長榮中學ê現在kap將來
Tiong-êng Tiong-ha̍k ê hiān-chāi kap Chiong-lâi
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第990號 |
| 日期 | 1966/9 |
| 頁數 | 2 |
白話字（原文數位化）
Tiong-êng Tiong-ha̍k ê hiān-chāi kap Chiong-lâi
Tè Bêng-hok
No. 990 1966.09.15 P.2-3
Chú lāi ê hiaⁿ-tī chí-bē pêng-an!
Pún-hāu 81 chiu-nî ê hāu-khèng-ji̍t ( 9 ge̍h 21 ji̍t) koh-chài teh-beh kàu lah, kè-khì chi̍t nî kú koh tit-tio̍h lín ê koan-hoâi tāi tó, chi-chhî kap oān-chō͘, kai-chài thang koh pêng-an keng-kè, chhim-chhim kám-chiā. Lán ê kàu-hoē tng tī khèng-chiok pah chiu-nî ê sî-chūn, pún-hāu iā chìn-ji̍p 80 nî ê hāu-kèng. Tng lán kàu-hoē gí-tēng sin ê thoân-kàu hong-chhek teh-beh si̍t-si ê sî-chūn, pún-hāu iā saⁿ-kap chìn-ji̍p sin ê kai-toaⁿ, í-keng tī 80 hè í-siōng ê sî-tāi, eng-kai iā ū sin ê hong-chhek, hō͘ ha̍k-hāu ê kiàn-siat ê cheng-sîn oē thang ho̍k-heng chiah tio̍h. Chóng-sī tng tī kàu-hoē pe8-ka ūn-tōng chìn-ji̍p ko-tiau ê sî, pún-hāu chin khó-sioh, boē thang phoè-ha̍p Tāi-choan ĪN-hāu ê oân-sêng ê kè-e̍k, lai choè koh-khah toā ê kòng-hiàn, si̍t-chāi kám-kak chin uî-hām. Chit tiong-kan chū-jiân ū khek-koan ê tiōng-tāi khùn-lân í-ki̍p kî-thaⁿ ê goân-in, tān-sī siat-sú nā-sī oē thang tit-tio̍h kàu-hoē kap hāu-iú choân le̍k chi-chhî kap seng-oān, kûn chhek kûn le̍k, chêng-hêng kiám-chhái ū khah bô siāng-khoán chiah tio̍h. Chū-jiân sī in-uī goán pún-lâng ê lêng-le̍k chin bô kàu-gia̍h, só͘-í chêng-pang tī Chóng-hoē pò-kò ê sî, í-keng ū chhut-la̍t chhéng-kiû chiū kín siat-hoat kiān-choân ê táng-sū-hoē, koh sīn-tiōng soán hāu-tiúⁿ lâi chiap thoè, hō͘ pún-hāu oē thang an-tēng, koh thang tit-tio̍h hoat-tián.
Pún-hāu tī 7 ge̍h chhoe Táng-sū-hoē ū oân-sêng kái-cho͘, táng-sū choē-choē sī sin ê lâng, koh ū pō͘-hūn sī liân khin le̍k-chòng ê lâng, in lóng ū siong-tong ê lí-sióng kap sù-bēng-kám, chhin-chhiūⁿ Táng-sū-tiúⁿ sī hāu-iú ê Gô͘ Ki-hok Phok-sū, nā ēng i ê ha̍k-sek seng-bōng kap châi-kàn lâi léng-tō Táng-sū-hoē, koh lâi kek sin pún-hāu, ún-tàng ū hó ê chiân-tô͘ thang hō͘ lán kî-thāi chiah tio̍h. Goá koh tit-tio̍h Táng-sū-tiúⁿ í-ki̍p chu-uī Táng-sū soán goá choè hāu-tiúⁿ, chhim-chhim kám-kak chek-jīm tiōng-tāi, sim-lāi lân-bián ū kiaⁿ-hiâⁿ, chóng bāng oē thang chīn goá só͘ ū ê lêng-lek lâi hāu-lô. Chì kàu chiong ha̍k-hāu ê hiān-hóng í-ki̍p chiong-lâi ê tián-bōng tī chia pò-kò tām-po̍h hō͘ chu-uī chai:
(1) Pún-hāu sui-jiân tú-tio̍h Chèng-hú phó͘-piàn beh siat ha̍k-hāu, kok toē-hng iā ū su-jîn heng-khí ha̍k-hāu, tì-kàu ha̍k-seng ê sò͘-chit tit-tio̍h kàng-kē, chóng-sī ha̍k-seng ê lâi-goân tit-tio̍h muí ê kàu-hoē ê tông-tō kap hāu-iú ê pang-chān, iáu-kú bô tú-tio̍h chin toā ê khùn-lân, siāng-sî su-chu hong-bīn kap keng-huì iā oē thang bián-kióng î-chhî, iáu sǹg thang kám-siā.
(2) Kè-khì chi̍t nî kú, ū kú-pān 80 chiu-nî ê hāu-khèng, koh tiàu-khai Hāu-iú-hoē ê Chóng-hoē, ǹg-bāng thang ka-kiông hāu-iú-hoē ê chó͘-chit, thang lâi hia̍p-chō͘ bú-hāu, thang hoat-hui pún-hau thoân-thóng ê cheng-sîn.
(3) Táng-sū-hoē kái cho͘ liáu-āu, sin ê Táng-sū-hoē chó͘-chit koh-khah kiān-choân. Chong-kàu kàu-io̍k, kàu-ha̍k í-ki̍p keng-chè kok hong-bīn ê khùn-lân, chiū thang tī sin ê Táng-sū-hoē tok-chhiok kap chí-tō ê ē-bīn siat-hoat kái-koat.
(4) Ha̍k-seng ê kàu-io̍k iáu boē thang ta̍t-kàu lí-sióng, ha̍k-gia̍p pí lâng khah su. Bô hoat-tō͘ thang sek-èng phó͘-thong Tiong-ha̍k khò-thêng ê í-keng tio̍k chiām kái-koat. Kàu-su tīn-iông iā chīn-la̍t chù-ì tī teh ka-kiông. Kî-bāng tī an-tēng tiong kiû chìn-pō͘, ló͘-le̍k tiong kiû hoat-tián.
(5) Sin ha̍k-nî ê kok hāng chhò-si:
Chong-kàu chú-jīm iáu bē ū tú-hó ê lâng thang lâi tam-jīm. Hiān-sî ū Tè Kiat-lâng thang lâi tam-jīm. Hiān-sî ū Tè Kiat-hiông kap Lí Kéng-hêng nn̄g uī thoân-tō-su teh tam-tng chong-kàu kang-chok. Koh hiān-sî ū teh kau-sia̍p Ka-ná-tāi che̍k ê I Thian-sù Bo̍k-su, ǹg-bāng thang lâi choè chū hāu Soan-kàu-su. Pún-hāu sǹg sī kàu-hoē ha̍k-hāu, chū-jiân tio̍h kiâⁿ “Iú kàu bû luī,” bô-lūn gâu, ham-bān; hó, pháiⁿ ha̍k-seng lóng tio̍h kā in kàu-io̍k, chóng-sī iā boē ēng-tit uī keng-huì ê koan-hē lām siu ha̍k-seng, bián-tit siū goā-kài giâm-lē phoe-phêng. Chóng-sī in-uī keng-huì bô kàu, siap-pī bô chiâu-chn̂g, koh choan-gia̍p jîn-châi khoat-hoa̍t, só͘-í tuì ha̍k-le̍k thài chha, á-sī hêng-uî khiàm ka ê ha̍k-seng, si̍t-chāi boē thang ū choa̍t-tuì ê pá-ak lâi kā in kàu-io̍k. Só͘-í chhú-khì tek-khak tio̍h hiòng tiōng chit, bô tiōng liōng ê tāi lō͘ lâi kiâⁿ. Put-kò tī hiān-sî ê khoân-kéng ē, beh koáⁿ-kín thê-ko sò͘-chit, sī bô iông-īⁿ, só͘-í seng-ha̍k pí-lu̍t ū khah chha tām-po̍h, tān-sī lán tio̍h chhut-la̍t choè, lâi pó͘-kiù hiah ê thêng-tō͘ khah chha ê ha̍k-seng. án-choáⁿ thê-ko tha̍k-chheh ê hong-khì? Sī choè tiōng-iàu ê kang-chok, koh tī lán pún-hāu ū chin-choē kia̍t-chhut ê jîn-châi, chhin-chhiūⁿ im-ga̍k, bí-su̍t, ūn-tōng, Eng-gú téng, ia̍h tio̍h siat-hoat hú-tō hō͘ i chiâⁿ-choè choan-gia̍p kī-lêng, lâi tuì ha̍k-gia̍p kap kī-lêng choè iú-hāu ê hú-tō pān-hoat, chiah ê lóng tī chek-ke̍k ê gián-kiù kè-e̍k tiong, ǹg-bāng bô kú ū chin hó ê sêng-chek piáu-hiān chhut-lâi.
Pún-kî tī giâm-keh kàu-ha̍k kap hùn-tō, ū kè-e̍k chhì-pān ê pān-hoat choè-hoé si̍t-si, lâi si̍t-hiān thâu-chêng só͘ kóng hiah ê lí-sióng.
Koan-hē keng-chè hong-bīn, bo̍k-chêng kap kong-li̍p ha̍k-hāu ê pí-kàu, thāi-gū bián-kióng khó-í î-chhî, chóng-sī beh tuì choan-gia̍p jîn-oân ê hùn liān, kap phèng-chhiáⁿ iu-liông ê kàu-su, tio̍h ài koh cheng-ka chi̍t phit keng-huì, si̍t-chāi bô kán-tan tān-sī bô siūⁿ pān-hoat sī boē ēng-tit. Chiah ê keng-huì muí nî tāi-iok tio̍h 40 bān kho͘, ǹg-bāng tit-tio̍h kái-koat.
Tī kià siok-sià keng-êng ê hong-chiam, in-uī chhī-lāi ha̍k-seng kiông-pek chū sià āu, kok hong-bīn hoán-èng bô hó, só͘-í pún ha̍k-kî í-keng hòng-khoan, tī chhī-lāi kap chhī-lāi ū chhin-lâng ê ha̍k-seng, thang sin-chhéng bián chū sià. Tī châi-le̍k ê khó-lêng hā, lâi si̍t-si bián huì chū hāu, thang chiàu 70 chiu-nî kè-e̍k tiong só͘ thê-khí khok-chhiong kàu 600 miâ siat-pī ê sio̍k-sià, nā-sī án-ni, thang ta̍t kàu choân hāu chū sià ê chè-tō͘.
Téng-bīn só͘ kóng ê sī î-chhî hiān-chōng ê si hoat, ū chi̍t kù oē kóng, “Pó-siú chiū-sī lo̍k-ngó͘.” Só͘-í pún-hāu Táng-sū-hoē kap iú-koan ê jîn-sū, ke̍k-le̍k chú-tiuⁿ tiû-pī Tāi-choan, chêng chhù Chóng-hoē í-keng koat-gī chàn-sêng, koh ū phài chhut Tāi-choan táng-sū jîn-soán, chìn-hêng tiû-pī, khó-sioh iáu bô ū kū-thé ê kiat-kó. Hiān-chāi hāu-iú-hoē kap iú-koan ê jîn-sū í-keng tōng-oân khí-lâi, ǹg-bāng kàu-hoē kap hāu-iú kok hong-bīn lóng choân-le̍k lâi chi-chhî, hia̍p-chō͘ chìn-hêng, lâi ta̍t-sêng siat-li̍p Tāi-choan ê goān-bōng.
Tī chit ê 81 chiu-nî hāu-khèng ê sî, chiong pún-hāu chêng-hêng kán-pò hō͘ kok-uī, ǹg-āng tī kì-liām lé-pài tiong lâi koan-sim kap tāi-tó. Ko chiàu Chóng-hoē kè-khì ê koat-gī saⁿ-kap lâi chhut-la̍t.
漢羅（Ùi原文改寫）
長榮中學ê現在kap將來
主內ê兄弟姊妹平安！
本校後81週年ê 校慶日( 9月21日) koh再teh-beh到lah，過去一年久koh得著恁ê關懷代禱，支持kap援助，佳哉thang koh平安經過，深深感謝。咱ê教會當tī慶祝百週年ê時陣，本校也進入80年ê校慶。當咱教會議訂新ê傳教方策teh-beh實施ê時陣，本校也相kap進入新ê階段，已經tī 80歲以上ê時代，應該也有新ê方策， hō͘學校ê建設ê精神會thang復興 chiah對。總是當tī教會倍加運動進入高潮ê時，本校真可惜boē thang配合大專醫校ê完成ê計畫， 來做koh-khah大ê貢獻，實在感覺真遺憾。 這中間自然有客觀ê重大困難以及其他ê原因，但是設使若是會thang得著教會kap 校友全力支持kap聲援， 群策群力，情形減彩有khah無siāng款chiah 對。自然是因為阮本人ê能力真無夠額，所以前pang tī總會報告ê時，已經有出力請求就緊設法健全ê 董事會， koh 慎重選校長來接替， hō͘本校會 thang安定， koh thang得著發展。
本校tī 7月初董事會有完成改組， 董事濟濟是新ê人， koh有部分是年輕力壯ê人， in攏有相當ê理想kap使命感，親像董事長是校友ê 吳Ki-hok博士，若用伊ê 學習聲望kap才幹來領導董事會， koh來激新本校，穩當有好ê前途thang hō͘咱期待chiah對。我koh得著董事長以及諸位董事選我做校長，深深感覺責任重大，心內難免有驚惶，總望會thang盡我所有ê能力來效勞。 只到將學校ê現況以及將來ê展望tī chia報告淡薄hō͘諸位知:
(1)本校雖然tú著政府普遍beh設學校， kok地方也有私人興起學校，致到學生ê素質得著降低，總是學生ê來源得著每ê教會ê同道kap校友ê幫贊， iáu-kú無tú著真大ê困難， siāng時師資方面kap經費也會thang勉強維持， iáu算thang感謝。
(2)過去一年久，有舉辦80週年ê 校慶， koh召開校友會ê總會， 向望thang加強校友會ê組織， thang來協助母會， thang發揮本校傳統ê精神。
(3) 董事會改組了後，新ê董事會組織koh-khah健全。宗教教育，教學以及經濟各方面ê困難，就thang tī新ê 董事會督促kap指導ê下面設法解決。
(4)學生ê教育iáu未thang達到理想， 學業比人khah輸。無法度thang適應普通中學課程ê已逐漸解決。教師陣容也盡力注意tī teh加強。 期望tī安定中求進步，努力中求發展。
(5) 新學年ê各項措施:
宗教主任iáu未有tú好ê人thang來擔任。現時有戴Kiat-hiông kap李Kéng-hêng兩位傳道師teh擔當宗教工作。 Koh現時有teh 交涉加拿大籍ê I Thian-sù牧師， 向望thang來做自校宣教師。本校算是教會學校，自然tio̍h行”有教無類，”無論gâu，頇慢；好， 歹學生攏tio̍h kā in教育，總是也boē用得為經費ê關係濫收學生，免得受外界嚴厲批評。總是因為經費無夠， 設備無齊全， koh 專業人才缺乏，所以對學歷太差，抑是行為欠佳ê學生，實在boē thang有絕對ê把握來kā in教育。所以取去的確tio̍h向重質，無重量ê大路來行。不過tī現時ê環境ē， beh趕緊提高素質，是無容易，所以升學比率有khah 差淡薄，但是咱tio̍h出力做，來補救hiah-ê程度khah 差 ê學生。 按怎提高讀冊ê風氣？是做重要ê工作，koh tī咱本校有真濟傑出ê人才，親像音樂， 美術，運動， 英語等，亦tio̍h設法輔導hō͘伊成做專業技能，來tuì學業kap技能做有效ê輔導辦法， chiah-ê攏tī積極ê研究計畫中， 向望無久有真好ê成績表現出來。
本期tī嚴格教學kap輔導，有計畫試辦ê辦法做夥實施，來實現頭前所講hiah-ê理想。
關係經濟方面，目前kap公立學校ê比較， 待遇勉強可以維持，總是beh對專業人員ê 訓練， kap 聘請優良ê教師， tio̍h ài koh增加一疋經費，實在無簡單但是無想辦法是boē用得。 Chiah-ê經費每年大約tio̍h 40萬箍，向望得著解決。
Tī寄宿舍經營ê方針，因為市內學生強迫住舍後， 各方面反應無好，所以本學期已經放寬， tī 市內kap 市內有親人ê學生， thang 申請免住舍。 Tī 財力ê可能下，來實施免費住校， thang照70週年計畫中所提起擴充到600名設備ê宿舍，若是án-ni， thang達到全校住舍ê制度。
頂面所講ê是維持現在ê施法，有一句話講：”保守就是落伍。”所以本校董事會會kap有關ê人士，極力主張籌備大專，前次總會已經決議贊成， koh有派出大專董事人選，進行籌備，可惜iáu無有具體ê結果。現在校友會kap有關ê人士已經動員起來， 向望教會kap校友各方面攏全力來支持，協助進行來達成設立大專ê願望。
Tī 這個 81 週年校慶5時，將本校情形簡報hō͘各位， 向望tī紀念禮拜中來關心kap代禱。 Koh照總會過去ê決議相kap來出力。