Tâi-oân Bin-kan Chong-kàu tiong ê Thoân-soat (8)Permalink

文獻資訊Permalink

白話字（原文數位化）Permalink

Tâi-oân Bin-kan Chong-kàu tiong ê Thoân-soat (8)

Niû Kú-têng

1966.05.01 P.6-7

Sîn-bêng koaⁿ-tiûⁿ ê chō͘-chit.

Tû liáu 18 si í-goā, koh ū siat nn̄g ê phoàⁿ-koaⁿ; nn̄g ê phoàⁿ-koaⁿ sī hun-choè bûn kap bú, koh ū 4 iâ, chiū-sī Gû-iâ, Bé-iâ, Kê-iâ（枷爺）, Só-âi（鎖爺）, iā ū jī chiong-kun, chiū-sī Chiā Pit-an（謝必安）, in-uī I pâi ti tē chhit ê, só͘-í sio̍k-chheng Chhit-iâ; Hoān bû-kiū（范無咎）, in-uī I pâi tī tē poeh--ê, só͘-í sio̍k-chheng Poeh-iâ, án-ni jī phoàⁿ-koaⁿ kap si-iâ kap jī chiong-kun ha̍p choè-hoé chheng-choè poeh-iâ.

Í-goā 36 pō͘-chiòng sī Kí Sian-ko͘（紀仙姑）, Liân-Sèng-chiá（連聖者）, Ngó͘ Liông-koaⁿ（五龍官）, Só Tāi-chiòng（鎖大將）, kim Sià-jîn（金舍人）, Tó-tô Tāi-chiòng（倒淘大將）. Lí Sian-ko͘（李仙姑）, Má Liông-koaⁿ（馬龍官）, Lâu Sèng-chiá（劉聖者）, Kâ Tāi-chiòng,（枷大將）, Tông Sià-jîn（唐舍人）, Î-san Tāi-chiòng（移山大將）, Tiō Goân-soè（趙元帥）, Un Goân-soè（殷元帥）, Ga̍k Goân-soè（岳元帥）, Ông Sun Goân-soè（王孫元帥）, Sin Goân-soè（辛元帥）, Pit tāi-chiong（必大將）, Khng Goân-soè（康元帥）, Un Goân-soè（溫元帥）, Chiù-chuí Chin-jîn（咒水真人）, Teng Goân-soè（鄧元帥）, Lí Goân-soè（李元帥）, Ko Goân-soè（高元帥）, Khoàn Sian-ko͘,（勸仙姑）, Tiuⁿ Séng-chiá（張醒者）, Ná Tāi-chiòng（拿大將）, Kang Sian-ko͘（江仙姑）, Hó͘ Ka-lô（虎加羅）, Si̍t-kuí Tāi-chiòng（食鬼大將）, Hô Sian-ko͘（何仙姑）, Siau Sèng-chiá（蕭聖者）, Chhiok Tāi-chiòng（捉大將）, Hông Hoà-koaⁿ（紅化官）, Má Ka-lô（馬加羅）, Thun-cheng Tāi-chiòng（吞精大將）, kiōng 36 ê pō͘-chiòng.

án-ni, hiān-chāi Tâi-pak ê Hâ-hái Sêng-hông-biō nih tû liáu chú-sîn Hâ-hái Sêng-hông kap Sêng-hông hu-jîn, í-goā Chiông-sîn（從神）, ū kiàm-tông（劍童）, ìn-tông（印童）, bûn-bú phoàⁿ-koaⁿ, gû, bé, kim（金）, san（山）, Chiā, Hoān téng chiong-kun, koh ū ín-tông tông-chú（引童童子）, Hok-tek chèng-sîn chiū-sī Thó͘-tī-kong, koh ū Hek-hó͘ Chiong-kun（黑虎將軍）, sī-lú（侍女）. Chiah ê í-goā, iáu ū phoè-sîn（配神）ê 36 pō͘-chiòng téng.

Lán khoàⁿ í-siōng só͘ kóng Hâ-hái Sêng-hông-biō tiong chit-iūⁿ koaⁿ-tiûⁿ phài-thâu pō͘-sio̍k téng, oán-jiân chhin-chhiūⁿ Chheng-tiâu sî-tāi iông-kan koaⁿ-tiûⁿ ê phài-thâu sio-siāng, che chiàⁿ sī Chheng-tiâu sî-tāi ū koá bat tī koaⁿ-tiûⁿ chhut-ji̍p ê lâng, ēng hiān-si̍t tiong ê sū-lē（事例）choè nâ-pún（藍本）só͘ phian chhut-lâi ê “gí-jîn-hoà”（擬人化）ê ngó͘-siōng chông-pài hong-sek.

Tī chia sūn-soà kóng, tī Hâ-hái Sêng-hông-biō ê phoè-sîn（配神）tiong iā ū ho̍k-sāi chi̍t ê Gī-ióng Kong（義勇公）, thiaⁿ kóng chit ê Gī-ióng Kong chiū-sī kì-liām tī Hâm-hong（咸豐）3 nî, tī Báng-kah toē-hng ū hoat-seng toā oan-ke saⁿ-thâi（頂下郊拚）ê sî, uī-tio̍h beh pó-hō͘ sîn-siōng tu̍t-phoà pau-uî ê sî, sûn-lān lâi sí ê lâng só͘ hong-li̍p ê. Koh chit keng Hâ-hái Sêng-hông-biō sī tī Hân-hong（咸豐）9 nî 3 ge̍h 1 ji̍t khí ê, koh tī thoân-soat tiong kóng Hâ-hái Sêng-hông-biō tiong hit nn̄g sin Chāi-Chiong-kun kap Hoān Chiong-kun, ū lâng bat khoàⁿ tio̍h in tī poàⁿ-mî nih the̍h só͘-liān tiàm koe-lō͘ nih teh sûn-lô, in-uī án-ni kóng hit toē-hng lóng bô chha̍t-á. Í-siōng sī uī beh chèng-bêng gí-jîn-hoà ê ngó͘-siōng ê thoân-soat kò͘-sū. Tuì chit ê thang chai Tâi-oân bîn-kan chong-kàu ê iù-tī su-siúⁿ.

KUÍ Ê BÊ-SÌN Ê SIÓ HONG-SIO̍K

1) Hòng-iâⁿ. Tī Tâi-oân kok toē ê biō-ú nā choè pu̍t siⁿ-ji̍t á-sī choè chiò ê sî, chiū tī biō ê hù-kūn, he̍k-sī chhiū-kha, he̍k-sī lō͘-piⁿ, he̍k-sī kiô-thâu ê só͘-chāi chiong nn̄g ki á-sī saⁿ ki sió tek-á, chi̍t koe̍h chhāi tī thô͘-lāi, lâu chhioh goā tn̂g thóng khí-lâi tī thô͘-bīn, koh ēng âng-pò͘-á pa̍k tī thó͘ khí-lâi tī thô͘-bīn ê tek-á nih, lán ún-tàng bat khoàⁿ tio̍h chit hō mi̍h, che kiò-choè “Hòng-iâⁿ”（放營）. Chāi tī Tāi-lio̍k nih sī kiò-choè “Sîn-iâⁿ”（神營）, á sī “kuí-tiùⁿ”（鬼帳）

Chiàu thoân-soat sī kóng, só͘ ū ê sîn-bêng lóng ū I ê pō͘-sio̍k（部屬）, á-sī sîn-chiòng（臣將）, te̍k-pia̍t jú ū sîn-thong kóng-toā（神通廣大）ê chiū i ê pō͘-sio̍k, á-sī sîn-chiòng ê tiong-kan iā ū chin-choē sîn-thong kóng-tāi ê kuí-sîn. Chiah ê pō͘-sio̍k, á-sī sîn-chiòng chi̍t-ē choē, chiū tī biō-lāi toà bô kàu, lēng-goā tio̍h hòng-iâⁿ tī hit keng biō ê hù-kūn. Só͘-í nā choè pu̍t siⁿ-ji̍t, á-sī choè chiò ê sî, “in” (chiū-sī hit toē hng chham-ka choè pu̍t siⁿ-ji̍t, pài ngó͘-siōng ê lâng), chiū tio̍h siāng-sî kú-hêng khò chiòng（稿將）, siúⁿ-peng（賞兵）, che chiàⁿ chhin-chhiūⁿ kó͘-tāi tī sio-thâi tek-sèng tńg-lâi ê sî tio̍h ài pān iân-sia̍h lâi khò-siúⁿ sam kun（稿賞三軍）chi̍t-iūⁿ.

Koh kóng chit khoán hòng-iâⁿ, sī kap lán tiong-kok kó͘-tāi sam kun teh chat-iâⁿ ê hong-sek sio-siāng, chiū-sī ū hun choè tang, sai, lâm, pak, tiong 5 iâⁿ. Só͘-í nā hoat-hiān tio̍h tī chi̍t só͘-chāi ū chhah chit hō hòng-iâⁿ ê tek-á, chiū tī hit hù-kūn ū biō, á sī sio-siāng chit hō hòng-iâⁿ ê só͘-chāi. Koh kóng chiah ê hòng-iâⁿ ê sîn-chiòng nā ū sîn-thong kóng-tāi, iā oē hō͘-siong cheng-chhú tē uī. Chóng kóng chit hō hòng-iân ê só͘-chāi, sui-jiân bô biō, chóng-sī kap biō tâng-iūⁿ ū kuí-sîn tī hit ê só͘-chāi teh khiā-khí, bo̍k-koài hiah ê pài ngó͘-siōng ê lâng, put-sî teh kiaⁿ thó-tio̍h, soah-tio̍h, iā kiaⁿ hoān-tio̍h bô chú ke-sîn, thian-lô hu-jîn, sim-lāi put-an, kiaⁿ-hiâⁿ, koh tī phoàⁿ-piⁿ mn̄g pu̍t ê sî, siông-siông kóng sī hoān-tio̍h tó chi̍t hng, chiū-sī lóng hoān-tio̍h chiah ê. Lia̍t-uī, lán beh cháiⁿ-iūⁿ lâi pang-chān chiah ê lâng lâi hō͘ Chú Iâ-so͘ chín-kiù?

2) Khèng-chàn tiong-goân（慶讚中元）. Khèng-chàn tiong-goân ê thó͘-miâ kiò-choè phó͘-tō͘, chiàu Hu̍t-kàu ê giân-sû sī kóng “Û-lân phûn-hoē（盂蘭盆會）, tī chit kuí nî lâi, in-uī ū lán hiân-bêng ê chèng-hú ê khai-tō, chit khoán pho͘-tiuⁿ lōng-huì ê phó͘-tō͘ í-keng chiām-chiām khah chió khì lah. Chit ê phó͘-tō͘ chiàu lē sī tī muí nî ê tiong-goân, tiong-goân sī “sià-choē toē-koan Chheng-hú tāi-tè（赦罪地官清府大帝）kàm-chhat jîn-kan choē-ok ê ji̍t (chiū-sī kū-le̍k 7 ge̍h 15 ji̍t), tī kok toā sī-biō nih kú-hêng. Pān-lí hū-chek chit ê chè-sū ê lâng chheng choè “lô͘-chú”（爐主）, lô͘-chú sī tuì tong-toē toā jī siⁿ ê ta̍k nî lûn-liû, chit ê lûn-liû ê hong-sek sī tī hit keng biō ê ngó͘-siōng bīn-chêng poa̍h-poe lâi tit-tio̍h ê, koh choè lô͘-chú ê lâng chū-jīn kóng sī êng-kng. Lô͘-chú nā í-keng koat-tēng, chiū tuì kū-le̍k ê chiaⁿ-ge̍h khai-sí hiòng hit toē-hng ê lâng tê-iân, hit ê hong-hoat ū ê sī ēng “teng”（丁）choè tan-uī, “teng” ê ì-sù chiū-sī ta-po͘ teng.

āu-lâi kàu 6 ge̍h 30 ji̍t, chiū tio̍h tī biō-chêng chhāi chi̍t ki 3,4 tn̄g koân ê teng-ko（燈篙）, téng-bīn tiàu chi̍t kha îⁿ ê teng-láng（燈籠）, siá tio̍h “khèng-chàn tiong-goân” 4 jī, chit ki teng-ko sī uī-tio̍h beh chio-chi̍p kuí-hûn lâi ê lō͘-ēng. Chiàu thoân-soat sī sìn kóng kū-le̍k ê 6 ge̍h 30 ji̍t sī “khui tē-ge̍k mn̂g” （開地獄門）, só͘-í chiah khiā-khí teng-ko lâi chio-chi̍p chiah ê kuí-sîn lâi. In-uī án-ni, kóng teng-ko nā khiā jú koân khoàⁿ ná hn̄g, chū-chi̍p lâi ê kuí-hûn iā ná choē. Teng-ko nā khiā hó chiū hō͘ hê-siūⁿ khì liām-keng, chhiáⁿ toē-chông ông khui kuí-mn̂g-koan, thang pàng hiah-ê ko͘-hûn, iau-kuí chhut-lâi, án-ni, tuì hit ji̍t khí, chi̍t nî chi̍t pái ê phó͘-tō͘ chiū chèng-sek khai-sí lah.

La̍k-ge̍h 30 ji̍t ê hông-hun, ke-ke hō͘-hō͘ chiū khai-sí chiap-thāi tuì tē-ge̍k tiong só͘ pàng chhut-lâi ê kuí-hûn, ke-ke hō͘-hō͘ tio̍h tī nî-chîⁿ ē nih, tiàu chi̍t ê îⁿ ê choá-teng, chi̍t-bīn siá tio̍h “Im-kong phó͘-chiò”（陰光普照）, chi̍t-bīn siá lō͘-teng, lēng-goā ū choē-choē soè-jī ê siá kóng “tē-chú bó͘-bó͘ kèng tiám”. Chit ê teng sī beh kā hiah ê kuí-hûn chhoā-lō͘ ê, chit ê teng ê hé, tuì 6 ge̍h 30 ji̍t khí kàu 7 ge̍h bé uî chí, tio̍h ta̍k mî kè-sio̍k tiám, muí chi̍t ê ka-têng chiū-sī tī 6 ge̍h 30 ji̍t ē-po͘ kap 7 ge̍h chhoe it ē-po͘, 7 ge̍h 15 ji̍t ē-po͘ kap 7 ge̍h bé ji̍t ē-po͘, tī chit 4 ê ē-po͘ pī-pān hî, bah, koe ah kap âng-ku-koé téng lâi hàu-kèng hiah ê kuí-hûn, pèng chheng hiah-ê kuí-hûn choè hó hiaⁿ-tī ah. Kî-thaⁿ ê ji̍t-chí sī chiàu chi̍t ji̍t kuí tiàu koe, á-sī kuí ê lí khai-sí liân-ha̍p phó͘-tō͘. chiah ê iā sī tuì kok ka-têng hū-chek kuí oáⁿ, oáⁿ-poâⁿ sī ēng bīn-tháng, ē-bīn té chho͘-khng, téng-bīn chiah pâi mi̍h-kiāⁿ, sī pâi tàu hó, tàu suí, oē ēng-tit kóng sī si̍t-bu̍t ê tián-lám.

Chiàu khoàⁿ, in ná chhin-chhiūⁿ chin hoaⁿ-hí chiau-thāi chiah ê kuí-hûn ê khoán, kî-si̍t m̄-sī, in chí-ū sī poàⁿ hí, poàⁿ kiaⁿ teh choè, chi̍t-bīn sī uī-tio̍h beh ta̍t-chiâⁿ phó͘-chè ko͘-hûn ê siān-goān（普濟孤魂的善願）, chóng-sī bô lâng goān-ì ín-kuí ji̍p the̍h lâi ke-thiⁿ ka-kī ê mâ-hoân-só͘-í chi̍t hong-bīn teh chiap-thāi, chi̍t hong-bīn sī teh siūⁿ hong-hoat “pī siâ”（避邪）. Hit ê pī siâ ê hong-hoat sī tī biō-tiâⁿ hē chi̍t ê bí-táu, lāi-bīn té pe̍h-bí, téng-bīn khǹg chi̍t ê kó͘ tâng-kiàⁿ, chi̍t ki kó͘ kiàm, chi̍t ê soè ê phêng（秤）, koh chi̍t ki liâng-soàⁿ（涼傘）, koh ū a-to kap chhioh, koh chi̍t choáⁿ iû-teng; muí chi̍t ê bí-táu sī tāi-piáu chi̍t lí（里）, á-sī chi̍t ê siā-thoân（社團）, ēng án-ni teh kú-hêng in ê pī siâ. (Thāi-sio̍k)

漢羅（Ùi原文改寫）Permalink

台灣民間宗教中ê傳說（8）

神明官場ê 組織。

除了18 司以外，koh有設兩個判官;兩個判官是分做文 kap 武， koh有4 爺，就是牛爺， 馬爺， 枷爺（枷爺），鎖爺（鎖爺），也有二將軍，就是謝必安（謝必安），因為伊排 ti第七ê，所以俗稱七爺; 范無咎（范無咎），因為伊排tī 第八--ê，所以俗稱八爺， án-ni 二判官kap 司爺 kap 二將軍合做夥稱做八爺。

以外36 部將是紀仙姑（紀仙姑），連聖者（連聖者），五龍官（五龍官），鎖大將（鎖大將），金舍人（金舍人），倒淘大將（倒淘大將）。李仙姑（李仙姑），馬龍官（馬龍官），劉聖者（劉聖者），枷大將，（枷大將），唐舍人（唐舍人），移山大將（移山大將），趙元帥（趙元帥），殷元帥（殷元帥），岳元帥（岳元帥），王孫元帥（王孫元帥），辛元帥（辛元帥），必大將（必大將），康元帥（康元帥），溫元帥（溫元帥），咒水真人（咒水真人），鄧元帥（鄧元帥），李元帥（李元帥），高元帥（高元帥），勸仙姑（勸仙姑），張醒者（張醒者），拿大將（拿大將），江仙姑（江仙姑），虎加羅（虎加羅），食鬼大將（食鬼大將），何仙姑（何仙姑），蕭聖者（蕭聖者），捉大將（捉大將），紅化官（紅化官），馬加羅（馬加羅），吞精大將（吞精大將），共36 個部眾。

án-ni，現在台北ê 霞海城隍廟裡除了主神霞海城隍 kap 城隍夫人，以外從神（從神），有劍童（劍童），印童（印童），文武判官，牛，馬， 金（金），山（山），謝， 范等將軍，koh有引童童子（引童童子），福德正神就是土地公， koh有黑虎將軍（黑虎將軍），侍女（侍女）。Chiah ê以外，iáu有配神（配神）ê 36 部眾 等。

咱看以上所講霞海城隍廟中這樣官場派頭部屬等，宛然親像清朝時代陽間 官場ê派頭相像，這正是清朝時代有寡 bat tī 官場出入ê人，用現實中ê事例（事例）做藍本（藍本）所編出來ê “擬人化”（擬人化）ê偶像崇拜方式。

Tī chia順soà講：tī 霞海城隍廟ê 配神（配神）中也有服祀一個義勇公（義勇公），聽講這個義勇公就是紀念tī咸豐（咸豐）3年，tī 艋舺地方有發生大冤家相-thâi（頂下郊拚）ê時，為著 beh保護神像突破包圍ê時，殉難來死ê人所封立ê。 Koh 這間霞海城隍廟是tī 咸豐（咸豐）9年3月1日起 ê， koh tī傳說中講霞海城隍廟中hit兩身謝將軍kap 范將軍，有人bat看著in tī半暝nih the̍h鎖鍊tiàm街路nih teh 巡邏，因為án-ni講hit地方攏無賊仔。以上是為beh證明擬人化ê偶像ê傳說故事。對這個thang知台灣民間宗教ê 幼稚思想。

幾個迷信ê小風俗

1) 放營. Tī台灣各地 ê廟宇若做佛生日抑是做醮ê時，就tī廟ê 附近，或是樹腳，或是路邊，或是橋頭ê所在將兩枝 抑是三枝小竹仔，一koe̍h chhāi tī土內，留尺goā長thóng起來tī土-面，koh用紅布仔縛tī thó͘起來tī土面ê 竹仔 nih，咱穩當bat看著這號物，這叫做”放營”（放營）。在tī大陸nih是叫做「神營」（神營），抑是「鬼帳」（鬼帳）

照傳說是講：所有ê神明攏有伊ê部屬（部屬），抑是臣將（臣將），特別jú有神通廣大（神通廣大）ê就伊ê 部屬，抑是臣將 ê中間也有真濟神通廣大 ê鬼神。Chiah ê 部屬，抑是臣將一下濟，就tī廟內toà無夠，另外tio̍h 放營 tī hit 間廟ê 附近。所以若做佛生日，抑是做醮ê時，”in” (就是hit 地方參加做佛生日，拜偶像ê人)，就tio̍h siāng-時舉行犒將（犒將），賞兵（賞兵），這正親像古代 tī sio-thâi得勝tńg來ê時tio̍h ài辦筵席來犒賞三軍（犒賞三軍）一樣。

Koh講這款放營，是kap咱中國古代三軍teh紮營ê方式相像，就是有分做東西南北，中5營。所以若發現著tī一所在有插這號放營ê 竹仔，就tī hit 附近有廟，抑是相像這號放營ê所在。Koh講chiah ê 放營ê臣將若有神通廣大，也會互相爭取地位。總講這號放營ê所在，雖然無廟，總是kap廟同樣有鬼神tī hit個所在teh khiā起，莫怪hiah ê拜偶像ê人，不時teh 驚討著， 煞著，也驚犯著無主家神，天羅夫人，心內不安，驚惶，koh tī 破病問佛 ê時，常常講是犯著 tó 一項，就是攏犯著chiah ê。列位，咱beh怎樣來幫贊chiah ê人來hō͘主耶穌拯救？

2) 慶讚中元（慶讚中元）。慶讚中元ê土名叫做普渡，照佛教ê言詞是講盂蘭盆會（盂蘭盆會），tī 這幾年來，因為有咱賢明 ê政府ê 開導， 這款鋪張浪費ê 普渡已經漸漸khah少去lah。 這個普渡照例是tī每年ê中元，中元是「赦罪地官清府大帝（赦罪地官清府大帝）鑑察人間罪惡ê日(就是舊曆 7月15日)，tī 各大寺廟nih舉行。辨理負責這個祭祀ê人稱做”爐主”（爐主），爐主是對當地大字生ê 逐年輪流， 這個輪流 ê方式是tī hit 間廟ê偶像面前poa̍h-杯來得著 ê， koh做爐主 ê人自認講是榮光。爐主若已經決定，就對舊曆ê正月開始向hit地方ê人tê-iân， hit個方法有ê是用”丁”（丁）做單位， “丁” ê意思就是ta-po͘ 丁。

後來到6月30日，就tio̍h tī廟前chhāi一支3，4 丈koân ê 燈篙（燈篙），頂面吊一kha圓 ê 燈籠（燈籠），寫著 “慶讚中原” 4字， 這支燈篙是為著beh招集鬼魂來ê路用。照傳說是信講舊曆ê 6月30日是「開地獄門」（開地獄門），所以chiah khiā起燈篙來招集chiah ê鬼神來。因為án-ni，講燈篙若khiā jú koân看ná遠，聚集來ê 鬼魂也ná濟。燈篙若khiā好就hō͘ 和尚去念經，請地藏王開鬼門關， thang放hiah ê 孤魂， 野鬼出來，án-ni， 對hit日起，一年一擺ê普渡就正式開始lah。

六月30日ê黃昏，家家戶戶就開始接待對地獄中所放出來ê 鬼魂， 家家戶戶tio̍h tī年錢ē nih， 吊一個圓ê紙燈，一面寫著 「陰光普照」（陰光普照），一面寫路燈，另外有最濟細膩ê寫講「地主某某敬點」。這個燈是beh kā hiah ê 鬼魂chhoā路ê， 這個燈ê火， 對6月30日起到7月尾為止， tio̍h 逐暝繼續點，每一個家庭就是tī 6月30日下晡kap 7月初一下晡，7月15日下晡kap 7月尾日下晡，tī 這4 ê下晡備辦魚，肉，雞鴨 kap 紅龜粿等來孝敬hiah ê 鬼魂， 並稱hiah ê 鬼魂做好兄弟仔。其他ê日子是照一日幾條街， 抑是幾個里開始聯合普渡。 Chiah ê也是對各家庭負責幾碗，碗盤是用面桶，下面té 粗糠，頂面chiah 排物件，是排tàu好，tàu suí，會用得講是植物ê展覽。

照看， in ná親像真歡喜招待chiah ê 鬼魂 ê款，其實m̄是，in只有是半喜，半驚teh做，一面是為著beh 達成普濟孤魂ê善願（普濟孤魂的善願），總是無人願意引鬼入宅來加添家己ê麻煩，所以一方面teh接待，一方面是teh想方法 “避邪”（避邪）。Hit個 避邪 ê方法是tī廟埕hē一個米斗，內面 té白米，頂面khǹg一個古銅鏡，一支古劍，一個細 ê 秤（秤），koh一支涼傘（涼傘），koh有鉸刀 kap 尺， koh一盞油燈;每一個米斗是代表一里（里），抑是一個社團（社團），用án-ni teh舉行in ê 避邪。 (待續)