英國聖公會與衛理公會計劃聯合
Eng-kok Sèng-kong-hoē kap oē-lí-kong-hoē Kè-e̍k Liân-ha̍p
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第1030期 |
| 日期 | 1968/5 |
| 頁數 | 6 |
白話字（原文數位化）
Eng-kok Sèng-kong-hoē kap oē-lí-kong-hoē Kè-e̍k Liân-ha̍p
1968.05.15 1030 hō P.6
英國聖公會與衛理公會計劃聯合
Keng-kè nn̄g sè-kí ê hun-lia̍t, choè-kūn Eng-kok Sèng-kong-hoē kap in hiaⁿ-tī oē-lí-kong-hoē kè-e̍k beh liân-ha̍p. In kè-khì ū chin-choē ê bô sio-siâng, chhin-chhiūⁿ Eng-kok Sèng-kong-hoē ê sìn-tô͘, chin chun-tiōng in ê chú-kàu chit-bū（主教職務）, ia̍h kap Eng-kok ê ông-uī ū chin bi̍t-chhiat ê koan-hē. oē-lí-kong-hoē chin ài in ê Sèng-si, ia̍h khah chū-iû, jī-chhiáⁿ iā kiông-tiau siā-hoē hok-im.（社會福音）.
Sui-jiân in ū chin-choē ê bô sio-siâng, chóng-sī tī sì-ge̍h chhoe; nn̄g pêng ê kàu-hoē lóng tông-ì chi̍t ê ha̍p-it（合一）ê kè-e̍k. Ká-sú nā bô kî-thaⁿ ê būn-toê, chiū tī 1980 nî Eng-kok oē chhut-hiān chi̍t ê ha̍p-it ê kàu-hoē lah. In ǹg-bāng oē siau-tû nn̄g pêng kàu-hoē kan ê phian-kiàn（偏見）. Kìm chiú ê oē-lí-kong-hoē ê sìn-tô͘, bô beh koh kian-chhî tī Sèng-chhan ê sî ēng phû-tô-chiap, Sèng-kong-hoē ê sìn-tô͘, iā bô beh iau-kiû oē-lí-kong-hoē ê hoē iú ēng phû-tô-chiú lâi choè Sèng-chhan. Jî-chhiáⁿ nn̄g pêng ê chú-kàu（主教）, á-sī bo̍k-su（牧師）, iā beh hō͘-siong lâi àn-chhiú hong-li̍p（封立）.
Sèng-kong-hoē chiū-sī Eng-kok kok-kàu, in tī 16 sè-kí chiū thoat-lī Lô-má Thian-chú-kàu（羅馬天主教）lâi sêng-li̍p in ka-tī ê kàu-hoē. Chōng-sī in iáu pó-chhî chú-kàu ê chè-tō͘（主教制度）, iā chin chù-tiōng gî-sek. Kàu tī 18 sè-kí, kang-gia̍p kek-bēng ê sî, Eng-kok kàu-hoē chiām-chiām hú-pāi, Gû-tin tāi-ha̍k（Oxfood University→應該是Oxford）chi̍t ê kàu-siū miâ uī-su-lé（Wesley）khí-lâi choè hoàn-chhíⁿ（喚醒）ê kang-chok, kú-hêng lō͘-thiⁿ ê pò͘-tō（露天佈道）, iā tit-tio̍h choē-choē lâng ê hióng-èng（響應）, hō͘ Eng-kok ê kàu-hoē tit-tio̍h ho̍k-heng, chóng-sī tng-sî ê chú-kàu kìm-chí i káng-tō（講道）, iā kìm-chí i kap i ê ióng-hō͘-chiá（擁護者）chiū Sèng-chhan. Ui-su-lé chiū ka-kī siú Sèng-chhan, iā hong-li̍p chú-kàu, koh phài soan-kàu-su kàu goā-kok thoân-tō. Tuì án-ni, oē-lí-kong-hoē chiū chiām-chiām sêng-li̍p, kàu kin-á-ji̍t í-keng chiâⁿ-choè sè-kài sì toā kàu-phài chi it.
Sui-jiân in nn̄g ê kàu-phài tī kè-khì ū bô hó-sè ê só͘-chāi, chóng-sī hiān-chāi in lóng ēng chin sêng-ì ê sim lâi kè-e̍k hô-hó ê tāi-chì, tâng-sim tui-kiû chi̍t ê Siōng-tè, chi̍t ê kàu-hoē ê ha̍p-it. Chit ê ha̍p-it iā chiū-sī Phó͘-sè Kàu-liân（普世教聯）só͘ teh ló͘-le̍k ê bo̍k-phiau.
漢羅（Ùi原文改寫）
英國聖公會與衛理公會計劃聯合
1968.05.15 1030號 P.6
英國聖公會與衛理公會計劃聯合
經過兩世紀的分裂，最近英國聖公會佮in兄弟會理公會計畫欲聯合。In過去有真濟的無相像，親像英國聖公會的信徒，真尊重in的主教職務，亦佮英國的王位有真密切的關係。衛理公會真愛in的聖詩，亦較自由，而且也強調社會福音。
雖然in有真濟的無相像，總是佇四月初；兩爿的教會攏同意一個合一的計畫。假使若無其他的問題，就佇1980年英國會出現一個合一的教會lah。In向望會消除兩爿教會間的偏見。禁酒的衛理公會的信徒，無欲閣堅持佇聖餐的時用葡萄汁，聖公會的信徒，也無欲要求衛理公會的會有用葡萄酒來做聖餐。而且兩爿的主教，抑是牧師，也欲互相來按手封立（封立）。
聖公會就是英國各教，in佇16世紀就脫離羅馬天主教來成立in家己的教會。總是in猶保持主教的制度，也真注重儀式。到佇18世紀，工業革命的時，英國教會漸漸腐敗，牛津大學（Oxfood University→應該是Oxford）一個教授名衛斯理(Wesley）起來做喚醒的工作，舉行露天的佈道，也得著濟濟人的響應，予英國的教會得著復興，總是當時的主教禁止伊講道，也禁止伊佮伊的擁護者就聖餐。衛斯理(Wesley）就家己守聖餐，也封立主教，閣派宣教師到外國傳道。對按呢，衛理公會就漸漸成立，到今仔日已經成做世界四大教派之一。
雖然in兩個教派佇過去有無好勢的所在，總是現在in攏用真誠意的心來計畫和好的代誌，同心追求一個上帝，一個教會的合一。這個合一也就是普世教聯所咧努力的目標。