對死擱活的主
Tuì sí koh-oah7 ê Chú
文獻資訊
| 項目 | 資料 |
|---|---|
| 作者 | 杜英助 Tō͘ Eng-chō͘ |
| 卷期 | 台灣教會公報 |
| 卷期 | 第1027期 |
| 日期 | 1968/4 |
| 頁數 | 3 |
白話字（原文數位化）
Tuì sí koh-oa̍h ê chú
Tō͘ Eng-chō͘
1968.04.01 1027 hō P.3
Le̍k-tāi ki-tok-tô͘ só͘ khak-sìn ê sìn-gióng kò-pe̍k, lán ê sìn-keng tē 2 toāⁿ kóng,”Goá sìn Iâ-so͘ Ki-tok………tī Pún-tiu Pí-lia̍p-to jīm-lāi siū-khó͘, tèng si̍p-jī-kè, sí, bâi-chóng, lo̍h im-hú; tē saⁿ ji̍t tuì sí-lâng tiong koh-oa̍h, chiūⁿ thiⁿ……“.Chit ê sìn-tiâu kàu hiān-chāi, sīm-chì kàu Chú koh lâi ê ji̍t, goá siong-sìn só͘ ū Ki-tok-tô͘ iû-goân beh án-ni siong-sìn.
Siáⁿ-sū lán ê Chú tio̍h lîm-kàu sè-kan siū-khó͘, hō͘ lâng tèng si̍p-jī-kè, sí bâi-chòng tī hûn-bōng nih? Chit ê bô m̄-sī beh uī-tio̍h choân sè-kài ê jîn-luī khui chi̍t tiâu oa̍h-oa̍h ê lō͘, hō͘ lâng ê choē tit-tio̍h chín-kiù, hoê-ho̍k Siōng-tè goân-pún só͘ chhòng-chō ê lâng ê hêng-siōng, lâi hō͘ I tit-tio̍h hoaⁿ-hí kap êng-iāu.
Tī Iâ-so͘ it-seng ê seng-gâi tiong, I ê siū-khó͘, tèng si̍p-jī-kè, sí, bâi-chòng, thang kóng sī chi̍t hāng hui-siông uí-tāi ê thiàⁿ-sim ê piáu-hiān, chóng-sī pí chit ê hi-seng sìⁿ-miā ê thiàⁿ koh khah kám-tōng lâng, hō͘ lâng thang hoaⁿ-hí, thang tit-tio̍h éng-oa̍h ê ǹg-bāng ê pîn-kù ê, chiū-sī kóng,”Ki-tok nā bē bat koh-oa̍h, chiū goán só͘ thoân ê sī khang-khang.”I koh kóng,”Taⁿ Ki-tok í-keng tuì sí-lâng tiong koh-oa̍h, choè chiah ê teh khùn ê thâu chi̍t ê koh-oa̍h ê”（I Ko-lîm-to 15:14,20）. Só͘-í lán siong-sìn. tuì tī Iâ-so͘ Ki-tok ê koh-oa̍h, kàu tī boa̍t-ji̍t I koh-oa̍h ê sî, lán ê jio̍k-thé iā beh koh-oa̍h, kap Chú kiat-liân, ti̍t-kàu éng-oán!
Ū sí, chiah ū koh-oa̍h; ū kan-khó͘ chiah ū êng-iāu. Lia̍t-uī tho̍k-chiá, lí hoaⁿ-hí uī Chú tio̍h-boâ, lô-khó͘ tit-tio̍h boē pāi-hoāi ê bián-liû mah? Tio̍h chù-sîn gióng-bōng tuì sí koh-oa̍h ê Chú!
漢羅（Ùi原文改寫）
對死閣活的主
杜英助
1968.04.01 1027號P.3
歷代基督徒所確信的信仰告白，咱的信經第2段講，「我信耶穌基督………佇Pún-tiu Pí-lia̍p-to任內受苦，釘十字架，死，埋葬，落陰府；第三日對死人中閣活，上天……」。這個信條到現在，甚至到主閣來的日，我相信所有基督徒猶原欲按呢相信。
啥事咱的主著臨到世間受苦，予人釘十字架，死埋葬佇墳墓nih？這個無毋是欲為著全世界的人類開一條活活的路，予人的罪得著拯救，回復上帝原本所創造的人的形象，來予伊得著歡喜佮榮耀。
佇耶穌一生的生涯中，伊的受苦，釘十字架，死，埋葬，通講是一項非常偉大的疼心的表現，總是比這個犧牲性命的疼閣較感動人，予人通歡喜，通得著永活的向望的憑據的，就是講，「基督若袂捌閣活，就阮所傳的是空空。」伊閣講，「Taⁿ基督已經對世人中閣活，做chiah的teh睏的頭一個閣活的」（哥林多前書15：14，20）。所以咱相信。對佇耶穌基督的閣活，到佇末日伊閣活的時，咱的肉體也欲閣活，佮主結聯，直到永遠！
有死，才有閣活；有艱苦才有榮耀。列位讀者，你歡喜為主著磨，勞苦得著袂敗壞的冕旒mah？著注神仰望對死閣活的主！