長榮女學創立81週年

Tióng-êng Lú-o̍h chhòng-li̍p 81 chiu-nî

文獻資訊

項目	資料
作者	劉主安 Lâu Chú-an
卷期	台灣教會公報
卷期	第1023期
日期	1968/2
頁數	8-9

白話字（原文數位化）

Tióng-êng Lú-o̍h Chhòng-li̍p 81 chiu-nî

Hāu-tiúⁿ:  Lâu chú-an

1968.02.01  1023 hō  P.8~P.9

（1）  Tióng-êng Lú-o̍h sī tī 1887 nî 2 ge̍h 14 ji̍t chhòng-li̍p ê.  Só͘-í kàu-taⁿ í-keng ū 81 nî kú.  Pún-lâi tī kū-nî 4 ge̍h beh kú-hêng 80 chiu-nî ê khèng-chiok tāi-hoē, in-uī chún-pī boē hù, só͘-í pún-hāu Táng-sū-hoē kap Hāu-iú-hoē, koat-tēng beh tī kin-nî ê 4 ge̍h tiong lâi khèng-chiok.

（2）  Hāu-iú-hoē ū chhiáⁿ chêng-jīm hāu-tiúⁿ Gô͘ Ko͘-niû tuì Eng-kok lâi chham-ka khèng-chiok ê tián-lé.  Khó-sioh in-uī in-uī i choè-kūn sin-thé bô kàu-gia̍h ióng-kiāⁿ thang choè tiông-tô͘ ê lú-hêng, só͘-í bē-thang lâi chham-ka.  Si̍t-chāi chin khó-sioh.  Chóng-sī i í-keng ū kià chi̍t tiuⁿ chiok-sû lâi beh hō͘ lán tī khèng-chiok tāi-hoē ê sî thang tha̍k, koh ū siá chi̍t phiⁿ kám-siúⁿ-bûn hō͘ lán thang ìn tī chiong-lâi beh hoat-khan ê 80 chiu-nî kì-liām chheh lāi.  Choē-choē hāu-iú nā tha̍k tio̍h Gô͘ Ko͘-niû ê chit phiⁿ kám-siúⁿ, ún-tàng oē siū kám-tōng, m̄-nā ke-thiⁿ in ê sìn-gióng kap uī kok-ka, siā-hoē, kàu-hoē ho̍k-bū ê cheng-sîn.

（3）  Hoê-kò͘ goá tī Bîn-kok 15 nî（1926）lâi pún-hāu, kàu-taⁿ í-keng ū 42 nî kú.  Tī chit tiong-kan kìⁿ tio̍h choē-choē ū hó ê sìn-gióng kap lí-siúⁿ ê tâng-kang.  Tuì in ê sìn-sim kap piáu-hiān, hō͘ goá tit-tio̍h choē-choē ê kó͘-lē kap kà-sī.  Chiah ê lâng ê tiong-kan ū Gô͘ Ko͘-niû, Lô͘ Ko͘-niû, Tō͘ Ko͘-niû, Lîm Ko͘-niû, Kéng Suī-chu Sian-siⁿ, Lîm Chu-phó͘ Sian-siⁿ téng.  Goá oē thang kap chiah ê sian-siⁿ saⁿ-kap tī ha̍k-hāu kang-chok, m̄-nā ke-thiⁿ goá ê khoài-lo̍k, iā hō͘ goá tit-tio̍h choē-choē ê lī-ek.  Goá siông-siông hoê-siúⁿ chit ê sū, kám-siā Siōng-tè ê an-pâi.

（4）  Kám-siā Siōng-tè tī 81 nî chêng, chhe I chīn-tiong ê lô͘-po̍k lâi kàu Tâi-lâm, tī chia kiàn-siat Tâi-oân séng choè chho͘ ê lú-chú Tiong-ha̍k.  Kè-khì 81 nî kú, ū choē-choē lú-chú lâi pún-hāu tha̍k-chheh, m̄-nā tit-tio̍h sè-kan ê ha̍k-būn, koh lâi bat Chú Iâ-so͘ Ki-tok, iā tit-tio̍h hok-im chin-lí.  Lán lóng chai-iáⁿ tī kè-khì kap hiān-chāi, ū choē-choē pún-hāu ê pit-gia̍p-seng tī ka-têng choè hó ê chú-hū kap lāu-bú, tī siā-hoē choè chin-choē hó ê ho̍k-bū kap kòng-hiàn.

（5）  Kám-siā Eng-kok Tiúⁿ-ló Kàu-hoē, tī kè-khì 81 nî ê tiong-kan, hōng-hiàn choē-choē kim-chîⁿ lâi pang-chān pún-hāu, iā koh phài choē-choē soan-kàu-su tī pún-hāu ho̍k-bū, m̄-nā kà-chheh, iā ū ín-chhoā ha̍k-seng bat Chú Iâ-so͘.  Koh tuì in ê sìn-gióng kap phín-keh, lâi kám-hoà ha̍k-seng, hō͘ in pit-gia̍p āu tī siā-hoē tiong, ū hó ê kòng-hiàn kap ho̍k-bū.

（6）  Goá iā ài kám-siā lán Tâi-oân Ki-tok Tiúⁿ-ló Kàu-hoē lāi choē-choē ê hiaⁿ-chí, in-uī lín tī kè-khì sò͘-cha̍p nî kú, ū hōng-hiàn choē-choē kim-chîⁿ lâi pang-chān pún-hāu choè kiàn-tiok kap cheng-ka siat-pī ê lō͘-ēng.  Koh siông-siông kài-siāu ha̍k-seng lâi pún-hāu tha̍k-chheh, iā sî-siông tī kî-tó tiong siàu-liām pún-hāu.  Pún-hāu tuì lán ê kàu-hoē só͘ tit-tio̍h bu̍t-chit siōng kap cheng-sîn siōng ê pang-chān si̍t-chāi chin toā.

（7）  Kám-siā choē-choē pún-hāu hāu-iú, sî-siông siàu-liām bú-hāu, uī-tio̍h bú-hāu kî-tó, koh kià chin-choē kim-chîⁿ kap kî-thaⁿ ê mi̍h-kiāⁿ lâi sàng pún-hāu.  Kè-khì 10 nî kú, pún-hāu tuì kok-lāi í-ki̍p kok-goā ê hāu-iú só͘ tit-tio̍h ê lo̍k-koan-kim iok ū 30 bān kho͘.  Pún-hāu ê hāu-sià kap ha̍k-seng ê kì-siok-sià, nā bô hāu-iú ê oān-chō͘, chiū boē thang chhin-chhiūⁿ hiān-chāi chit-khoán ê oân-pī.  Choē-choē hāu-iú ta̍k-pái tńg-lâi bú-hāu ê sî, m̄-nā pún-sin kám-kak chin khoài-lo̍k, chāi o̍h ê ha̍k-seng khoàⁿ-tio̍h hāu-iú thoân-kiat kap ài-hāu ê sim, iā ū tit-tio̍h chin toā ê kó͘-lē.   Choē-choē lâng kóng, pún-hāu hāu-iú ê thoân-kiat kap ài-hāu sim, m̄-nā tī kok-lāi, chiū-sī tī sè-kài tiong, iā oē thang choè pa̍t-lâng ê bô͘-hoān.  ǹg-bāng chit khoán ê thoân-thóng éng-kiú oē thang pó-chhî.

（8）  Kū-nî 4 ge̍h pún-hāu Táng-sū-hoē ū gī koat beh kiàn-tiok chi̍t chō kàu-sek toā-lâu, lâi khèng-chiok kì-liām chhòng-li̍p 80 chiu-nî ê le̍k-sú, koh thang thê-ko ha̍k-seng tha̍k-chheh ê hāu-lu̍t.  Chit keng kàu-sek toā-lâu í-keng tī kū-nî 10 ge̍h 25 ji̍t（Kong-ho̍k-choeh ê ji̍t）khai kang, ū-tēng kin-nî 6 ge̍h beh oân-sêng.  Kiàn-tiok ê chóng kang-thêng huì iok 80 bān kho͘.  Í-keng ū tuì Eng-kok Bú-hoē tit-tio̍h 10 bān kho͘ ê pó͘-chō͘-kim, iā ū chi̍t uī Bú-hoē ê chí-bē hōng-hiàn 5 bān kho͘.  Koh tuì lán ê hāu-iú-hoē iā í-keng tit-tio̍h 13 bān kho͘.  Í-goā tuì pún-hāu ê hāu-iú kap ka-tiúⁿ iú-chì ū tit-tio̍h iok 10 bān kho͘ ê hiàn-kim.  Khó-lêng choè-kūn oē thang tuì Séng-chèng-hú Kàu-io̍k-thiaⁿ tit-tio̍h iok 10 bān kho͘ ê pó͘-chō͘-kim.  Ha̍k-hāu tuì keng-huì iā oē thang chiat-khiām iok 5 bān kho͘.  án-ni siōng-chhiáⁿ iáu-kú khiàm iok 30 bān kho͘ ê kiàn-tiok chu-kim.  Só͘-í koat-tēng kin-nî 2 ge̍h tē saⁿ lé-pài-ji̍t（2 ge̍h 18 ji̍t）,tuì choân séng ê Tiúⁿ-ló Kàu-hoē só͘ tit-tio̍h ê te̍k-pia̍t hiàn-kim beh ēng choè chit keng kàu-sek toā-lâu ê lō͘-ēng.  ǹg-bāng kok-uī hiaⁿ-chí to-to koan-sim kap oān-chō͘.  iā ǹg-bāng pún-hāu ê hāu-iú uī-tio̍h bú-hāu kî-tó kap hōng-hiàn, hō͘ bú-hāu só͘ kè-e̍k ê kang-sū bô kú oē thang oân-sêng.

（9）  Kin-nî 4 ge̍h toing beh tī pún-hāu kú-hêng khèng-chiok 80 chiu-nî ê tián-lé.  Kàu sî it-tēng oē thong-ti choân séng kok toē-hng ê hāu-iú.  Chóng-sī hāu-iú ê chū-só͘ siông-siông piàn-keng, koh choè-kūn ū só͘-chāi chhin-chhiūⁿ Tâi-lâm chhī ū kái oāⁿ ke miâ kap chhù ê hoan-hō.  Só͘-í choè hó chhiáⁿ kok-uī hāu-iú oē thang kià chi̍t tiuⁿ bêng-sìn-phìⁿ lâi thong-ti ha̍k-hāu lí hiān-chāi ê toē-chí, kap tiàm-hō á-sī hō͘-chú ê sìⁿ-miâ.  Nā án-ni, lí chiū ún-tàng oē chiap tio̍h thong-ti, m̄-thang bô thong-ti ha̍k-hāu, kàu-sî kóng ha̍k-hāu lóng bô hō͘ lí chai.  Hāu-iú thong-ti ha̍k-hāu i ê toē-chí, sī chin kán-tan ê sū.  Chhiáⁿ kok-uī hāu-iú liōng-kái kap ha̍p-chok.

Pún-hāu Táng-sū-tiúⁿ kap Hāu-iú-hoē-tiúⁿ ài goá thè in kā lia̍t-uī hiaⁿ-chí chhéng-an kap seh to-siā.  Goān Chú ê un-tián siông-siông tī kok-uī ka-têng ê téng-bīn.

漢羅（Ùi原文改寫）

長榮女學創立81週年

校長：劉主安

1968.02.01  1023號P.8~P.9

（1）長榮女學是佇1887年2月14日創立的。所以到taⁿ已經有81年久。本來佇舊年4月欲舉行80週年的慶祝大會，因為準備袂赴，所以本校董事會佮校友會，決定欲佇今年的 4月中來慶祝。

（2）校友會有請前任校長吳姑娘對英國來參加慶祝的典禮。可惜因為因為伊最近身體無夠額勇健通做長途的旅行，所以袂通來參加。實在真可惜。總是伊已經 有寄一張祝詞來欲予咱佇慶祝大會的時通讀，閣有寫一篇感想文予咱通印佇將來欲發刊的80週年記念冊內。濟濟校友若讀著吳姑娘的這篇感想，穩當會受感動，毋若加添in的信仰佮為國家，社會，教會服務的精神。

（3）回顧我佇民國15年（1926）來本校，到taⁿ已經有42年久。佇這中間見著濟濟有好的信仰佮理想的同工。對in 的信心佮表現，予我得著濟濟的鼓勵佮教示。Chiah的人的中間有吳姑娘，羅姑娘，杜姑娘，林姑娘，Kéng Suī-chu先生，林Chu-phó͘先生等。我會通佮遮的先生相佮佇學校工作，m̄但加添我的快樂，也予我得著濟濟的利益。我常常回想這个事，感謝上帝的安排。

（4）感謝上帝佇81年前，差伊盡忠的奴僕來到台南，佇遮建設台灣省最初的女子中學。過去81年久，有濟濟女子來本校讀冊，毋若得著世間的學問，閣來bat主耶穌基督，也得著福音真理。咱攏知影佇過去佮現在，有濟濟本校的畢業生佇家庭做好的主婦佮老母，佇社會做真濟好的服務佮貢獻。

（5）感謝英國長老教會，佇過去81年的中間，奉獻濟濟金錢來幫贊本校，也閣派濟濟宣教師佇本校服務，m̄但教冊，也有引chhoā學生捌主耶穌。閣對in 的信仰佮品格，來感化學生，予in畢業後佇社會中，有好的貢獻佮服務。

（6）我也愛感謝咱台灣基督長老教會內濟濟的兄姊，因為恁佇過去數十年久，有奉獻濟濟金錢來幫贊本校做建築佮增加設備的路用。閣常常介紹學生來本校讀冊，也時常佇祈禱中數念本校。本校對咱的教會所得著物質上佮精神上的幫贊實在真大。

（7）感謝濟濟本校校友，時常數念母校，為著母校祈禱，閣寄真濟金錢佮其他的物件來送本校。過去10年久，本校對國內以及國外的校友所得著樂捐金約有30萬箍。本校的校舍佮學生的寄宿舍，若無校友的援助，就袂通親像現在這款的完備。濟濟校友逐擺轉來母校的時，毋若本身感覺真快樂，在學的學生看著校友團結佮愛校的心，也有得著真大的鼓勵。濟濟人講，本校校友的團結佮愛校心，毋若佇國內，就是佇世界中，也會通做別人的模範。向望這款的傳統永久會通保持。

（8）舊年4月本校董事會有議決欲建築一座教室大樓，來慶祝記念創立80週年的歷史，閣通提高學生讀冊的效率。這間教室大樓已經佇舊年10月25日（光復節的日）開工，有定今年6月欲完成。建築的總工程費約80萬箍。已經有對英國母會得著10萬箍的補助金，也有一位母會的姊妹奉獻5萬箍。閣對咱ê校友會也已經得著13萬箍。以外對本校的校友佮家長有志有得著約10萬箍的獻金。可能最近會通對省政府教育廳得著約10萬箍的補助金。學校對經費也會通節儉約5萬箍。按呢尚且猶久欠約30萬箍的建築資金。所以決定今年2月第三禮拜日（2月18日），對全省的長老教會所得著的特別獻金欲用做這間教室大樓的路用。向望各位兄姊多多關心佮援助。也向望本校的校友為著母校祈禱佮奉獻，予母校所計畫工事無久會通完成。

（9）今年4月中欲佇本校舉行慶祝80週年典禮。到時一定會通知全省各地方的校友。總是校友的住所常常變更，閣最近有所在親像台南市有改換家名佮厝的番號。所以做好請各位校友會通寄一張明信片來通知學校你現在的地址，佮店號抑是戶主的姓名。若按呢，你就穩當會接著通知，毋通無通知學校，到時講學校攏無予你知。校友通知學校伊的地址，是真簡單的事。請各位校友諒解佮合作。

本校董事長佮校友會長愛我替 in共列位兄姊請安佮說多謝。願主的恩典常常佇各位家庭的頂面。