我tī外國所體驗著 ê感恩
Goá tī goā-kok Só͘ thé-giām tio̍h ê Kám-un
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第970號 |
| 日期 | 1965/11 |
| 頁數 | 7 |
白話字（原文數位化）
Goá tī goā-kok Só͘ thé-giām tio̍h ê Kám-un
Phîⁿ Chēng-siok
1965.11.15 P.7-8
Phí-jîn tī A. D. 1961-1963, tit Siōng-tè ê ín-chhoā kàu Bí-kok chhim-chō, tng chin bô liâu, bô chhin, bô chhek, giân-gú, bîn-cho̍k-sèng put-tông ê khoân-kéng tiong, hō͘ goá thé-giām tio̍h chi̍t hāng chin pó-poè ê, chiū-sī tuì Siōng-tè ê kám-un, kàu tī kin-á-ji̍t í-keng beh kè-liáu nn̄g nî, iáu-kú tī goá ê kì-ek tiong chhin-chhiūⁿ cha-ji̍t ê khoán-sit lâi hoan-hí kám-siā, ke-thiⁿ goá hiān-chāi choè kang ê khuì-la̍t kap pang-chān, hō͘ goá chi̍t sî boē bián-tit ēng kám-siā ê sim lâi lio̍k-su̍t goá só͘ thé-giām ê kám-un.
Goá tī Bí-kok ê sî, ū khì tī chi̍t keng Bí-kok Kui-chèng kàu-hoē só͘ siat ê tāi-ha̍k kiò-choè Northwestern College, tī hia tha̍k-chheh, chóng-sī goá ū toà tī chi̍t uī tiúⁿ-ló, tiúⁿ-ló-niû(Mr. & Mrs. De Ruter) ê chhù, in ū gō͘ ê hāu-siⁿ, kî-tiong chi̍t ê ū kè-sin, kî-thaⁿ sì ê lóng kiat-hun liáu, bô kap in toà choè-hoé, iā in bô cha-bó͘-kiáⁿ, só͘-í in khoán-thāi goá chhin-chhiūⁿ in ê cha-bó͘-kiáⁿ chi̍t iūⁿ. Goá lóng m̄-bián hoân-ló goá ê ji̍t siông seng-oa̍h ê chia̍h, chhēng, ēng, koh siông-siông uī-tio̍h goá khui tê-piáⁿ-hoē (tea party), hō͘ goá ū ki-hoē thang kap choē-choē pêng-iú saⁿ-bat, koh chin siông chhoā goá khì chham-koan choē-choē uī ê kàu-hoē iā khoàⁿ in chí-bē tī kàu-hoē ê oa̍h-tāng, koh hō͘ goá ū ki-hoē thang kóng-khí tī Tâi-oân Lú Soan ê oa̍h-tnag7. M̄-nā án-ni, kàu tī joa̍h-thiⁿ ê sî, hō͘ goá kap in kàu tī ô͘-piⁿ tī in ê pia̍t-chong(cottage) tī hia tiò-hî, siû-chuí, hit khoán ê hióng-siū thang kóng oân-choân thé-giām tio̍h kap in siāng-khoán khoài-lo̍k, un-loán ê ka-têng seng-oa̍h (family life). Só͘-í thâu chi̍t hāng hō͘ goá thang kám-siā ê, chiū-sī Siōng-tè ê thiàⁿ thong-kè chit uī jia̍t-sim ê tiúⁿ-ló, tiúⁿ-ló-niû, hō͘ goá choè in ka-têng ê chi̍t ê, tī Bí-kok ê seng-oa̍h lóng bô khiàm-kheh, iā m̄-bián chhin-chhiūⁿ ū lâng tio̍h chin chhut-la̍t choè kang thang tit seng-oa̍h-huì, koh hióng-siū phó͘-thong lâng só͘ boē thang hióng-siū ê hióng-siū.
Tè jī, goá ài kám-un ê, chiū-sī āu-lâi goá ài khì kàu tī toā siâⁿ chicago ê só͘-chāi, hia ū chi̍t keng Moody Bible Institute tī hia khah ū Sîn-ha̍k-tek ê gián-kiù, chóng-sī boē thang tit-tio̍h chióng-ha̍k-kim, hit sî goá só͘ khì ê kàu-hoē ê Lú Soan chí-bē ū uī-tio̍h goá khui chi̍t ê party kiò-choè silver-tea, ì-sù chiū-sī chiong hit ê party só͘-hiàn ê chîⁿ lâi pang-chān goá, koh í-goā ū kò-jîn-tek pang-chān goá ê iā boē chió. Chhin-chhiūⁿ án-ni, in chiah ê chí-bē si̍t-chāi tī Chú ê lāi-bīn chin gâu si̍t-hêng “thàiⁿ chhù-piⁿ,” chiàu Chú ê kà-sī. kOh tī joa̍h-thiⁿ chiah ê khah siàu-liân ê chí-bē siông-siông chhoā in ê ka-têng khì iá-goā chū-chhan( Picnic) hit sî siông-siông chiau-thāi goá khì chham-ka, hō͘ goá kám-kak in Bi-kok ê chú-hū sī bô chhiàⁿ kang-lâng, muí-ji̍t hui-siông ê bô-êng, iáu-kú siông-siông uī-tio̍h ka-têng ê lâng khó-lū, hō͘ tiōng-hu, kiáⁿ-jî oē kám-kak ka-têng ê un-loán kap khoài-lo̍k, m̄-nā án-ni, liân m̄-sī in ka-têng ê lâng in iā ū chit khoán ê lāu-pô-á sim, chiong in ê khoài-lo̍k pun hō͘ pa̍t lâng, chhin-chhiūⁿ kuí-nā pái goá só͘ toà tī hia ê tiúⁿ-ló, tiúⁿ-ló-niû chhut-goā bô tī-teh ê sî, siông-siông to ū chí-bē phah tiān-oē, chhiáⁿ goá khì in tau saⁿ-kap chia̍h àm-tǹg, saⁿ-kap khoàⁿ tiān-sī (T. V.), saⁿ-kap kau-poê, in-uī in khó-lîn goá ka-kī chi̍t ê kò͘-chhù, chia̍h-pn̄g bô-phoāⁿ, si̍t-chāi hō͘ lán só͘ siūⁿ boē kàu ê sū, in oē-hiáu uī-tio̍h chhut-goā lâng lâi siūⁿ, hō͘ goá tit chin toā ê an-uì. Put-tān sī án-ni, tī kàu-hoē chiah ê choh-sit lâng thiaⁿ tio̍h goá ài chia̍h chi̍t chióng tiⁿ hoan-be̍h (sweet corn), chiū tng hoan-be̍h siu-sêng ê sî, ēng chhia chài goá kàu in ê ke lâi hióng-siū tī Tâi-oân só͘ boē thang hióng-siū ê hoan-be̍h, koh ū ki-hoē thang khoàⁿ in ê choh-sit seng-oa̍h, thang kóng in ê choh-sit lâng toā-pō͘-hūn lóng ū tāi-ha̍k pit-gia̍p, iā chhân-nih ê khang-khè lóng sī ki-khì-hoà, bô-lūn chèng-choh, siu-sêng, khau-chháu lóng ēng ki-khì, só͘-í chi̍t ê lâng choè cha̍p goā kah sī bô būn-toê, koh chhī kuí-nā cha̍p chiah ê lin-gû, lu̍t lin iā lóng ēng ki-khì, iā koe-á chhī saⁿ, sì pah chiah, só͘-í hō͘ goá kap in saⁿ-kap khioh kuí-nā pah lia̍p ê koe-nn̄g, thang kóng sī hui-siông ê hoan-hí kap chhù-bī, liân beh soé koe-nn̄g iā ēng ki-khì, hō͘ goá chin tio̍h kian, in-uī soè liáu chin chheng-kì koh boē phà. Sui-jiân kóng sī choh-sit lâng, chóng-sī in ê seng-oa̍h chuí-chún kap to͘-chhī ê lâng bô koh-iūⁿ.
Choè-āu goá beh tńg-lâi ê sî, hō͘ goá it-seng bô boē kì-tit ê, chiū-sī tiúⁿ-ló, tiúⁿ-ló-niû uī-tio̍h goá huì-liáu chi̍t lé-pài kú-kap in ê pêng-iú saⁿ thoè-oān sái-chhia chài goá tuì Iowa chiu kàu San Grancisco chē chûn, tī chit ê lú-hêng tiong chhoā goá khì chham-koan choē-choē chhut-miâ ê só͘-chāi, hō͘ goá ka-pē tit-tio̍h tì-sek, chai Bí-kok kok chiu ê chha-īⁿ kap tī Tâi-oân put-khó-lêng thang khoàⁿ iû-lám ê só͘-chāi.
Só͘-í sui-jiân goá tī Bí-kok m̄-sī chin kú, tuì ha̍k-būn-tek kiám-chhái bô ha̍k-si̍p chin-choē, tān-sī tuì in ê ka-têng seng-oa̍h, goá hó-táⁿ kóng o̍h chin-choē, khoàⁿ chin-choē, ǹg-bāng tī hiān-chāi goá tuì Lú Soan ê kang-chok oē thang chiàu goá tī Bí-kok só͘ khoàⁿ, só͘ ha̍k-si̍p ê lâi lī-ek lán ê chí-bē, sī goá choè toā ê kî-thāi kap bo̍k-phiau, ǹg-bāng tho̍k-chiá uī-tio̍h lán lú sìn-tô͘ sìn-gióng seng-oa̍h ê chìn-pō͘ saⁿ-thoè kî-tó.
漢羅（Ùi原文改寫）
我tī外國所體驗著 ê感恩
敝人tī A. D. 1961-1963，得上帝ê 引chhoā到美國深造， tng真無聊，無親，無戚，言語，民族性不同ê環境中，hō͘我體驗著一項真寶貝ê，就是對上帝ê感恩，到tī今仔日已經beh過了兩年，iáu-kú tī我ê記憶中親像cha-日ê款式來歡喜感謝，加添我現在做工ê氣力kap幫贊，hō͘我一時boē免得用感謝ê心來略述我所體驗ê感恩。
我tī美國ê時，有去tī一間美國規正教會所設ê大學叫做Northwestern College， tī hia讀冊，總是我有toà tī一位長老，長老娘(Mr. & Mrs. De Ruter) ê厝，in有五個後生，其中一個有過身，其他四個攏結婚了，無kap in toà做夥，也in無查某囝，所以in款待我親像 in ê查某囝一樣。我攏m̄免煩惱我ê日常生活ê食，穿，用，koh常常為著我開茶餅會 (tea party)，hō͘我有機會thang kap濟濟朋友相識，koh真常chhoā我去參觀濟濟位ê教會也看in姊妹tī教會ê活動，koh hō͘我有機會thang講起tī台灣女宣ê活動。 M̄-nā án-ni，到tī熱天ê時，hō͘我kap in到tī湖邊tī in ê 別莊(cottage) tī hia釣魚，泅水，hit款ê享受thang講完全體驗著 kap in 相款快樂，溫暖ê家庭生活(family life)。所以頭一項hō͘我thang感謝ê,就是上帝ê 疼通過這位熱心ê長老，長老娘, hō͘我做in家庭ê一個，tī美國ê生活攏無欠缺，也m̄免親像有人著真出力做工thang得生活費， koh享受普通人所boē-thang享受ê享受。
第二，我愛感恩ê，就是後來我愛去到tī大城chicago ê所在，hia有一間Moody Bible Institute tī hia khah有神學-tek ê研究，總是boē-thang得著獎學金，hit時我所去ê教會ê女宣姊妹有為著我開一個party叫做silver-tea，意思就是將hit個party所獻ê錢來幫贊我，koh以外有個人-tek幫贊我ê也boē少。親像án-ni， in chiah ê姊妹實在tī主ê內面真gâu實行「疼厝邊，」照主ê教示。Koh tī熱天chiah ê khah少年ê姊妹常常chhoā in ê家庭去野外自餐( Picnic) hit時常常招待我去參加，hō͘我感覺in 美國ê 主婦是無倩工人，每日非常ê無閒，iáu-kú常常為著家庭ê人考慮， hō͘丈夫，囝兒會感覺家庭ê溫暖kap快樂，m̄-nā án-ni，連m̄是in家庭ê人in也有這款ê老婆仔心，將in ê快樂分hō͘別人，親像幾-nā 擺我所toà tī hia ê長老，長老娘出外無tī-teh ê時，常常to有姊妹拍電話，請我去in 兜相kap食暗頓，相kap看電視(T. V.)，相kap交陪，因為in可憐我家己一個顧厝，食飯無伴，實在hō͘咱所想boē 到 ê事，in會曉為著出外人來想，hō͘我得真大ê安慰。不但是án-ni， tī教會chiah ê作穡人聽著我愛食一種甜蕃麥(sweet corn)，就當蕃麥收成ê時，用車載我到in ê家來享受tī台灣所boē-thang享受ê蕃麥，koh有機會thang看in ê作穡生活，thang講in ê作穡人大部分攏有大學畢業，也田裡ê 空課攏是機器化，無論種作，收成，khau-草攏用機器，所以一個人做十外kah是無問題， koh 飼幾-nā十chiah ê 乳牛，lu̍t 乳也攏用機器，也雞仔飼三，四百隻，所以hō͘我kap in相kap khioh幾-nā百粒ê 雞卵，thang講是非常ê 歡喜kap趣味，連beh洗機卵也用機器，hō͘我真著驚，因為洗了真清氣koh boē phà。雖然講是作穡人，總是in ê 生活水準 kap都市ê人無各樣。
最後我beh tńg來ê時，hō͘我一生無boē記得ê，就是長老，長老娘為著我費了一禮拜久 kap in ê朋友相替換駛車載我對 Iowa 州到 San Grancisco坐船，tī 這個旅行中chhoā我去參觀濟濟出名ê所在，hō͘我加倍得著知識，知美國各州ê 差異 kap tī台灣不可能thang 看遊覽ê所在。
所以雖然我tī美國m̄是真久，對學問-tek kiám-chhái無學習真濟，但是對in ê家庭生活，我好膽講學真濟，看真濟，ǹg望tī現在我對女宣ê 工作會 thang照我tī美國所看，所學習ê來利益咱ê姊妹，是我最大ê期待kap 目標， ǹg望讀者為著咱女信徒信仰生活ê 進步相替祈禱。