新的能力

Sin ê lêng-le̍k

文獻資訊

項目	資料
作者	楊士養 Iûⁿ Sū-ióng
卷期	台灣教會公報
卷期	第1024、1025期
日期	1968/2
頁數	20-21

白話字（原文數位化）

Sin ê Lêng-le̍k

Iûⁿ Sū-ióng

1968.02.15  1024 hō  P.20~P.21

Tī chia só͘ kì ê keng-bûn oē thang hun choè nn̄g toāⁿ.  Thâu chi̍t toāⁿ sī kóng-khí Siōng-tè kap lâng só͘ chō ê ngô͘-siōng ū toā koh-iūⁿ, in-uī I sī chhòng-chō ê Chú, ū toā koân-lêng.  Koh chi̍t toāⁿ soat-bêng Siōng-tè éng-oán chûn-chāi.  Kìⁿ-nā sìn-khò I ê lâng oē thang tit-tio̍h SÎN Ê LÊNG-LE̍K.  Chhin-chhiūⁿ eng-chiáu thí-si̍t pe-koâiⁿ; in cháu, iā bô ià; kiâⁿ iā bô siān.  Lán tāi-ke chin khoài ià-siān.  Siàu-liân lâng iā oē poa̍h-tó.  Kiám kó-jiân ū chit hō ê sū-si̍t?  Taⁿ-chiah lâi tam-jīm Chú-ji̍t-o̍h kàu-oân ê chheng-liân, chóng-sī koh bô joā-kú chiū kám-kak ià-siān.  Tú-chiah chhut-lâi ê chheng-liân thoân-tō-su, phāu oán-tāi ê hi-bōng, koat-ì ài chhut-la̍t uī Chú choè kang, ho̍k-bū kàu-hoē.  uī-tio̍h só͘ choè ê sū boē thang chiàu i ê ì-sù, chiū ià-siān sit-chì.  Tú-chiah lâi sìn Chú ê lâng sim chin jia̍t, tì-ì ài khì chū-hoē, koh iā chham-ka kàu-hoē ê kang-chok.  Chóng-sī āu-lâi uī-tio̍h ka-sū ê chó͘-tòng, á-sī kap lâng ì-chì boē ha̍h chiū loé-chì.  ióng-chòng ê lâng iā oē poa̍h-tó.  Bo̍k-su kap tióng-chip chhin-chhiūⁿ pí siàu-liân lâng khah ióng-chòng, m̄-kú ū sî iā oē poa̍h-tó.  Kè-khì lán bat ià-siān sit-chì; tī chia ū hó siau-sit tuì chá chiū kā lán kóng(kong), To̍k-to̍k oá-khò Iâ-hô-hoa--ê beh tit-tio̍h sin ê khuì-la̍t……“（Í-sài-a 40:31）Taⁿ ài kóng nn̄g hāng:

I.  Sin Lêng-le̍k ê Su-iàu

Lâng ê khuì-la̍t nā bô cheng-ka, chiū oē ià-siān bô la̍t.  Só͘ ēng ê muî-iû（煤油）nā bô koh ke-thiⁿ, chiū iû oē ta, teng-sim oē liáu, kàu bé teng-hé chiū hoa-khì.

Cheng-ka sin lêng-le̍k ê hong-hoat ū nn̄g hāng, chiū-sī chia̍h kap iōng chit nn̄g jī.

（1）Chia̍h:  Lâng nā bô chia̍h, put-tàn boē thang ke-thiⁿ sin ê lêng-le̍k, liân kū ê la̍t iā beh bô--khì.

（2）iōng:  Lâng sui-jiân ū chia̍h, nā bô iōng bô chhut-la̍t, m̄-nā sin ê khuì-la̍t boē ke-thiⁿ, chiū kū-sî só͘ ū ê la̍t iā beh sún-sit.

Beh ke-thiⁿ sin-khu ê sin khuì-la̍t, chiū tio̍h chia̍h tio̍h iōng.  Niû-si̍t jú chiok, khuì-la̍t chiū jú toā.  Sin-thé jú ióng, khuì-la̍t chiū jú ke-thiⁿ.  Lán ū nn̄g ki chhiú, nā bô nn̄g chhiú lóng-chóng ū ēng ū chhut-la̍t, chiū chhiú-kut oē toā-soè ki.  Nā ài cheng-ka lêng-sèng siōng sin ê lêng-le̍k, hit ê hoat-tō͘ iû-goân ū nn̄g hāng:  Chiū-sī Siū（受） kap iōng（用）.

Siū:  Chiū-sī kî-tó, tha̍k-keng（讀經）kap chiū-kūn Sèng-chhan（陪餐）.

iōng:  Siū, í-āu nā ū ēng chiū thang cheng-ka sin ê lêng-le̍k.  Pok-su Tāi-chiòng kóng, Tio̍h tha̍k, tio̍h sìn, tio̍h thàn, chiū oē tek-sèng.  Chiàu só͘ kiû ê lâi kiáⁿ, chiàu só͘ tha̍k ê Sèng-keng lâi si̍t-hêng, niá-siū Sèng-chhan, tio̍h chiàu tī Sèng-chhan ê lāi-bīn só͘ tit-tio̍h ê un-huī lâi kiâⁿ.  Iâ-so͘ bēng-lēng hoān-tio̍h kuí tit-tio̍h i-hó ê lâng kóng, “Tò-khì lí ê ke chhē lí ê chhin-lâng, chiong Chú kā lí kiâⁿ hiah toā ê sū kap só͘ lîn-bín lí ê kā in kóng”（Má-khó 5:19）

Só͘ kiû lâi tit-tio̍h ê ū khì iōng, só͘ tha̍k ê ū si̍t-hêng, só͘ sêng-siū ê ū khì soan-iông, Chú tek-khak oē ke-thiⁿ sin ê lêng-le̍k.

II.  Sin Lêng-le̍k ê Lâi-goân

“To̍k-to̍k oá-khò Iâ-hô-hoa--ê beh tit-tio̍h sin ê khuì-la̍t; in beh chhin-chhiūⁿ eng-chiáu thí-si̍t pe-koâiⁿ; in cháu, iā bô ià; kiâⁿ ia̍h bô siān”（Í-sài-a 40:31）.  Sin lêng-le̍k ê lâi-goân sī tuì oá-khò Iâ-hô-hoa.  “oá-khò”chit nn̄g jī sī chin tiōng-iàu.  Khò ka-tī bô lī-ek, oá-khò Chú oē tit-tio̍h sèng-lī.

1）Ngá-kok tī Ngá-po̍k ê hô-piⁿ（tō͘-thâu）kap thiⁿ-sài tàu-la̍t, lâi tit-tio̍h sèng-lī.  In-uī Ngá-kok sìn-khò Siōng-tè ê oē, tit-tio̍h Siōng-tè siúⁿ-sù sin ê lêng-le̍k.

2）Tāi-pi̍t thâi-iâⁿ Kho-lī-a, i ê hong-hoat iā sī oá-khò Siōng-tè.  Tāi-pi̍t tuì Kho-lī-a kóng, Lí oá-kūn goá, sī ēng to, ēng chhiuⁿ, ēng kek; goá lâi oá-kūn lí, sī ēng bān-kun ê Iâ-hô-hoa ê miâ, Í-sek-lia̍t kun-tuī ê Siōng-tè, chiū-sī lí só͘ biáu-sī ê（I Sat-bó͘-jíⁿ 17:45）.  só͘-í thang chai khò ka-tī ê khuì-la̍t oē sit-pāi, oá-khò Chú oē tit-tio̍h sèng-lī, chóng-sī tek-khak m̄-thang êng-iāu ka-tī.

Lia̍t-uī, lán lâng sī loán-jio̍k, siông-siông oē sit-pāi.  Í-āu lán eng-kai tio̍h kiû Siōng-tè, oá-khò Chú lâi tit-tio̍h sin ê lêng-le̍k.

漢羅（Ùi原文改寫）

新的能力

楊士養

1968.02.15  1024號P.20~P.21

佇遮所記的經文會通分做兩段。頭一段是講起上帝佮人所造的偶像有大各樣，因為伊是創造的主，有大權能。閣一段說明上帝永遠存在。見若信靠伊的人會通得著新的能力。親像鷹鳥thí翼飛懸；in走，也無厭；行也無倦。咱大家真快厭倦。少年人也會跋倒。Kiám果然有這號的事實？Taⁿ才來擔任主日學教員的青年，總是閣無偌久就感覺厭倦。拄才出來的青年傳道師，抱遠大的希望，決意愛出力為主做工，服務教會。為著所做的事未通照伊的意思，就厭倦失志。拄才來信主的人心真熱，致意愛去聚會，閣也參加教會的工作。總是後來為著家事的阻擋，抑是佮人意志未合就餒志。勇壯的人也會跋倒。牧師佮長執親像比少年人較勇壯，毋過有時也會跋倒。過去咱bat厭倦失志；佇遮有好消息對早就共咱講，獨獨倚靠耶和華的欲得著的氣力……」（以賽亞40：31）Taⁿ愛講兩項：

I. 新能力的需要

人的氣力若無增加，就會厭倦無力。所用的煤油若無閣加添，就油會乾，燈芯會了，到尾燈火就hoa去。

增加新能力的方法有兩項，就是食佮用這兩字。

（1）食：人若無食，不但未通加添新的能力，連舊的力也欲無去。

（2）用：人雖然有食，若無用無出力，毋若新的氣力未加添，就舊時所有的力也欲損失。

欲加添身軀的新氣力，就著食著用。糧食愈足，氣力就愈大。身體愈勇，氣力就愈加添。咱有兩支手，若無兩手攏總有用有出力，就手骨會大細支。若愛增加靈性上新的能力，彼個法度猶原有兩項：就是受佮用。

受：就是祈禱，讀經佮就近聖餐。

用：受，以後若有用就通增加新的能力。Pok-su大眾講，著讀，著信，著趁，就會得勝。照所求的來行，照所讀的聖經來實行，領受聖餐，著照佇聖餐的內面所得著的恩惠來行。耶穌命令患著鬼得著伊好的人講，「倒去你的家揣你的親人，將主共你行遐大的事佮所憐憫你的共in講」（馬可5：19）

所求來得著的有去用，所讀的有實行，所承受的有去宣揚，主的確會加添新的能力。

II. 新能力的來源

「獨獨倚靠耶和華的欲得著新的氣力；in欲親像鷹鳥褫(thí)翼飛懸(koâiⁿ)；in走，也無厭；行亦無倦(siān)」（以賽亞40：31）。新能力的來源是對倚靠耶和華。「倚靠」這兩字是真重要。靠家己無利益，倚靠主會(oē)得著勝利。

1）雅各佇Ngá-po̍k的河邊（渡頭）佮天使鬥力，來得著勝利。因為雅各信靠上帝的話，得著上帝賞賜新的能力。

2）大衛刣贏Kho-lī-a，伊的方法也是倚靠上帝。大衛對Kho-lī-a講，你倚近我，是用刀，用槍，用激；我來倚近你，是用萬軍的耶和華的名，以色列軍隊的上帝，就是你所藐視的（撒母耳上17：45）。所以通知靠家己的氣力會失敗，倚靠主會得著勝利，總是的確毋通榮耀家己。

列位，咱人是軟弱，常常會失敗。以後咱應該著求上帝，倚靠主來得著新的能力。