-īⁿ ū khui tê-piáⁿ-hoē chiau-thāi lâi-pin, hiòng lâi-pin seh-siā.  Tuì Tân Sek-chong Bo̍k-su choè Tâi-oân Sîn-ha̍k-īⁿ īⁿ-tiúⁿ í-āu, kai-īⁿ Táng-sū-tiúⁿ Sòng Choân-chiong Tiúⁿ-ló chin ǹg-bāng chhú-āu kai-īⁿ oē chìn chi̍t pō͘ kap Tâi-lâm Sîn-ha̍k-īⁿ ha̍p-chok, saⁿ-kap kè-e̍k Sîn-ha̍k kàu-io̍k ê hong-chiam, ló͘-le̍k chhiong-si̍t Sîn-ha̍k kàu-io̍k ê loē-iông.

漢羅（Ùi原文改寫）Permalink

陳皙宗博士就任台灣神學院院長

1968.06.01  1031號P.7

台灣神學院創設86年來，頭一擺由本地人做院長的陳皙宗牧師，5月9日下午兩點佇該院禮拜堂舉行就任典禮。典禮由北部大會議長吳清鎰牧師主持。來賓的中間來觀禮佮代表致詞的有：總會總幹事鍾茂成牧師，台南神學院院長宋泉盛牧師，佮衛理公會的代表等200外名。

陳皙宗牧師就任台灣神的學院的院長以後，伊有發表一篇就任演講，佇演講的中間伊講，「教會就是傳上帝佇耶穌基督內面，道成肉體的福音；人若踮佇耶穌基督的內面，才有向望佮活命。」陳院長閣講，「今日神學教育的危機就是只有注重學問，理性的研究，忽略信仰的造就。所以今後的神學教育著忠實佇聖經的 考察。Siāng時也著配合倫理道德，信上帝，傳上帝。以外也需要疼的教育佮實行疼的教示。按呢造就出來的工人才會通貢獻社會，榮光上帝，利益眾人。」

典禮煞，台灣神學院有開茶餅會招待來賓，向來賓說謝。對陳皙宗牧師做台灣神學院院長以後，該院董事長宋泉璋長老真向望此後該院會進一步佮台南神學院合作，相佮計畫神學教育的方針，努力充實神學教育的內容。