南中女宣舉辦母親節音樂會
Lâm Tiong Lú Soan kú-pān Bú-chhin-choeh im-ga̍k-hoē
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第1030期 |
| 日期 | 1968/5 |
| 頁數 | 11 |
白話字（原文數位化）
Lâm Tiong Lú Soan kú-pān Bú-chhin-choeh im-ga̍k-hoē
1968.05.15 1030 hō P.11
Tâi-lâm Tiong-hoē Lú Soan Ha̍p-chhiùⁿ-thoân pún-ge̍h 13 àm, uī-tio̍h ka-tī khèng-chiok Bú-chhin-choeh, tī Thài-pêng-kéng kàu-hoē kú-pān”Bú-chhin-choeh im-ga̍k-hoē”. Im-ga̍k-hoē kiat-sok ê sî, iā ū piáu-ián chi̍t chhut chin ū ì-gī ê oē-ke̍k, kiò-choè”Kng-bêng kap o͘-àm”,í-goā iā ū lâi hù hoē ê Lú Soan hoē-oân choân-thé piáu-ián khong-lo̍k chiat-bo̍k.
Lâm Tiong Lú Soan chit hoê tī Thài-pêng-kéng só͘ kú-pān ê Bú-chhin-choeh im-ga̍k khong-lo̍k boán-hoē, chham-ka ê hū-lú tāi-pō͘-hūn lóng í-keng choè ma-ma, á-má lah. Chóng-sī in só͘ gîm ê si-koa, chi̍t-su̍t-á iā bô su chheng-liân lâng ê siaⁿ-im. Tng in teh gîm siàu-liām lāu-bú ê si ê sî, in ê siaⁿ-im oán-jiân chhin-chhiūⁿ chhut tuì sè-kiáⁿ ê chhuì, in ê piáu-chêng iā chhin-chhiūⁿ sè-kiáⁿ lī-hiong teh siàu-liām in ê lāu-bú, hō͘ thiaⁿ ê lâng, kek-khí su-chhin kap hàu-chhin ê sim.
Lâm Tiong Lú Soan Ha̍p-chhiùⁿ-thoân sī tī kin nî Koh-oa̍h-choeh chiah sêng-li̍p ê. In ê chong-chí chiū-sī chū-chi̍p só͘-uī”loán-jio̍k ê lú-sèng”ê le̍k-liōng, ēng in bô tiâu-kiāⁿ pe̍h-pe̍h só͘ tit-tio̍h ê chin-chiàⁿ ê kiù-sio̍k kap si̍t-chāi ê sìn-gióng hia̍p-chō͘ kàu-hoē, ēng si-koa lâi soan-iông Iâ-so͘ chiū-sī jîn-luī ê Kiù-chú.
漢羅（Ùi原文改寫）
南中女宣舉辦母親節音樂會
1968.05.15 1030號P.11
台南中會女宣合唱團本月13暗，為著家己慶祝母親節，佇太平境教會舉辦「母親節音樂會」。音樂會結束的時，也有表演一齣真有意義的話劇，叫做「光明佮烏暗」，以外也有來赴會的女宣會員全體表演康樂節目。
南中女宣這回佇太平境所舉辦的母親節音樂康樂晚會，參加的婦女大部分攏已經做媽媽，阿嬤lah。總是in所吟的詩歌，一屑仔也無輸青年人的聲音。當in teh吟數念老母的詩的時，in 的聲音宛然親像出對細囝的喙，in的表情也親像細囝離鄉teh數念in的老母，予聽的人，激起思親佮孝親的心。
南中女宣合唱團是佇今年閣活節才成立的。In的宗旨就是聚集所謂「軟弱的女性」的力量，用in無條件白白所得著的真正的救贖佮實在的信仰協助教會，用詩歌來宣揚耶穌就是人類的救主。