五月的感言
Gō͘-ge̍h ê kám-giân
文獻資訊
| 項目 | 資料 |
|---|---|
| 作者 | 編輯部 Phian-chip-pō͘͘ |
| 卷期 | 台灣教會公報 |
| 卷期 | 第1029期 |
| 日期 | 1968/5 |
| 頁數 | 3 |
白話字（原文數位化）
Gō͘ Ge̍h ê Kám-giân
Phian-chhip-sek
1968.05.01 1029 hō P.3
Gō͘ ge̍h ū choē-choē thang siàu-liām ê kì-liām-ji̍t. 5 ge̍h 1 ji̍t sī Lô-kang-choeh, 5 ge̍h tē jī lé-pài sī Bú-chhin-choeh; soà-lo̍h-khì chi̍t lé-pài sī Ka-têng-chiu, 6 ge̍h chhe jī sī Sèng Sîn kàng-lîm-choeh……
Tī chiah choē ê kì-liām-ji̍t, lán kàu-hoē ká-ná khah kheng-tiōng tī Bú-chhin-choeh: ū kèng-ló-hoē, kèng-bú-hoē, pò-choá cha̍p-chì toā-toā teh soan-iông. Nā-sī kàu-hoē-le̍k tiōng-iàu ê choeh-ji̍t Sèng Sîn kàng-lîm-choeh soà hō͘ lâng boē kì-tit. Che-sī chin khó-sioh ê sū, lán eng-kai tio̍h khah tiōng-sī Sèng Sîn kàng-lîm-choeh.
Koh-oa̍h-choeh āu 40 ji̍t chiū-sī Chú Iâ-so͘ sèng(seng)-tian ê ji̍t, tú-tú sī pài 4, ū ê kàu-hoē tī chit ji̍t kú-hêng seng-thian-choeh ê lé-pài. Koh kè 10 ji̍t chiū-sī Sèng Sîn kàng-lîm-choeh, chit ji̍t thang kóng sī kàu-hoē ê siⁿ-ji̍t. Lán ū khèng-chiok Ki-tok ê kàng-seng, iā tio̍h siâng-khoán khoàⁿ-tāng Sèng Sîn ê kàng-lîm. Tī chit ji̍t thang kú-hêng sèng-lé-tián, Kàu-hoē kap sìn-tô͘ tio̍h kî-thāi tī chit ji̍t koh tuì thiⁿ-nih niá-siū sin ê le̍k-liōng.
Gō͘ ge̍h 1 ji̍t sī Lô-kang-choeh, kūn-lâi lán ê Chóng-hoē khah ū koan-sim lô-kang ê būn-toê, pún-pò chêng chi̍t hō ū kài-siāu Tīⁿ Jî-gio̍k Bo̍k-su choè ê chi̍t siú si, chit siú si ū chhiong-hun piáu-ta̍t Ki-tok-tô͘ tī chit sè-kai phāu sìn-sim teh hùn-tò͘ ê cheng-sîn; koh tit-tio̍h Lo̍h Î-tō Sian-siⁿ choè lán Tâi-oân khoán ê khek, thang kóng sī sûn pún-toē-hoà ê si, ǹg-bāng kok kàu-hoē oah7-ēng. Tī Lô-tōng-choeh kok Tiong-hoē ū pān lô-kang ê liân-hoan-hoē téng, pún-pò ū tēng tī āu kî oē khan-chhut chiah ê siau-sit.
Bú-chhin-choeh í-keng chiâⁿ-choè lán kàu-hoē hêng-sū ê chi̍t hāng. Siōng-iông hàu-tō, che sī thang thê-chhiòng ê, chóng-sī siông-siông cháu kám-chêng choè hêng-sek-tek ê sū; khah bô chhim-siūⁿ Ki-tok-tô ê hàu-sūn sī cháiⁿ-iūⁿ, iā ka-têng tio̍h cháiⁿ-iūⁿ lâi Ki-tok-hoà. 5 ge̍h hō ê En̂g-kong-pò ū “Bú-chhin-choeh kap ka-têng-chiu ê te̍k-chi̍p”ǹg-bāng kok-uī tho̍k-chiá chù-ì. Koan-hē ka-têng-chiu ê siau-sit, hoan-gêng kok kàu-hoē chiong lín ê hêng-sū pò lâi pún-siā, thang pò hō͘ tāi-ke chai.
Gō͘ ge̍h tē saⁿ lé-pài sī Gio̍k-san Sèng-keng Su-īⁿ ê kì-liām-ji̍t. Chit keng poê-iúⁿ san-tē thoân-kàu-su ê ha̍k-iⁿ, sī lán Chóng-hoē Su-kì Ko Chùn-bêng Bo̍k-su, hiàn i ê sim-hiat tī chióng-chióng ê khùn-lân tiong keng-êng chhut-lâi ê. Kin-nî koh sī San-tē-nî, ǹg-bāng lán tī chit ji̍t koan-sim chit keng ha̍k-īⁿ, uī-tio̍h in kî-tó, kap te̍k-pia̍t ê hōng-hiàn.
Sin Soan ūn-tōng chhui-hêng Ui-oân-hoē ū chè-tēng 5 ge̍h tē-it lé-pài khí kàu 7 ge̍h té, choè”Siū thok cheng-sîn”chhui-hêng si̍t-si ê kî-kan. Chit ê”Siū thok cheng-sîn”pèng m̄-sī ū Sin Soan ūn-tōng chiah ū ê, goân-lâi choè chi̍t ê Ki-tok-tô͘ chiū èng(eng)-kai chhim-sìn i ê sî-kan, châi-lêng, kim-chîⁿ it-chhè lóng sī Siōng-tè só͘ kau-thok lâi hó-hó oa̍h-ēng. Sin Soan ūn-tōng ū te̍k-pia̍t lâi kiông-tiau, choè Sin Soan ūn-tōng 4 hāng chhui-hêng bo̍k-phiau ê chi̍t hāng. ǹg-bāng chit ê choè chi̍t ê sìn-tô͘ khí-má ê cheng-sîn, tī chit ê kî-kan lāi i-chiàu kè-e̍k lâi chhui-hêng soà sit7-si.
Koan-hē Sin Soan ūn-tōng tī 6 ge̍h hō ê En̂g-kong Ge̍h-khan ū beh choan toê te̍k-chi̍p lâi pò-tō, chhiáⁿ kî-thāi.
漢羅（Ùi原文改寫）
五月的感言
編輯室
1968.05.01 1029號P.3
五月有濟濟通數念的紀念日。5月1日是勞工節，5月第二禮拜是母親節；紲落去一禮拜是家庭週，6月初二是聖神降臨節……
佇才濟的紀念日，咱教會干若較傾重佇母親節：有敬老會，敬母會，報紙雜誌大大咧(teh)宣揚。若是教會力重要的節日聖神降臨節紲予人未記得。這是真可惜的事，咱應該著較重視聖神降臨節。
閣活節後40日就是主耶穌聖誕的日，拄拄是拜4，有的教會佇這日舉行升天節的禮拜。閣過 10日就是聖神降臨節，這日通講是教會的生日。咱有慶祝基督的降生，也著像款看重聖神的降臨。佇這日通舉行聖禮典，教會佮信徒著期待佇這日閣對天裡領受新的力量。
五月1日是勞工節，近來咱的總會較有關心勞工的問題，本報前一號有介紹鄭玉兒牧師做的一首詩，這首詩有充分表達基督徒佇這世界抱信心teh的精神；閣得著駱維道先生做咱台灣款的曲，通講是純本地化的詩，向望各教會活用。佇勞動節各中會有辦勞工的聯歡會等，本報有定佇後期會刊出遮個消息。
母親節已經成做咱教會行事的一項。誦揚孝道，這是通提倡的，總是常常走感情做形式tek的事；較無深-想基督徒的孝順是怎樣，也家庭著怎樣來基督化。5月號的榮公報有「母親節佮家庭週的特輯」向望各位讀者注意。關係家庭週的消息，歡迎各教會將恁的行事報來本社，通報予大家知。
五月第三禮拜是玉山聖經書院的紀念日。這間培養山地傳教師的學院，是咱總會書記高俊明牧師，獻伊的心血佇種種的困難中經營出來的。今年閣是山地年，向望咱佇這日關心這間學院，為著in祈禱，佮特別的奉獻。
新宣運動推行委員會有制定5月第一禮拜起到7月底，做「受託精神」推行實施的期間。這個「受託精神」並毋是有新宣運動才有的，原來做一個基督徒就應該深信伊的時間，才能，金錢一切攏是上帝所交託來好好活用。新宣運動有特別來強調，做新宣運動4項推行目標的一項。向望這個做一個信徒起碼的精神，佇這個期間內依照計畫來推行紲實施。
關係新宣運動佇6月號的榮光月刊有欲專題特輯te̍k-chi̍p來報導，請期待。