美國，日本教會追悼金馬丁博士

Bí-kok, Ji̍t-pún kàu-hoē tui-tō kim Má-teng phok-sū

文獻資訊

項目	資料
作者	無lo̍h名
卷期	台灣教會公報
卷期	第1030期
日期	1968/5
頁數	7

白話字（原文數位化）

Bí-kok, Ji̍t-pún kàu-hoē tui-tō kim Má-teng phok-sū

1968.05.15  1030 hō  P.7

美國,日本教會追悼金馬丁博士

Bí-kok kàu-hoē Hia̍p-gī-hoē（NCCC）Gī-tiúⁿアーサフレシングhiòng-kok kàu-hoē hoat-piáu, chhiáⁿ tī 4 ge̍h 7 hō hā-ngō͘ 4 tiám uī-tio̍h Kim Má-teng Bo̍k-su ê sí piáu-sī ai-tō ê ì-sù.  Ji̍t-pún Ki-tok-kàu Hia̍p-gī-hoē tī 4 ge̍h 6 ji̍t ēng tiān-pò hiòng Bí-kok Kàu-hoē Hia̍p-gī-hoē piáu-sī Kim Phok-sū siū àm-sat ê ai-tō.  Tiān-bûn chhin-chhiūⁿ ē-bīn:”Ji̍t-pún ê chu kàu-hoē ai-sioh Kim Phok-sū ê pi-ke̍k-tek ê sí, iā uī-tio̍h kuì kàu-hoē oē thang kè-sio̍k uī-tio̍h siā-hoē chèng-gī ló͘-le̍k lâi kî-tó.  Ji̍t-pún Ki-tok-kàu Hia̍p-gī-hoē beh tī 4 ge̍h 10 ji̍t hā-ngó͘ 6 tiám poàⁿ kú-hêng tui-tō kì-liām lé-pài.”

Kim Má-teng Phok-sū sī Bí-kok Lâm-pō͘ Chìm-sìn-hoē ê o͘-lâng bo̍k-su, sī o͘-lâng ê léng-tō-chiá, chú-chhiòng hui pō-le̍k chú-gī;  koàn-thiat bô tí-khòng ê tí-khòng, kin-nî 39 hè, tī 4 ge̍h 4 hō àm-sî 6 tiám, khó-sioh siū àm-sat lâi pia̍t-sè.

Tng hit sî Kim Bo̍k-su tú tī Bēng-hui-su chhī, chi̍t keng siok-sià ê lâu-téng hiòng ē-bīn ê chō͘-chhiú hoan-hù tio̍h an-pâi hit àm ê chū-hoē ēng”Chun-kuì ê Chú ah, goān lí khan goá ê chhiú.”Hit sî tuì chi̍t tâi teh cháu ê khì-chhia siā-ke̍k ê chèng-chí siā tio̍h thâu-pō͘.  Chi̍t tiám cheng āu chiū kè-sin.

Chit ê uī-tio̍h jîn-chióng chha-pia̍t thiat-hoè ūn-tōng hiàn-sin ê bo̍k-su; tī 1964 nî ū tit-tio̍h諾貝爾hô-pêng chióng-kim ê êng-ū.  I ê sí hō͘ choân sè-kài ê lâng só͘ oán-sioh.

漢羅（Ùi原文改寫）

美國，日本教會追悼金馬丁博士

1968.05.30  1030號  P.7

美國，日本教會追掉金馬丁博士

美國教會協議會（NCCC）議長アーサフレシング向各教會發表，請佇4月7號下午4點為著金馬丁牧師的死表示哀悼的意思。日本基督教協議會佇4月6日用電報向美國教會協議會表示金博士受暗殺的哀悼。電文親像下面：「日本的諸教會哀惜金博士的悲劇tek的死，也為著貴教會會通繼續為著謝會正義努力來祈禱。日本基督教協議會欲佇4月10日下午 6點半舉行追悼記念禮拜。」

金馬丁博士是美國南部浸信會的烏人牧師，是烏人的領導者，主倡非暴力主義；貫徹無抵抗的抵抗，今年39歲，佇4月4號暗時6點，可惜受暗殺來別世。

當彼時金牧師拄佇孟菲斯市，一間宿舍的樓頂向下面的助手吩咐著安排彼暗的聚會用「尊貴的主ah，願祢牽我的手。」彼時對一台teh走的汽車射擊的銃子射著頭部。一點鐘後就過身。

這個為著人種差別thiat-hoè運動獻身的牧師；佇1964年有得著諾貝爾和平獎金的榮譽。伊的死予全世界的人所惋惜。