醫事衛生

I-sū oē-seng

文獻資訊

項目	資料
作者	拾穗生
卷期	台灣教會公報
卷期	第975號
日期	1966/2
頁數	16

白話字（原文數位化）

I-sū oē-seng

拾穗生

1966.02.01 [Khioh Be̍h-suī]第7期，P. 16-17

Sèng-keh kap chia̍h-mi̍h

Chiàu choan-bûn-ka ê gián-kiù, chia̍h-mi̍h kap sèng-keh chin toā koan-hē, phì-jī ài chia̍h bah ê lâng, khah choē sī hó-táⁿ, ū chìn-chhú ê khì-khài, chia̍h chhài chia̍h tn̂g-chai ê lâng, I ê sèng-keh khah pó-siú-tek, sim-sîn khah tìn-chēng（沉靜）. ài kóng-oē (kāu-oē) ê lâng, sī I ê toā-náu（大腦）khiàm-kheh Vitamin B, ài lim khah choē gû-lin, bi̍t-chuí, sió-be̍h（胚芽米）.

Cheng-sîn bô an-tēng ê lâng, sī khiàm-ēng鈣質kap燐質ê chia̍h-mi̍h.

鈣質：Chiū-sī thô͘-tāu, tāu-á, poê-lêng-chhài, hê, ô-á, hî-chí, gû-lin.

燐質：Chiū-sī koe, koe-nn̄g, chîm, bé-lêng-chû, phû-tô, hēng-jîn, la̍t-chí.

I-nāi-sèng tāng ê lâng: Kan-ta oá-khò chia̍h-mi̍h bô kàu-gia̍h, ài kiam cheng-sîn ê siu-ióng, chia̍h-mi̍h ài pêng-kun, m̄-thang khéng chia̍h, koh ài tiāⁿ-tio̍h sî-kan, m̄-thang chia̍h tiám-sim.

Phín-sèng陰沉(im-tîm) beh hō͘ i pìⁿ choè 明朗, Ji̍t-pún-oē kóngアカルクテホガラカナコト. Cheerfulo tio̍h ài chia̍h khah choē 鈣質 kap 蛋白質ê chia̍h-mi̍h, chhin-chhiūⁿ hî, chiaⁿ-bah, gû-linm, 乳酪, tāu-hū, tāu-hū, ô-á.

Pháiⁿ sèng-tē khoài siū-khì ê lâng sī khiàm Vitamin K. B. kap 炭酸鈣, ài chia̍h khah choē hái-sán-mi̍h, chhin-chhiūⁿ hî, hê, chîm, ham-á, ji̍t-ge̍h-than, hî-chí, hái-chhài, 多種維他命丸, chia̍h chhò-bí.

To-gî chit-tò ê lâng, tio̍h ài cheng-sîn siu-ióng kap chia̍h-mi̍h ê êng-ióng pèng-hêng.

Chia̍h-mi̍h ê hong-bīn, chia̍h khah choē Vitamin B kap nn̄g-pe̍h-chit. 澱粉 choē ê mi̍h khah mài chia̍h.

Bô ài kau-chè ê lâng, beh kái-piàn choè 明朗豪爽 ê sèng-keh, tio̍hchia̍h khah choē ū nn̄g-pe̍h-chit kap ū 鈣ê chia̍h-mi̍h, keng-choi, 菠蘿, āi-chi kap kî-û ê chuí-kó.

Hó͘-thâu niáu-chhú bé ê lâng: Thang kóng ū nn̄g ê goân-in. (1) Si khiàm Vitamin A kap B, ái chia̍h hî-piú, hoan-á-kiuⁿ, sún-koaⁿ, 紅蘿蔔kap chìⁿ ê mi̍h. (2) Bo̍h-tit chia̍h bah, oāⁿ chia̍h khah choē ké-chí.

漢羅（Ùi原文改寫）

醫事衛生

拾穗生

1966.02.01 [拾麥穗]第7期，P. 16-17

性格kap食物

照專門家ê研究，食物kap性格真大關係， 譬喻 愛食肉ê人， khah 濟是好膽，有進取ê氣慨，食菜食長齋ê人，伊ê性格khah保守-tek，心神khah鎮靜（沉靜）。 愛講話(厚話) ê人，是伊ê大腦（大腦）欠缺Vitamin B， ài lim khah 濟牛奶，蜜水，小麥（胚芽米）。

精神無安定ê人，是欠用鈣質kap燐質ê食物。

鈣質：就是土豆，豆仔， poê-lêng-菜， 蝦， 芋仔，魚子，牛奶。

燐質：就是雞， 雞蛋， 蟳， 馬鈴薯，葡萄，杏仁，栗子。

依賴性重ê人: Kan-ta 倚靠食物無夠額， ài 兼精神ê修養，食物ài平均， m̄-thang揀食， koh ài定tio̍h時間， m̄-thang食點心。

品行陰沉(陰沉) beh hō͘伊變明朗，日本話講アカルクテホガラカナコトCheerfulo tio̍h ài食khah 濟 鈣質 kap 蛋白質ê食物，親像魚， 精肉，牛奶， 乳酪， 豆腐， 芋仔。

歹性地快受氣ê人是欠Vitamin K. B. Kap 炭酸鈣， ài食khah 濟海產物，親像魚， 蝦， 蟳， 蛤仔，日月蟶，魚子，海菜， 多種維他命丸，食糙米。

多疑 忌妒 ê人， tio̍h ài精神修養kap食物ê 營養 並行。

食物ê方面，食khah 濟 Vitamin B kap蛋白質。 澱粉 濟 ê物khah mài食。

無愛 交際 ê人， beh 改變做明朗豪爽 ê性格， tio̍h 食 khah 濟有蛋白質 kap有鈣ê食物， 芎蕉， 菠蘿， 荔枝 kap其餘ê水果。

虎頭老鼠尾 ê人: Thang講有兩個原因。 (1)是欠Vitamin A kap B， ài食魚脯， 番仔薑， 筍乾， 紅蘿蔔kap炸ê物。 (2)莫得食肉，換食khah 濟果子。