故事：獅kap青iok仔（水雞）
KÒ͘-SŪ:SAI KAP CHHIN-IOH-Á (Suí-koe).
文獻資訊
| 項目 | 資料 |
|---|---|
| 作者 | 拾穗生 |
| 卷期 | 台灣教會公報 |
| 卷期 | 第982號 |
| 日期 | 1966/5 |
| 頁數 | 12 |
白話字（原文數位化）
KÒ͘-SŪ: SAI KAP CHHIN-IOH-Á (Suí-koe).
拾穗生翻譯
1966.05.15 Khioh Be̍h-suī第15期 P.12-13
Kó͘-chá ū chi̍t ê hông-tè kap ông-hō͘ siⁿ chi̍t ê ông-chú kap chi̍t ê ông-lú, nn̄g ê hiaⁿ-bē-á chin siong-hó, ông-chú chin ài chhut-khì phah-la̍h, (khì soaⁿ-nih phah chiáu, phah lo̍k), ū sî bat tiàm chhiū-nâ-lāi chin kú, ū chi̍t pái khì chin-choē ji̍t lóng bô tò lâi, in sió-bē chin siong-sim, háu kàu nn̄g luí ba̍k-chiu ham-ham, lō͘-bé tòng boē tiâu, chiū khì chhiū-nâ-lāi beh chhē in hiaⁿ-ko, kiâⁿ chin hn̄g, oē kiâⁿ kiâⁿ kàu boē kiâⁿ, khiā teh sì-koè khoàⁿ, hut-jiân-kan chi̍t chiah sai cháu lâi khiā tī i sin-piⁿ, hit chiah sai chin koai koh chin chhin-chhiat, i chiū kā peh khì ka-chiah-téng chē, sai chiong I ê bé kā i loa̍h. Ji̍t-thâu chiò tī ông-lú ê chhuì-phoé, I chiū kā i ia̍t hong, kiâⁿ ū hiah hn̄g, kàu chi̍t ê tōng-hia̍t ê mn̂g-kháu, i chiū kiâⁿ ji̍p-khì, sai chin chhin-chhiat, só͘-í ông-lú bô kiaⁿ, iā bô siūⁿ beh lo̍h-lâi, tuì hit ê tōng-lāi ti̍t-ti̍t ji̍p-khì, ná-kiâⁿ ná-àm, kàu lō͘-bé chin àm lóng bô khoàⁿ-kìⁿ sím-mi̍h, koh kiâⁿ tiap-á-kú chiū chiām-chiām kng, chhut tōng-khang chiū kàu chi̍t ê chin suí ê tiâⁿ-hn̂g, ta̍k hāng chhòng khì chin chéng-choê, ji̍t teh chiò hoe chháu chhiū-ba̍k ná suí. Tiong-ng chi̍t keng chin hó khoàⁿ ê kiong-tiān, kàu mn̂g-kháu sai chiū thêng-kha, ông-lú lo̍h-lâi, sai chiū khui chhuì kóng-oē.
Lí tiàm chit keng chin hó ê chhù, kā goá choè khang-khè, goá só͘ kah lí choè ê, lí nā oē chhòng chin hó-sè, chiū oē kìⁿ-tio̍h lí ê hiaⁿ-ko. Tuì án-ni, ông-lú chiū kā sai choè kang, nā kiò I chhòng sím-mi̍h, I chiū ìn hó, hó. Ū chi̍t ji̍t, ông-lú khì tiâⁿ-nih sàn-pō͘, tiâⁿ chin suí, chin khoah, ka-kī chi̍t ê siūⁿ liáu soà sim sng, ná kiâⁿ ná pi-ai, hut-jiân-kan khoàⁿ tio̍h chi̍t ê tî, tî ê tiong-ng ū chi̍t ê soaⁿ-á, tah chit ê pò͘-phâng（天幕）, pò͘-phâng ê lāi-bīn ū chi̍t chiah chhiⁿ-ioh-á, ēng chi̍t hio̍h chhiong-bî ê hio̍h choè bō-á tì tiàm thâu-khah, chhiⁿ-ioh-á tuì ông-lú kim-kim khoàⁿ. án-choáⁿ thái hiah tàm-chì? án-choáⁿ goá thái boē si̍t-chì, chiū chiong i ê tāi-chì lóng kóng hō͘ i thiaⁿ, chhiⁿ-ioh-á thiaⁿ liáu chin tông-chêng, tuì i kóng, Lí nā ū khùn-lân ê sū m̄-bián soè-jī lâi kap goá chham-siông, goá oē kā lí tàu phah-sǹg, ông-lú kóng, goá beh ēng sím-mi̍h lâi pò-tap lí?
Chhiⁿ-ioh-á kóng, Lóng m̄-bián, chí-ū lí ta̍k chá-khí bán chi̍t hioh chhiⁿ-chhuì ê chhiong-bî hio̍h hō͘ goá choè bo-á tì chiū hó. Ông-lú thiaⁿ tio̍h án-ni, chiū an-sim tò-khì, ta̍k chá-khí chiū bán chi̍t hio̍h chhiⁿ-chhuì ê chhiong-bî hio̍h lâi hō͘ i.
Hit chiah sai kiò i chhòng sím-mi̍h, i ta̍k pái lóng lâi tî-pin kā chhiⁿ-ioh-á kóng, i chiū thiàu-lâi thiàu-khì, thoè i chhòng kàu hó-sè hó-sè.
Ū chi̍t ji̍t, sai kā ông-lú kóng, ê-hng goá beh chia̍h báng-á ê pau-á(m̄-sī bah-pau), nā bô choè chin hó chia̍h boē sái-tit. Ông-lú siūⁿ hit hō mi̍h, beh án-choáⁿ choè goá choè boē lâi, i chiū khì khàu loā hit chiah chhiⁿ-ioh-á.
Chhiⁿ-ioh-á kóng, Bián hoân-ló báng-á-pau, goá tek-khak choè hō͘ lí. I suî-sî chē lo̍h-khì, chhiú thìⁿ tiàm thô͘-kha, oa̍t chiàⁿ-pêng chhuì khui-khui ha̍p chi̍t-ē, oa̍t tò-pêng ha̍p chi̍t-ē, án-ni ha̍p-lâi ha̍p-khì, beh ēng ê báng-á lóng ha̍p kàu-gia̍h, chiū thiàu chhut-khì khioh ta-chhâ kap chhiū-hio̍h lâi khí hé, bô nn̄g tiám cheng kú, pau-á chiū choè hó chhe-se̍k, bô-lūn sím-mi̍h lâng khoàⁿ tio̍h choè hiah suí, phiⁿ hiah phang, to lâu chhuí-khí-noā.
Chhiⁿ-ioh-á kóng, Pau-á choè hó sī choè hó lah, lí nā bô kap goá iok-sok chi̍t hāng tāi-chì, goá m̄-hō͘ lí. Sai teh khùn ê bîn-chhn̂g āu ū chi̍t ki to, sai nā khùn-khì, lí to kia̍h khí-lâi tuì ām-kún kā chuî lo̍h-khì.
Ông-lú kóng, Goá choè boē lo̍h chhiú, hit chiah sai tuì goá chin hó.
Chhiⁿ-ioh-á kóng, Nā bô án-ni choè, kàu sím-mi̍h sî lí to boē thang kìⁿ-tio̍h lín hiaⁿ-ko. Koh choè án-ni, iā boē hāi tio̍h hit chiah sai.
Cha-bó͘ gín-ná chiū koat-sim, pau-á phâng tò-khì, sai phīⁿ-tio̍h hit ê bī chiū kóng, chiah phang ún-tàng chin hó-chia̍h, chi̍t-ē-á liâm-piⁿ chia̍h liáu-liáu, chia̍h pá chiū siūⁿ ài-khùn, kā ông-lú kóng, Lí chē tiàm goá sin-piⁿ, chńg-thâu-á kā goá so hī-á āu kàu goá khùn-khì. I ēng tò-chhiú kā so, chiàⁿ-chhiú tuì bîn-chhn̂g āu khì sa hit ki to, sai khùn kàu teh hoâⁿ, to pui̍h khí-lâi, ba̍k-chiu pàng khoeh-khoeh, tuì sai ê ām-kún chiū kā chuî lo̍h-khì, ông-lú ba̍k-chiu thí khui chi̍t-ē khoàⁿ, liân chi̍t chiah sai-á-ián to bô. I ê hiaⁿ-ko lâi khiā tī i sin-piⁿ, in hiaⁿ-ko tuì sim-toé chin hoaⁿ-hí, phō in sió-bē khí-lâi chim, kóng, Lí kiù goá, goá hō͘ lâng liām chiù pìⁿ choè sai, kóng nā m̄-sī ū chi̍t ê cha-bó͘ gín-ná chin thiàⁿ goá, ēng I ê chhiú lâi chām sai ê ām-kún, goá chi̍t-sì-lâng to sī sai. āu-lâi nn̄g lâng sio chhoā khì chuí-tî hia, beh kā chhiⁿ-ioh-á thiàu-lâi thiàu-khì, the khioh ta chhâ lâi khí hé, to̍h kàu chin iām, chhiⁿ-ioh-á chiū thiàu tuì hé tiong-ng lo̍h-khì, hé liâm-piⁿ oa-hoa khì, pìⁿ chi̍t ê suí cha-bó͘ gín-ná khiā tī hia. I sī ông-chú kah-ì ê cha-bó͘ gín-ná, iû-goân sī hō͘ lâng liām chiù pìⁿ choè chhiⁿ-ioh-á ê. án-ni 3 lâng chhoā tò-khì kìⁿ lāu ê hông-tè kap hông-hō͘, tī hia kú-hêng chin lāu-jia̍t ê kiat-hun-sek, khì hù sek ê lâng bô chi̍t ê hō͘ i iau tò-khì.
Koh-oa̍h-choeh, bú-hoē kap nn̄g keng chi-hoē, 3 keng Chú-ji̍t-o̍h liân-ha̍p chiok-hō͘-hoē tī chong-ha̍p ê thé-io̍k-tiûⁿ kóng--ê.
漢羅（Ùi原文改寫）
故事：獅kap青iok仔（水雞）
古早有一個皇帝kap王后生一個王子kap一個王女，兩個兄妹仔真相好，王子真愛出去拍獵， (去山裡拍鳥， 拍鹿)，有時bat tiàm樹林內真久，有一擺去真濟日攏無倒來， in小妹真傷心，哮到兩蕊目睭ham-ham，路尾tòng boē tiâu，就去樹林內beh chhē in兄哥，行真遠， 會行行到boē行， khiā teh四界看，忽然間一隻獅走來khiā tī伊身邊， hit隻獅真乖koh真親切，伊就kā peh去胛脊頂坐，獅將伊ê馬kā醫熱。日頭照tī王女ê嘴phoé，伊就kā伊ia̍t風，行有hiah遠，到一個洞穴ê門口，伊就行入去，獅真親切，所以王女無驚，也無想beh落來， tuì hit-ê洞內直直入去， ná行ná暗，到路尾真暗攏無看見甚麼， koh行tiap-á久就漸漸光，出洞空就到一個真suí ê埕園， 逐項chhòng去真整齊，日teh照花草樹木ná suí。中央一間真好看ê宮殿，到門口獅就停腳， 王女落來，獅就開嘴講話。
你tiàm這間真好ê厝， kā我做空課，我所kah你做ê，你若會chhòng真好勢，就會見著你ê兄哥。 Tuì án-ni，王女就kā獅做工，若叫伊chhòng甚麼，伊就應好，好。有一日， 王女去埕裡散步， 埕真suí，真闊，家己一個想了soà心酸， ná行ná悲哀，忽然間看著一個池，池ê中央有一個山仔， 搭一個布篷（天幕），布篷ê內面有一隻青ioh仔，用一葉chhiong-bî ê葉做帽仔戴tiàm頭殼，青ioh仔對王女金金看。 按怎thái hiah淡志？按怎我thái boē失志，就將伊ê代誌攏講hō͘伊聽， 青ioh仔聽了真同情，對伊講，你若有困難ê事m̄免細膩來kap我參詳，我會kā你鬥拍算， 王女講：我beh用甚麼來報答你？
青ioh仔講：攏m̄免，只有你逐早起挽一葉青翠ê chhiong-bî葉hō͘我做帽仔戴就好。 王女聽著án-ni，就安心倒去， 逐早起就挽一葉青翠ê chhiong-bî葉來hō͘伊。
hit隻獅叫伊chhòng甚麼，伊逐擺攏來池邊kā青ioh仔講：伊就跳來跳去，替伊chhòng到好勢好勢。
有一日， 獅kā王女講：ê昏我beh食báng仔ê包仔(m̄是肉包)，若無做真好食boē使得。 王女想hit號物， beh按怎做我做boē來，伊就去哭loā hit隻青ioh仔。
青ioh仔講：免煩惱báng仔包，我的確做hō͘你。伊隨時坐落去，手thìⁿ tiàm土腳， oa̍t 正爿嘴開開合一下， oa̍t 倒爿合一下， án-ni合來合去， beh用ê báng仔攏合夠額，就跳出去拾乾柴kap樹葉來起火，無兩點鐘久， 包仔就做好炊熟，無論甚麼人看著做hiah suí， 鼻hiah芳， to流嘴齒noā。
青ioh仔講：包仔做好是做好lah，你若無kap我約束一項代誌，我m̄-hō͘你。 獅teh睏ê眠床後有一支刀，獅若睏去，你刀kia̍h起來對頷頸kā chuî落去。
王女講：我做boē落手， hit隻獅對我真好。
青ioh仔講：若無án-ni做，到甚麼時你to boē-thang見著恁兄哥。 Koh做án-ni，也boē害著hit隻獅。
查某囡仔就決心， 包仔捧倒去，獅鼻著hit-ê味就講：chiah芳穩當真好食，一下仔連鞭食了了，食飽就想愛睏， kā王女講：你坐tiàm我身邊，指頭仔kā我so耳仔後到我睏去。伊用倒手kā so，正手tuì眠床後去sa hit支刀，獅睏到teh鼾， 刀拔起來，目睭放khoeh-khoeh， tuì獅ê頷頸就kā chuî落去， 王女目睭thí 開一下看，連一隻獅仔影to無。伊ê兄哥來khiā tī伊身邊， in兄哥tuì心底真歡喜，抱in小妹起來chim，講：你救我，我hō͘人念咒變做獅，講若m̄是有一個查某囡仔真疼我，用伊ê手來斬獅ê頷頸，我一世人to是獅。後來兩人相chhoā去水池hia， beh kā青ioh仔說多謝。到位，看hit隻青ioh仔跳來跳去， teh拾乾柴來起火，to̍h到真焰， 青ioh仔就跳tuì火中央落去，火連鞭hoa-hoa去，變一個suí查某囡仔khiā tī hia。伊是王子合意ê 查某囡仔，猶原是hō͘人念咒變做青ioh仔ê。 án-nì人chhoā倒去見老ê皇帝kap 皇后， tī hia舉行真鬧熱ê結婚式，去赴式ê人無一個hō͘伊iau倒去。
koh活節，母會kap兩間支會， 3間主日學聯合祝福會 tī綜合ê體育場講--ê。