台灣民間宗教ê傳說（7）
Tâu-oân Bîn-kan Chong-kàu tiong ê thoân-soat（7）
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第980號 |
| 日期 | 1966/4 |
| 頁數 | 12 |
白話字（原文數位化）
Tâu-oân Bîn-kan Chong-kàu tiong ê thoân-soat（7）
Niû Kú-têng
1966.04.15 P.12、15
Gí-jîn-hoà ê ngó͘-siōng chông-pài.
Tng goá teh gián-kiù “Tâi-oân bîn-kan chong-kàu” ê sî, hō͘ goá hoat-kiàn tio̍h chit ê gí-jîn-hoà（擬人化）ê ngó͘-siōng su-siúⁿ, tī bîn-kan ngó͘-siōng chông-pài ê tiong-kan, siông-siông chiàu lâng ka-kī ê seng-oa̍h hong-sek choè ngó͘-siōng chông-pài ê phiau-chún, chhin-chhiūⁿ kóng “Pu̍t siⁿ-i̍t” lah, á-sī chhin-chhiūⁿ “Tang-ga̍k biō”（東獄廟）ê Ga̍k-tè-iâ kap Sêng-hông-biō（城隍廟）ê Sêng-hông-iâ téng. Chiàu thoân-soat, in sī teh chip-chiáng im-kan（冥司）ê sū, chóng-sī in biō tiong ê pâi-siat kap loē-iông ê chó͘-chit, chiàⁿ kap iông-kan ê Gê-mn̂g sio-siāng, iā ū phoàⁿ-koaⁿ, iā ū si-sio̍k（司屬）téng, hoe-sek chin-choē.
Keh Sèng-ông chhoā-bó.
Lán tī í-chêng bat kóng kàu “Tāi-tō-kong kap Má-chó͘-pô ê loân-ài sú,” í-ki̍p “Siōng-tè-kong (sī chí Hiân-thian Siōng-tè玄天上帝) kā Pó-an Tāi-tè chioh pó-kiàm” téng, lóng sī “gí-jîn-hoà” ê kò͘-sū. Taⁿ chit sî lâi kóng sîn-bêng chhoā-bó͘ ê gí-jîn-hoà kò͘-sū.
Kóng-te̍k Chun-ông（廣澤尊王）, iā chheng-choè Keh Sèng ông（郭聖王）, á-sī Pó-an Chun-ông（保安尊王）, I ê pún-sìⁿ sìⁿ Keh（郭）, miâ choè Hông-hok（洪福）, sī Choân-chiu hú Lâm-an koān（泉州府南安縣） ê lâng só͘ the kèng-pài ê ngó͘-siōng, in-uī Tâi-oân ê chū-bîn toā pō͘-hūn sī tuì Choân-chiu lâi ê. Só͘-í tī Tâi-oân nih iā ū chin-choē Keh-sèng-ông ê biō.
Chiàu thoân-soat kóng, tng I sêng-hu̍t choè sîn-bêng í-āu, bat khoàⁿ-kìⁿ An-khe si-kong（安溪司公，sī sîn-bêng tiong ê chi̍t ê）ê cha-bó͘-kiáⁿ, m̄-kú An-khe si-kong ê cha-bó͘-kiáⁿ í-keng choè lâng liáu lah, Keh-sèng-ông chiū tng tán chit ê cha-bó͘ gín-ná beh kiat-hun hit ji̍t, ēng hoat-su̍t chiong hit téng chē sin-niû ê hoe-kiō chhiúⁿ-lâi i ê biō, kiông-pek I sêng-chhin, tuì án-ni ín-khí An-khoe si-kong kap Keh-sèng-ông ê chi̍t-tiûⁿ ê toā tàu-hoat. Chiàu toân-soat tiong kóng, An-khoe si-kong ê hoat-le̍k iā put-chí toā, chóng-sī kàu-kia̍t-kio̍k Keh-sèng-ông tek-sèng, in-uī án-ni, ho̍k-sāi Keh-sèng-ông ê biō-nih tio̍h ke khek chi̍t sin Keh-sèng-ông hu-jîn ê ngó͘-siōng, siōng chhiáⁿ koh kóng chit sin Keh-sèng-oâng hu-jîn siông-siông tī thian-kài nih siⁿ-kiáⁿ. Só͘-í Keh-sèng-ông biō tiong nā thiaⁿ-kìⁿ ū eⁿ-á the khàu ê siaⁿ, Keh-sèng-ông biō chêng ê thó͘-toē chiū phòng-khí-lâi, lâng chiū chiong hiah ê thô͘ lo̍h-khì chng chi̍t sin Keh-sèng-ông ê kiáⁿ ê ngó͘-siōng, chiū kā I kiò-choè tè-it Thài-pó͘, āu-lâi koh muí nî ke chi̍t sin, chiàu chit ê hong-sek lóng-chóng ū ke 4 sin, koh chheng-choè tē it Thài-pó, tè jī Thài-pó, tē saⁿ Thài-pó, tē sì Thài-pó téng. chit khoán loân-ài kiù hun, kap chhoā-bó͘ siⁿ-kiáⁿ, oân-choân bô chhut lâng hiān-si̍t seng-oa̍h ê hoān-uî.
Thiⁿ-kong chhut kò-sī.
Koh ū chi̍t ê gí-jîn-hoà ê kò͘-sū, chiū-sī tī Bîn-kok 13 nî（民國十三年）chhut-pán ê Tâi-oân hong-sio̍k chì nih, ū chhut tio̍h Tâi-lâm Thiⁿ-kong-biō ê Thiⁿ-kong só͘ hoat-chhut ê chi̍t tiuⁿ pò͘-kò（佈告）, goá chiong I ê loē-iông siá chi̍t-pō͘-hūn tī ē-bīn hō͘ tāi-ke choè chham-khó. “敕封靈公，駐鎮全臺，白龍庵瘟部主宰，糾察爵閣部堂張，為出示曉諭事，照得本爵閣部堂恭奉簡命，駐鎮臺疆，分別善惡，年例代天巡狩，設醮造舟，驅瘟逐疫出海，以保闔郡黎民安泰。時屆夏令，應行舉辦事宜，茲擇于……” í-hā sī bēng-lēng “採造龍舟” kap “開堂視事” ê ji̍t-kî, nā chiong chit tiuⁿ pò͘-kò（佈告）tiong ū koan-hē im iông（陰陽）ê jī-gán nā kā I kái-tōng chi̍t-ē, chiū thang piàn-chiâⁿ Chheng-tāi Hok-kiàn chóng-tok, á-sī Tâi-oân sûn-bú ê pò͘-kò-bûn（佈告文）. Tú-tú chiàu Chheng-tiâu sî-tāi ê kong-bûn hong-sek, cháiⁿ-iūn liân sîn-bêng iā teh ēng Chheng-tiâu koaⁿ-tiûⁿ ê kong-bûn hong-sek hoat-chhut pò͘-kò-bûn? Si̍t-chāi gí-jîn-hoà kàu ū thiat-té.
Koh tī Tiong-hoâ choân-kok hong-sio̍k chì（中華全國風俗誌）nih ū kóng, tng-sî ngiâ nāu-jia̍t ê sî kok biō-sī ê sîn-bêng ê kiō chhut-lâi tī-teh chhut-sûn ê sî, bān-it nā tī ke-thâu lō͘-bé saⁿ-gū ê sî, tio̍h án-chiàu hit ê sîn-bêng ê koaⁿ-kai（官階）kiâⁿ-chham-iat（參謁）kap pī-tō（避道）ê lé-sò͘, chit-khoán ê lé-sò͘ kok ū kui-tēng, oân-choân kap Chheng-tiâu sî-tāi ê koaⁿ-oân tī lō͘-tiong saⁿ-gū ê lé-sò͘ sio-siāng, lóng bô chi̍t-tiám-á chha-chhò, si̍t-chāi chin sim-sek.
Sîn-bêng ê koaⁿ-tiûⁿ chó͘-chit.
Í-hā koh-chài lâi kóng chi̍t ê ū koaⁿ-tiûⁿ phài-thâu gí-jîn-hoà ê lē. Tī pún-séng ê tiong-kan lóng-chóng ū 30 goā keng ê Sêng-hông-biō（城隍廟）, kî-tiong choè tē it toā keng ê, thang kóng sī Tâi-pak chhī Toā-tiū-tiâⁿ ê Hâ-hái Sêng-hông-biō（霞海城隍廟）. Hâ-hái Sêng-hông-biō ê chè-tián sī tī muí nî kū-le̍k ê 5 ge̍h 13 ji̍t, chóng-sī tuì 5 ge̍h chhoe it ji̍t chiū lio̍k-sio̍k teh khai-sí nāu-jia̍t lah. Lâi hia chham-ka khoàⁿ nāu-jia̍t ê lâng, chiàu kè-khì kì-lio̍k, choè-to bat chhiau-kè 50 bān lâng ê choē, koh tī hit kuí ji̍t tiong, só͘ khai ê chîⁿ, chhiau-kè chi̍t-chheng bān kho͘ í-siōng ê sin Tâi-pè, chit ê sò͘-jī put-chí khó-koan.
Tī thoân-soat tiong kóng, chá-sî beh khì khó-kàu ê lâng lóng it-tēng oē khì Sêng-hông-biō sio hiuⁿ kiû kim-pńg toê-miâ, sīm-chì tī kin-á-ji̍t iáu ū ka-tiúⁿ tī gín-ná teh-beh seng-ha̍k khó-chhì ê sî, iā oē chhoā gín-ná khì sio-hiuⁿ kî-goān（祈願）.
Taⁿ chit ê Sêng-hôngiā kóng sī bêng-kài（冥界）, á-sī kóng iu-kài（幽界）ê koaⁿ-oân, chóng-sī iā ū kap iông-kan ê toē-hng-koaⁿ chi̍t-iūⁿ ê pâi-siat, chhin-chhiūⁿ kóng ū 18 si（十八司）, ū Sì-iâ（四爺）, Jī chiong-kun（二將軍）kap 36 ê pō͘-chiòng, í-goā iáu ū chin-choē pō͘-sio̍k hun-piat teh tam-jīm koán-khu ê lāi si-hoat（司法）, kap kéng-chhat（警察）hong-bīn ê sū-bū.
Só͘ teh kóng ê cha̍p-poeh si （十八司）, chiū-sī Hêng-bûn-si（衡文司）, Hù-sūn-si（富順司）, Lio̍k-siān-si（錄善司）, Tan-ok-si（癉惡司）, Kài-siū-si（介壽司）, Châi-pe̍k-si（財帛司）, Khó-kong-si（考功司）, Ui-tìn-si（威鎮司）, Chú-sun-si（子孫司）, Sok-pò-si（速報司）, Bēng-lo̍k-si（命祿司）, Chiáng-gî-si（掌儀司）, Chhái-hóng-si（採訪司）, Soan-hoat-si（宣發司）, Chàn-chèng-si（贊政司）, Tô͘-che̍k-si（圖籍司）, Hok-lo̍k-si（福祿司）, Khé-ta̍t-si（啟達司）téng, kiōng 18 si . Chóng-sī iā ū pí-kàu-tek khah soè ê Sêng-hông-biō chí-ū siat 6 ê si, chiū-sī: Im-iông-si（陰陽司）, Sok-pò-si（速報司）, Hoa̍t-ok-si（罰惡司）, iân-siū-si（延壽司）, Cheng-lo̍k-si（增祿司）, Chiong-siān-si（獎善司）téng, í-goā iā ū só͘-chāi siat 12 si, iā ū só͘-chāi siat 16 si, kî-tiong Tâi-pak ê Hâ-hái Sêng-hông-biō sī siat 18 si ê （Thāi-sio̍k）.
漢羅（Ùi原文改寫）
台灣民間宗教ê傳說（7）
擬人化 ê偶像崇拜。
當我teh研究「台灣民間宗教」ê時，hō͘我發見著這個擬人化（擬人化）ê偶像思想，tī民間偶像崇拜ê中間，常常照人家己ê生活方式做偶像崇拜ê 標準，親像講”Pu̍t siⁿ-i̍t” lah， 抑是親像「東嶽廟」（東獄廟）ê 嶽帝爺 kap 城隍廟（城隍廟）ê 城隍爺等。照傳說，in是teh執掌陰間（冥司）ê事，總是in廟中ê排設kap 內容ê組織， 正kap 陽間 ê衙門相像，也有判官，也有司屬（司屬）等，花色真濟。
郭聖王 chhoā某。
咱tī以前bat講到”大道公 kap媽祖婆 ê戀愛史，」以及「上帝公 (是指玄天上帝 玄天上帝) kā 保安大帝借寶劍」等，攏是”擬人化”ê故事。Taⁿ 這時來講神明chhoā 某 ê 擬人化故事。
廣澤尊王（廣澤尊王），也稱做郭聖王（郭聖王），抑是保安尊王（保安尊王），伊ê本姓姓郭（郭），名做洪福（洪福），是泉州府南安縣（泉州府南安縣） ê人所teh敬拜ê偶像，因為台灣ê 住民大部分是對泉州來ê。所以tī台灣裡也有真濟郭聖王 ê廟。
照傳說講：當伊成佛做神明以後，bat看見安溪司公（安溪司公，是神明中ê一個）ê 查某囝， m̄-kú安溪司公ê 查某囝已經做人了lah， 郭聖王就當等這個查某囡仔beh結婚hit日，用法術將hit 頂坐新娘ê花轎搶來伊ê廟，強迫伊成親， 對án-ni引起安溪司公kap 郭聖王 ê一場ê大鬥法。照傳說中講：安溪司公ê 法力也不止大，總是到結局郭聖王得勝，因為án-ni， 服祀郭聖王ê廟裡tio̍h ke 刻一身郭聖王夫人ê偶像，尚且koh講這身郭聖王夫人常常tī 天界裡生囝。所以郭聖王廟中若聽見有嬰仔teh哭ê 聲， 郭聖王廟前ê土地就phòng起來，人就將hiah ê土落去裝一身郭聖王ê 囝 ê偶像，就kā 伊叫做第一太保，後來koh每年ke一身，照這個方式，攏總有ke 4 身， koh稱做第一太保， 第二太保，第三太保，第四太保等。 這款戀愛kiù婚， kap chhoā某生囝， 完全無出人現實生活ê範圍。
天公出告示。
Koh有一個擬人化ê故事，就是tī 民國13年（民國十三年）出版ê台灣風俗誌裡， 有出著台南天公廟ê 天公所發出ê一張佈告（佈告），我將伊ê 內容寫一部分tī下面hō͘大家做參考。「敕封靈公，駐鎮全臺，白龍庵瘟部主宰，糾察爵閣部堂張，為出示曉諭事，照得本爵閣部堂恭奉簡命，駐鎮臺疆，分別善惡，年例代天巡狩，設醮造舟，驅瘟逐疫出海，以保闔郡黎民安泰。時屆夏令，應行舉辦事宜，茲擇于……」以下是命令「採造龍舟」kap「開堂視事」ê日期，若將這張佈告（佈告）中有關係陰陽（陰陽）ê字眼若kā 伊改動一下，就thang變成千代福建總督，抑是台灣巡武ê 佈告文（佈告文）。Tú-tú照清朝時代ê 公文方式，cháiⁿ-iūn連神明也teh用清朝官場ê 公文方式發出佈告文?實在擬人化到有徹底。
Koh tī中華全國風俗誌（中華全國風俗誌）裡有講：當時迎鬧熱ê時各廟寺ê神明ê 轎出來tī-teh出巡 ê時，萬一若tī 街頭路尾相遇 ê時，tio̍h 按照hit個神明ê 官階（官階）行參謁（參謁）kap 避道（避道）ê禮數，這款ê禮數kok有規定，完全kap 清朝時代ê官員tī路中相遇 ê禮數相像，攏無一點仔差錯，實在真心適。
神明 ê 官場組織。
以下koh再來講一個有官場派頭擬人化ê例。Tī本省ê中間攏總有30 goā 間 ê 城隍廟（城隍廟），其中最第一大間 ê， thang講是台北市大稻埕ê霞海城隍廟（霞海城隍廟）。霞海城隍廟ê 祭典是tī每年舊曆 ê 5月13日，總是對 5月初一日就陸續teh開始鬧熱lah。來hia參加看鬧熱ê人，照過去記錄，最多 bat超過50 萬人ê濟，koh tī hit幾日中，所開ê錢，超過一千萬箍以上ê 新台幣， 這個數字不止可觀。
Tī傳說中講：早時beh去khó-kàu ê人攏一定會去城隍廟燒香求金榜題名，甚至tī 今仔日iáu有家長 tī 囝仔 teh-beh 升學考試 ê時，也會chhoā 囝仔去燒香祈願（祈願）。
Taⁿ 這個城隍爺講是冥界（冥界），抑是講幽界（幽界）ê官員，總是也有kap 陽間 ê地方官一樣ê排設，親像講有18 司（十八司），有四爺（四爺），二將軍（二將軍）kap 36 ê 部眾，以外iáu有真濟部屬分別teh擔任管區 ê內司法（司法），kap警察（警察）方面ê事務。
所teh講ê十八司（十八司），就是衡文司（衡文司），富順司（富順司），錄善司（錄善司），癉惡司（癉惡司），介壽司（介壽司），財帛司（財帛司），考功司（考功司），威鎮司（威鎮司），子孫司（子孫司），速報司（速報司），命祿司（命祿司），掌儀司（掌儀司），採訪司（採訪司），宣發司（宣發司），贊政司（贊政司），圖籍司（圖籍司），福祿司（福祿司），啟達司（啟達司）等，共18 司。總是也有比較-tek khah 細ê 城隍廟只有設 6 ê 司，就是: 陰陽司（陰陽司），速報司（速報司），罰惡司（罰惡司），延壽司（延壽司），增祿司（增祿司），獎善司（獎善司）等，以外也有所在設 12 司，也有所在設 16 司，其中台北ê 霞海城隍廟是設 18 司 ê （待續）。