屏東市模範母親
Pîn-tong-chhī Bô͘-Hoān Bú-Chhin
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第1029期 |
| 日期 | 1968/5 |
| 頁數 | 17 |
白話字（原文數位化）
Pîn-tong-chhī Bô͘-hoān Bú-chhin
Tiō Sìn-in
1968.05.01 1029 hō P.17
Kin-nî Pîn-tong chhī bô͘-hoān bú-chhin Lâu Tek Tiúⁿ-ló siū kéng-soán, sī choè Pîn-tong koān choè siū piáu-iông ê bô͘-hoān bú-chhin, tī Bú-chhin-cheh beh tāi-piáu Pin-tong koān, chhī, kàu Tâi-tiong chiap-siū Séng chú-se̍k ê piáu-chiong..
Lâu Tek Tiúⁿ-ló sī Sio̍k Pîn-tong kàu-hoē ê tiúⁿ-ló. Hiān-nî 64 hè. Tī 40 nî chêng, tng i chheng-chhun ê 24 hè, i ê tiōng-hu chiū pia̍t-sè, chiú-koáⁿ, cheng-chiat, tiàm tī sìn-gióng oá-khò Siōng-tè, ióng-kám lâi chai-poê 2 lâm 1 lú. I ê tiōng-hu pia̍t-sè bô lâu sím-mi̍h uî-sán, chí-ū khò i ê siang-chhiú choè-kang, chèng ti-chhài, ióng ti lâi poê-iúⁿ kiáⁿ-jî tit-tio̍h sêng-kong.
Toā-kiáⁿ Chiu Chèng-tō Tiong-ha̍k pit-gia̍p āu koh liû Ji̍t, hiān-sî iáu tiàm tī Ji̍t-pún keng siong, chhoā Ji̍t-pún ê thài-thài. Tē jī kiáⁿ Chiu Chèng-kiat Tâi-tāi I-ha̍k-īⁿ pit-gia̍p āu iā liû Ji̍t. Hiān-sî tī Pîn-tong khui Kai-seng jî-tông i-īⁿ, i-su̍t ko-bêng, koh gâu thé-thiap hoān-chiá, hian-ap chê-sè, sī lâng-lâng só͘ chai. Muí-ji̍t hoān-chiá 300 miâ chó-iū, khó-kiàn sī bêng i. I ê i seng niû sī Ông Siú-ióng Bo̍k-su ê chhian-kim, Ông Bí-im Lú-sū, liû Bí ko-kip hō͘-lí choan-kho ha̍k-hāu pit-gia̍p ê ko-chhâi-seng, sī choè hó ê loē-chō͘. Tióng lú Chiu Chhun-thô Lú-sū, liû Ji̍t, pit-gia̍p pó-bú ha̍k-hāu. Hiān-sî choè Bîn-hô Kàu-hoē Ong Tông-tèng Chip-sū ê hó loē chō͘, pang-bâng keng-siong. Tī kàu-hoē iā chin oa̍h-tāng, jia̍t-sim ho̍k-sāi Chú.
I ê kiáⁿ-jî ū kin-á-ji̍t ê sêng-kong, thang kóng sī i ê jû-khó͘ hâm-sin（茹苦含辛）ióng ti chai-poê, oá-khò Siōng-tè ê khuì-la̍t, put-toān ê kî-tó só͘ tit.
I choè tit piáu-iông choè bô͘-hoān bú-chhin m̄-nā siū-khó͘ poê-iúⁿ kiáⁿ-jî sêng-kong jî-í, iā-sī i ê sìn-sim jia̍t-sim kap thiàⁿ-sim.
I ū chin kian-kò͘ ê sìn-sim, bô-lūn sím-mi̍h khùn-lân ê sū, kan-khó͘ ê sū, lóng oá-khó Chú lâi sèng-lī. Tuì i ê sìn-sim kap kî-tó ê thé-giām, i chiū ū khuì-la̍t sî-siông thè lâng kî-tó, iā sī choè bo̍k-su ê A-lûn kap Hō͘-jíⁿ.
I ū jia̍t-sim ho̍k-sim ho̍k-sāi Siōng-tè, kap jia̍t-sim ho̍k-bū lâng. Kàu-hoē lāi, goā pò͘-tō-hoē, chū-hoē lóng choè sian-hong, chin gâu kóng tō-lí hō͘ lâng thiaⁿ, jia̍t-sim kà hiah ê kiû-tō-chiá ê Pe̍h-oē-jī kap tō-lí, sî-siông lī-iōng tiong-tàu kàu chin-hn̄g ê só͘-chāi khì kà, bô hioh tiong-tàu, bô hiâm kan-khó͘.
koh choè Chú-ji̍t-o̍h kàu-oân kuí cha̍p tang lóng bô làng, thàu-chá chiū kàu Chú-ji̍t-o̍h choè hó ê lāu-su, m̄-nā gâu kà pa̍t lâng, liân ka-kī ê sun, 4, 5 hè chiū kà kàu oē hiáu tha̍k Pe̍h-oē-jī Sèng-keng koh chin gâu kî-tó.
I koh ū thiàⁿ-sim moá-moá, chin gâu thé-thiap pîn-khùn ê lâng, ko͘-jî, koáⁿ-hū, siông-siông chhoā chit khoán ê lâng hō͘ i ê kiáⁿ bián-huì si-liâu. I choè kàu-hoē chû-siān pō͘-tiúⁿ, choè kiù-chè kang-chok, uì-būn, tāi-tó. iā tiû-bō͘ pîn-khùn ha̍k-seng chù-chheh-huì téng-téng.
I iā sī bo̍k-su hó ê tâng-kang, sî-siông kap bo̍k-su thàm-hóng hoē-iú, tāi-tó. Koh gâu thiàⁿ bo̍k-chiá, tī bu̍t-chit, cheng-sîn, kang-chok kok hong-bīn ê kióng-èng chin toā, hō͘ thoân-kàu-chiá tit-tio̍h le̍k-liōng.
I ê bīn sî-siông hoat kng-liāng, chhiò-iông, bô-lūn siā-hoē, kàu-hoē ê lâng lóng chin khim-gióng chit uī Sèng Sîn chhiong-moá sìn-gióng ê uí-jîn, bô͘-hoān bú-chhin.
漢羅（Ùi原文改寫）
屏東市模範母親
趙信恩
1968.05.01 1029號P.17
今年屏東市模範母親劉竹長老受揀選，是做屏東縣做受表揚的模範母親，佇母親節欲代表屏東縣，市，到台中接受省主席的表彰。。
劉竹長老是屬屏東教會的長老。現年64歲。佇40年前，當伊青春的24歲，伊的丈夫就別世，守寡，貞節，踮佇信仰倚靠上帝，勇敢來栽培2男1女。伊的丈夫別世無留甚物遺產，只有靠伊的雙手做工，種豬菜，養豬來培養囝兒得著成功。
大囝周正道中學畢業後閣留日，現時猶踮佇日本經商，娶日本的太太。第二囝周正吉 台大醫學院畢業後也留日。現時佇屏東開Kai-seng兒童醫院，醫術高明，閣gâu體貼患者，hian-ap chê-sè，是人人所知。每日患者300名左右，可見是名醫。伊的醫生娘是王守勇牧師的千金，王美音女士，留美高級護理專科學校畢業的高材生，是做好的內助。長女周春桃女士，留日，畢業保母學校。現時做民和教會翁Tông-tèng執事的好內助，幫忙經商。佇教會也真活動，熱心服侍主。
伊的囝兒有今仔日的成功，通講是伊的茹苦含辛ióng ti栽培，倚靠上帝的氣力，不斷的祈禱所得。
伊做得表揚做模範母親毋但受苦培養囝兒成功而已，也是伊的信心熱心佮疼心。
伊有真堅固的信心，無論甚物困難的事，艱苦的事，攏倚靠主來勝利。對伊的信心佮祈禱的體驗，伊就有氣力時常替人祈禱，也是做牧師的A-lûn佮Hō͘-jíⁿ。
伊有熱心服事上帝，佮熱心服務人。教會內，外佈道會，聚會攏做先鋒，真gâu講道理予人聽，熱心教遐的求道者的白話字佮道理，時常利用中晝到真遠的所在去教，無歇中晝，無嫌艱苦。
閣做主日學教員幾十冬攏無làng，透早就到主日學做好的老師，毋但gâu教別人，連家己的孫，4，5歲就教到會曉讀白話字聖經閣真gâu祈禱。
伊閣有疼心滿滿，真gâu體貼貧困的人，孤兒，寡婦，常常chhoā這款的人予伊的囝免費施療。伊做到會慈善部長，做救濟工作，慰問，代禱。也籌募貧困學生註冊費等等。
伊也是牧師好的同工，時常佮牧師探訪會友，代禱。閣gâu疼牧者，佇物質，精神，工作各方面的供應真大，予傳教者得著力量。
伊的面時常發光亮，笑容，無論社會，教會的人攏真欽仰這位聖神充滿信仰的偉人，模範母親。