短篇小說
Té-phiⁿ Siáu-soat
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第979號 |
| 日期 | 1966/4 |
| 頁數 | 17 |
白話字（原文數位化）
Té-phiⁿ Siáu-soat
Teng En̂g-lîm
1966.04.01 P.17-18
Ē-bīn ê kò͘-sū sìn put sìn iû lí, chóng-sī m̄-thang bô kín-sīn
- Put-sok chi-khek（不速之客）
Hit ji̍t goá chē tī pān-kong thiaⁿ teh chéng-lí kàu-hoē su-luī.
” Pêng-an,” hut-jîn ū chi̍t ê lâng khiā tī mn̂g-kháu teh kā goá chhéng-an, goá kia̍h thâu chi̍t-ē khoàⁿ, m̄-sī goá ê hoē-iú, iā m̄-sī goá só͘ bat ê sìn-tô͘, tuì chit khoán siⁿ-hūn lag5 kong-lîm ê keng-giām, kà-sī goá sui-jiân tio̍h piáu-sī hoan-gêng, chóng-sī iā tio̍h chûn tām-po̍h ê kài-sim, in-uī goá í-keng hō͘ chin-choē lâng phiàn ê phiàn, láu ê láu, liáu khì bû-sò͘ ê chiⁿ lah, só͘-í ta̍k pái nā khoàⁿ-tio̍h chiah ê put-sok chi-kek（不速之客）ji̍p-lâi, boē bián tit hō͘ goá hân-sim. Chóng-sī chit uī hiaⁿ-tī seng-khu chhēng se-chong, chhiú koāⁿ pá-pá ê phê-pau, tuì chit khoán chhēng-chhah kap bīn-iông khoàⁿ--lâi, bô thang giâu-gî sī chi̍t ê liû-lōng-chiá teh choè pián-sian ê lâng, te̍k-pia̍t i thâu-chi̍t kù oē tuì goá kóng pêng-an, hō͘ goá ke-thiⁿ an-sim, chai-iáⁿ i sī Chú-chhut-lâi hoan-gêng i kap i ak-chiú, chhiáⁿ i ji̍p lâi chē.
“Sian-siⁿ, kuì sìⁿ?”
“Sió sìⁿ Gô͘, miâ Pang（吳邦）, tiàm tī Tâi-pak sio̍k S. M. kàu-hoē.”
Goá chi̍t-ē thiaⁿ-kìⁿ i sī tuì Tai-pak lâi, boē-bián tio̍h chi̍t kiaⁿ, koh mn̄g i kóng, “Gô͘ Sian-siⁿ ū sím-mi̍h kuì-sū, tiâu-kang chiah hn̄g lâi chhē goá?”
“M̄-sī, goá m̄-sī tiâu-kang lâi chhē lí, in-uī goá ê chit-gia̍p sī teh siu-lí hong-khîm, kin-á-ji̍t lâi kàu chia ji̍p lâi khoàⁿ kàu-hoē ê hong-khim ū thang siu-lí bô?”
“Ah! Cin sit-lé, pún kàu-hoē ê hong-khîm tú-chiah boé bô joā-kú, m̄-bián siu-lí.”
“án-ni chin hó, put-kò goá m̄-sī teh siu-lí hong-khîm nā-tiāⁿ, kám-siā Siōng-tè, hō͘ goá chià tio̍h chit ê ki-hoē thang tī ta̍k só͘-chāi ê kàu-hoē uī Chú choè kang.”
“Chin hó, chin hó! Chhin-chhiūⁿ Pó-lô chi̍t bīn choè pò͘-pîⁿ, chi̍t bīn choè Chú ê kang, goān Siōng-tè chiok-hok lí chit khoán kang-chok.”
“Kám-siā Chú, goá bat tī goá ê kàu-hoē choè T. K. C. hoē-tiúⁿ, iā bat coè Chú-ji̍t-o̍h kàu-oân, ū sî bat thoè bo̍k-su káng-tō.” I koh kóng, “Goá chhut-lâi ta̍k só͘-chāi siông-siông ū ki-hoē thang pang-chān kàu-hoē ê kang.”
Gô͘ Sian-siⁿ chin oē kóng oē, bô-lūn thó-lūn Sèng-keng, á-sī kàu-hoē ê chêng-hêng, sím-chì chin-choē bo̍k-su ê loē-iông i lóng chin chai-iáⁿ, goá chin khim-poē i ê hâng-chêng, koh-khah kám-sim i tuì Chú ê jia̍t-sim, goá bô lí-iû koh hoâi-gî cit ê siⁿ-hūn-lâng. Goá ê hū-jîn-lâng tuì bô se̍k-sāi ê lâng-kheh, it-hiòng bín-kám koh kín-sīn, tng i tī lāi-bīn siông-sè thiaⁿ goán ê tâm-lūn, iā bô oē-phāng khoàⁿ chhut i m̄-sī chi̍t ê jia̍t-sim ê Ki-tok-tô͘, só͘-í iā chhut-lâi ka-ji̍p goán ê tâm-oē, sīm-chì chún-pī ké-chí lâi chiau-thāi i.
- Sêng-sim chiap-thāi.
Tng tāi-ke kóng kàu chin sim-sek ê sî, ji̍t-thâu chiām-chiām lo̍h-soaⁿ. Gô͘ Sian-siⁿ koh kóng, “Chin kám-siā Chú, goá muí kàu chi̍t só͘-chāi, tāi-ke suî-jiân bô se̍k-sāi, nā-sī bo̍k-su, sian-siⁿ á-sī hoē-iú lóng khoàn goá choè chi̍t ke ê lâng; cin-chiàⁿ Chú-lāi chiū-sī chhù-lāi, hō͘ goá chin toā hong-piān. Teng Sian-siⁿ, eng-àm beh kā lí chioh hioh chi̍t mî, m̄-chai lí chia ū só͘-chāi thang iông-ún á bô?” “Kì-jiân sī tâng sio̍k Chú ê lâng, tong-jiân hoan-gêng.”
“Kàu-hoē eng-àm ū chū-hoē bô?” I koh mn̄g.
“Ū! Eng-àm sī pài saⁿ, sī chiu-kan lé-pài(kî-tó-hoē).”
“án-ni chin kám-siā Chú, nā bô khì-hiâm, hō͘ goá chú-lí hó bô?”
“Hó! hó, lí beh choè kang chin hoan-gêng.”
“Teng Sian-siⁿ lí cin hó, goá bat tī chin-choè kàu-hoē thó beh chú-lí, ū sî boē thang tit-tio̍h bo̍k-su ê ún-chún, in kóng káng-tâi boē-sái suî-piān hō͘ chi̍t ê bô se̍k-sāi, koh bô Tiong-hoē ún-chún ê lâng khiā, goá khoàⁿ chiah ê bo̍k-su lóng hō͘ hoat-kui pa̍k-teh, bô si̍t-chāi thiàⁿ Chú.”
Hut-jiân i ê oē hō͘ goá ê sim chha̍k chi̍t ē, goá in i kóng, “Tio̍h! tio̍h! Káng-tâi boē thang suî-piān hō͘ lâng khiā, in-uī jî-pí oē nāu-chhut būn-toê lâi,: chit sî goá ê sim-lāi chin mâu-tún, m̄-kú goá kì-jiân tah-èng i , boē thang koh siu-hoê, jî-chhiáⁿ khoàⁿ chit ê lâng ê sìn-gióng kàu-gia̍h thang hō͘ sìn-tô͘ o̍h, hō͘ i khiā ū sím-mi̍h chó͘-gāi? Só͘-í kā i kóng, “Gô͘ Sian-siⁿ, lí oē kham-tit choè chú-lí, bô iàu-kín.”
“To-siā, lí ê hó-ì goá chin kám-siā, taⁿ goá tio̍h lâi chún-pī chi̍t-ē.”
I kā goá chioh Sèng-keng, Seng-si ji̍p-khì lâng-kheh pâng teh chún-pī, goá tī goā-bīn thiaⁿ i kî-tó chin toā siaⁿ, uī-tio̍h eng-àm ê chú-lí, goá ê hū-jîn-lâng chai-iáⁿ chit ê lâng-kheh eng-àm oē tī chia chia̍h-pn̄g, i iā bū sà-sà, lîm-sî kio goá khiâ-chhia khì chhī-tiûⁿ boé bah, nn̄g, iân-chhiân thang lâi chhiáⁿ i.
- Chú-chhî kî-tó-hoē chin láu-liān.
Kî-tó-hoē ê sî-kan, goá tuì chèng hoē-iú kài-siā liáu, Gô͘ Sian-siⁿ chiū chhoā tai8-ke gîm-si tha̍k Sèng-keng, I ín Má-thài 24: 1-24; I I Ko-lîm-to 11:12-15 bián-lē sìn-tô͘ kóng.
“……Tī chit ê boa̍t-sè sî-tāi, lâng ná lâi ná pháiⁿ, só͘ choè ê ná khuí-khiat, Mô͘-kuí lóng oē chng-choè kng-bêng ê thiⁿ-sài, chhin-chhiūⁿ gī ê chhe-ēng, sì-koè kiâⁿ the chhē só͘ beh thun-chia̍h ê lâng, só͘-í hiaⁿ-tī chí-bē, lín tio̍h kéng-séng, tio̍h kî-tó chiah bián jip tī bê-he̍k……”
Kóng soah, i ēng hui-siông pek-chhiat ê siaⁿ thoè kàu-hoē, thoè goá, kap chèng hoē-iú kî-tó, i ê jia̍t-chêng kám-tōng choē-choē lâng khí-lâi kî-tó, liân pêng-siông m̄-bat khí-lâi ê sìn-tô͘ iā lóng khí-lâi jin-choē kî-tó. Che sī chi̍t pái chin sêng-kong ê kî-tó-hoē, te̍k-ia̍t kám-tōng tio̍h Tân Tiúⁿ-ló. Kàu chū-hoē soah, Tân Tiúⁿ-ló suî-sî chhut-lâi kap i ak-chhiú, nn̄g lâng ti̍t-ti̍t hoah “kám-siā Chú, o-ló Chú.: Kàu beh khùn ê sî, Tân tiúⁿ-ló khì goā-bīn kiò tiám-sim kap ké-chí hō͘ i chia̍h, in-uī thiⁿ-khì chin joa̍h, i tiâu-kang tńg-khì chhù-nih giâ i ê tiān-hong-sìⁿ（電扇）lâi beh hō͘ Gô͘ Sian-siⁿ khùn thang chhe, iā uī i koà báng-tà, chiau-thāi tit bû-bî pû-chì, Tân Tiúⁿ-ló beh tńg-khì ê sî, nn̄g lâng koh kuī tī bîn-chhn̂g téng toā siaⁿ kî-tó, goá thiaⁿ-kìⁿ Tân Tiúⁿ-ló ēng chin khún-chhiat ê ai-kiû tuì Siōng-tè kóng, “ Nā-si Lí ê hó chí-ì, chhiáⁿ iông-ún Lí ê tiong-po̍k Gô͘ hiaⁿ-tī tiàm tī chia lâi ho̍k-heng Lí ê Sèng-hoē.” I chhiong-moá heng-hùn ê sim, toà tio̍h hoaⁿ-hí ê ba̍k-sái tńg-khí.
- goân-lâi jû-chhú.
Keh chá-khí thiⁿ iáu-bē kng, goá iáu tī bîn-chhn̂g teng tng hó-khùn. Tân Tiúⁿ-ló tio̍h-kip ê siaⁿ kiò-chhíⁿ goá, goá lia̍h chún i beh kiò goá khí-lâi saⁿ-kap kî-tó, bô phah-sǹg i ê bīn lóng piàn-sek, oē kóng boē siáⁿ liàn-tńg, ti̍t-ti̍t mn̄g.
“Gô͘ Sian-siⁿ khì tá-lo̍h?”
“ún-tàng tī lé-pài-tn̂g the kî-tó.” Goá ba̍k-chiu bâng-bâng teh ìn.
“Bô! bô tī lé-pài-tn̂g, iā bô tī bîn-chhn̂g, goá ta̍k uī chhē lóng bô.” Tân-tiúⁿ-ló kóng “Bîn-chhn̂g lóng kim tang-tang, liân goá ê tiān-sìⁿ iā bô khoàⁿ-tio̍h!”
“Sím-mi̍h?” Goá tiaⁿ chi̍t-ē, ba̍k-chiu tián toā luí khí-lâi, khùn-sîn lóng bô--kì, bô khoà chhēng-saⁿ, chiū tuì bîn-chhn̂g téng chông--lo̍h-lâi, Thian ah! kha-ta̍h-chhia（腳踏車）iā bô-khì, lāi-bīn kìⁿ-nā oē eng-tit ê mi̍h lóng sàu kàu khang-khang. Goá koh cháu-ji̍p pài-tn̂g, khoàⁿ-kìⁿ hit tâi sin ê hong-khîm ê goā-khak pak-lo̍h-lâi, goá hàiⁿ-thâu tuì Tân Tiúⁿ-ló kóng, “Hong-khîm ê pi-á iā hō͘ chhiú-su̍t khì, m̄-sìn goá toâⁿ hō͘ lí thiaⁿ, kó-jiân kha chi̍t-ē ta̍h-lo̍h-khì, chí-ū thiaⁿ-tio̍h hong ê siaⁿ hū-hū háu nā-tiāⁿ.
Tân Tiúⁿ-ló kap goá lám-heng, sì-luí ba̍k-chiu tuì siòng, lóng boē kóng oē, chin kú, I chiah ti̍t-ti̍t iô-thâu thó͘-khuì kóng.
“Ti-jîn ti-bīn put-ti sim, goá m̄-sī bô-chhái hiah ê mi̍h-kiāⁿ bô khì, goá sī thòng-sim kin-á-ji̍t ū joā-choē ê ki-tok-tô͘ sī koà iûⁿ-thâu boē káu-bah, ēng Ki-tok ê chiau-pâi（招牌）the choè hoān-choē ê sū, chhuì kóng Iâ-so͘, chhiú kia̍h gû-to; chhuì kóng saⁿ-thiàⁿ, kî-si̍t teh saⁿ piàⁿ; thâu-chêng teh kî-tó, āu-piah teh iat lián-pó; thâu-chêng teh hoah kám-siā Chú, āu-piah ū mi̍h chiū chhú. Khó-lîn ê ki-tok-tô͘”. I thâu-khak àⁿ-àⁿ, ná kóng ná kiâⁿ tńg-khì.
Goá hui-siông hō͘-hoé, tuì goá ê bû-ti chiah oē ín-chìn chhâi-lông ji̍p chhú-lāi（引狼入室）. Goá kuī tī lé-pài-tn̂g lâi kiû Siōng-tè sià-bián goá chit chhù ê gû-gōng, siúⁿ-sù goá ū tì-huī, í-āu oē hiáu hun-piat hó-pháiⁿ, bô koh ū tē jī pái ê sit-chhò. Goá chim-chiok siūⁿ, sī lah! che sī Siōng-tè thong-kè i tuì goá(iā tuì lán) kóng-oē:
“Tī chit ê boa̍t-sè ê sî-tāi, Mô͘-kuí chng-choè kng-bêng ê thiⁿ-sài, chhin-chhiūⁿ gī ê chhe-ēng, sì-koè kiâⁿ, teh chhē só͘ thang thun chia̍h ê lâng, só͘-í tio̍h kéng-séng kî-tó, chiah bián ji̍p tī bê-he̍k.”
漢羅（Ùi原文改寫）
短篇小說
下面ê故事信不信由你，總是m̄-thang無謹慎
- 不速之客（不速之客）
Hit日我坐tī辦公廳teh整理教會書類。
“平安，” 忽然有一個人khiā tī門口teh kā我請安，我kia̍h頭一下看， m̄是我ê會友，也m̄是我所bat ê信徒，對這款生份人光臨ê經驗，教示我雖然tio̍h表示歡迎，總是也tio̍h存淡薄ê戒心，因為我已經hō͘真濟人騙ê騙，了ê了，了去無數ê錢lah，所以逐擺若看這chiah-ê不速之客（不速之客）入來， boē免得hō͘我寒心。總是這位兄弟身軀穿西裝，手koāⁿ飽飽ê皮包，tuì 這款穿插kap面容看來，無thang僥疑是一個流浪者teh做騙仙ê人，特別伊頭一句話對我講平安， hō͘我加添安心，知影伊是主出來歡迎伊kap伊握手，請伊入來坐。
“先生，貴姓？”
“小姓吳，名邦（吳邦）， tiàm tī台北屬S. M.教會。”
我一下聽見伊是tuì 台北來， boē免著一驚， koh問伊講， “吳先生有甚麼貴事，tiâu工chiah遠來chhē我？”
“m̄是，我m̄是tiâu工來chhē你，因為我ê職業是teh修理風琴，今仔日來到chia入來看教會ê風琴有thang修理無？”
“Ah！真失禮，本教會ê風琴tú-chiah買無joā久， m̄免修理。”
“án-ni真好，不過我m̄是teh修理風琴nā-tiāⁿ，感謝上帝， hō͘我藉tio̍h 這個機會thang tī逐所在ê教會為主做工。”
“真好，真好！親像保羅一面做布棚，一面做主ê工，願上帝祝福你這款工作。”
“感謝主，我bat tī我ê教會做T. K. C.會長，也bat 做主日學教員，有時bat替牧師講道。”伊koh講：”我出來逐所在常常有機會thang幫贊教會ê工。”
吳先生真會講話，無論討論聖經， 抑是教會ê情形， 甚至真濟牧師ê內容伊攏真知影，我真欽佩伊ê行情， koh-khah感心伊對主ê熱心，我無理由koh懷疑這ê生份人。我ê婦人人對無熟似ê人客，一向敏感koh謹慎，當伊tī內面詳細聽阮ê談論，也無話縫看出伊m̄是一個熱心ê基督徒，所以也出來加入阮ê談話，甚至準備果子來招待伊。
- 誠心接待。
當大家講到真心適ê時，日頭漸漸落山。 吳先生koh講：”真感謝主，我每到一所在，大家雖然無熟似，若是牧師，先生抑是會友攏看我做一家ê人； 真正主內就是厝內， hō͘我真大方便。 丁先生， eng暗beh kā你借歇一暝， m̄知你chia有所在thang容允抑無？” “既然是同屬主ê人，當然歡迎。”
“教會eng暗有聚會無？”伊koh問。
“有！ eng暗是拜三，是週間禮拜(祈禱會)。”
“án-ni真感謝主，若無棄嫌， hō͘我主理好無？”
“好！好，你beh做工真歡迎。”
“丁先生你真好，我bat tī真濟教會討beh主理，有時boē-thang得著牧師ê允准， in講講台boē使隨便hō͘一個無熟似， koh無中會允准ê人khiā，我看chiah-ê牧師攏hō͘法規縛teh，無實在疼主。”
忽然伊ê話hō͘我ê心鑿一下，我應伊講， “Tio̍h！ tio̍h！講台boē-thang隨便hō͘人khiā，因為jî-pí會鬧出問題來，: 這時我ê心內真矛盾， m̄-kú我既然答應伊， boē-thang koh收回，而且看這個人ê信仰夠額thang hō͘信徒學， hō͘伊khiā有甚麼阻礙？所以kā伊講， “吳先生，你會堪得做主理，無要緊。”
“多謝，你ê好意我真感謝， taⁿ我tio̍h來準備一下。”
伊kā我借聖經、聖詩入去人客房teh準備，我tī外面聽伊祈禱真大聲，為著eng暗ê主理，我ê婦人人知影這個人客eng暗會tī chia食飯，伊也霧sà-sà， 臨時叫我騎車去市場買肉，卵，iân-chhiân thang來請伊。
- 主持祈禱會真老練。
祈禱會ê時間，我對眾會友介紹了， 吳先生就chhoā大家吟詩讀聖經，伊引馬太24: 1-24；伊哥林多前書11:12-15勉勵信徒講。
“……Tī 這個末世時代，人ná來ná歹，所做ê ná詭譎，魔鬼攏會裝做光明ê天使，親像義ê差用，四界行teh chhē所beh吞食ê人，所以兄弟姊妹， 恁tio̍h警醒， tio̍h祈禱chiah免入tī迷惑……”
講soah，伊用非常迫切ê聲替教會，替我， kap眾會友祈禱，伊ê熱情感動濟濟人起來祈禱，連平常m̄-bat起來ê信徒也攏起來認罪祈禱。這是一擺真成功ê祈禱會， 特別感動著陳長老。到聚會soah， 陳長老隨時出來kap伊握手，兩人直直hoah “感謝主， o-ló主。:到beh睏ê時， 陳長老去外面叫點心kap果子hō͘伊食，因為天氣真熱，伊tiâu工轉去厝裡giâ伊ê電風扇（電扇）來beh hō͘ 吳先生睏thang吹，也為伊掛báng罩， 招待得無微不至，陳長老beh轉去ê時，兩人koh跪tī眠床頂大聲祈禱，我聽見陳長老用真懇切ê哀求對上帝講：”若是你ê好旨意，請容允你ê忠僕吳兄弟tiàm tī chia來復興你ê聖會。”伊充滿興奮ê心，帶著歡喜ê目屎轉去。
- 原來如此。
隔早起天iáu未光，我iáu tī眠床頂當好睏。 陳長老著急ê聲叫醒我，我掠準伊beh叫我起來相kap祈禱，無拍算伊ê面攏變色， 話講boē啥liàn轉，直直問。
“吳先生去tá-lo̍h？”
“穩當tī禮拜堂teh祈禱。”我目睭茫茫teh應。
“無！無tī禮拜堂，也無tī眠床，我逐位chhē攏無。” 陳長老講”眠床攏金tang-tang，連我ê電扇也無看著！”
“甚麼？”我聽一下，目睭tián大蕊起來，睏神攏無去，無khoà穿衫，就tuì眠床頂chông--落來， 天ah！腳踏車（腳踏車）也無去，內面見若會用得ê物攏掃到空空。我koh走入拜堂，看見hit台新ê風琴ê外殼拔落來，我hàiⁿ-頭對陳長老講：”風琴ê pi-á也hō͘手術去， m̄信我彈hō͘你聽，果然腳一下踏落去，只有聽著風ê聲hū-hū哮nā-tiāⁿ。
陳長老kap我攬胸，四蕊目睭對相，攏boē講話，真久，伊chiah直直搖頭吐氣講。
“知人知面不知心，我m̄是無彩hiah-ê物件無去，我是痛心今仔日有joā濟ê基督徒是掛羊頭賣狗肉，用基督ê招牌（招牌）teh做犯罪ê事，嘴講耶穌，手kia̍h牛刀；嘴講相疼，其實teh相拚；頭前teh祈禱，後壁teh iat 撚寶；頭前teh hoah感謝主，後壁有物就取。可憐ê基督徒”。伊頭殼àⁿ-àⁿ， ná講ná行轉去。
我非常後悔， tuì我ê 無知chiah會引進財狼入厝內（引狼入室）。我跪tī禮拜堂來求上帝赦免我這次ê愚戇，賞賜我有智慧，以後會曉分別好歹，無koh有第二擺ê失錯。我斟酌想，是lah！這是上帝通過伊對我(也對咱)講話：
“Tī這個末世ê時代，魔鬼裝做光明ê天使，親像義ê差用，四界行， teh chhē所thang吞食ê人，所以tio̍h警醒祈禱， chiah免入tī迷惑。”