真實的自由
Chin-si̍t ê chū-iû
文獻資訊
| 項目 | 資料 |
|---|---|
| 作者 | 杜英助 Tō͘ Eng-chō͘ |
| 卷期 | 台灣教會公報 |
| 卷期 | 第1028期 |
| 日期 | 1968/4 |
| 頁數 | 3 |
白話字（原文數位化）
Chin-si̍t ê chū-iû
Tō͘ Eng-chō͘
1968.04.15 1028 hō P.3
Jī-cha̍p sè-kí tī sè-kái ta̍k só͘-chāi ê kang-gia̍p teh hoat-tián ê sî, chit hāng chin iáu-kín ê Bîn-koân ūn-tōng iā tī choân sè-kài ta̍k kak-lo̍k teh hoat-tián. Tuì tī chit-ê ūn-tōng ê hoat-tián, kè-khì tī lia̍t-kiông ê kok-ka thóng-tī-ē ê hù-sio̍k kok kap si̍t-bîn-toē ê bîn-cho̍k, lóng chiām-chiām chiâⁿ-choè to̍k-li̍p ê kok-ka kap chū-iû ê bîn-cho̍k. Chóng-sī kàu hiān-chāi ū ê kok-ka sī tuì kuí-nā ê bîn-cho̍k lâi cho͘-sêng, te̍k-pia̍t sī Bí-kok. Hiah ê í-chêng siū lâng tuì Hui-chiu lia̍h lâi choè lô͘-lē ê o͘-bīn-lâng, sui-jiân tuì Lâm Pak chiàn-cheng í-āu chiū tit-tio̍h tháu-pàng, chóng-sī in só͘ tit-tio̍h ê chū-iû iû-goân chin iú-hān. Só͘-í kin-á-ji̍t tī choân sè-kài teh hoat-tián Bîn-koân ūn-tōng, chū-jiân jî-jiân chiū éng-hióng chiah ê o͘-bīn-lâng ê tì-sek hūn-chú chek-ke̍k tuì chèng-hú chèng-hú kap pe̍h-bīn-lâng tông-téng ê koân-lī kap siā-hoē hok-lī.
Tī Bí-kok teh léng-tō o͘-bīn-lâng ēng hô-pêng ê hong-hoat lâi tián-khai Bîn-koân ūn-tōng, cheng-chhú chū-iû ê léng-tō-chiá Kim Má-teng Phok-sū, pún ge̍h 4 ji̍t tī Bí-kok Tiân-la̍p-se chiu ê Bêng-hui-su siâⁿ siū chi̍t ê pe̍h-bīn-lâng ēng chhèng àm-sat. Tuì tī chi̍t uī ēng Ki-tok hô-pêng ê hong-hoat lâi cheng-chhú chū-iû ê o͘-bīn-lâng Bo̍k-su Kim Phok-sū siū lâng àm-sat í-āu, m̄-nā hong-tōng Bí-kok, iā hō͘ choân sè-kài ê lâng uī-tio̍h i ê put-hēng lâi tio̍h-kiaⁿ, ai-siong.
“Chū-iû”thang kóng sī lâng lâng só͘ teh cheng-chhú ê chi̍t chióng siā-hoē seng-oa̍h ê koân-lī. Chóng-sī bô-lūn sī tī ū chū-iû, á-sī bô chū-iû ê só͘-chāi, ta̍k só͘-chāi ê siā-hoē tia̍t-sū lóng chin jiáu-loān, só͘-í bô-lūn sī sím-mi̍h kok-ka, lóng tio̍h hùn-liān choē-choē tī-an jîn-oân lâi î-chhî siā-hoē tia̍t-sū, pó-chiong(chiòng?) jîn-luī ê chū-iû. Siáⁿ-sū tio̍h án-ni? Goá siong-sìn chit ê choè toā ê goân-in sī chāi tī lâng iáu boē-hiáu hióng-siū chū-iû, siāng-sî piáu-sī lâng iáu m̄-bat chū-iû sī sím-mi̍h?
Iâ-so͘ kóng,”Lín beh bat chin-lí,ia̍h chin-lí beh hō͘ lín chū-iû”（Iok-hān 8:32）. I koh kóng,”Goá chiū-sī chin-lī”（Iok-hān 14:6）. Só͘-í lâng nā beh tit-tio̍h chin-chiàⁿ ê chin-lí. jīn-bat Ki-tok. Chí-ū jīn-bat Ki-tok, tiàm tī Chú ê lāi-bīn ê lâng, tī in ê jio̍k-thé kap sim-lêng-siōng chiah oē-thang hióng-siū chin-si̍t ê chū-iû--Bô-lūn tī sím-mi̍h khoân-kéng-ē lóng boē siū sok-pa̍k. Chhin-chhiūⁿ Pó-lô Sian-siⁿ i jīn-bat Ki-tok í-āu, sui-jiân siū lâng ēng só-liān pa̍k teh, chóng-sī tī i ê sim-lāi iû-goân oē-thang chin chū-iû chū-chāi lâi gîm-si, kî-tó, o-ló Siōng-tè. Ki-tok-tô͘ só͘ su-iàu ê chū-iû, chiū-sī chit khoán boē siū jîn-uî ê in-sò͘ só͘ sok-pa̍k ê chin-si̍t ê chū-iû.
漢羅（Ùi原文改寫）
真實的自由
杜英助
1968.04.15 1028號P.3
二十世紀佇世界逐所在的工業teh發展的時，這項真猶緊的民權運動也佇全世界逐角落teh發展。對佇這个運動的發展，過去佇列強的國家統治下)的附屬國佮殖民地的民族，攏漸漸成做獨立的國家佮自由的民族。總是到現在有的國家是對幾若个民族來組成，特別是美國。遐个以前受人對非洲掠來做奴隸的烏面人，雖然對南北戰爭以後就得著敨放，總是in所得著的自由猶原真有限。所以今仔日佇全世界teh發展民權運動，自然而然就影響遮个烏面人的智識份子積極對政府政府佮白面人同等的權利佮社會福利。
佇美國teh領導烏面人用和平的方法來展開民權運動，爭取自由的領導者金馬丁(Kim Má-teng)博士，本月4日佇美國田納西(Tiân-la̍p-se)州的孟菲斯(Bêng-hui-su)城受一个白面人用槍暗殺。對佇一位用基督和平的方法來爭取自由的黑面人牧師金博士受人暗殺以後，毋但轟動美國，也予全世界的人為著伊的不幸來著驚，哀傷。
「自由」通講是人人所teh爭取的一種社會生活的權利。總是無論是佇有自由，á是無自由的所在，逐所在的社會秩序攏真擾亂，所以無論是甚物國家，攏著訓練濟濟治安人員來維持社會秩序，保障人類的自由。啥事著按呢？我相信這个最大的原因是在佇人猶袂曉享受自由，siāng時表示人猶毋bat自由是甚物？
耶穌講，「恁欲捌真理，亦真理欲予恁自由」（約翰8：32）。伊閣講，「我就是真理」（約翰14：6）。所以人若欲得著真正的真理。認識基督。只有認識基督，踮佇主的內面的人，佇in的肉體佮心靈上才會通享受真實的自由無論佇甚物環境下攏袂受束縛。親像保羅先生伊認識基督以後，雖然受人用鎖鏈縛teh，總是佇伊的心內猶原會通真自由自在來吟詩，祈禱，呵咾上帝。基督徒所需要的自由，就是這款袂受人為的因素所束縛的真實的自由。