婚姻ê悲劇(下)
Hun-in ê pi-ke̍k (Hā)
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第986號 |
| 日期 | 1966/7 |
| 頁數 | 13 |
白話字（原文數位化）
Hun-in ê pi-ke̍k (Hā)
Teng En̂g-lîm
1966.07.15 P.13-15
“Lí kóng án-ni iā ū iáⁿ, chóng-sī goá siōng-sè kā thoáng-kè, chit khoán ê lē cin chió, cha̍p ê bô chi̍t ê, kî-thaⁿ ê 9 ê, m̄-nā boē ín-chhoā tiōng-hu, liân i ka-kī ê sìn-gióng to tè i khì, lí kiám oē khak-sìn lí ū hoat-tō͘ thang ín-chhoā i. Nā bô chū-sìn, choa̍t-tuì m̄-thang beh chhì Chú lí ê Siōng-tè.” Lāu-pē iā bô hoaⁿ-hí, án-ni ìn goá.
Chit sî goá chiah kám-kak, ū ián chong-kàu oē sok-pa̍k lâng, tú-tú chiàu Bûn-kia̍t só͘ kóng ê. Goá m̄-thiaⁿ pē-bú ê oē, koat-sim beh ài i. Goán ê kau-poê keng-kè nn̄g ge̍h ji̍t, ài-chêng ê un-tō͘ ta̍t-kàu hut-tiám（沸點）. Bûn-kiâ8 sī chi̍t ê láu-si̍t ê chheng-liân, chì-chió tī goá ê ìn-siōng-tiong sī thang oá-khò ê lâng.
Chiū tī I beh thè-ngó͘ ê chêng-ji̍t, goán iok-sok tī kok-hāu ê kàu-sek kìⁿ-bīn, hit àm i tuì goá kiû hun kóng, nā tńg-khì, liâm-piⁿ beh lâi chhoā goá, goá uī-tio̍h beh tuì I piáu-sī chīn-chêng, goá bô kū-choa̍t I tuì goá ê bô lé, sū-si̍t goá iā hióng-siū tio̍h bē bat ū ê ài-chêng, goá sit-khì lí-tì; sìn-gióng, pē-bú lóng boē kì-tit lah. Goá chiong lú-chú choè pó-poè beh hiàn hō͘ tiōng-hu ê lé-mi̍h tī chit sî oân-choân hiàn hō͘ bûn-kia̍t.
- Thau cháu chhut-khì kiat-hun.
Chi̍t ge̍h ji̍t āu, goá hoat-kak-tio̍h goá ê seng-khu ū koh-iūⁿ, chai-iáⁿ pak-tó͘-lāi t-tēng ke chi̍t ê oah-miā chhut-lâi, hui-siông ê tio̍h-kip, siá phoe thoang-ti Bûn-kia̍t chai-iáⁿ, i hoê-phoe kóng, in-uī pē-bú bô chàn-sêng i chhoā chháu-tē lú-chú, só͘-í hō͘ i m̄-chai beh án-choáⁿ phah-sǹg. Goá khoàⁿ liáu kiông-kiông beh hūn lo̍h-khì, kàu chia lâi nā bô koáⁿ-kín lâi-khì chhē i, i ún-tàng beh pàng-soah khì, khoàⁿ goá kàu sî beh án-choáⁿ kìⁿ lâng, choè chi̍t ê bē chhut-kè ê lāu-bú sià-tio̍h chó͘-kong, kàu-hoē , ka-têng ê bīn-thé-phê, oē kiàn-siàu sí, pē-bú iáu m̄-chai chit ê sū, nā chai! ún-tàng kòng sí goá. Tio̍h! goá î-it ê lō͘ sī lâi-khì chhē i.
Hit àm, goá thau chún-pī hêng-lí kap pêng-sî só͘ chek-chū ê chîⁿ iok ū 5000 kho͘, chū án-ni tī in khùn-khì ê àm-mî thau cháu chhut-lâi chē iā khoài-chhia kàu Tâi-pak. Chhē tio̍h Bûn-kia̍t, hō͘ I tio̍h chi̍t kiaⁿ, o-ló goá ê ióng-kám, nā-sī i ê pē-bú hoán-tuì, ko-put-chiong goán lēng-goā sè-chhù tī pa̍t-uī ka-kī khiā.
Chi̍t ge̍h ji̍t āu, goán chèng-sek tī Hoat-īⁿ kú-hêng kong-chèng kiat-hun, tī kat-hun chèng-su ū kài-chiong koh hip-siōng, hit ji̍t chí-ū chhiáⁿ kuí ê pêng-iú, í-goā lóng bô sím-mi̍h nāu-jia̍t.
Kiat-hun āu goán ê seng-oa̍h kè-tit chin khoài-lo̍k. Bûn-kia̍t uī-tio̍h choè seng-lí siông-siông chhut-goā, sīm-chì khì Hiong-káng（香港）, m̄-kú lóng ū siá phoe kià chîⁿ tńg-lâi, i nā tńg-lâi, oē uī-tio̍h goá boé Hiong-káng ê lé-mi̍h hō͘ goá hoaⁿ-hí, hui-siông ê thé-thiap goá, goá ta̍k ji̍t bô sū choè, chiū khì khoàⁿ tiān-iáⁿ á-sī chhī-lāi ta̍k só͘-chāi thit-thô, kè tio̍h siâⁿ-chhī hióng-siū ê seng-oa̍h. Hit sî goá ū siáⁿ-phoe tńg-lâi chhù-nih pò-kò goán ê hēng-hok seng-oa̍h hō͘pē-bú an-sim, nā-sī in lóng bô kā goá hoê phoe, in m̄-chai joā nih hùn-khài goá ê só͘ choè, chū kap Bûn-kia̍t kiat-hun āu, goá lóng sit-khì í-chêng ê sìn-gióng, goá thé-giām tio̍h lâng nā pêng-an kè ji̍t-chí chiū hó, m̄-bián to chhú it-kú（多此一舉）lâi sok-pa̍k ka-kī, hiān-chāi goán bô Siōng-tè iā siāng-khoán kè tio̍h hēng-hok ê seng-oa̍h, goá bô hō͘-hoé chit chân sū. Bûn-kia̍t í-keng hō͘ goá kàu-gia̍h ê khoài-lo̍k lah, goá hô-pit tio̍h mâ-hoâ Siōng-tè lâi kiáu-chhá goán ê bí-bōng（美夢）.
- Chhám lah.
Chóng-sī天有不測風雲, 人有旦夕禍福, choè bāng iā siūⁿ boē kàu, chiū tī goá seng-sán ê hit ge̍h ji̍t, Bûn-kia̍t khai-sí pàng-sak goá, goá geh-lāi lóng bô tńg-lâi kā goá khoàⁿ, thiaⁿ chhù-chú kóng, i tī Hiong-káng ū kau tio̍h chi̍t ê Bō͘-e̍k-siong（貿易商）ê cha-bó͘-kiáⁿ, jî-chhiáⁿ ū toà tńg-lâi hō͘ pē-bú khoàⁿ, i ê pē-bú put-chí hoaⁿ-hí chit ê ū chîⁿ ê chhian-kim sió-chiá, chiū sái-so I siūⁿ pān-hoat kap goá lī-hun, thang kap hit ê lú-chú kiat-hun. Moá-ge̍h āu ê chi̍t àm, i hut-jiân tńg-lâi, goá sui-jiân chin siū-khì, m̄-kú ēng chhiò-iông tāi-thoè goá ê siū-khì, phō goán ài-chêng ê kiat-cheng（結晶）. Bīn chin sêng i ê ta-po͘ eⁿ-á hō͘ i khoàⁿ, khoàⁿ i oē uī-tio̍h chit ê chheng-siù ê kiáⁿ-jî lâi hō͘-hoé boē? Bô phah-sǹg, bô liông-sim ê kîm-siu kèng-jiân mn̄g goá chit ê eⁿ-á ê lāu-pē sī sím-mi̍h lâng? Goá jín boē-tiâu hòng siaⁿ toā khàu, chin kú I chiah hó-lé kā goá kóng, sū-chêng kàu chia lâi, uī-tio̍h beh hàu-sūn pē-bú kap seng-lí ê iân-kò͘, ǹg-bāng goá liōng-chêng kap i lī-hun. Thian-ah! i lóng bô khó-lū goá uī-tio̍h i cháiⁿ-iūⁿ hi-seng; pang-sak pē-bú……I koh kóng, goá nā hó-hó tap-èng lī-hun, muí ge̍h-ji̍t beh 500 kho͘ choè chiam-ióng-huì（贍養費）hō͘ goá ēng, nā m̄ tap-èng, í-āu lóng m̄ chhap goá, khoàⁿ goá ka-kī ū pān-hoat bô?
Goá khó-lū 3 ji̍t, hó! lī-hun, chhin-chhiūⁿ chit khoán choa̍t-chêng ê lâm-sèng ū sím-mi̍h liû-loân. Chi̍t lé-pài āu, goán chèng-sek tī Hoat-īⁿ pān lī-hun chhiú-sio̍k, i the̍h 6000 kho͘ hō͘ goá choè chi̍t nî ê huì-iōng.
Tuì hit ji̍t khí, goá kè tio̍h thòng-sim khang-hi ê seng-oa̍h, goá bô bâi-oàn sím-mi̍h lâng, goá chai-iáⁿ ka-kī chok-giatk8, ka-kī siū choē, chí hūn ka-kī ba̍k-chiu chhiⁿ-mî, sit-khì lí-tì, tham-ài chhia-hoâ ê iân-koì. Taⁿ î-it ê ǹg-bāng sī chit ê soè-kián choè goá chin goā ê an-uì nā-tiāⁿ.
Poàⁿ nî āu, hit chiah khîm-siù kap hit ê iau-chiaⁿ（妖精）chèng-sek kiat-hun, gî-sek chhiáⁿ Tâi-pak chhī-tiúⁿ hok-chèng, thiaⁿ kóng chhiáⁿ pah-goā toh, hong-tōng choân-chhī, pò-choá iā ū khan in nn̄g lâng ê siōng chhut-lâi.
Jit-chí teh kè chhin-chhiūⁿ ku teh sô, chi̍t nî kè-khì, hit tuì iá oan-iuⁿ（野鴛鴦）khì Hiong-káng, muí ge̍h 500 kho͘ ê chiam-ióng-huì iā soà boē kì-tit lah! Goá iū-koh siū phiàn lah, siūⁿ beh khì Hoat-īⁿ kò-sò͘, nā-sī goá it sî hô͘-tô͘ bô siá khè-iok-su, bô hoat i ta-oâ; ká-sú ū iā bô chîⁿ chhiáⁿ lu̍t-su, sio̍k-gú kóng, “Gê-mn̂g pat jī khai, ū lí bô chîⁿ m̄-bián lâi”（衙門八字開，有理無錢莫進來）. Taⁿ goá beh án-choáⁿ kè ji̍t, nā án-ni lo̍h-khì choè-kang, m̄-kú lâng bīn bô se̍k, bô tàng ín, jî-chhiáⁿ chhù-chú lâi beh the̍h chhù-sè, goá kā i ān koh ān, au lâi i soà khí phuì-bīn, beh kiò kéng-chhat lâi pek goá poaⁿ cháu. Chit sî goá chiah kam-kak goá sī chi̍t ê lōng-chú lī-khui ka-têng, chiah tú-tio̍h chiah-nih chhiⁿ-chhám ê kiat-kio̍k, goá tio̍h tńg-lâi chhù-nih, nā bô goá oē sí. Boē ēng-tit, goá sī thau cháu chhut-lâi kiat-hun ê, kin-á-ji̍t hō͘ tiong-hu pàng-sak, choē ū èng-tit, nā tńg-khì kiám m̄-sī hō͘ lâng thí-chhiò sí.
Chhù-chú chin-chiàⁿ kiò kéng-chhat lâi lah, goá ba̍k-sái lâu moá-bīn, kuī tī kéng-chhat ê bīn-chêng, chiong-goá ê khó͘-chêng ai-kiû hō͘ i thiaⁿ, bô phah-sǹg i thiaⁿ liáu put-chí tông-chêng, chiū kā goá kài-siāu khì I ê siōng-si So͘ Kio̍k-tiúⁿ ê chhù kā in chú-pn̄g. Goán bú-kiáⁿ chiām-sî ū kià-thok, ji̍t chí iā khah hó kè.
- Hō put tan-hêng.
Soè-kiáⁿ miâ kiò Hoâi-jîn（懷仁）, í-keng 5 hè lah, siⁿ-choè chin chheng-siù, tit lâng thiàⁿ, goá î-it ê ǹg-bāng kap an-uì chiū-sī poê-ióng chit ê kiáⁿ kàu toā-hàn. Nā-sī chai-hō phian-phian beh kap goá choè tuì-te̍k, tng goá tit-tio̍h tām-po̍h an-uì ê sî, choè toā ê put-hēng iū lîm-kàu goá. Hoân-jîn phoà-pīⁿ chin siong-tiōng, i-seng kóng sī kip-sèng ê Náu-mo͘h8-iām（腦膜炎）tio̍h chek-sî ji̍p-īⁿ, goá phō khì Má-kai Pīⁿ-īⁿ（馬偕醫院）ji̍p-īⁿ, chiong kuí nî lâi lia̍p-chek ê chîⁿ ēng liáu-liáu, koh piàn boē nn̄g kha kim chhiú-chí, kuí niá hó ê saⁿ-á khò͘ iā bô hoat-tō͘ bán-hoê soè-kiáⁿ ê sìⁿ-miā, i tē 5 ji̍t chiū lī-khui sè-kan. Goá lám soè-kiáⁿ liân-soà háu chi̍t ji̍t, hūn-khì 5 pái, m̄-goān hō͘ lâng kā goá phō khì bâi-chòng, nā m̄-sī kàu-hoē ê chí-bē ēng sim khó͘-khǹg, goá tī hit ji̍t chiū í-keng kap soè-kisán choè-hoé khì lah. Chi̍t lé-apì kú goá bô chia̍h bô lim, the̍h hit tiuⁿ i 3 hè hip ê siòng-phìⁿ ná háu ná kiò “Hoâi-jîn, Hoâi-jîn-“ Goá pìⁿ-choè siáu-lâng, cheng-sîn sit-khì, ta̍k ji̍t cha̍uh-cha̍uh liām, tó tī pīⁿ-iⁿ chi̍t ge̍h ji̍t kú. Má-kai pīⁿ-iⁿ ê Lîm Bo̍k-su kap chí-bē ta̍k ji̍t lâi thoè goá kî-tó, an-uì goá, chiū tī chit sî goá chiah chhē tio̍h phah-m̄-kìn 5 nî kú ê sìn-gióng.
- Lōng-chú hoê-thâu
Goá chhim-chhim thé-giām tio̍h chi̍t ê bô Siōng-tè ê lâng só͘ choè ê choē-ok joā-nih khó-phàⁿ; chi̍t ê lī-khui Siōng-tè ê lâng só͘ siū-tio̍h ê thòng-khó͘ hô-téng pi-ai, goá koh kám-kak sè-kan choè pó-poè ê mi̍h-kiáⁿ sī “Ai,” chín-chiàⁿ ê ài chí-ū tī Siōng-tè ê lāi-bīn chiah oē ti̍t-tio̍h; goá ê ka-têng, goá ê kàu-hoē, goá ê Siōng-tè chiah ū chit ê ài ê chûn-chāi, kî-thaⁿ ê ài lóng sī ké--ê.
Goá ná chhin-chhiūⁿ bāng kìⁿ chi̍t ê ok-bāng, chit ê ok-bāng kà-sī goá, tok-chek goá, hō͘ goá khoàⁿ thàu sè-kan, tú-tú chhin-chhiūn Só͘-lô-bûn ê it-seng kàu tī nî-lāu ê sî só͘ kóng ê kóng,
Khang-hu ê khang-hu, khang-hu ê khang-hu; hoān-sū lóng sī khang-hu, tī ji̍t-kng ê ē-bīn it-chhè ê sū, khoàⁿ ah, lóng sī khang-hu, lóng sī lia̍h hong.
--To̍k-to̍k kèng-uì Siōng-tè, kín-sīn siú i ê kài-bēng; che sī lâng chiâu-pī ê pún-hūn (Thoân-tō 1:3, 12:13).
Taⁿ goá tio̍h tuì ok-bāng chhíⁿ khí-lâi, tng goá chhut īⁿ hit ji̍t, thiàⁿ Chú ê chí-bē uī goá sèng-piat, chhiùⁿ Sèng-si 245 siú.
Goá chêng ná iûⁿ sit-bê,
Tiâu-goā lām-sám khì se̍h;
Bo̍k-chiá ê sian goá bô beh thiaⁿ,
Bô ài tè I khì kiâⁿ;
Goá chêng ná kiáⁿ hòng-chhiòng,
Bô ài khiā-khí ke-tiong;
Thiⁿ-pē ê siaⁿ goá bô ài thiaⁿ,
ài tit sì-koè khì kiâⁿ.
Sī lah, goá sī chi̍t ê lōng-chú, taⁿ goá tio̍h choè ê, sī tńg-lâi chhin-kūn lāu-pē kiû i ê sià-bián. Chá-khí chin chá, goá tuì Tâi-pak chē chhia tńg-lâi, lī pia̍t chit keng kàu-hoē kap ka-têng tú-tú 5 nî kú.
XX XX XX XX XX
Goá khoàⁿ i ê chhiú-kun lóng tâm lah, nn̄g luí ba̍k-chiu khàu kah âng kòng-kòng, goá iā tè i lâu boē chió ê ba̍k-sái.
Goá chiū chhoā i tǹg-khì, lō͘ keng-kè chi̍t keng kang-chhiún, tī hit ki toā ki ian-tâng ū siá “Hong-sēng si̍t-phín ka-kang chhiúⁿ”（豐盛食品加工廠）ê jī, i chù-i khoàⁿ ê sî, goá kā i kóng,
“Chit keng kang-chhiúⁿ ê láu-pán chiū-sī lí tng-sî só͘ bô ài hit ê chheng-liân Keh Hong-sēng kun ê, choan-bûn the choè siông-jiông（香姑）koàn-thâu siau goā-kok, put-chí thàn-chîⁿ, I hiān-chāi sī kàu-hoē ê chip-sū, iā sī Hiong-kong-só͘ ê Bîn-chèng khò-tiúⁿ, iā láu-pán-niû chiū-sī Goa̍t-eng (月英）chí-Lí ê sió-bē”
-(oân)-
漢羅（Ùi原文改寫）
婚姻ê悲劇（下）
“你講án-ni也有影，總是我詳細kā統計， 這款ê例真少，十個無一個，其他ê 9個， m̄-nā boē引chhoā丈夫，連伊家己ê信仰to tè伊去，你kiám會確信你有法度thang引chhoā伊。若無自信，絕對m̄-thang beh試主你ê上帝。”老父也無歡喜， án-ni應我。
這時我chiah感覺，有影宗教會束縛人， tú-tú照文傑所講ê。我m̄聽父母ê話，決心beh愛伊。阮ê交陪經過兩月日，愛情ê溫度達到沸點（沸點）。 文傑是一個老實ê青年， 至少tī我ê印象中是thang倚靠ê人。
就tī伊beh退伍ê前日，阮約束tī國校ê教室見面， hit暗伊對我求婚講：若轉去， 連鞭beh來chhoā我，我為著beh對伊表示盡情，我無拒絕伊對我ê無禮，事實我也享受著未bat有ê愛情，我失去理智；信仰，父母攏boē記得lah。我將女子做寶貝beh獻hō͘丈夫ê禮物tī 這時完全獻hō͘文傑。
- 偷走出去結婚。
一月日後，我發覺著我ê身軀有各樣，知影腹肚內一定ke一個活命出來，非常ê著急，寫批通知文傑知影，伊回批講：因為父母無贊成伊chhoā草地女子，所以hō͘伊m̄知beh按怎拍算。我看了強強beh 昏落去，到chia來若無趕緊來去chhē伊，伊穩當beh放soah去，看我到時beh按怎見人，做一個未出嫁ê老母sià著祖公，教會，家庭ê面體皮， 會見笑死，父母iáu m̄知這個事，若知！穩當kòng死我。 Tio̍h！我唯一ê路是來去chhē伊。
hit暗，我偷準備行李kap平時所積聚ê錢約有5000箍， chū án-ni tī in睏去ê暗暝偷走出來坐夜快車到台北。 Chhē著文傑， hō͘伊著一驚， o-ló我ê勇敢，若是伊ê父母反對， 姑不將阮另外sè厝tī別位家己khiā。
一月日後，阮正式tī法院舉行公正結婚， tī 結婚證書有蓋章koh翕相，hit日只有請幾個朋友，以外攏無甚麼鬧熱。
結婚後阮ê生活過得真快樂。 文傑為著做生理常常出外，甚至去香港（香港）， m̄-kú攏有寫批寄錢轉來，伊若轉來， 會為著我買香港ê禮物hō͘我歡喜，非常ê體貼我，我逐日無事做，就去看電影抑是市內逐所在thit-thô， 過著城市享受ê生活。 Hit時我有寫批轉來厝裡報告阮ê幸福生活hō͘父母安心，若是in攏無kā我回批， in m̄知joā nih憤慨我ê所做，自kap文傑結婚後，我攏失去以前ê信仰，我體驗著人若平安過日子就好， m̄免多此一舉（多此一舉）來束縛家己，現在阮無上帝也siāng款過著幸福ê生活，我無後悔這層事。文傑已經hō͘我夠額ê快樂lah，我何必tio̍h麻煩上帝來攪吵阮ê美夢（美夢）。
- 慘lah。
總是天有不測風雲， 人有旦夕禍福，做夢也想boē到，就tī我生產ê hit月日， 文傑開始放sak我，我月內攏無轉來kā我看，聽厝主講：伊tī香港有交著一個貿易商（貿易商）ê 查某囝，而且有帶轉來hō͘父母看，伊ê父母不止歡喜這個有錢ê 千金小姐，就唆使伊想辦法kap我離婚， thang kap hit-ê女子結婚。滿月後ê一暗，伊忽然轉來，我雖然真受氣， m̄-kú用笑容代替我ê 生氣，抱阮愛情ê 結晶（結晶）。面真sêng伊ê ta-po͘嬰仔hō͘伊看，看伊會為著這個清秀ê 囝兒來後悔boē？無拍算，無良心ê禽獸竟然問我這個嬰仔ê老父是甚麼人？我忍boē-tiâu 放聲大哭，真久伊chiah好禮kā我講：事情到chia來，為著beh孝順父母kap生理ê緣故， 向望我諒情kap伊離婚。 天啊！伊攏無考慮我為著伊怎樣犧牲； 放sak父母……伊koh講：我若好好答應離婚，每月日beh 500箍做贍養費（贍養費）hō͘我用，若m̄答應，以後攏m̄ chhap我，看我家己有辦法無？
我考慮3日，好！ 離婚，親像這款絕情ê男性有甚麼留戀。一禮拜後，阮正式tī 法院辦離婚手續，伊the̍h 6000箍 hō͘我做一年ê費用。
Tuì hit日起，我過著痛心空虛ê生活，我無埋怨甚麼人，我知影家己作孽，家己受罪， 只恨家己目睭青瞑，失去理智，貪愛奢華ê緣故。 Taⁿ唯一ê向望是這個細囝做我真大ê安慰nā-tiāⁿ。
半年後， hit隻禽獸kap hit-ê 妖精（妖精）正式結婚，儀式請台北市長福證，聽講請百goā桌，轟動全市，報紙也有刊in兩人ê像出來。
日子teh過親像龜teh sô，一年過去， hit 對野鴛鴦（野鴛鴦）去香港，每月500箍 ê 贍養費也soà boē記得lah！我又koh受騙lah，想beh去法院告訴，若是我一時糊塗無寫契約書，無法伊ta-oâ；假使有也無錢請律師，俗語講：”衙門八字開，有理無錢m̄免來”（衙門八字開，有理無錢莫進來） Taⁿ我beh按怎過日，若án-ni落去做工， m̄-kú人面無熟，無tàng應，而且厝主來beh the̍h厝稅，我kā伊ān koh ān， 後來伊soà 起phuì面， beh叫警察來逼我搬走。 這時我chiah 感覺我是一個浪子離開家庭， chiah tú-tio̍h chiah-nih悽慘ê結局，我tio̍h 轉來厝裡，若無我會死。 Boē用得，我是偷走出來結婚ê，今仔日hō͘丈夫放sak， 罪有應得，若轉去kiám m̄是hō͘人恥笑死。
厝主真正叫警察來lah，我目屎流滿面，跪tī警察ê面前，將我ê苦情哀求hō͘伊聽，無拍算伊聽了不止同情，就kā我介紹去伊ê上司蘇局長ê厝kā in 煮飯。阮母囝暫時有寄託，日子也khah好過。
- 禍不單行。
細囝名叫懷仁（懷仁），已經5歲 lah，生做真清秀，得人疼，我唯一ê 向望kap安慰就是培養這個囝到大漢。若是災禍偏偏beh kap我做對敵，當我得著淡薄安慰ê時，最大ê不幸又臨到我。 懷仁破病真傷重，醫生講是急性ê 腦膜炎（腦膜炎）tio̍h即時入院，我抱去馬偕病院（馬偕醫院）入院，將幾年來粒積ê錢用了了， koh 變賣兩kha金手指， 幾領好ê衫仔褲也無法度挽回細囝 ê性命，伊第5日就離開世間。我攬細囝連續哮一日，暈去5擺， m̄願hō͘人kā我抱去埋葬，若m̄是教會ê姊妹用心苦勸，我tī hit日就已經kap 細囝做夥去lah。一禮拜久我無食無lim， the̍h hit張伊3 歲翕ê相片ná哮ná叫”懷仁，懷仁-“我變做siáu人，精神失去， 逐日cha̍uh-cha̍uh念，倒tī病院一月日久。 馬偕病院ê林牧師kap姊妹逐日來替我祈禱，安慰我，就tī 這時我chiah chhē著拍m̄見5年久ê信仰。
- 浪子回頭
我深深體驗著一個無上帝ê人所做ê罪惡joā-nih可怕。一個離開上帝ê人所受著ê痛苦何等悲哀，我koh感覺世間做寶貝ê物件是”愛，” 真正 ê 愛只有tī上帝ê內面chiah會得著；我ê家庭，我ê教會，我ê上帝chiah有這個愛 ê存在，其他ê 愛攏是假--ê。
我ná親像夢見一個惡夢， 這個惡夢教示我，督責我， hō͘我看透世間， tú-tú 親像所羅門ê一生到tī年老ê時所講ê講：
空虛ê空虛，空虛ê空虛；凡事攏是空虛， tī日光ê下面一切ê事，看ah，攏是空虛，攏是掠風。
--獨獨敬畏上帝，謹慎守伊ê誡命；這是人齊備ê本份(傳道1:3， 12:13)。
Taⁿ我tio̍h tuì惡夢醒起來，當我出院hit日，疼主ê姊妹為我聖別，唱聖詩245首。
我前ná 羊失迷，
Tiâu外lām-sám去se̍h；
牧者ê 聲我無beh聽，
無ài tè伊去行；
我前ná 囝放縱，
無ài khiā起家中；
天父ê聲我無ài聽，
ài得四界去行。
是lah，我是一個浪子， taⁿ我tio̍h做ê，是轉來親近老父求伊ê赦免。早起真早，我tuì台北坐車轉來， 離別這間教會kap家庭tú-tú 5年久。
我看伊ê手巾攏tâm lah，兩蕊目睭哭kah 紅kòng-kòng，我也tè伊流 boē少ê目屎。
我就chhoā伊轉去， 路經過一間工廠， tī hit支大支煙筒有寫”豐盛食品加工廠”（豐盛食品加工廠）ê字，伊chù伊看ê時，我kā伊講，
“這間工廠ê老闆就是你當時所無愛hit-ê青年郭豐盛君ê，專門teh做松茸（香姑）罐頭銷外國，不止趁錢，伊現在是教會ê執事，也是鄉公所ê 民政課長，也老闆娘就是月英 (月英)姊--你ê小妹”
-(完)-