回憶
Hoê-ek
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第1022期 |
| 日期 | 1968/1 |
| 頁數 | 7-8 |
白話字（原文數位化）
Hoê-ek
（Pún-kî sio̍k oân） Pat si̍p só͘
1968.01.15 1022 hō P.7~P.8
Sin lé-tn̂g lok-sêng. Hāu-khèng téng
Tâi-chêng 5 nî（1916）só͘ khí ê sin hāu-sià, chhiàu hit-sî khoàⁿ, sī chin ha̍p ēng, nā-sī keng-kè 15 nî āu, ha̍k-seng ê siàu-gia̍h nî-nî ke-thiⁿ, nā-sī lé-tn̂g ê pîⁿ-sò͘, put-sî sī 37.5 pîⁿ, lóng boē ke-thiⁿ. Kū lé-tn̂g ê tn̂g sī 7.5 keng, khoah sī 5 keng, án-ni chiah ū 37.5 pîⁿ toā, chí-ū oē siu-iông 250 lâng, ke̍k boán-téng sī 300 lâng, chiū cha̍t thóng-thóng lah! 1935 nî sī thoân-kàu tī Tâi-oân 70 nî, ū-tēng beh tī Tâi-lâm khui 70 chiu-nî kì-liām tāi-hoē, iā sī Tiúⁿ Tiong khai-hāu 50 nî, iā ū tiāⁿ-tio̍h beh khui chiok-hō-hoē. Só͘-í tio̍h ū oē thang iông-ún 800 goā lâng ê lé-tn̂g, chiū tiāⁿ-tio̍h Tiong-o̍h khí khah khoah toā ê lé-tn̂g. Kiàn-tiok huì àn chi̍t bān 5 chheng kho͘. Chit ê huì-iōng àn-sǹg tuì hāu-iú kap ka-tiúⁿ bō͘-koan, nâ bô kàu, chiah lēng-goā siat-hoat. 1932 nî 4 ge̍h, Tiō Thian-chû Sian-siⁿ tuì Tang-kiaⁿ Li̍p-chèng Tāi-ha̍k Ko-téng Su-hoān-kho pit-gia̍p tò-lâi, i só͘ hū-tam kàu-ha̍k sî-kan bô joā-choē, iū koh i kap hāu-iú, ka-tiúⁿ khah sio̍k-se̍k. Só͘-í tong-kio̍k chhui-chiàn i chhut-lâi bō͘-koan chit tiâu chîⁿ. Thian-chû Sian-siⁿ pài 2,3, 4 kà-chheh, pài 5 kàu pài it chhut-khì bō-koan. oá 3 ge̍h ji̍t ê phun-cháu, siu-ji̍p hiān-kim 7 chheng goā, kap ha̍k-hāu só͘ chek-chū ê, í-ki̍p Kàu-sū-hoē te̍k-pia̍t ê kì-chēng-kim, ha̍p-ha̍p choè-hoé, chiū tio̍k-chhiú heng-kang. Kàu 1935 nî 10 ge̍h, Tâi-oân Lâm-pō͘ kàu-hoē siat-kàu 70 chiu-nî, Tiúⁿ Tiong 50 chiu-nî hāu-khèng. Lo̍k-sêng tián-lé lóng choè-hoé kú-hêng.
Chit keng lé-tn̂g khoah 45 chhioh（7.5 keng）, tn̂g 100 chhioh（16.66 keng）, chiū-sī 124.5 pîⁿ toā, oē tit iông-ún 800 goā ê ha̍k-seng, khah bû-lí oē chē tit 900 miâ. Chit sî Bān Hāu-tiúⁿ iáu tī Tâi-oân, chit keng sī i choè-āu ê kiàn-siat, thang kóng sī choè hó ê kì-liām. uī-tio̍h ke-e̍k chéng-chéng ê hêng-sū, ha̍k-hāu hioh-khùn chi̍t lé-pài teh chún-pī, 3,4 ji̍t kú tī chia khui kì-liām-hoē, im-ga̍k-hoē, ūn-tōng-hoē, tián-lám-hoē, kì-liām, kám-siā, hoāⁿ-hí, hō͘ hoān-nā chham-ka ê lâng bô boē kì-tit. Che khèng-chiok ín-khì Tâi-oân kok hong-biān ê hèng-chhù, hāu-iú, ka-tiúⁿ, pêng-iú, bo̍k-su, tiúⁿ-ló, tāi-piáu tuì Tâi-oân oán kūn kok toē, í-ki̍p chèng-hú koaⁿ-oân, kap choē-choē hù-siong lâi chham-ka. Tāi-ke chin boān-chiok, ū chit keng oē thang iông-ún 800 goā lâng ê lé-tn̂g, si̍t-chāi sī chin ha̍p-sek ê kì-liām kiàn-tiok. Tāi-ke to sêng-jīn lán ê ha̍k-hāu sī ū chiân-tô͘ ê, chá-jit só͘ hoat-siⁿ mâ-hoân būn-toê iā ún-tēng khí-lâi. Chit sî Ka-tîn Liông-thài-lông choè hāu-tiúⁿ, i iā ū seng-bêng, ha̍k-hāu sian-siⁿ ê só͘-gia̍h, Tâi, Ji̍p pîⁿ choē lâng. Só͘-í Jit Tâi kàu-su kan ê chhai-khī iā tuì án-ni kái-siau. Su-seng ê kám-chêng chiām-chiām oân-bí bô sū. Tuì chit nn̄g ê táin-lé kap hêng-sū（行事）, só͘ tit-tio̍h ê éng-hióng chin toā! Kám-siā Siōng-tè.
Chit keng oē thang iông-ún 900 miâ chó-iū ê toā lé-tn̂g, sī Bān Bo̍k-su siat-kè, Khó͘ Choâⁿ Sian-siⁿ che-tô͘. Tī chit ê sî-chûn áu-boē ū thih-kun hūn-gêng-thó͘（鋼筋混凝土 reinforced concrete）ê kiàn-tiok-hoat, só͘-í hoâiⁿ-kông, kah-tòng lóng sī ēng saⁿ-kak-thih, chng-á-piah, chhù-téng khàm o͘-hiā, mn̂g, thang chin-choē, liân ē-kûn-tó͘ iā lâu thoah-chí, oē tit thoah-khui-tit, chin hiàng-liâng chhiu-chhìn. Lóng kiōng khai chi̍t bān 7 chheng kho͘ nā-tiāⁿ, chit sî-chūn, chîⁿ toā îⁿ, mi̍h hó koh siok2, lóng bô hit hō thâu kang kiám liāu ê oē, chhù chin ióng, sui jiân hong-thai toē-tāng, an-jiân chū-chāi bô kiaⁿ. Saⁿ nî chêng Hāu-iú Hâu Choân-sêng sian-siⁿ siū bēng choè táng-sū-tiúⁿ, ū koh kè-e̍k kái-chō lé-tn̂g khah toā, oē tit iông-ún 1500 miâ í-lāi, choè Lâm-pō͘ kàu-hoē 100 chiu-nî kì-liām tāi-hoē ê sek-tiûⁿ. āu-lâi nā ū ki-hoē chiah kóng khah siông-sè.
Ha̍k-liâu hoè-chí
Ū ha̍k-liāu chiah ū hó ê hāu-hong（校風）,che sī bat toà kè siok-sià ê lâng só͘ kong-jīn--ê. Bān Hāu-tiúⁿ chin giâm, ha̍k-seng lóng tio̍h toà siok-sià, nā bô m̄ siu, liân sian-siⁿ ê kiáⁿ iā tio̍h toà siok-sià. Só͘-í choân-hāu ha̍k-seng kì-siok chè-tō͘, sī Tiúⁿ Tiong ê te̍k-sek. Su-seng tông khí ku（同起居）. Tióng iù saⁿ pang-chān, chit-pēng（疾病）saⁿ hû-chhî, hô-ái chhin-chhiūⁿ chi̍t ke ê lâng. Chá àm gîm-si, tha̍k keng, kî-tó, oē tit thang tit-tio̍h chong-kàu kàu-io̍k, hùn-liān cheng-sîn, î-chhî ha̍k-hāu hó ê hong-khì, thoân-thóng kuí cha̍p nî, biân-biân（綿綿）put-choa̍t, To̍k-to̍k hiah ê Ji̍t-jîn, ēng Hông-bîn-hoà choè khó͘-si̍t（口實）. Si̍t-chāi sī khū-phàⁿ Tâi-pau chhek-tōng hoán-khòng, sià-kam lóng tio̍h Ji̍t-jîn tam-tng. Ke siu sià-huì, ke-thiⁿ ha̍k-seng toà siok-sià ê hū-tam, tì-sú ha̍k-seng m̄ ài toà siok-sià, ū ê toà tī chhī-lāi ê jîn-ke chhù, ū ê tuì hn̄g-hn̄g ê só͘-chāi. chá-khí sî 3,4 tiám-cheng, chiū tio̍h khí-lâi chún-pī kiáⁿ-jî ê chá-tǹg kap tiong-ngó͘ piān-tong. Siok-sià lāi iā ta̍uh-ta̍uh hoat-seng sū-kiāⁿ, chin o̍h-tit pān, uī-tio̍h Tâi-oân lâng choè sià-kam ê sî, to chin hó kè ji̍t, hiān-sî thái oē án-ni, soà teh giâu-gî sī Tâi-oân sian-siⁿ siàn-tōng--ê, kai-chài lāu Ka-tîn Hāu-tiúⁿ bô sìn in ê oē chiah bô sū.
In-uī chiàn-sî ê thóng-chè chèng-chhek, boē tit chū-iû boé mi̍h. Eng-kok kàu-hoē ê pó͘-chō͘ kim iā choa̍t-lō͘, tio̍h khó-lū huì-iōng ê lâi-goân, chiah piàn siok-sià choè kàu-sek, siu khah-choē ha̍k-seng, thang tit-tio̍h khah choē ha̍k huì. Chit ê ū thoân-thóng le̍k-sú ê siok-sià chè-tō͘, tuì án-ni hoè-chí khì lah!
Kok-gú káng-sip-hoē
Kong-ho̍k āu tû-khí boē-sái-tit khai-chi ki-pún kim 10 bān í-goā, ha̍k-hāu bô chhun joā choē chîⁿ. Tiō Thian-chû, Lí Kok-te̍k, Lí Kok-liông 3 uī sian-seⁿ chiū siūⁿ chhut thàn chîⁿ ê hoat-tō͘. Tuì 34 nî 10 ge̍h it ji̍t khí khui kok-bûn（Tiō）,Kok-gú kap pèng-jī（二李）ê káng-si̍p-hoē, Ū thàn tām-po̍h chîⁿ choè kiù-chè jiân-bî chi-kip（燃眉之急）. Lán kàu-hoē ha̍k-hāu tī hō͘ Ji̍t-pún khòng-chè 50 nî kú ê tiong-kan, iáu lâu Hàn-bûn tī-leh, iā ū cheng-thong Kok-gú ê sian-siⁿ teh kà-chheh, chē oē kham-tit hō͘ lán kiau-gō͘（Pro͘d）. Káng-si̍p-hoē lâm-lú kiam-siu, khah choē sī ki-koan kong-si ê chit-oân, ū ê tiau-kang tuì Ko-hiông, Ka-gī lâi thong-ha̍k. chin jia̍t-sim, ū hèng-chhù.
Su seng chi ài
Ha̍k-huì sī chiàu Chèng-hú só͘ kui-tēng, boē-sái-tit ke siu, hòng-kiam kong-ho̍k āu, bí chu sin kuì（米珠薪桂）, chi̍t ê sian-siⁿ só͘ tit-tio̍h ê ū hān-tiāⁿ, ji̍p put-hu chhut, ha̍k-seng thé-thiap lāu-su ê khó͘-thàng, chhòng-siat ài-hāu-hoē, muí ge̍h muí chi̍t ê ha̍k-seng hiàn kau pe̍h bí 5 chin, che lóng sī tuì ha̍k-seng ê sêng-ì, bô lâng bô kau. Ha̍k-seng tiong kéng chhut uí-oân lâi siu-chip, jiân-āu chiàu kàu chit-oân ka-chok ê choē chió, hun-phoè kàu sian-siⁿ ê ke-lāi. Ū chi̍t pái Tiō Thian-chû Sian-siⁿ tuì Tâi-pak beh tò-lâi Tâi-lâm, chhia tiong tú-tio̍h Lí Liân-chhun Kiok-tiúⁿ, chhiáⁿ i chiong chia̍h bí, phoe-siû hō͘ su-li̍p ha̍k-hāu oân-kang. I ū tap-eng, suî-sî kiò tī siāng chhia-lāi ê pì-su oē kì-tit siat-hoat. Tuì chia khí su-li̍p ha̍k-hāu oân-kang tuì in ê sin-chhéng oē thang tuì Niû-si̍t-kio̍k boé khah sio̍k ê bí, ha̍k-seng ê hiàn bí ūn-tōng chiah thêng-chí.
Tióng Tiong ê hāu-iú iā put-chí ài-kèng sian-siⁿ. 80 só͘ bat khì Chiong-hoà, Ko-hiông, Sai-lê, Sin-iâⁿ, Pak-káng, Tek-san, Phoh-chú chiah ê só͘-chāi, lóng siū hāu-iú khui-hoē hoan-gêng. Kuí nî lâi muí nî to ū kuí-nā pái ha̍k-seng tò-lâi khui in ê Tông-pan-hoê（同班會）. ēng chhī-lāi ê hāu-iú choè hoat-khí-jîn, hoat sìn chio-chi̍p kok toē-hng ê kip-iú lâi hóng-būn bú-hāu khui-hoē. Sui-jiân in bô lóng sìn Chú, khui-hoē ê sî, iû-goân gîm-si tha̍k-keng kî-tó. Koh chi̍t pái siūⁿ chhut chá-chêng choè lé-pêng ê khoài-lo̍k. Thiaⁿ”Bú-hāu ê keng-kè”, “kóng kok lâng ê chōng-hóng”ū ê í-keng choè a-kong, ū ê iáu-boē choè lāu-pē, ū ê sī koaⁿ, ū ê sī bîn, sam kàu kiú liû, bû só͘ put iú. Kū nî 11 ge̍h 23 ji̍t só͘ khui ê, sī Bîn-kok 24 nî ji̍p-ha̍k ê tông-ha̍k-hoē, ū ê tuì Tâi-tang, Tâi-pak, Tâi-tiong lâi hù-hoē. iā ū hong-hù ê iân-sia̍h, sàng lé-mi̍h hō͘ 5 uī lāu-su lâi piáu-sī in ê kám-siā.
Chiong-sin bêng-ū hāu-tiúⁿ
Ji̍t-pún hâng-ho̍k, Tâi-oân kong-ho̍k, kiám ū pí che khah hoaⁿ-hí ê sū mah? Ka-tîn Hāu-tiúⁿ hoan-hù Tiō Thian-chû Sian-siⁿ tio̍h koáⁿ-kín kap Gô͘ Chhiu-bî, Hâu Choân-sêng 2 uī Sian-siⁿ chham-siông siān-hō͘ ê sū-chêng, nā bô oē hō͘ lâng chiap-siu khì. Ta̍uh-ta̍uh tī Gô͘ ka gī-lūn tāi-chì kè 12,3 tiám chiah tò-lâi, tú-tio̍h hiàn-peng sûn-lô, tòng m̄ lâng kè, beh chhiau seng-khu, kai-chài sin-chiūⁿ ū Tóng-chèng, nn̄g lâng chiah an-choân tu̍t-phoà kéng-kài soàⁿ.
Saⁿ-cha̍p sì nî 10 ge̍h 10 ji̍t, pún-hāu koh khui, lâi pò-tò ê ha̍k-seng 600 goā miâ, hun choè Ko, Chho͘-kip nn̄g pan. Keh nî 7 ge̍h ū kú-hêng kū-chè Tiong-ha̍k choè āu chi̍t pái ê pit-gia̍p-sek. Ha̍k-hāu sui sī bô tit-chiap siū chà, nā-sī tāi-chiàn tiong lóng bô siu-lí, í, toh iā sún-sit, phah-pháiⁿ chin siong-tiōng. 36 nî tit-tio̍h Ka-tiúⁿ hoē-tiúⁿ kò͘ Un Chiàm-khoe Sian-siⁿ ê hó-ì, tī Tâi-lâm koān-hā tuì ka-tiúⁿ bō͘ khoán, kap Pîn-tong koān-hā kuí só͘-chāi, tit-tio̍h 16 bān 4 chheng goā（kū Tâi-pè）,khai-chi āu, iáu chhun chi̍t bān 9 chhēng goā. Ū-sǹg chit nn̄g bān gûn oē tit pìⁿ-choè 200 bān, bô phah-sǹg, kàu 38 nî ê chi̍t chá-khí, pìⁿ-choè 5 kak gûn nā-tiāⁿ.
Ū chi̍t ji̍t, Tiō, Ông í-ki̍p kuí-nā ê Ji̍t-pún lāu-su, chē tī kū lé-tn̂g lâu-téng ê chêng-bīn cháu-lông teh liâu-thian. Ka-tîn Hāu-tiúⁿ kóng, goá khoàⁿ lín chiah ê lâng, chí-ū Tiō Kun chi̍t lâng sī choè tiúⁿ ê kai-kip, chóng-sī beh cháiⁿ-iūⁿ oē choè tiúⁿ leh! I sī Tâi-oân lâng, chèng-hú bô beh ēng choè hāu-tiúⁿ, phah-sǹg tio̍h ji̍p si̍t-gia̍p-kài, khah ū ǹg-bāng. Tiō Kun kóng goá bat choè kè kip-tiúⁿ, sek-tiúⁿ, hiān-sî sī Ko saⁿ ê kip chú-jīm mā sī tiúⁿ, iū koh sī goán tau ê ka-tiúⁿ, án-ni chiū kàu-gia̍h lah!
Bô phah-sǹg kuí nî āu, Siōng-tè ê an-pâi, Ji̍t-pún pāi-chiàn, Tâi-oân kong-ho̍k, Táng-sū-hoē phèng-chhiáⁿ Tiō Sian-siⁿ choè hāu-tiúⁿ. I tam-tng hāu-tiúⁿ ê kang 6 nî. In-uī nî-hè choē, seng-khu chiām soe chiah sî-chit, āu-lâi ū hoat-kiàn tī ām-kún siⁿ liû, keng-kè chhiú-su̍t, chiah koh ho̍k-goân. Táng-sū-hoē m̄-kam i lī-khui ha̍k-hāu, cheng-sàng i chiong-sin bêng-ū hāu-tiúⁿ. It sî kim í-goā, koh sàng i muí ge̍h hōng-kip ê saⁿ hūn chi̍t, hō͘ i ióng-ló͘. Hái-goā ê Thoân-kàu-su-hoē, iā ū siá phoe kā i seh-siā.
校歌 趙天慈作詞
堂皇大廈,威鎮城東,歷史悠久,美麗稱雄,
桃李盈門,化雨春風,螢雪苦幹,學海爭強.
隆隆校運,與世同長,隆隆校運,與世同長.
長榮中學,萬世流芳,長榮中學,萬世流芳.
長榮,長榮,長榮.
“Pat si̍p só͘ tuì 55 nî 7 ge̍h kàu taⁿ, thâu-bé 3 nî kú, tì pò-siōng kap tāi-ke saⁿ kìⁿ-bīn, taⁿ”Hoê-ek”kàu chia uî-chí. ǹg-bāng tuì 3 ge̍h khí oē tit ēng goá só͘ chai bat Seng-toē Pa-le̍k-su-thêng ê sū pò lín chai. 3 nî kú lô-hoân tāi-ke ê ba̍k-chiu, kā tāi-ke seh siā, tiàm tī Chú tit-tio̍h an khong.”
（Choân bûn oân）
漢羅（Ùi原文改寫）
回憶
（本期屬完） Pat 習所
1968.01.15 1022號P.7~P.8
新禮堂落成。校慶等。
台前5年（1916）所起的新校舍，照彼時看，是真合用，若是經過15年後，學生的數額年年加添，若是禮堂的坪數，不時是37。5坪，攏未加添。舊禮堂的長是7.5間，闊是5間，按呢才有37.5坪大，只有會收容250人，極滿等是300人，就差thóng-thóng lah！1935年是傳教佇台灣70年，有-tēng欲佇台南開70週年紀念大會，也是長中開校50年，也有定著欲開祝賀會。所以著有會通容允800外人的禮堂，就定著中學起較闊大的禮堂。建築費按一萬5千箍。這個費用按算對校友佮家長募捐，若無夠，才另外設法。1932年4月，趙天慈先生對東京立正大學高等師範科畢業倒來，伊所負擔教學時間無偌濟，又閣伊佮校友，家長較熟識。所以當局推薦伊出來募捐這條錢。天慈先生拜二，三，四教冊，拜五到拜一出去募捐。倚三月日的奔走，收入現金7千外，佮學校所積聚的，以及教師會特別的寄贈金，合合做伙，就著手興工。到1935年10月，台灣南部教會設教70週年，長中50週年校慶。落成典禮攏做伙舉行。
這間禮堂闊45尺（7.5間），長100尺（16.66間），就是124.5坪大，會得容允800外的學生，較無理會坐得900名。這時萬校長猶佇台灣，這間是伊最後的建設，通講是做好的紀念。為著計劃種種的行事，學校歇睏一禮拜咧準備，3，4日久佇遮開紀念會，音樂會，運動會，展覽會，紀念，感謝，歡喜，予hoān-nā參加的人無未記得。這慶祝引起台灣各方面的興趣，校友，家長，朋友，牧師，長老，代表對台灣倚近各地，以及政府官員，佮濟濟富商來參加。大家真滿足，有這間會通容允800外人的禮堂，實在是真合適的紀念建築。大家to承認咱的學校是有前途的，早日所發生麻煩問題也穩定起來。這時加藤龍太郎做校長，伊也有聲明，學校先生的數額，台，日平濟人。所以日台教師間的chhai-khī也對按呢介紹。師生的感情漸漸完美無事。對這兩個典禮佮行事，所得著的影響真大！感謝上帝。
這間會通容允900名左右的大禮堂，是萬牧師設計，許泉先生製圖。佇這个時陣後尾有鐵筋混凝土（鋼筋混凝土 reinforced concrete）的建築法，所以橫kông，kah-tòng攏是用三角鐵，磚仔壁，厝頂蓋烏瓦，門，窗真濟，連ē-kûn-tó͘也留thoah-chí，會得thoah開得，真向涼秋凊。攏共khai一萬7chheng箍若定，這時陣，錢大圓，物好閣俗，攏無彼號偷工減料的話，厝真勇，雖然風颱地動，安然自在無驚。三年前校友侯全成先生受命做董事長，有閣計畫改造禮堂較大，會得容允1500名以內，做南部教會100週年紀念大會的室場。後來若有機會才講較詳細。
學寮廢止
有學寮才有好的校風（校風），這是捌toà過宿舍的人所公認的。萬校長真嚴，學生攏著toà宿舍，若無毋收，連先生的囝也著帶toà宿舍。所以全校學生寄宿制度，是長中的特色。師生同起居。長幼相幫贊，疾病相扶持，和藹親像一家的人。早暗吟詩，讀經，祈禱，會得通得著宗教教育，訓練精神，維持學校好的風氣，傳統幾十年，綿綿不絕，獨獨遐的日人，用皇民化做口實。實在是懼怕台胞策動反抗，舍監攏著日人擔當。加收社費，加添學生toà宿舍的負擔，致使學生毋愛toà宿舍，有的帶佇市內的人家厝，有的對遠遠的所在。早起時3，4點鐘，就著起來準備囝兒的早頓佮中午便當。宿舍內也ta̍uh-ta̍uh發生事件，真o̍h得辦，為著台灣人做舍監的時，都真好過日，現時thái會按呢，紲teh僥疑是台灣先生煽動的，佳哉老加藤校長無信in的話才無事。
因為戰時的統制政策，未得自由買物。英國教會的補助金也絕路，著考慮費用的來源，才變宿舍做教室，收卡濟學生，通得著卡濟學費。這個有傳統歷史的宿舍制度，對按呢廢止去lah！
國語講習會
光復後除去袂使得開支基本金10萬以外，學校無偆偌濟錢。趙天慈，李國澤，李國良3位先生就想出趁錢的法度。對34年10月1日起開國文（趙），國語佮pèng-jī（二李）的講習會，有趁淡薄錢做救濟燃眉之急（燃眉之急）。咱教會學校佇予日本控制50年久的中間，猶留漢文佇-leh，也有精通國語的先生teh教冊，chē會堪得予咱驕傲（Pro͘d）。講習會男女兼收，卡濟是機關公司的職員，有的刁工對高雄，嘉義來通學。真熱心，有興趣。
師生之愛
學費是照政府所規定，袂使得加收，況兼光復後，米珠新桂（米珠薪桂），一個先生所得著的有限定，入不敷出，學生體貼老師的苦痛，創設愛校會，每月每一個學生獻交白五 5 chin，這攏是對學生的誠意，無人無交。學生中揀出委員來收集，然後照教職員家族的濟少，分配到先生的家內。有一擺趙天慈先生對台北欲倒來台南，車中拄著李年春局長，請伊將食米，配售予私立學校員工。伊有答應，隨時叫佇siāng車內的秘書會記得設法。對遮起私立學校員工對in 的申請會通對糧食局買卡俗的米，學生的獻米運動才停止。
長中的校友也不止愛敬先生。80所bat去彰化，高雄，西螺，新營，北港，竹山，朴子遮的所在，攏受校友開會歡迎。幾年來每年都有幾若擺學生倒來開in 的同班會（同班會）。用市內的校友做發起人，發信招集各地方的級友來訪問母校開會。雖然in無攏信主，開會的時，猶原吟詩讀經祈禱。閣一擺想出早前做lé-pêng的快樂。聽「母校的經過」，「講各人的狀況」有的已經做阿公，有的猶未做老爸，有的是官，有的是民，三教九流，無所不有。舊年11月23日所開的，是民國24年入學的同學會，有的對台東，台北，台中來赴會。也有豐富的筵席，送禮物予5 位老師來表示in 的感謝。
終身名譽校長
日本降服，台灣光復，kiám有比這卡歡喜的事mah？加藤校長吩咐趙天慈先生著趕緊佮吳Chhiu-bî，侯全成2位先生參詳善募的事情，若無會予人接收去。Ta̍uh-ta̍uh佇吳家議論代誌過 12，3點才tò來，拄著憲兵巡邏，擋毋人過，欲搜身軀，佳哉身上有黨證，兩人才安全突破警戒線。
三十四年10月10日，本校閣開，來報到的學生600外名，分做高，初級兩班。隔年7月有舉行舊制中學做後一擺的畢業式。學校雖是無直接受炸，若是大戰中攏無修理，椅，桌也損失，扑歹真傷重。36年得著家長會長顧溫Chiàm-khoe先生的好意，佇台南縣下對家長募款，佮屏東縣下幾所在，得著16萬4千外（舊台幣），開支後，猶偆一萬9千外。預算這兩萬銀會得變做200萬，無扑算，到38年的一早起，變做5 角銀若定。
有一日，趙，王以及幾若個日本老師，坐佇舊禮堂樓頂的前面走廊teh聊天。 茄籘(Ka-tîn)校長講，我看恁chiah 的人，只有趙君一人是做長的階級，總是欲 怎樣oē 做長 leh! 伊是台灣人，政府無欲用做校長，扑算著入實業界，較有向望。趙君講我bat做過級長，宿長，現時是高三的級主任嘛是長，又閣是阮兜的家長，按呢就到額lah！
無扑算幾年後，上帝的安排，日本敗戰，台灣光復，董事會聘請趙先生做校長。伊擔當校長的工6年。因為年歲濟，身軀漸衰才辭職，後來有發見佇頷頸生瘤，經過手術，才閣復原。董事會毋甘伊離開學校，贈送伊終身名譽校長。一sî 金以外，閣送伊每月俸給的三分一，予伊養老。海外的傳教師會，也有寫批共伊說謝。
校歌 趙天慈作詞
堂皇大廈，威鎮城東，歷史悠久，美麗稱雄，
桃李盈門，化雨春風，螢雪苦幹，學海爭強。
隆隆校運，與世同長，隆隆校運，與世同長。
長榮中學，萬世流芳，長榮中學，萬世流芳。
長榮，長榮，長榮。
「Pat習所對55年7月到taⁿ，頭尾3年久，佇報上佮大家saⁿ見面，taⁿ「回憶」到遮為止。向望對3月起會得用我所知bat聖地Pa-le̍k-su-thêng的事報恁知。3年久勞煩大家的目睭，共大家說謝，踮佇主得著安康。」
（全文完）