西羅亞ê 池
SE-LÔ-A Ê TÎ
文獻資訊
| 項目 | 資料 |
|---|---|
| 作者 | 編輯部 Phian-chip-pō͘͘ |
| 卷期 | 台灣教會公報 |
| 卷期 | 第971號 |
| 日期 | 1965/12 |
| 頁數 | 12 |
白話字（原文數位化）
SE-LÔ-A Ê TÎ
Phian-chhip-sek
1965.12.01 P.12-15、18
Jîn-bu̍t：
Chhiⁿ-mî lâng.
Kè-lō͘ lâng A, B, C, C, E.
Hoat-lī-sài lâng 1, 2, 3.
Chhiⁿ-mî lâng ê lāu-pē.
Chhiⁿ-mî lâng ê lāu-bú.
Kî-thaⁿ kûn-chiòng.
Sî-kan
Iâ-so͘ chāi sè tiong.
Só͘-chāi：
Iâ-lō͘-sat-léng siâⁿ-goā, Selô-a ê tî piⁿ.
Keh chi̍t tiâu nāu-jia̍t ê lō͘ ê hit pêng, ū chin chheng ê Se-lô-a tî. Tī tî piⁿ ū hoat chi̍t jiah chi̍t jiah ê lô͘-uí. Tuì chia khoàⁿ kè-khì ū Iâ-lō͘-sat-léng ê sèng-tiān, hit ê pe̍h-sek chiò tio̍h thài-iông oē hoán-siā. Sī chēng-chēng chhun-thiⁿ ê chá-khí-sî.
Bō͘ khui
Chhiⁿ-mî lâng koáiⁿ-á tok-leh tok-leh, tuì chiàⁿ-pêng teng-tiûⁿ.
Chhiⁿ： O͘h! Kàu lah, kàu lah, ū phīⁿ-tio̍h chin chēng ê chuí jiàn, (koáiⁿ-á tuh-leh kiâⁿ 2, 3 pō͘) soè-jī leh, m̄-thang chhū-tó.
Chhiⁿ-mî lâng ēng koáiⁿ-á ûn-á tuh-leh tuh-leh kiâⁿ-oá tî piⁿ. Kè-lō͘ lâng tuì tò-pêng koáⁿ-kín khí-lâi.
Kè-lō͘ A： Lia̍h-chún sī siáⁿ lâng leh, tō sī pêng-sî tī sèng-tiān ê mn̂g-kháu teh kiû siá-sì ê khit-chia̍h. Tiàm chit ê tî piⁿ sô-lâi sô-khì, nā poa̍h lo̍h-khì leh.
Chhiⁿ： To-siā, chin tuì put-chū, chhiáⁿ chhoā goá khah oá chuí-piⁿ leh, hó m̄?
Kè-lō͘ B： Sī beh chhòng sím-mi̍h? Ba̍k-chiu chi̍t-ē bô khoàⁿ-kìⁿ, m̄-káⁿ teh siūⁿ beh chū-sat leh?
Chhiⁿ： Chū-sat… si̍t-chāi iā bat siūⁿ beh sí, chhin-chhiūⁿ chiah-nih bô chū-iû, put-jû sí-sí leh… iā bat kuí-nā pái án-ni siūⁿ. Chóng-sī……
Kè-lō͘ C： iā taⁿ koat-tēng beh sí no͘h, iā soà siūⁿ beh kiò goán kā lí an-pâi siān-āu nih.
Chhiⁿ： M̄-sī, m̄-sī, kin-áji̍t ê goá sī moá ū ǹg-bāng ê, chhiáⁿ lín khoàⁿ goá ê ba̍k-chiu leh.
Kè-lō͘ A： (Kap B, C, saⁿ khoàⁿ, chhiò chhiò kóng) án-choáⁿ, goán khoàⁿ leh.
Kè-lō͘ C： Hǹg, he ba̍k-chiu m̄-chai kô͘ sím-mi̍h mi̍h?
Kè-lō͘ A： Ho͘N3, lō͘-kô͘-bê lah.
Chhiⁿ： Che sī Ná-sat-le̍k ê Iâ-so͘ kā goá kô͘ ê. iā Iâ-so͘ kiò goá lâi Se-lô-a tî soé, só͘-í koáⁿ-kín ài soé-soé leh. Chhián khah kín chhoā goá oá-khì chuí-piⁿ leh, pài-thok.
Kè-lō͘ A： Hǹg, hō͘ Iâ-so͘ kā lí kô͘ ê ò͘. M̄-kú Iâ-so͘ kiám oē i-tī chhut-sì chiū bô khoàⁿ-kìⁿ ê chhiⁿ-mî lâng leh, ún-tàng sī teh an káu-sim no͘h!
Kè-lō͘ C： Sī lah, ún-tàng sī án-ni lah. Iâ-so͘ sī siūn kóng lí che bô hoat-tō͘ thang khoàⁿ-kìⁿ, só͘-í o͘-pe̍h kā lí kóng. Chin-chiàⁿ bô hoat-tō͘.
Chhiⁿ： Chhiáⁿ lín m̄-thang án-ni kóng, goá chai Iâ-so͘ m̄-sī hit khoán pián-sian-á, chū-kàu-taⁿ I só͘ choè ê sū lóng bô ū hit khoán bô iáⁿ chiah ê.
Kè-lō͘ C： oà--ah, lí ê ba̍k-chiu nā oē khui, goá kam-goān tò-thâu-chai peh sèng-tiān ê gîm-á hō͘ lí khoàⁿ.
Kè-lō͘ B： Bô tāi bô chì pìⁿ chit khoán pá-hì, lí nā bô jîn-khì, choè khit-chiah chiū m̄-bián siūⁿ beh pun ū.
Chhiⁿ： (Seng-khu chhoah chi̍t-ē). Bô iàu-kín, goá bô boē kì-tit Iâ-so͘ só͘ kóng ê oē (kha chhip-leh chhip-leh, soà àⁿ lo̍h-khì ēng 4 kha chhip oá khì chuí-piⁿ).
Kè-lō͘ A： Hà! soà teh khí khong.
Kè-lō͘ B： Sí sîn teh chhē i.
Kè-lō͘ C： Ah! ah! oē chhū lo̍h khì chuí lāi. Chhiⁿ-mî lâng hò͘ chuí soé ba̍k-chiu.
Kè-lō͘ B： Chin chhut-la̍t teh soé.
Kè-lō͘ C： Hà, bô hoat-tō͘. Chhiⁿ-mî lâng hiông-hiông peh khí-lâi, chhut hoaⁿ-hí ê siaⁿ.
Chhiⁿ： Ah! ū khoàⁿ-kìⁿ, ū khoàⁿ-kìⁿ, ba̍k-chiu ū khoàⁿ-kìⁿ (peh khí-lâi thiàu, cháu kàu tī tiong-ng, kha thí-khui, chhiú kia̍h koân, khoàⁿ thiⁿ, kî-û ê lâng lóng goân-ngia̍h). Hò͘! chiah-nih suí, he chiū-sī thiⁿ ò͘ (kí chêng-āu, chó͘-iū) he chiū-sī chháu-po͘ ò͘! Hiah-nih suí ê sek, hit ê koâiⁿ-koâiⁿ ê só͘-chāi chiū-sī soaⁿ! Ū khoàⁿ-kìⁿ, ū khoàⁿ-kìⁿ, (hiông-hiông hoat-kiàn ka-kī, khoàⁿ ka-kī ê chhiú), che sī sím-mi̍h! o͘h, sī chhiú (mn̄g kè-lō͘ lâng), sī m̄? Che sī chńg-thâu-á, 1, 2, 3, 4……ū 10 ki( kha kia̍h koâiⁿ) che sī kha, án-ni chi̍t-pō͘ chi̍t pō͘ thang kiâⁿ (chhiu hìⁿ-leh, hìⁿ-leh kiâⁿ-lâi kiâⁿ-khì).
※※
Hoat-lī-sài 3 lâng tuì chiàⁿ-pêng khí-lâi, khiā teh khoàⁿ hit ê chhiⁿ-mî lâng.
Hoat 1： (Hiông-hiông kiâⁿ oá-khì, tuì chhiú lia̍h--teh). Tiām-tiām, lí sī siáⁿ-lâng. Kin-á-ji̍t sī an-hioh-ji̍t, toà chit lō͘-nih tiô-lâi tiô-khì, chin bô kín-sīn.
Chhiⁿ： (Hō͘ lâng hoah chi̍t-ē, soà pháiⁿ-sè pháiⁿ-sè, chóng-sī chin hoan-hí). Sian-siⁿ, goá in-uī chin hoaⁿ-hí, hoaⁿ-hí kàu boē kò͘-tit.
Hoat 2： Sī teh hoan-hí sím-mi̍h, tī an-hioh-ji̍t án-ni choè sī hoān lu̍t-hoat ê.
Hoat 3： oē hông-hāi kau-thong.
Chhiⁿ： Goá m̄-sī teh tiô-thiàu, sī ba̍k-chiu tit khoàⁿ-kìⁿ teh hoaⁿ-hí.
Hoat 2： O͘-pe̍h kóng, thiⁿ-kng ba̍k-chiu chiū khoàⁿ-kìⁿ sī eng-kai ê, hoān lu̍t-hoat chiū sī hoān-choē, beh kò tī gī-hoē ô͘.
Chhiⁿ： Goá kàu thâu-tú-á sī chhiⁿ-mî lâng, iā hiān-kim tit-tio̍h khoàⁿ-kìⁿ.
Hoat 2： Sím-mi̍h, kóng hit hō bô ê (tuì chèng-lâng) lín tāi-ke, chit ê kiám chin-chiàⁿ ū chhiⁿ-mî?
Kè-lō͘ A： (Ta̍h chi̍t pō͘ chìn-chêng). Sī, kàu tú-á i si̍t-chāi sī chhiⁿ-mî.
Kè-lō͘ B： Cha-hng iáu chē tī sèng-tiān ê mn̂g teh kiû-khit.
Hoat 3： Nā kóng án-ni, ná chhin-chhiūⁿ bat khoàⁿ-kìⁿ. (Tuì chhiⁿ-mî lâng) iā sī thài oē liâm-piⁿ pìⁿ ū khoàⁿ-kìⁿ?
Hoat 1： Siông-sè kóng khoàⁿ-māi.
Chhiⁿ： Ū chi̍t ê kiò Iâ-so͘ ê, I chiong thô͘-bê kô͘ tī goá ê ba̍k-chiu, kiò goá lâi Se-lô-a ê tî khì soé, só͘-í goá chiū án-ni choè, iā chiū tit-tio̍h khoàⁿ-kìⁿ.
Hoat-lī-sài lâng tāi-ke saⁿ khoàⁿ, tiām-tiām. Chhiⁿ-mî lâng m̄-kam m̄-kam khioh koáiⁿ-á khí-lâi, siūⁿ beh thè tiûⁿ.
Hoat 1： Bān-chiah-sī, hit ê Iâ-so͘ tī tó-uī?
Chhiⁿ： Goá m̄-chai.
Hoat 2： Nā bô láu-sit kóng, sī tuì lí put-lī ô͘.
Hoat 3： Lí sī kap Iâ-so͘ kiat-tóng teh phiàn lâng m̄!
Chhiⁿ： I sī toā sian-ti, sian-ti lâng thái oē phiàn lâng.
Hoat 2： Hǹg, lí ū tuì Iâ-so͘ tit-tio̍h chîⁿ ho͘N3?
Chhiⁿ： Tit-tio̍h pí kim-chîⁿ khah hó ê.
Hoat 2： Tit-tio̍h sím-mi̍h?
Chhiⁿ： Siáⁿ-sū goá chhin-chhiūⁿ choē-jîn teh siū sím-mn̄g? Pí kim-chîⁿ khah hó ê chiū-sī khui goá ê ba̍k-chiu.
Hoat 3： Hit ê Iâ-so͘ sī bô siú lū-hoat ê, hit khoán lâng m̄-sī sian-ti.
Chhiⁿ： Iâ-so͘ kiám án-ni. Kiám-chhái án-ni kóng sī sit-lé, goá khoàⁿ lín sī chin chū-ko ê Iâ-so͘ tek-khak m̄-sī hit khoán lâng. I chin jîn-chû, chhin-chhiūⁿ goá chit khoán khit-chia̍h, lâng I iā ēng chhiú kiáu thô͘ kā goá kô͘.
Hoat 2： Lí sī tuì goán Hoat-lī-sài tóng beh hoán-khòng m̄?
Chhiⁿ： M̄-sī, m̄-sī, sī chiàu só͘ siūⁿ án-ni kóng nā-tiāⁿ.
Tuì chiàⁿ-pêng í-keng ū hè ê chhiⁿ-mî lâng ê pē-bú saⁿ khan chhiú chhut-lâi, lóng sī chhēng bái-bái.
Pē： O͘h! lí thái oē tī chia.
Bú： Cha-mî lí sī khì tó-uī? iā bô tńg-lâi chhù-nih, lín pa-pa kap goá thong mî bô khùn hoân-ló lí.
Chhiⁿ： Ah, pa-pa, ma-ma, chhiáⁿ lín hoaⁿ-hí, goá ê ba̍k-chiu í-keng khoàⁿ-kìⁿ lah, chhut-sì kàu taⁿ thâu chi̍t pái khoàⁿ-tio̍h lín ê bīn. Bô ū pí chit ê khah hoaⁿ-hí ê.
Pē： Sím-mi̍h, (khoàⁿ chhiⁿ-mî lâng ê bīn). O͘h! lí ê ba̍k-chiu tit-tio̍h khui, che chin kî-biāu!
Bú： (Phō chhiⁿ-mî lâng) ba̍k-chiu tit-tio̍h khui (háu).
Hoat 1： (Tuì pē-bú) oé, oé, lín ài kín-sīn, kin-á-ji̍t sī an-hio̍h-ji̍t. chit ê si̍t-chāi sī lín ê kiáⁿ mah, kiám chhut-sì chiū chhiⁿ-mî mah?
Chhiⁿ-mî lâng ê pē-bú khoàⁿ-kìⁿ sī Hoat-lī-sài lâng, chiū koáⁿ-kín tuì in kiâⁿ lé.
Pē： Sī, sī, sī goán ê kiáⁿ.
Bú： Chin khó-lîn, tuì chhut-sì chiū chhiⁿ-mî.
Hoat 3： Kiám m̄-sī ké-choè chhiⁿ-mî--ê.
Chhiⁿ： iáu teh gî-ngái mah.
Pē： Aih (tuì i ê kiáⁿ) che, m̄-chai sím-mi̍h goân-in, tuì chhut-sì chiū siang ba̍k lóng bô khui. iā hiān-chāi tit-tio̍h khoàⁿ-kìⁿ, che lóng sī Siōng-tè ê un-huī.
Bú： (Tuì Hoat-lī-sài lâng tàm-thâu) che lóng sī tuì lín ê kî-tó só͘ tì-ìm ê.
Chhiⁿ： Ma-ma, m̄-sī lah, in kap goá lóng bô sím-mi̍h kan-sia̍p. si̍t-chāi sī cha hng tuì goá che sin-miā kám-kak iàm-sè, chiū cha-mî tī Se-lô-a tî piⁿ sô-lâi sô-lâi, kàu thiⁿ-kng hit sî-chūn, goá tiaⁿ-kìⁿ 10 goā lâng ê kha-po͘-siaⁿ tī teh lâi, iā tuì in só͘ teh kóng ê oē chai-iáⁿ sī Iâ-so͘ kap I ê ha̍kseng. In-uī goá tī sèng-tiān teh kiû-khit bat thiaⁿ-kìⁿ Iâ-so͘ ê oē. Hit tiong-kan ha̍k-seng ê chi̍t ê tuì Iâ-so͘ kóng, “Sian-siⁿ, chit ê chhiⁿ-mî lâng, sī tuì chī-chuī hoān-choē só͘ tì, á-sī sī tuì i ê pē-bú só͘ hoān ê choē?” Hit ê ha̍k-seng só͘ kóng ê “chit ê” chiū-sī goá.
Pē： iā Iâ-so͘ án-choáⁿ kā i ìn?
Chhiⁿ： Iâ-so͘ án-ni kā i kóng, “iā m̄-sī chit lâng, i ê pē-bú iā bô. To̍k-to̍k sī Siōng-tè ê êng-kng beh tuì chit chit lâng lâi hián-bêng.” I chiū chiong thô͘-bê kô͘ tī goá ê ba̍k-chiu, kiò goá khì Se-lô-a ê tî soé. Thiaⁿ-tio̍h Iâ-so͘ chiah ê oē, tuì goá ê sim-té chiū ū chi̍t khoán ê la̍t chhèng chhut-lâi.
Bú： Tuì án-ni lí chiū chiàu Iâ-so͘ ê oē khì choè ho͘N3.
Chhiⁿ; Sī, án-ni ba̍k-chiu chiū tit-tio̍h khui. Pa-pa, ma-ma, goá sī hō͘ Iâ-so͘ kā goá khui ba̍k-chiu ê.
Hoat 3： Hit ê Iâ-so͘ sī choē-jîn.
Chhiⁿ： Sī choē-jîn á m̄-sī, goá m̄-chai, goá chí-ū chai I sī sòng-hiong ê, ai-siong ê, phoà-pīⁿ ê, chhiⁿ-mî ê, pái-kha ê ê pêng-iú. Khui goá ê ba̍k-chiu sī chin hó ê chèng-kù.
Hoat 1： Kóng sím-mi̍h, lí siūⁿ beh kà-sī goán Hoat-lī-sài lâng mah?
Chhiⁿ： Kà-sī lâng ê sī lín, goá sī chiong si̍t-chāi ê sū……
Hoat 1： (Chhin-chhiūⁿ teh háⁿ ê khoán) teh kóng sím-mi̍h oē!
Pē： Lí khah kín kā in seh to-siā, thang tńg-lâi-khì.
Chhiⁿ： Thái tō kā in seh to-siā. Tńg-lâi-khì.
Hoat 3： Bān-chiah-sī, ài koh mn̄g lí chi̍t hāng sū. Iâ-so͘ sī ēng án-choáⁿ khui lí ê ba̍k-chiu?
Chhiⁿ： Í-keng kā lín kóng kuí-nā pái lah. Mn̄g kàu hiah siông-sè, lín iā sī siūⁿ beh choè Iâ-so͘ ê ha̍k-seng nih.
Hoat 3： Kóng sím-mi̍h, khah sit-lé. Chhin-chhiūⁿ lí chit khoán ê chiah sī hit ê chháu-tē ba̍k-chhiūⁿ ê ha̍k-seng. Goán sī Mô͘-se ê ha̍k-seng. Mô͘-se sī ti̍t-chiap tuì Siōng-tè thiaⁿ-tio̍h bēng-lēng ê.
Chhiⁿ： Iâ-so͘ khak-si̍t sī pí lín, iā pí Mô͘-se koh-khah gâu. Tī Sèng-keng iā bô kì Mô͘-se bat i-hó chhut-sì chiū chhiⁿ-mî ê. Chhin-chhiūⁿ chit khoán sîn-jiah, chū ū sè-kan í-lâi bē bat thiaⁿ-tio̍h. Nā Iâ-so͘ m̄-sī Siōng-tè ê Kiáⁿ, iā boē thang khui chhiⁿ-mî lâng ê ba̍k-chiu.
Hoat 1： (Tuì kî-thaⁿ ê Hoat-lī-sài lâng) chhap chit hō siáu-lâng, teh-beh boē hù lé-pài lah, lán lâi-khì.
Hoat 2： Sī, sī, chiân chin kú lah, lâi-khì (tuì chhiⁿ-mî lâng) oé, siáu--ê.
Chhiⁿ： Goá m̄-sī siáu--ê.
Hoat 2： Tuì goán khoàⁿ, lí m̄-sī chèng-keng ê.
Chhiⁿ： Nā goá khoàⁿ lín, iā m̄-sī chèng-keng ê, koh lín sī chhàu-hī kiam chhiⁿ-mî ê.
Hoat 3： Kóng sím-mi̍h bô lé ê oē.
Chhiⁿ： Kiám m̄-sī án-ni. Khah kóng to thiaⁿ bô ê hī, khoàⁿ iā khoàⁿ bô ê ba̍k-chiu……
Hoat-lī-sài lâng 3, khì, khí-lâi cháu-oá tuì chhiⁿ-mî lâng ê chhiú lia̍h--teh.
Hoat 3： Hǹg, chit khoán káu-koài, pòng-to̍k Siōng-tè ê êng-kng kap lu̍t-hoat ê choē, goán beh kò lí tī kong-hoē. Lâi! (tuì kî-û ê Hoat-lī-sài) goá beh thoa i lâi-khì kong-hoē, chhiáⁿ lín seng-khì.
Chhiⁿ： Goá sī án-choáⁿ (siū lia̍h ê chhiú kún khui).
Hoat 1： In-uī lí hoān-choē, só͘-í goán beh kò lí tī kong-hoē. Koh bô kú, lí chiū beh tī siâⁿ-goā hō͘ lâng ēng chio̍h-thâu tìm-sí. Tiāⁿ-tiāⁿ.
Hoat 3： (Koh-chài thoa chhiⁿ-mî lâng ê chhiú). Lâi!
Chhiⁿ： (Ná kiâⁿ, ǹg Hoat-lī-sài lâng). lín kiám ū koân thang sím-phoàⁿ lâng ê sī Siōng-tè. Hō͘ Siōng-tè bô tit-tio̍h êng-kng ê kiám m̄-sī lín? Lín chiū-sī ké-hó ê lâng.
Hoat 1： Nā kù-chāi lí kóng, soà it-ti̍t kóng bô lé ê oē.
Hoat 2： Nā ū put-pêng chiah lâi kong-hoē kóng.
Hoat-lī-sài lâng 3, chiong oá-lâi ê pē-bú tùn cháu, chhoā chhiⁿ-mî lâng tuì tò-pêng lo̍h-khì.
Hoat 1： (Tuì Hoat-lī-sài 2). Si̍t-chāi chin khó-o͘N3.
Hoat 2： Koh chi̍t ê khah khó-o͘N3 ê sī siàn-tōng chiah ê gû-bîn ê chháu-tè ba̍k-chhiūⁿ ê Iâ-so͘.
Hoat 1： Sī, hit ê nā bô khah kín kā tû-tiāu, (khoàⁿ hiah ê tī hia teh tiû-tû ê pē-bú) lín chiah ê lāu-lâng, ka-kī ê kiáⁿ tio̍h kam-tok hō͘ hó.
Pē-bú： Sī, sī, hó.
Hoat-lī-sài lâng kiâⁿ khì chiàⁿ-pêng, kûn-chiòng pun-khui tī chó-iū.
Hoat 2： Lín tāi-ke, kiáu-jiáu lín ho͘N3.
Kè-lō͘ A： Boē ò͘, boē ò͘.
Hoat 1： Lín tāi-ke iā sī beh khì sèng-tiān ho͘N3?
Kè-lō͘ lâng： Sī-sī.
Hoat 2： (Tuì Hoat 1). Taⁿ lán lâi-khì.
Hoat-lī-sài lâng, kè-lō͘ lâng, pē-bú siám tī chiàⁿ-pêng, chiū tuì tò-pêng Hoat-lī-sài 3, cháu kàu hiông-kài-kài chhut-lâi khiā tī tiong-ng.
Hoat 3： Sió-kiáⁿ leh, cháu tó-khì, sió-khoá bô teh chù-ì, hit ê ké chhiⁿ-mî ê soà cháu-khì, chin kàu-koài.
Tuì chiàⁿ-pêng kè-lō͘ lâng D, E, kiâⁿ kàu.
Hoat 3： oé, oé, chhiáⁿ mn̄g leh.
Kè-lō͘ D： Hâⁿ!
Hoat 3： Lín ū khoàⁿ-tio̍h chi̍t ê khit-chia̍h lâng bô?
Kè-lō͘ E： Khit-chia̍h khoán ê lâng, hàⁿ! tú-á tī hia (kí-kiâⁿ-lâi ê só͘-chāi) kap 4, 5 ê lâng sio siám-sin, put-káⁿ tī hit tiong-kan.
Hoat 3： Hǹg, ún-tàng sī (tuì chiàⁿ-pêng lo̍h-khì).
Kè-lō͘ D： (Khoàⁿ hit ê lo̍h-khì ê āu-iáⁿ). Chit chūn ê Iû-thài lâng lóng mā sī m̄-chiâⁿ lâng.
Kè-lō͘ E： Tû-khí chè-si kap Hoat-lī-sài lâng, kap thiu-hiòng ê í-goā lóng mā án-ni.
Kè-lō͘ D, E： Hà, hà (ná chhiò, tuì tò-pêng lo̍h-khì).
Tuì tò-pêng chhiⁿ-mî lâng ûn-á chhut-lâi, khiā tī Se-lô-a ê tî piⁿ.
Chhiⁿ： (Chēng-chēng teh khoàⁿ chuí-bīn). Chhut-sì kàu taⁿ thâu chi̍t pái khoàⁿ-tio̍h ê sè-kài, si̍t-chāi sī sióng-siōng í-siōng ê suí. Chóng-sī só͘ khoàⁿ-tio̍h lâng ê bīn, thái hiah-nih pháiⁿ khoàⁿ. (Thêng chi̍t-ē). Ah! goá iá-bē tuì Iâ-so͘ seh to-siā, lâi-khì chhē Iâ-so͘, tuì I kóng goá ū chiàu I só͘ kóng ê khì choè, chiū ba̍k-chiu kó-jiân tit-tio̍h khoàⁿ-kìⁿ. Chhut-sì í-lâi thâu chi̍t pái khoàⁿ-tio̍h thiⁿ toē chū-jiân ê suí. Goá hoaⁿ-hí kàu boē kò͘-tit. Chóng-sī khoàⁿ-tio̍h lâng ê hêng-chōng chiah pháiⁿ khoàⁿ soà sit-bāng. Hiah ê teh sáng-sè ê Hoat-lī-sài lâng á sī keng-ha̍k-sū, choè hō͘ Siōng-tè bô hoan-hí iā lia̍h choè bô iàu-kín (Put-ti put-kak tiong í-keng kuī teh beh kî-tó ê chu-sè). Chú Iâ-so͘, hiah ê lâng sī teh siūⁿ beh hāi Lí. Ch2 Iâ-so͘, chhiáⁿ tuì chit tia̍p hō͘ goá choè Lí ê lô͘-po̍k, thang pò bān hūn ê hi̍t hūn ê un. (Khiā khí-lâi). Sī, koáⁿ-kín lâi-khì kā I pài-thok. Goá tio̍h choè Iâ-so͘ ê lô͘-po̍k, thang tng-bīn kap Hoat-lī-sài lâng kau-chiàn.
Chhiⁿ-mî lâng kiâⁿ tuì chiàⁿ-pêng khì, tuì āu-bīn ū siaⁿ.
Siaⁿ： Chhiáⁿ tán-hāu leh.
Chhiⁿ： (oa̍t-thâu). Sī sím-mi̍h lâng.
Siaⁿ： Lí kiám beh sìn Siōng-tè ê Kiáⁿ.
Chhiⁿ： Hiah kî-koài, iā bô khoàⁿ-tio̍h lâng.
Chhiⁿ-mî lâng chú-ì khoàⁿ tò-pêng, ná chhin-chhiūⁿ khoàⁿ-tio̍h lâng kiâⁿ 2, 3 chìn-chêng.
Chhiⁿ： Lí sī chī-chuī?
Siaⁿ： Ná-sat-le̍k ê Iâ-so͘.
Chhiⁿ： (Kuī lo̍h-khì). O͘h! Chú Iâ-so͘.
Siaⁿ： Lí kiám ū sìn Goá sī Siōng-tè ê Kiáⁿ.
Chhiⁿ： Chú ah! goá sìn, Lí sī Siōng-tè ê Kiáⁿ, sī Chú Ki-tok.
Siaⁿ： Nā sìn, tio̍h pē si̍p-jī-kè lâi tè goá.
Chhiⁿ： Sī, bô-lūn sī kaⁿ-ga̍k, á-sī hêng-tiûⁿ……
Bú-tâi sió-khoá àm, ha̍p-chhiùⁿ ê siaⁿ hut-jiân khí, ha̍p-chhiùⁿ tiong bō͘ koaiⁿ.
漢羅（Ùi原文改寫）
西羅亞ê 池
編輯室
1965.12.01 P.12-15、18
人物：
青瞑人。
過路人A， B， C， D， E。
法利賽人1， 2， 3。
青瞑人ê老父。
青瞑人ê老母。
其他群眾。
時間
耶穌在世中。
所在：
耶路撒冷城外，西羅亞 ê 池邊。
隔一條鬧熱ê路ê hit 旁，有真清 ê西羅亞池。 Tī 池邊有發一jiah一jiah ê蘆葦。對 chia看過去有耶路撒冷ê聖殿，hit個白色照著太陽會反射。是靜靜春天ê早起時。
幕開
青瞑人柺á tok-leh tok-leh, 對 正旁 登場。
青： O͘h! 到 lah， 到 lah，有鼻著真靜 ê水 hiàn， (柺á tuh-leh行2, 3 步)細膩leh， m̄-thang chhū-倒。
青瞑人用柺á 勻-á tuh-leh tuh-leh行-oá tî邊。過路人對倒旁趕緊起來。
過路 A：掠準是啥人leh， tō是平時tī聖殿ê門口teh求施捨ê乞食。Tiàm 這個池邊sô-來sô-去，若跋落去leh。
青： 多謝，真對不住，請chhoā我khah oá水邊leh,好m̄？
過路 B：是beh chhòng甚麼？目睭一下無看見，m̄敢teh想beh 自殺 leh？
青： 自殺…實在也bat想beh死，親像chiah-nih無自由，不如死死leh.。也bat 幾-nā 擺 án-ni想總是…
過路 C：也taⁿ決定beh死no͘h，也soà 想 beh叫阮kā你安排善後nih。
青： m̄是，m̄是，今-á-日 ê我是滿有ǹg望ê，請恁看我ê目睭leh。
過路 A： (Kap B， C，相看，笑笑講) 按怎，阮看leh。
過路 C： Hǹg， he目睭m̄知糊甚麼物？
過路 A：好，路糊糜 lah。
青：這是拿撒勒ê耶穌kā我糊 ê。 也耶穌叫我來西羅亞池洗，所以趕緊ài 洗洗leh。淺khah 緊 chhoā我oá-去水邊leh，拜託。
過路 A： Hǹg， hō͘耶穌kā你糊 ê ò͘。 M̄-kú耶穌kiám會醫治出世就無看見ê 青瞑人leh，穩當是teh 安 狗心no͘h！
過路 C：是lah，穩當是án-ni lah。耶穌是想講你這無法度thang看見，所以烏白kā你講。真正無法度。
青：請恁 m̄-thang án-ni講：我知耶穌m̄是hit款pián-仙-á， 自到-taⁿ 伊所做ê事攏無有hit款無影 chiah-ê.
過路 C： oà--ah，你ê目睭若會開，我甘願倒頭栽peh聖殿êgîm-á hō͘你看。
過路 B：無代無誌變這款把戲，你若無人氣，做乞食就m̄免想beh分有。
青： (身軀chhoah一下)。無要緊，我無boē記得耶穌所講ê話(腳 chhip-leh chhip-leh，soà àⁿ落去用4 腳 chhip oá去水邊)。
過路 A： Hà！soà teh 起khong。
過路 B：死神teh chhē 伊。
過路 C： Ah！ Ah！ 會 chhū落去水內。青瞑人hò͘水洗目睭。
過路 B：真出力teh洗。
過路 C： Hà，無法度。青瞑人雄雄 peh起來，出歡喜ê 聲。
青： Ah！有看見，有看見，目睭有看見(peh起來跳，走到tī中央，腳thí開，手kia̍h koân， 看天，其餘ê人攏goân-ngia̍h)。Hò͘！ chiah-nih suí，he就是天 ò͘ (指前後，左右) he就是草埔ò͘！ Hiah-nih suí ê 色， hit個高高ê所在就是山！有看見，有看見，(雄雄發見家己，看家己ê手)，這是甚麼！o͘h，是手(問過路人)，是m̄？這是指頭á， 1， 2， 3， 4……
有10 隻 (腳 kia̍h高)這是腳， án-ni一步一步thang行(手 hìⁿ-leh, hìⁿ-leh行來行去)。
※※
法利賽3人對 正旁起來，khiā teh 看 hit個青瞑人。
法 1： (雄雄行oá-去，對手掠--teh)。恬恬，你是啥人。今-á-日是安歇日，toà 這路裡tiô-來tiô-去，真無謹慎。
青： (hō͘人hoah一下，soà 歹勢歹勢，總是真歡喜)。先生，我因為真歡喜，歡喜到 boē顧得。
法 2：是teh 歡喜甚麼，tī安歇日án-ni做是犯律法ê。
法 3： 會妨害交通。
青：我m̄是teh tiô跳，是目睭得看見teh歡喜。
法 2： 烏白講：天光目睭就看見是應該ê， 犯律法就是犯罪，beh告tī議會ô͘。
青：我到頭-tú-á是青瞑人，也現今得著看見。
法 2：甚麼，講hit號無ê (對眾人)恁大家，這個kiám真正有青瞑？
過路 A： (踏一步進前)。是，到 tú-á 伊實在是青瞑。
過路 B：昨昏iáu坐tī聖殿ê門teh求乞。
法 3： 若講án-ni， ná親像bat看見。(對 青瞑人)也是thài會連鞭變有看見？
法 1：詳細講看覓。
青：有一個叫耶穌ê，伊將土糜糊tī我ê目睭，叫我來西羅亞ê 池去洗，所以我就án-ni做，也就得著看見。
法利賽人大家相看，恬恬。青瞑人m̄-kam m̄-kam khioh柺á起來，想beh 退場。
法 1： 慢且是，hit個耶穌tī tó位？
青：我m̄知。
法 2： 若無老實講：是對你不利ô͘。
法 3：你是kap耶穌結黨teh 騙人m̄！
青： 伊是大先知，先知人thái 會 騙人。
法 2： Hǹg，你有對耶穌得著錢好？
青：得著比金錢khah好ê。
法 2：得著甚麼？
青：啥事我親像罪人teh受審問？比金錢khah好ê就是開我 ê目睭。
法 3： hit個耶穌是無守律法 ê， hit款人m̄是先知。
青：耶穌kiám án-ni。 Kiám-chhái án-ni講是失禮，我看恁是真自高ê。耶穌的確m̄是hit款人。伊真仁慈，親像我這款乞食，人伊也用手攪土kā我糊。
法 2：你是對阮法利賽黨 beh反抗m̄？
青： m̄是，m̄是，是照所想án-ni講nā-tiāⁿ.
對 正旁已經有hè ê 青瞑人ê父母相牽手出來，攏是穿bái-bái.
父： O͘h！你thái 會 tī chia。
母： Cha-暝你是去tó位？也無tńg來厝裡， 恁爸爸 kap我通暝無睏煩惱你。
青： Ah，爸爸，媽媽，請恁歡喜，我ê目睭已經看見lah，出世到 taⁿ頭一擺看著恁ê面。無有比這個 khah歡喜ê.
父：甚麼，(看青瞑人ê面)。O͘h！你ê目睭得著開，這真奇妙！
母： (抱青瞑人)目睭得著開 (哮)。
法 1： (對父母) oé， oé， 恁 ài謹慎，今á日是安歇日。這個實在是恁 ê 囝 mah， kiám出世就青瞑 mah？
青瞑人ê父母看見是法利賽人，就趕緊對 in行禮。
父：是，是，是阮ê 囝。
母：真可憐，對出世就青瞑.
法 3： Kiám m̄是假做青瞑--ê。
青： iáu teh 疑-ngái mah。
父： Aih (對伊ê 囝)這，m̄知甚麼原因，對出世就雙目攏無開。也現在得著看見，這攏是上帝ê恩惠。
母： (對法利賽人tàm-頭)這攏是對 恁 ê祈禱所致蔭 ê.
青： 媽媽， m̄是lah， in kap我攏無甚麼干涉。實在是昨昏對我這身命感覺厭世，就昨暝 tī西羅亞池邊sô-來sô-來，到天光hit時陣，我聽見10 外人ê 腳步聲 tī teh來，也對 in所teh講ê話知影是耶穌kap伊ê 學生，因為我tī聖殿teh求乞 bat聽見耶穌ê話。Hit中間學生ê一個對耶穌講：「先生，這個 青瞑人，是對 chī-chuī犯罪所致， 抑是是對伊ê父母所犯ê罪？」hit個學生所講ê 「這個」就是我。
父：也耶穌按怎 kā 伊應？
青：耶穌án-ni kā伊講，「也m̄是這人，伊ê父母也無。獨獨是上帝ê榮光beh 對 這這人來顯明。」伊就將土糜糊 tī我ê目睭，叫我去西羅亞ê 池洗。聽著耶穌chiah ê話，對我ê心底就有一款ê力chhèng出來。
母： 對 án-ni你就照耶穌ê話去做好。
青：是，án-ni目睭就得著開。. 爸爸，媽媽，我是hō͘耶穌kā我開目睭ê。
法 3： hit個耶穌是罪人。
青：是罪人á m̄是，我m̄知，我只有知伊是sòng-鄉ê，哀傷ê，破病ê， 青瞑 ê，跛腳ê ê朋友。開我ê目睭是真好ê證據。
法 1：講甚麼，你想beh教示阮法利賽人mah？
青：教示人ê是恁，我是將實在ê事……
法 1： (親像teh háⁿ ê款) teh講甚麼話！
父：你khah 緊 kā in 說多謝， thang tńg來去。
青： Thái tō kā in 說多謝。 tńg來去。
法 3： 慢且是，ài koh問你一項事。耶穌是用按怎開你ê目睭？
青：已經kā 恁講幾-nā擺 lah。問到 hiah詳細，恁也是想beh做耶穌ê學生nih。
法 3：講甚麼，khah 失禮。親像你這款ê chiah是hit個草地木匠ê學生。阮是摩西ê學生。摩西是直接對上帝聽著命令ê.
青：耶穌確實是比恁，也比摩西koh-khah gâu。 Tī聖經也無記摩西bat醫好出世就青瞑 ê。親像這款神蹟，自有世間以來未bat聽著。 若耶穌m̄是上帝ê 囝，也boē-thang 開 青瞑人ê目睭。
法 1： (對其他ê法利賽人) chhap 這號痟人，teh-beh boē 赴禮拜lah，咱來去。
法 2：是，是，chhiân真久lah，來去(對 青瞑人) oé， 痟--ê。
青：我m̄是痟--ê。
法 2： 對阮看，你m̄是正經ê。
青： 若我看恁，也m̄是正經ê， koh 恁是臭耳 兼 青瞑 ê。
法 3：講甚麼無禮 ê話。
青： Kiám m̄是án-ni。 Khah講to聽無ê 耳，看也看無ê目睭……
法利賽人3，去，起來走oá 對 青瞑人ê手掠--teh.
法 3： Hǹg， 這款狡怪，謗瀆上帝ê榮光kap律法ê罪，阮beh告你tī公會。來！(對其餘ê法利賽)我beh 拖伊來去公會，請恁先去。
青：我是按怎 (受掠ê手滾開)。
法 1：因為你犯罪，所以阮beh告你tī公會。Koh無久，你就beh tī城外hō͘人用石頭tìm死。定定。
法 3： (koh再拖 青瞑人ê手)。來！
青： (Ná行，ǹg法利賽人)。恁 kiám有權 thang審判人ê是上帝。Hō͘上帝無得著榮光ê kiám m̄是恁？ 恁就是假好ê人。
法 1： 若 據在你講，soà一直講無禮 ê話。
法 2： 若有不平chiah來公會講。
法利賽人3，將oá來ê父母tùn走，chhoā 青瞑人對倒旁落去。
法 1： (對法利賽2)。實在真可惡。
法 2： Koh一個khah可惡ê是煽動 chiah ê愚民 ê草地木匠ê耶穌。
法 1：是，hit個若無khah 緊 kā 除掉， (看hiah ê tī hia teh躊躇ê父母)恁 chiah ê老人，家己ê 囝著kam-tok hō͘好。
父母：是，是，好。
法利賽人行去正旁， 群眾分開tī左右。
法 2： 恁大家，攪擾恁ho͘N3。
過路 A： Boē ò͘， boē ò͘。
法 1： 恁大家也是beh去聖殿ho͘N3？
過路人：是，是。
法 2： (對 法 1)。Taⁿ咱來去。
法利賽人，過路人，父母閃 tī 正旁，就對 倒旁法利賽3，走到雄-kài-kài出來khiā tī中央。
法 3：小囝 leh，走tó-去，小寡無teh注意，hit個假 青瞑 ê soà走去，真狡怪。
對 正旁 過路人D， E，行到。
法 3： oé， oé，請問leh。
過路 D： Hâⁿ！
法 3： 恁有看著一個乞食人無？
過路 E：乞食款ê人，hàⁿ！ tú-á tī hia (指行來ê所在) kap 4， 5 個人相 閃身，不敢tī hit中間。
法 3： Hǹg， 穩當是(對 正旁落去)。
過路 D： (看hit個落去ê後影)。這陣 ê猶太人攏mā是m̄-成 人。
過路 E： 除去祭司kap法利賽人，kap抽餉ê以外攏mā án-ni。
過路 D， E： Hà, hà (ná笑，對 倒旁落去)。
對 倒旁 青瞑人勻-á 出來，khiā tī西羅亞ê 池邊。
青： (靜靜teh看水面)。出世到 taⁿ頭一擺 看著 ê世界，實在是想像以上ê suí。總是所看著人ê面，thái hiah-nih 歹看。(停一下)。Ah！我iáu-未 對耶穌說多謝，來去chhē耶穌，對伊講我有照伊所講ê去做，就目睭果然得著看見。出世以來頭一擺看著天地自然ê suí。我歡喜到 boē顧得。總是看著人ê形狀chiah 歹看soà失望。Hiah ê teh sáng-勢 ê 法利賽人抑是經學士，做hō͘上帝無歡喜也掠做無要緊(不知不覺中已經跪 teh beh祈禱ê姿勢)。主耶穌，hiah ê人是teh想beh 害你。主耶穌，請對這霎 hō͘我做你ê奴僕，thang報萬分 ê 一份 ê 恩。 (Khiā起來)。是，趕緊來去kā伊拜託。我著做耶穌ê奴僕，thang 當面 kap法利賽人交戰。
青瞑人行對 正旁去，對後面有聲。
聲：請等候 leh。
青： (越頭)。是甚麼人。
聲：你kiám beh信上帝ê 囝。
青： Hiah奇怪，也無看著人。
青瞑人注意看左旁， ná親像看著人行2， 3進前。
青：你是chī-chuī？
聲： 拿撒勒 ê耶穌。
青： (跪落去)。O͘h！主耶穌。
聲：你kiám有信我是上帝ê 囝。
青：主ah！我信，你是上帝ê 囝，是主基督。
聲： 若信，著背十字架來tè我。
青：是，無論是監獄，抑是刑場……
舞台小寡暗，合唱ê 聲忽然起，合唱中幕關。