故張Kim-iû長老
Kò͘ Tiuⁿ Kim-iû Tiúⁿ-ló
文獻資訊
| 項目 | 資料 |
|---|---|
| 作者 | 黃秋財 N̂g Chhiu-châi |
| 卷期 | 台灣教會公報 |
| 卷期 | 第992號 |
| 日期 | 1966/10 |
| 頁數 | 13 |
白話字（原文數位化）
Kò͘ Tiuⁿ Kim-iû Tiúⁿ-ló
N̂g Chhiu-châi
1966.10.15 P.13-14
Choè-kūn (9 ge̍h 16 ji̍t hān-ngó͘ 2 tiam 30 hun), tī Pîn-tong Tiong-hoē ê Khoe-chiu Kàu-hoē ū sit-lo̍h chi̍t uī kàu-kài tiōng-iàu khó-kèng ê tiúⁿ-ló, chiū-sī Tiuⁿ Kim-iû Tiúⁿ-ló. I tī Tâi-oân chhiⁿ-kó（青果）kài iā sī chi̍t uī būn-bêng ê jîn-bu̍t, iā sī chi̍t uī kong-gē（剛毅）, liâm-chèng（廉正）, tok-sìn（篤信）, ài-jîn（愛人）ê lâng. I ê khì-sè put-tān sī i ê uî-cho̍k siū tio̍h chin toā ê táⁿ-kek, tuì tī kàu-hoē sī chin toā ê sún-sit.
Tī chia goá lâi siá i ê lo̍k-le̍k kap i ê choè lâng lâi tui-liām i.
- Lio̍k-le̍k.
I chhut-sì tī 1915 nî 1 ge̍h 13 ji̍t, iā tī 1934 nî kiat-hun; ū 4 lâm, 3 lú. I tī 1934 nî pit-gia̍p Pîn-tong Lông-gia̍p ha̍k-hāu, chêng-āu ū jīm kong-ha̍k-hāu kàu-oân nn̄g nî, Hiong-kong-só͘ kī-sū 3 nî, Chhiⁿ-kó tông-gia̍p cho͘-ha̍p 13 nî, Pîn-tong kiám-giām-chām chām-tiúⁿ 3 nî, jiân-āu chū-êng lông-tiûⁿ, āu-lâi tng lông-gia̍p koan-hē ê kong-chit kàu sí.
I tī Chú-āu 1948 nî 6 ge̍h 27 ji̍t niá soé chìn kàu, chiân-āu tng tióng-chip 16 nî kú.
2) I sī khûn-ha̍k, khek-khó͘ ê lâng, i sui-jiân sī chhut-sì tī pîn-khùn ê lông-ka, chóng-sī tuì ha̍k-gia̍p chin jīn-chin, tuì chú-lú ê kàu-io̍k iā sī hui-siông ê koan-sim, tāi pō͘-hūn ê chú-lú lóng ū pit-ga̍p tāi choan á-sī hiān-chāi chāi-ha̍k tiong.
3) I sī siú-sìn, liâm-chèng kap chīn-chit ê lâng. I it-tàn nā tap-èng lâng ê sū, bô-lūn ū sím-mi̍h khùn-lân iā tek-khak choè kàu chiâⁿ.
Tī i ê chit-uī siōng, i sî-siông ū choē-choē ki-hoē thang tit-tio̍h gia̍h-goā ê kim-chîⁿ á-sī mi̍h-kiāⁿ, chóng-sī chi̍t si to bô beh tham. Koh-chài i sī chi̍t uī chin-tiong siú-chit, só͘-í cha̍p-hun tit-tio̍h siōng-si ê thióng-ài kap sin-jīm.
4) Ū kong-ek-sim. I tuì hiah ê ti̍t-chiap teh seng-sán keng-chio ê chio-lông ê siu-ek, hui-siông chhut-la̍t kā in cheng-chhú, nā-sī tuì hiah ê tham-koaⁿ ù-lī, i chiū put phà chù-sin put-lī ê hiō-kó, giâm-chèng, í hoat tuì-khòng, bián-tit hiah ê lông-bîn siū pak-siah. Só-í put-chí siū chio-lông tāi-ke ê kèng-gióng kap ài-hō͘.
5) Gâu thiàⁿ Siōng-tè kap thiàⁿ lâng. I chiân-āu tī Khoe-chiu kàu-hoē jīm-chit iok ū 16 nî, kî-tiong iā bat tng T. K. C. hoē-tiúⁿ. Tuì tī Chú-ji̍t-o̍h ê kang-chok hui-siông koan-sim. Tī Tiong-hoē iā ū tam-tng kè Châi-bū-pō͘-oân.
Pún-sin choè lâng khiân-sêng, jia̍t-sim koh tok-sìn, tī choè-āu beh pia̍t-sè ê chi̍t lé-pài, sui-jiân pīⁿ tāng kan-khó͘, iû-goân phe-miā jím-khó͘ lâi chham-ka lé-pài. Koh-chài i sui-jiân chai ka-kī ê pīⁿ sī choa̍t-chèng, iû-goân chhin-chhiūⁿ lok-pek, lóng bô hoat-chhut oàn-giân, thun-lún, sūn-ho̍k Siōng-tè kàu lîm-chiong, tī siā-hoē siōng sī chit ê chhut-miā ê “thih-bīn bû-su”（鐵面無私）ê léng-tō jîn-bu̍t.
Koh chi̍t bīn, i sī gâu kèng-tiōng bo̍k-su ê lâng, jī-chhiáⁿ bô-lūn hoē-lāi, á-sī hoē-goā, i bô hun pîn-chiān hù-kuì, toē-uī ê koan-kē, nî-hè ê choē chió, hoaⁿ-hí kap in chhin-kūn, mn̄g tn̂g, mn̄g té, koan-sim tī in ê seng-oa̍h, tī àm-tiong chin gâu pang-chān jio̍k-sió ê kan-khó͘ lâng. Tuì-thāi kang-lân. Kang-chok siōng chin giâm-chèng, chóng-sī lāi-sim sī moá ū thiàⁿ-chêng. Gâu thé-thiap, un-thāi in.
Tuì kàu-hoē ê hōng-hià koh-khah sī kam-sim, chhut-la̍t. Kiat-hun ê tong-chho͘, ka-kéng pîn-khùn, ū choē-choē hū-chè, iáu-kú chhut-la̍t hōng-hiàn. Tuì chi-hoē Khàm-téng ê kiàn-tn̂g, sui-jiân ka-kī iáu ū hū-chè, 10 kuí bān kho͘ ê ū-soàn, i chiū hiàn 3 bān. Kiàn-tn̂g tiong i ū pang-bâng kàm-kang. Sui-iân phoà-pīⁿ chiām-chiām siong-tiōng, iáu-kú phe-miā m̄-khéng hioh-khùn, muí ji̍t pháu chin hn̄g ê lō͘-chām khì kàm-kang. In-uī i siông kóng, tng goá iáu ū oa̍h-miā, khuì-la̍t, goá tio̍h chīn-la̍t lâi choè, goá iáu oa̍h teh oē thang hiàn ê sî, goá beh chīn la̍t lâi hiàn, lín m̄-thang kā goá chó͘-chí.
6) I ū pêng-an tiàm tī Chú lîm-chiong.
Tī i lîm-chiong ê sî ū lêng-chēng, an-siông ê bīn-iông, ji̍p-bo̍k chêng ê uî-iông sī chhiong-moá kng-bêng, chhiò-iông, pêng-an ê iông-māu, tuì án-ni, hō͘ i ê uî-cho̍k, chhin-lâng kap chèng sìn-tô͘ tāi-ke lâu liáu chin chhim-kek hó ê ìn-siōng kap an-uì. Kò-pia̍t lé-pài（告別禮拜）, ū chi̍t chheng chó-iū miâ ê hoē chiòng, tān-sī chit ê sī khoe-chiu khong-chiân bī cheng iú（空前未曾有）ê.
漢羅（Ùi原文改寫）
故張Kim-iû長老
黃秋財
1966.10.15 P.13-14
最近(9月16日下午 2 點 30 分)， tī 屏東中會 ê溪洲教會有失落一位教界重要可敬ê長老，就是張Kim-iû長老。伊tī台灣青果（青果）界也是一位聞名 ê人物，也是一位剛毅（剛毅）， 廉正（廉正）， 篤信（篤信）， 愛人（愛人）ê人。伊ê氣勢 不但是伊ê 遺族受tio̍h真大ê打擊，對tī教會是真大ê損失。
Tī chia我來寫伊ê戮力 kap伊ê做人來追念伊。
1。 戮力。
伊出世tī 1915年1月13日，iā tī 1934年結婚；有4 男， 3 女。伊tī 1934年畢業屏東農業學校，前後有任公學校教員兩年， 鄉公所記事3年， 青果同業組合13年， 屏東檢驗站 站長 3年，然後自營農場，後來當農業關係ê 公職到死。
伊tī主後1948年6月27日領洗進教，chiân-後當長執 16年久。
2)伊是勤學，刻苦ê人，伊雖然是出世tī 貧困ê 農家，總是tuì 學業真認真， tuì 子女 ê教育也是非常ê關心， 大部分ê子女攏有畢業大專 á是現在在學中。
3)伊是守信， 廉正kap盡職ê人。伊一旦若答應人ê事，無論有甚麼困難也的確做到成。
tī伊ê職位上，伊時常有濟濟機會thang得tio̍h額外 ê金錢á是物件，總是一絲to無beh 貪。 Koh再伊是一位盡忠守職，所以十分得tio̍h 上司ê寵愛kap 信任。
4)有公益心。伊tuì hiah-ê直接teh生產芎蕉 ê 蕉農ê 收益，非常出力kā in爭取，若是tuì hiah-ê 貪官 有利，伊就不怕自身不利ê後果，嚴正，依法對抗，免得hiah-ê農民受剝削。 所以不止受蕉農大家ê敬仰 kap愛護。
5) Gâu疼上帝kap疼人。伊前後tī 溪洲教會任職約有16年，其中也bat當T. K. C.會長。對tī主日學ê工作非常關心。 Tī中會也有擔當過 財務部員。
本身做人虔誠，熱心koh 篤信， tī最後beh 別式 ê一禮拜，雖然病重艱苦，猶原phe命忍苦來參加禮拜。 Koh再伊雖然知家己ê病是絕症，猶原親像約伯，攏無發出怨言，吞忍，順服上帝到臨終， tī社會上是一個出名ê “鐵面無私”（鐵面無私）ê領導人物。
Koh一面，伊是gâu敬重牧師ê人， 而且無論會內， á是會外，伊無分貧賤富貴，地位ê koân-kē，年歲ê濟少，歡喜kap in親近，問長，問短，關心tī in ê生活， tī暗中真gâu幫贊弱小ê艱苦人。對待工人。工作上真嚴正，總是內心是滿有疼情。 Gâu體貼， 恩待in。
Tuì教會ê奉獻koh-khah是甘心，出力。結婚ê當初， 家境貧困，有濟濟 負債， iáu-kú出力奉獻。 Tuì 支會坎頂 ê 建堂，雖然家己iáu有負債， 10 幾 萬 kho͘ ê預算，伊就獻3 萬。 建堂中伊有幫忙監工。 雖然破病漸漸傷重， iáu-kú phe命m̄肯歇睏，每日跑真遠ê路站去監工。因為伊常講：當我iáu有活命，氣力，我tio̍h盡力來做，我iáu活teh 會 thang獻ê時，我beh盡力來獻， lín m̄-thang kā我阻止。
6)伊有平安tiàm tī主臨終。
tī伊臨終ê時有寧靜，安祥ê面容，入墓前ê 遺容是充滿光明，笑容，平安ê容貌， tuì án-ni， hō͘伊ê 遺族，親人kap眾信徒大家流了真深刻好ê印象kap安慰。告別禮拜（告別禮拜），有一千左右名ê會眾，但是這個是溪洲 空前未曾有（空前未曾有）ê。