世界偉大的女性海倫凱勒別世
Sè-kài uí-tāi ê lú-sèng Hái-lûn-khái-le̍k pia̍t-sè
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第1032期 |
| 日期 | 1968/6 |
| 頁數 | 8 |
白話字（原文數位化）
Sè-kài uí-tāi ê lú-sèng Hái-lûn-khái-le̍k pia̍t-sè
世界最偉大女性之一，海倫凱勒別世
1968.06.15 1032 hō P.8
Khek-ho̍k chhiⁿ-mî kap é-káu, chiâⁿ-choè sè-kài choè uí-tāi ê lú-sèng Hái-lûn-khái-le̍k（Helen Adams Keller）lú-sū tī 6 ge̍h1 hō pia̍t-sè, hióng-nî 88.
Hái-lûn Lú-sū chhut-sì 19 kò-ge̍h chiū hoān tio̍h jia̍t-pīⁿ sit-khì sī-kak kap thèng-kak, chiâⁿ-choè chi̍t ê chhiⁿ-mî koh é-káu ê lâng. Kàu 8 hè ê sî ū chháiⁿ chi̍t uī lāu-su So͘-lē-bûn（Sulli-van）Lú-sū choè ka-têng kàu-su. Tuì Khái-le̍k Lú-sū chū-sin ê thian-chu kap so͘-lē-bûn Lú-sū ê nāi-sim, kàu-tō chìn-pō͘ kàu oē-hiáu kóng Eng-gú, Tek-gú, Hoat-gú, iā bat Hi-pek-lâi-gú. 1904 nî pit-gia̍p Luî-tek Khek-le̍k Tāi-ha̍k-īⁿ tit B.A. ê ha̍k-uī. Í-āu koh tit-tio̍h chin-choē ê êng-ū ha̍k-uī.
I ê it-teng ū choē-choē tù-chok kap kang-ián, chiong toā pō͘-hūn ê sî-kan kap cheng-le̍k kòng-hiàn tī sè-kài sin-thé phoà-siùⁿ ê lâng ê hok-lī. 1937 nî ū khì Ji̍t-pún kok-toē káng-ián, Ji̍t-pún chèng-hú ēng”chún kok-pin khoán-thāi i.”
Tuì Khái-le̍k Lú-sū, Ji̍t-pún San-sek Kun-pêng Sian-siⁿ ū kóng chi̍t toāⁿ kò͘-sū: Ka-têng kàu-su So͘-lē-bûn Lú-sū tuì Khái-le̍k chīn-liōng kà i choē-choē hāng sū, chóng-sī koan-hē Siōng-tè ê chin-lí chin sīn-tiōng m̄-káⁿ kà, āu-lâi chiah chhiáⁿ chi̍t uī bo̍k-su lâi kà i koan-hē Siōng-tè ê sū, hit-sî Hái-lûn kā bo̍k-su kóng,”Lí só͘ kà goá ê Siōng-tè, tī goá ê sim-lâi í-keng lóng chai, chí-ū m̄-chai I sī kiò-choè Siōng-tè nā-tiāⁿ.”I it-seng tuì Siōng-tè khiân-sêng, tī i ê sin-chiūⁿ êng-kng Siōng-tè, lī-ek sè-kan lâng.
漢羅（Ùi原文改寫）
世界偉大女性海倫凱勒別世
世界最偉大女性之一，海倫凱勒別世
1968.06.15 1032號P.8
克服青盲佮啞口，成做世界做偉大的女性海倫凱勒（Helen Adams Keller）女士佇6月1號別世，享年88。
海倫女士出世19個月就患著熱病失去視覺佮聽覺，成做一個青盲閣啞口的人。到8歲的時有請一位老師蘇利文（Sulli-van）女士做家庭教師。對凱勒女士自身的天資佮蘇利文女士的耐心，教導進步到會曉講英語，德語，法語，也捌希伯來語。1904年畢業Luî-tek Khek-le̍k大學院得B.A.的學位。以後閣得著真濟的榮譽學位。
伊的一生有濟濟著作佮講演，將大部分的時間佮精力貢獻佇世界身體破相的人的福利。1937年有去日本各地講演，日本政府用「準國賓款待伊。」
對凱勒女士，日本San-sek Kun-pêng先生有講一段故事：家庭教師蘇利文女士對凱勒盡量教伊濟濟項事，總是關係上帝的真理真慎重毋敢教，後來才請一位牧師來教伊關係上帝的事，彼時海倫共牧師講，「你所教我的上帝，佇我的心內已經攏知，只有毋知伊是叫做上帝若定。」伊一生對上帝虔誠，佇伊的身上榮光上帝，利益世間人。