機車愛護者互談會

Ki-chhia ài-hō͘-chiá hō͘-tâm-hoē

文獻資訊

項目	資料
作者	無lo̍h名
卷期	台灣教會公報
卷期	第1030期
日期	1968/5
頁數	11

白話字（原文數位化）

Ki-chhia ài-hō͘-chiá hō͘-tâm-hoē

1968.05.15  1030 hō  P.11

Ka-gī Tiong-hoē tī 5 ge̍h 1 ji̍t ê Lô-tōng-choeh tiàu-khai khiâ ki-chhia ê lâng ê hoē-gī.  Che sī sin ê sū, m̄-nā tuì sìn-gióng ū chō-chiū, ia̍h si̍t-chè chí-tō kau-thong tō-tek, ki-chhia ê pó-ióng téng.

Tì-kàu kéng-kài án-ni kóng,”Chit ê kang eng-kai sī kéng-chhat-kài ài choè ê kang, chóng-sī goán choè boē kàu soá hō͘ lín Ki-tok-kàu lâi choè si̍t-chāi chin to-siā……”

Chit hoê ê ki-chhia hō͘-tâm-hoē, ū 70 miâ chham-ka, kok lâng khiâ ki-chhia; ū 50cc ê iā ū 600cc ê kok-chióng ê ki-chhia lóng ū.  Koh iok chi̍t poàⁿ sī hoē-goā ê lâng, in chham-ka liáu tuì kàu-hoē ū án-ni koan-sim lâng ê sìⁿ-miā hui-siông ê kám-kek.

Hō͘-tâm-hoē hoē-tiûⁿ hun-choè nn̄g só͘-chāi, tāi-seng tī Chiam-soaⁿ piⁿ.  Tī chia ū chhiáⁿ Ka-gī Kang-gia̍p ha̍k-hāu ê lāu-su, Loā Chheng-chûn Sian-siⁿ lâi káng ki-chhia ê kò͘(kó͘)-chō kap siông-sek.  Jiân-āu thó-lūn.  Tē jī hoē-tiúⁿ sī tī Gô͘-hōng-biō, choân-thé hoē-oân hun-choè 7 sió-tuī, keng-kè 32 kong-lí ê lō͘, pâi ki-chhia ê toā-tuī si̍t-chāi chin chòng-koan.

Tī Gō͘-hōng-biō chit hoê ê chú-se̍k Kang Chìn-hoat Bo̍k-su kóng”Au Bí, Ji̍t-pún, Tang Lâm A téng ê kau-thong chêng-hêng.”āu-lâi koh ū Ko Chín-êng Tiúⁿ-ló káng”ki-chhia kà-sú ê kī-su̍t, kap ká-sú-jîn èng ū ê jîn-keh siu-ióng”téng.

Choè-āu ū hō͘ khah ū kī-su̍t ê hoē-oân nn̄g miâ piáu-ián kà-sú te̍k-ki, chin cheng-chhái.

漢羅（Ùi原文改寫）

機車愛護者互談會

1968.05.30  1030號P.11

嘉義中會佇5月1日的勞動節召開騎機車的人的會議。這是新的事，毋但對信仰有造就，亦實際指導交通道德，機車的保養等。

致到警戒按呢講，「這個工應該是警察界愛做的工，總是阮做未到紲予恁基督教來做實在真多謝……」

這回的機車互談會，有70名參加，各人騎機車；有50cc的也有600cc的各種的機車攏有。閣約一半是會外的人，in參加了對教會有按呢關心人的性命非常的感激。

互談會會場分做兩所在，代先佇尖山邊。佇遮有請嘉義工業學校的老師，賴Chheng-chûn先生來講機車的構造佮常識。然後討論。第二會長是佇吳鳳廟，全體會員分做7小隊，經過32公里的路，排機車的大隊實在真壯觀。

佇吳鳳廟這回的主席江進發牧師講「歐美，日本，東南亞等的交通情形。」後來閣有高振榮長老講「機車駕駛的技術，佮駕駛人應有的人格修養」等。

最後有予較有技術的會員兩名表演駕駛特技，真精彩。