媽媽合唱傳來虎尾演唱
Ma-ma ha̍p-chhiùⁿ-thoân lâi hó͘-bē ián-chhiùⁿ
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第1031期 |
| 日期 | 1968/6 |
| 頁數 | 15-16 |
白話字（原文數位化）
Ma-ma ha̍p-chhiùⁿ-thoân lâi hó͘-bē ián-chhiùⁿ
媽媽合唱團來虎尾演唱
1968.06.01 1031 hō P.15-P.16
Tâi-tiong Tiong-hàu-lō͘ kàu-hoē, Ma-ma Ha̍p-chhiùⁿ-thoân tī 5 ge̍h 19 ji̍t hā-ngó͘ 5 tiám chó-iū, tī Ông Siù-eng Hoē-tiúⁿ léng-tō ê ē-bīn, chē 3 tâi chū-ka-iōng ê chhia lâi pún-hoē. Tī hit àm 7 tiám poàⁿ khai-sí kú-hêng ián-chhiùⁿ-hoē. Lāi-iông ū ha̍p-chhiùⁿ, saⁿ-têng-chhiùⁿ, to̍k-chhiùⁿ, chê-chhiùⁿ. Só͘ chhiùⁿ ê ū chong-kàu si-koa, ū gē-su̍t koa-khek, iā ū lán ê bîn-iâu.
Tuì tī in ê jia̍t-chêng, í-ki̍p thiàⁿ Chú ê cheng-sîn, koh-chài ta̍k lâng im-ga̍k sò͘-ióng lóng chin hó, só͘-í chhiùⁿ liáu chin sêng-kong, sui-jiân thoân-oân ū lâng ê nî-hè í-keng chhiau kè 70, chòng-sī in ê siaⁿ-im bô khah su hiah ê cha-bó͘ gín-ná ê siaⁿ.
In-uī Ma-ma Ha̍p-chhiùⁿ-thoân, in-uī bat tī tiān-sī ián-chhiùⁿ kè, só͘-í tuì thiaⁿ-chiòng to ū khip-ín-le̍k. Sīm-chì ū hoē-goā ê lāng chin-choē lâi thiaⁿ, in-uī án-ni tì-kàu ū lâng tio̍h ài chē tī goā-bīn lâi him-sióng.
Hit àm ê chham-ka chiá iok 300 miâ, muí tiûⁿ to ū chin jia̍t-lia̍t ê kó͘-chióng siaⁿ.
ián-chhiùⁿ tiong koh phoè-ha̍p Lū Chhun-tiông Bo̍k-su ê ga̍k-khek ê kán-kài, í-ki̍p kài-siāu ha̍p-chhiùⁿ-thoân kap中興新村教會ê sū-chêng, in-uī Lū Bo̍k-su ê kài-siāu put-chí ū la̍t, koh oē kám-tōng thiaⁿ-chiòng, só͘-í tuì thâu kàu bé bô ū léng-tiûⁿ, thang kóng sī chin sêng-kong ê ián-chhiùⁿ-hoē.
Hit àm ê ián-chhiùⁿ sī uī-tio̍h中興新村教會beh khí lé-pài-tn̂g lâi pún-hoē bō-koan ê, só͘-í pún-hoē ū chiong hit àm ê hiàn-kim choân-pō͘ hōng-hiàn choè中興新村教會khí lé-pài-tn̂g ê lō͘-ēng. Goān Chú chiok-hok kàu-hoē kap chiah ê khéng uī Chú tio̍h-boâ ê Ma-ma Ha̍p-chhiùⁿ-thoân.
漢羅（Ùi原文改寫）
媽媽合唱傳來虎尾演唱
媽媽合唱團來虎尾演唱
1968.06.01 1031號P.15-P.16
台中忠孝路教會，媽媽合唱團佇5月19日下午5點左右，佇王秀英會長領導的下面，坐3台自家用的車來本會。佇彼暗7點半開始舉行演唱會。內容有合唱，三重唱，獨唱，齊唱。所唱的有宗教詩歌，有藝術歌曲，也有咱的民謠。
對佇in的熱情，以及疼主的精神，閣再逐人音樂素養攏真好，所以唱了真成功，雖然團員有人的年歲已經超過70，總是in的聲音無較輸遐的查某囡仔的聲。
因為媽媽合唱團，因為捌佇電視演唱過，所以對聽眾都有吸引力。甚至有會外的人真濟來聽，因為按呢致到有人著愛坐佇外面來欣賞。
彼暗的參加者約300名，每場都有真熱烈的鼓掌聲。
演唱中閣配合呂春長牧師的樂曲的簡介，以及介紹合唱團佮中興新村教會的事情，因為呂牧師的介紹不止有力，閣會感動聽眾，所以對頭到尾無有冷場，通講是真成功的演唱會。
彼暗的演唱是為著中興新村教會欲起禮拜堂來本會募捐的，所以本會有將彼暗的獻金全部奉獻做中興新村教會起禮拜堂的路用。願主祝福教會佮遮的肯為主著磨的媽媽合唱團。