流乳kap蜜ê地
LÂU LIN KAP BI̍T Ê TOĒ
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第968號 |
| 日期 | 1965/10 |
| 頁數 | 17 |
白話字（原文數位化）
LÂU LIN KAP BI̍T Ê TOĒ
Chāi Pa-se: Khèng-sêng siá
1965.10.15 P.17-20
Chit phiⁿ sī Chiong-hoà koān Jī-lîm tìn 5 Ha̍p-heng kàu-hoē ê sìn-tô͘ î-bîn khì Pa-se só͘ siá tńg-lâi hō͘ in ê tióng-chip ê phoe. Pit-chiá Khèng-sêng sī Goân-táu chhut-sin ê jīm-chit-chiá.
Tuì Pa-se só͘ pò chiah ê siau-sit, ún-tàng oē hō͘ tho̍k-chiá hoan-gêng chiah tio̍h.
Lia̍t-uī hoan-ho͘ kap kek-lē lâi sàng goán ê siaⁿ í-keng keng-kè chiong-kūn nn̄g nî lah. Sió-tī tē jī pái kia̍h-pit siá tām-po̍h goán ê siau-sit kap Pa-se ê lông-gia̍p hō͘ lín chai. Tāi-seng ài kám-siā Siōng-tè, in-uī I ín-chhoā goán kàu tī lâu lin kap bi̍t ê toē, an-pâi an-ku lo̍k-gia̍p kap sù-goán lêng-sèng kap jio̍k-thé ê bí-niû toā hong-hù, koh chiàu-kò͘ goán pêng-an, tio̍h kám-siā Chú, lâi kám-siā Chú, in-uī I toā un-sù.
Goán chin ū hok-khì, tī bô phah-sǹg ê tiong-kan, tuì 5 ge̍h Chú ū chhe I ê tiong-po̍k, chiū-sī tī Pîn-tong ê toā kàu-hoē léng-tō saⁿ-cha̍p goā tang kú, tāi-ke só͘ chun-kèng ê Khó͘ Iú-châi Bo̍k-su kap bo̍k-su-niû kàu Pa-se, Chú ū an-pâi chin tú-hó i ê kong-chú Chhiâu-sè Tiúⁿ-ló, toà tī lī goán chia 25 kong-lí hn̄g ê Pintotama(ビイントグマ) ê só͘-chāi teh ióng-koe, iā sī siū Chú chiok-hok ê ke. Khó͘ Bo̍k-su in choân-ke tû-khí lâu chi̍t, nn̄g ê lâng kò-chhù í-goā, lóng tī Sèng-ji̍t ê chá-khí chiū kàu pài-tn̂g lé-pài, tuì án-ni goán oē tàng niá-siū tio̍h i só͘ pun hō͘ goán lêng-sèng-chiūⁿ hong-hù ê bí-niû. Chan Thian-lâi Sian-siⁿ, tuì 6 ge̍h khí, tī Sèng-ji̍t ê téng-ē-po͘ lóng tī Sèng Pó-lô kàu-hoē choè-kang. I ia̍h sī chin thiàⁿ Chú ê kang-lâng, goán put-chí siàu-liām i, siū tio̍h i nî goā kú ê poê-iúⁿ, goán ê lêng-sèng ū tióng-chìn. Khí-thâu lé-pài sī goán kuí hō͘, i-goā bô pa̍t lâng chham-ka, hiān-sî ū khiā-khí tī chit hū-kūn ê Tâi-oân ê hiaⁿ-tī kap goā-séng chī-bē lâi saⁿ-hap lé-pài. Chū-hoē jîn-sò͘ 40 goā lâng, hiàn-kim choè-kūn pêng-kun sī Pa-pè 17500 クルゼイロ, án-ni, muí lé-pài ê hiàn-kim oāⁿ sǹg Tâi-pè sī 430 goā kho͘, pí-kàu khí-thâu sī chìn-pō͘ 10 pē. Kám-siā chú, goán ǹg-bāng tī 2 nî āu oē koh chìn-pō͘ hiān-sî ê 10 pē, í-keng ū kè-e̍k tī 5 nî āu beh koh khí sin ê lé-pài-tn̂g, ū soàn kim-gia̍h sī 5000 kho͘ Bí-kim í-siōng, ǹg-bāng lín saⁿ-kap kî-tó, kiû Chú pang-chān goán ê sìn-sim kian-kò͘, hō͘ goán oē chiàu sî lâi ko-kú khah koân ê si̍p-jī-kè tī chit ê só͘-chāi lâi êng-iāu I ê sèng-miâ.
▲Chia ê seng-oa̍h.
Lín ún-tàng chin koan-sim goán ê seng-oa̍h kap lông-gia̍p seng-sán, koan-hē seng-sán hong-bīn, thâu chi̍t nî, in-uī toā-pō͘-hūn ê kang lóng hē tī kiàn-tiok, khah bô sî-kan thang chèng chhài, koh-chài siⁿ-nn̄g-koe ia̍h chhī khah chió, nn̄g kè pí hiān-sî sio̍k chi̍t poàⁿ, kai-chài Chú ū sù goán siông-jiông hó siu, tuì sió-sióê chhù-lāi chèng 7- phêng, hō͘ goán siu 1000 kho͘ Bí-kim, tuì án-ni koh cheng-ka chhī 1000 chiah ê siⁿ-nn̄g-koe, oē tit chiu-choán hó-sè, lóng bô hoat-seng sím-mi̍h khùn-lân. In-uī goán só͘ toà-lâi ê chîⁿ sī iú-hān nā-tiāⁿ, koh-chài pho͘-phiⁿ tām-po̍h tī tâng kiâⁿ ê tiong-kan. Kóng chit ê, m̄-sī chhut tī phín-phóng, sī ài hō͘ lán chai, tâng kiâⁿ put-lī tâng-miā. Goán ê Bí-kim oāⁿ liáu lah, kám-siā Chú ê toā un-tián, tuì kū-nî ê Sèng-tàn chêng koe-nn̄g chiū khí-kè, kàu hiān-sî chiū-sī choè hó ê sî, sió-tī só͘ chhī ê koe sī pí Eńg-tit chip-sū khah chió, tī chiaⁿ-ge̍h tiong ū tuì kám-mō͘ lâi hoat-seng コクシユム ê pīⁿ, hit sî ū-sí chiâⁿ pah chiah khì, kai-chài Chú ê lîn-bín, choân-pō͘ chù-siā 4 hoê chiū hó--khì. Hiān-sî nn̄g muí ji̍t siⁿ 1000 chhut-thâu lia̍p, sûn-ek sī oāⁿ sǹg Tâi-pè 500 kho͘ í-siōng. Chèng chhài iā sī put-chí hó, tuì chiaⁿ-ge̍h kàu hiān-chāi, muí lé-apì só͘ boē ê chhài pêng-kun ū Tâi-pè 1700 kho͘ í-siōng, án-ni, liân siông-jiông ê siu-ji̍p, muí ji̍t ū Tâi-pè chiâⁿ chheng kho͘ ê lī-sûn teh ji̍p-lâi, nā-sī Eńg-tit Chip-sū sī koh-kah ke. Tuì chit ê oe̍h-oe̍h ê bīn-chek, chi̍t hō͘ put-kò chi̍t Tâi-kah khah ke-á ê toē, ta̍k ji̍t lī-ek chiah-nih toā, lín siūⁿ, kiám m̄-sī Chú kî-biāu ê un-sù. Goán 6 hō͘ tiàm choè-tui, ta̍k ji̍t chhiong-moá hoan-hí kap khoài-lo̍k, phāu oán-tāi ê hi-bōng, koat-ì uī-tio̍h ài lī-ek Chú ê sèng-miâ, hiòng-chêng teh hùn-tò͘. Goán lóng chin bô-êng, tû-khí 7 tiám cheng ê an-bîn kap chia̍h-pn̄g ê sî-kan í-goā, lóng sī teh kang-chok, ia̍h ū kè-e̍k kuí nî āu beh lâi-khì Sèng-toē khoàⁿ-khoàⁿ leh. Kiû Chú pang-chān goán sù chit ê sū oē chiâⁿ, kàu hit sî oē ēng kiong-kèng lâi siūⁿ Chú ê thiàⁿ kì-liām I. Goán 6 hō͘ lóng ū koh khí chi̍t tòng ê siông-jiông chhù, í-keng khí hó soà chèng khùn lo̍h-khì lah, siông-jiông khún sī ka-kī choè ê. Chit kuí ji̍t Chng Chheng-lông Sian-siⁿ kè-e̍k ài lâi kap goán chèng siông-jiông, i sī tī Sèng Pó-lô chhī ê kang-chhiúⁿ teh chiū-chit, chi̍t kò ge̍h ê kip-liāu ū Tâi-pè 5000 kho͘, i sī tam-jīm tiān-khì hong-bīn, siông-siông ka-pan, só͘-í ka-soàn tī hit lāi-bīn. Sui-jiân sī án-ni, i ia̍h siūⁿ beh sî, lâi chèng siông-jiông kap choè chhiⁿ-kó ê seng-lí, í-keng lâi tī Ông Tiúⁿ-ló ê toē teh chún-pī hē siông-jiông chhù ê toē ki lah. Goán kuí-nā lâng kàu 10 ge̍h ài koh khí chi̍t keng ê koe-á-kián chhù kap khí 1000 chiah hūn ê koe-sià, 9 ge̍h chi̍t lâng ū-tēng beh ji̍p 2000 chiah ê koe-á-kiáⁿ, tān-sī nn̄g kè nā kè-sio̍k it-ti̍t hó, kiám-chhái beh ji̍p khah chió chiah. Goán ê ji̍t-siông ê seng-oa̍h chin hong-hù, Chú sù goán lóng bô khiàm-kheh, muí ji̍t 3 chhan lóng ū Pa-se chhut-sán ê ké-chí, í-goā ū tiám-sim, chiū-sī コーヒパーン, バタ, gû-lin, chiàu lán ê su-iàu, si̍t-chè siōng thâu chi̍t nî sī m̄-káⁿ án-ni hióng-siū. Tuì chit ê hō͘ lín chai, Chú ê un-tián kap sù-hok joā-nih toā, m̄-sī lâng ê pún-sū. Ū choē-choē Tâi-oân ê hiaⁿ-tī, in kàu Pa-se bô joā-kú chiū sit-bāng koh tò-tńg khì, hiān-chāi iáu ū chin-choē lâng tī Sèng Pó-lô chhī, iáu-bē tit-tio̍h an-ku lo̍k-gia̍p, só͘ choè ê sī hoān-hoat ê sió seng-lí, tuì án-ni, lán thang chai Chú siông-siông kap lán tông-chāi, teh pó-hō͘ khoàⁿ-kò͘ lán.
▲ Pa-se ê lông-gia̍p.
Soà lo̍h-khì ài pò Pa-se ê lông-gia̍p hō͘ lín chai. Pa-se kok sī chin toā, tāi-iok ū Tâi-oân ê 3, 4 pah pē toā, jîn-kháu 7, 8 chheng bān lâng nā-tiāⁿ, toā pō͘-hūn ê lâng lóng chi̍p-tiong tī kok oā siâⁿ-chhī kap tiàm tī tiān-chhia ê soàⁿ-lō͘ piⁿ ê sió to͘-chhī, toā pō͘-hūn ê lâng lóng sī lô-tōng-chiá, in lóng lī-iōng chē tiān-chhia khì kang-chhiúⁿ thong-khûn. Chia ê kang-chhiúⁿ toā koh chin-choē, iā put-chí hoat-ta̍t, sió pō͘-hūn ê lâng toà tī chng-kha, in lóng ū thoân-thóng-tek ê si̍p-koàn, chiū-sī ài choè hō͘ lâng chhiàⁿ-kang ê lâng, khah m̄ ài ka-kī keng-lông ê khoán-sit, nā-sī khah chá lâi ê Tek-kok lâng kap Ì-tāi-lī lâng, in chin-choē sì-soàⁿ chāi chng-kha keng-êng bo̍k-tiûⁿ kap sió kang-gia̍p, lóng put-chí sêng-kong, Ji̍t-pún lâng ia̍h sī chin-choē tī chng-kha ióng-koe kap chèng ké-chí, chèng chhài, iah9 chin sêng-kong, in ê ka-cho̍k sò͘ chiàm ū 7, 8 siâⁿ, lóng ū chū-ka iōng ê chhia, ū ê chi̍t hō͘ 3, 4 tâi, thiaⁿ kóng lóng sī khang-chhiú lâi Pa-se chiah thàn ê. Í-goā ū 2, 3 uī Ji̍t-jîn ê toā chéng-koe-tiûⁿ, hit ê châi-sán chin oh-tit kó͘-kè, muí keng lóng ū siông-siông pó-chhî 10 bān chiah ê tuì Pak Bí î-ji̍p ê chéng-koe, thang èng-hù choân Pa-se ê ióng-koe ka só͘ su-iàu ê koe-á-kián. chóng-sī khah sió ê chéng-koe-tiûⁿ tī chia ia̍h sī ū, án-ni, Pa-se ê lông-gia̍p ia̍h sī toā ê chin toā, soè ê chin soè, chhin-chhiūⁿ chuí-tiū ia̍h ū chi̍t hō͘ keng-choh kuí-nā chheng kah, ū toā tâi ê siu-be̍h-ki, トラツクター, chū-tōng-chhia chin-choē tâi, koh ū put-chí choē ê chhiàⁿ-kang lâng, ēng toā kui-bô͘ teh keng-êng lông-gia̍p ê ia̍h ū. Chóng-sī pí-kàu goán chit hō͘, chí-ū chi̍t Tâi- kah chhut-á ê toē, ia̍h bô トラツクター, tio̍h ēng ti-thâu ku̍t teh chèng-choh, ēng soè-tâi ê chhiú-chhia-á teh ūn-poaⁿ, kám-kak tè sî-sè boē tio̍h, lī thiⁿ kap toē ê hn̄g ê khoán-sit. Chóng-sī Chú Iâ-so͘ ê oē ū kóng, chhek-chiáu-á Thiⁿ Pē Siōng-tè ia̍h khoàⁿ-kò͘ i, hô-hòng lán lâng sī pí chhek-chiáu-á khah kuì-khì, I ia̍h ún-tàng thiàⁿ lán. Taⁿ goán chiah ê sió lông, chiū-sī teh seng-sán toā lông só͘ boē tàng seng-sán ê mi̍h-kiāⁿ. Chhin-chhiūⁿ khah kuì-khì ê chhài-luī, á-sī siông-jiông kap koe-nn̄g, án-ni, nn̄g pêng ê seng-sán kè-kek ê pí-kàu, ún-tàng lín oē chin tio̍h-kiaⁿ, chiàu tuì sán-toē lâi ê Tâi-oân ê hian-tī Chhoà Sian-siⁿ, i ū boé 200 goā Tâi kah teh chèng tiū-á, i kóng, chhek-á 60 公斤 sī A-se chîⁿ 4000 クルゼイロ, oāⁿ sǹg Tâi-pè tú-tú sī 100 kho͘, chiàu án-ni sī sio̍k Tâi-oân chi̍t-poàⁿ khah ke, hit-sî goán só͘ chhut ê hoe-á-chhài toā luí ê chi̍t táⁿ (12 lia̍p) sī koah lâng 2000クルゼイロ, án-ni, nn̄g táⁿ hoe-á-chhài kap 100 Tâi-kun ê chhek-á pîⁿ choē chîⁿ. Goán tī chia boé put-chí suí ê pe̍h-bí, chhia lâi kàu chhù, koh kah chi̍t kha bí-tē-á, án-ni chi̍t pau 60公斤Pa-se 11,500クルゼイロ, oā sǹg Tâi-pè sī 288 kho͘ goā, in-uī seng-lí lâng sǹg ūn-kim, ka-kang kap lī-sûn lia̍h chin hó thàn.
Pa-se ê toā-lông sī toā kàu chin toā, soè ê sī chin soè. Nā-sī Siōng-tè an-pâi chin tú-hó, lóng ū khoài-lo̍k ê seng-oa̍h. Goán sī sio̍k sió-lông, tān-sī tuì seng-sán hong-bīn lâi khoàⁿ, si̍t-chāi thang kám-siā Chú, I hō͘ goán khiā tī pí siōng put-chiok, pí hā iú û ê kai-toāⁿ lah. Khiā tī chit ê lip-tiûⁿ lâi khoàⁿ téng-bīn ê toā-lông, in lī-iōng ki-hâi ê la̍t lâi chèng-choh kap siu-sêng, lâi tit-tio̍h tāi-liōng ê seng-sán, tuì án-ni iā bat siông-siông tú-tio̍h seng-sán kè-to, sán-bu̍t pan-gî ê hiān-siōng, uī-tio̍h án-ni, khui-sún ê chiân-lē iā bô chió. Chhin-chhiūⁿ kū-nî chèng bé-lêng-chû ê toā-lông, iû-goân tú-tio̍h poa̍h-kè ê goân-in lâi liáu ke-hé ê ia̍h chin-choē. Koh oa̍t tò-tńg lâi khoàⁿ, kap goán tông-téng he̍k-chiá í-hā ê sió-lông, á-sī choè chhiàⁿ-kang ê lâng, in lóng ēng chin tan-sûn 5 hong-hoat teh keng-choh, lóng bô teh tio̍h-kip phín-chéng kái-liông kap cheng-ka seng-sán, ia̍h bô kēng-cheng sèng, chin pêng-hoân teh seng-oa̍h, choè kang-lâng ia̍h bô siūⁿ ài ku̍t chi̍t-kak-á chèng chhài, liân chhiⁿ-chhài ia̍h tio̍h boé. Sui-jiân sī án-ni, in ia̍h chin khoài-lo̍k, nā- kàu pài la̍k, ū ê hioh-khùn bô choè kang, ū ê choè chi̍t po͘, khah phah-piàⁿ ê ia̍h ū choè kui ji̍t, lé-pài-ji̍t sī lóng hioh-khùn, chóng-sī in bô teh lé-pài, khah choē lóng teh thit-thô.
Koan-hē Pa-se ê tē-chit, sī sng-sèng chin tāng, chiū-tiong Sèng Pó-lô chiu ê thó͘-toē sī choân sè-kài sng-sèng tē it tāng ê, só͘-í tio̍h ēng chio̍h-hoe tiau-hô, ki-puî sī ēng koe-tiâu-pùn, koh tio̍h ài lo̍h sam iàu-sò͘ ê hoà-kak puî-liāu, chèng chhài chiah oē khí-lâi, kiám-chhái sī m̄-bat choè hong-thai ê goân-in, pīⁿ-thâng hāi chin giâm-tiōng, chhin-chhiūⁿ トマト, hô-lân-tāu, bín-tāu chi̍t lé-pài tio̍h ài phū nn̄g pái ê tāi-seng-hùn, nā-sī bô, chin iông-īⁿ hoat-seng pīⁿ, kuí ji̍t tiong-kan chiū piàn choè siu-sêng ê ǹg-bāng lóng bô-khì. Só͘-í choē-choē ê Ji̍t-pún lâng, in tuì chèng chhài lâi tit-tio̍h chu-pún, āu-lâi chiū hoat-tián tuì choan-bûn ióng koe, he̍k-chiá tuì pa̍t khoán ê chit-gia̍p khì. Goán ia̍h ū kè-e̍k kàu āu-lâi ài hoat-tián tuì ióng ti kap leng-gû, bah-gû ê hong-bīn khì, sī chiong-lâi put-chí ū ǹg-bāng ê sū-gia̍p ê khoán-sit. Hiān-chāi Pa-se chèng-hú ū teh chióng-lē lâng khì lāi-lio̍k Ò-tē khai-hoat, chiū-sī chi̍p-thoân ê, ēng 400 kah choè chhù-toē kap khí lé-pài-tn̂g, ha̍k-hāu, koh-chài chi̍t hō͘ koah-tong 100 台甲ê bī-khai ê toē thang khai-khún, m̄-bián tuì chèng-hú boé, ài chhut thó͘-toē ê chhek-liōng-huì kap teng-kì-huì. Tī chi̍t lé-pài chêng, tuì Sin-tek lâi ê Chiam Sian-siⁿ, i kóng in 7 lâng ū khì sin-chhéng, í-keng phoe-chún liáu, bô kú oē khì khai-khún lah.
▲ Kang-chok cheng-sîn
Choè-āu lâi kóng, beh tī Pa-se keng-lông ài ū khek-khó͘ nāi-lô, chhin-chhiūⁿ lán tiàm tī oe̍h-oe̍h ê Tâi-oân, lông-gia̍p hong-bīn sī kan-ta tui-kiû tan-uī bīn-chek ê cheng-ka seng-sán, lô-tōng ū sî liân àm-sî soà choè thàu-kè, lán ū chit khoán kēng-cheng si̍p-koàn, liân in Jit-pún lâng khoàⁿ liáu ia̍h put-chí chù-ba̍k. Bat chi̍t uī goán ê chhin-iú池田, kóng goán Ji̍t-pún lâng beh thài oē iâⁿ lín Tâi-oân lâng, lán chai Ji̍t-pún lâng ia̍h sī put-chí khûn-lô ê bîn-cho̍k, tī chia choân-kok só͘ su-iàu ê chhài-luī chiàm 7, 8 siâⁿ sī in seng-sán ê, tī Sèng Pó-lô kap Mogi (モジ) ê chhī-tiûⁿ ū sò͘ pah lâng teh boē chhài, ia̍h chiàm 8 siâⁿ sī Ji̍t-pún lâng, m̄-bat khoàⁿ-tio̍h in ê lâng choè khit-chia̍h. Chiàu khoàⁿ, Pa-se ê lông-gia̍p sī chiong-lâi put-chí ū hoat-tián sèng, ia̍h hō͘ lán thang khǹg chin toā ê ǹg-bāng. Hiān-sî goán bô khiàm-kheh, chiū-sī kiâⁿ chiūⁿ koe-sià téng, lóng sī thiaⁿ-tio̍h koe teh kho͘-toan ê siaⁿ kap khoàⁿ-tio̍h koe-nn̄g ji̍p-khì, kàu siông-jiông chhù-lāi, ia̍h sī khoàⁿ-tio̍h sûn-pe̍h ê siông-jiông chiām-chiām teh toā lia̍p; chhut-khì kàu chhài-hn̂g, só͘ khoàⁿ sī chhiⁿ-chhuì iù-nńg ê chhài-luī, ū ê chèng bô joā-kú, ū ê kūn tī siu-sêng, lóng-sī oē tit khoàⁿ-chhut chō-bu̍t Chú ê si-un ê. Choè hó ê, chiū-sī nā kàu Sèng-ji̍t oē thang hióng-siū lêng-sèng choè-toā ê iân-sia̍h, sui-jiân sī án-ni, kiû Chú pang-chān goán sî-kheh kéng-séng kî-tó, hō͘ goán bô-lūn kéng-gū hó-pháiⁿ, lóng oē ēng kám-siā kap o-ló, í-ki̍p it-chhè ê só͘ choè lâi êng-kng Chú ê miâ.
À-bēng.
漢羅（Ùi原文改寫）
流乳kap蜜ê地
這篇是彰化縣二林鎮ê合興教會ê信徒移民去巴西所寫tńg來hō͘ in ê長執 ê 批。 筆者Khèng-sêng是Goân-táu出身 ê 任職者。
對巴西所報chiah ê消息，穩當會hō͘讀者歡迎chiah著。
列位歡呼kap激勵來送阮ê聲已經經過將近兩年lah。小弟第二擺kia̍h-筆寫淡薄阮ê消息kap巴西 ê 農業hō͘ 恁知。事先ài感謝上帝，因為伊引-chhoā阮到tī 流乳kap蜜ê 地，安排安居樂業kap賜阮靈性kap肉體ê米糧大豐富， koh照顧阮平安，著感謝主，來感謝主，因為伊大恩賜。
阮真有福氣，tī無拍算ê中間，對5月主有差伊ê忠僕，就是tī屏東ê大教會領導三十外冬久，大家所尊敬ê 許Iú-châi牧師kap牧師娘到巴西，主有安排真tú-好伊ê 公子Chhiâu-sè長老，toà tī 離阮chia 25 公里遠ê Pintotama(ビイントグマ) ê所在teh養雞，也是受主祝福ê家。許牧師in全家除去留一，兩個人顧厝以外，攏tī聖日ê早起就到拜堂禮拜，對án-ni阮會tàng領受著伊所分hō͘阮靈性上豐富ê米糧。曾天來先生，對6月起， tī聖日ê 頂下晡攏tī聖保羅教會做工。伊亦是真疼主ê工人，阮不止數念伊，受著伊年外久ê培養，阮ê靈性有長進。起頭禮拜是阮幾戶， 以外無別人參加，現時有khiā起tī 這附近ê台灣ê兄弟 kap 外省姐妹來相-hap禮拜。聚會人數40外人，獻金最近平均是巴幣 17500 クルゼイロ，án-ni，每禮拜ê獻金換算台幣是430外箍，比較起頭是進步10倍。感謝主，阮ǹg望tī 2年後會koh進步現時ê 10倍，已經有計畫tī 5年後beh koh 起新ê禮拜堂，預算金額是5000 箍美金以上，ǹg望恁相kap祈禱，求主幫贊阮ê信心堅固，hō͘阮會照時來高舉khah koân ê十字架tī 這個所在來榮耀伊ê聖名。
▲ Chia ê生活。
恁穩當真關心阮ê生活kap 農業生產，關係生產方面，頭一年，因為大部分ê 工攏下tī 建築， khah無時間thang種菜， koh再生卵雞亦飼 khah少，卵雞比現時屬一半，佳哉主有賜阮松茸好收， 對小小ê厝內種70坪， hō͘阮收1000 箍 美金， 對 án-ni koh增加飼1000隻ê生卵雞，會得周轉好勢，攏無發生甚麼困難。因為阮所toà-來 ê錢是有限nā-tiāⁿ， koh再pho͘ phiⁿ淡薄tī同行ê中間。講這個， m̄是出tī 品-phóng，是ài hō͘咱知，同行不利同命。阮ê 美金換了lah，感謝主ê大恩典，對舊年ê聖誕前雞卵就起價， 到現時就是最好ê時，小弟所飼ê雞是比Eńg-tit執事khah少，tī正月中有對感冒來發生コクシユム ê病，hit時有死成百隻去，佳哉主ê憐憫，全部注射 4 回就好--去。現時兩每日生1000出頭粒， 純益是換算台幣500箍以上。種菜也是不止好，對正月到現在，每禮拜所賣ê 菜平均有台幣1700箍以上，án-ni，連松茸ê 收入，每日有台幣成千箍 ê 利純 teh入來，若是Eńg-tit執事是koh-kah加。 對這個狹狹ê面積，一戶不過一台甲khah 加-á ê 地， 逐日利益chiah-nih大，恁想，kiám m̄是主奇妙ê恩賜。阮6戶tiàm做堆，逐日充滿歡喜kap快樂，抱遠大ê希望，決意為著ài利益主ê聖名，向前teh奮鬥。阮攏真無閒，除去7點鐘ê安眠kap食飯 ê時間以外，攏是teh工作，亦有計畫幾年後beh來去聖地看看leh。求主幫贊阮賜這個事會成， 到hit時會用恭敬來想主ê疼紀念伊。阮6 戶攏有koh 起一棟ê 松茸厝，已經起好續續菌落去lah， 松茸菌是家己做ê。 這幾日莊Chheng-lông先生計畫ài來kap阮種松茸， 伊是tī聖保羅市 ê 工廠teh就職，一個月ê 給料有台幣5000 箍， 伊是擔任電器方面，常常加班，所以ka-soàn tī hit內面。雖然是án-ni， 伊亦想beh時，來種松茸kap做青果 ê 生理，已經來tī 王長老ê 地 teh準備下松茸厝ê 地基 lah。阮幾若人到10月ài koh 起一間ê雞仔囝厝kap 起 1000 隻份 ê 雞社， 9月一人預定beh入2000 隻ê雞仔囝，但是卵價若繼續一直好，kiám-chhái beh入khah少隻。阮ê日常ê生活真豐富，主賜阮攏無欠缺，每日3餐攏有巴西出產ê果子，以外有點心，就是 コーヒパーン，バタ，牛奶，照咱ê需要，實際上頭一年是m̄敢án-ni享受。對這個hō͘ 恁知，主ê恩典kap賜福joā-nih大，m̄是人ê本事。有濟濟台灣ê兄弟，in 到巴西無joā久就失望koh 倒-tńg去，現在 iáu有真濟人tī聖保羅市， iáu未得著安居樂業，所做ê是犯法ê小生理，對án-ni，咱thang知主常常kap咱同在，teh保護看顧咱。
▲ 巴西 ê 農業。
續落去ài報巴西 ê 農業hō͘ 恁知。巴西國是真大，大約有台灣ê 3， 4百倍大，人口7， 8千萬人nā-tiāⁿ，大部分ê人攏集中tī 國外城市kap tiàm tī電車ê線路邊ê小都市，大部分ê人攏是勞動者， in攏利用坐電車去工廠通勤。 Chia ê 工廠大koh真濟，也不止發達，小部分ê人toà tī庄腳，in攏有傳統-tek ê習慣，就是ài做hō͘人倩工ê人，khah m̄ ài家己經農ê款式，若是khah早來ê 德國人kap意大利人，in真濟四散在庄腳經營牧場kap小工業，攏不止成功，日本人亦是真濟tī庄腳養雞kap種果子，種菜， 亦真成功，in ê家族數佔有7， 8成，攏有自家用ê 車，有ê一戶 3， 4 台， 聽講攏是空手來巴西chiah 趁 ê。以外有2， 3 位 日人 ê大種雞場，hit個財產真oh得估價，每間攏有常常保持10 萬 chiah ê 對北美移入ê種雞， thang應付全巴西 ê 養雞家所需要ê雞仔囝。總是khah小ê種雞場tī chia亦是有，án-ni， 巴西 ê 農業亦是大ê真大，細 ê真細，親像水稻亦有一戶耕作 幾若千甲，有大台ê 收麥機， トラツクター，自動車真濟台， koh有不止濟ê 倩工人，用大規模teh經營農業ê亦有。總是比較阮這戶，只有一台甲出-á ê 地，亦無トラツクター，著用鋤頭掘teh種作，用細台 ê手車仔 teh運搬，感覺tè時勢boē 著， 離天kap地ê遠ê款式。總是主耶穌ê話有講：雀鳥á 天父上帝亦看顧伊，何況咱人是比雀鳥á khah貴氣，伊亦穩當疼咱。Taⁿ阮chiah ê小農，就是teh生產大農所boē tàng生產ê物件。親像khah貴氣ê 菜類， 抑是松茸 kap 雞卵，án-ni，兩旁ê生產價格ê比較，穩當恁會真著驚，照對產地來ê台灣ê hian-tī 蔡先生，伊有買 200 外台甲teh種稻-á， 伊講：粟á 60 公斤是阿西錢4000 クルゼイロ，換算台幣 tú-tú是100箍，照án-ni是屬台灣一半khah 加， hit時阮所出ê花仔菜大蕊 ê一打 (12 粒)是koah人2000クルゼイロ，án-ni，兩打花仔菜 kap 100 台斤 ê粟á 平濟錢。阮tī chia 賣不止suí ê白米， 車來到厝，koh kah一腳米袋-á， án-ni一包 60公斤巴西 11，500クルゼイロ，換算台幣是288 箍外，因為生理人算運金，加工kap 利純掠真好趁。
巴西ê大農是大到真大，細 ê是真細。若是上帝安排真tú-好，攏有快樂ê生活。阮是屬小農，但是對生產方面來看，實在thang感謝主，伊 hō͘阮khiā tī 比上不足， 比下有餘 ê階段lah。 Khiā tī 這個立場來看頂面ê大農， in利用機械ê力來種作kap收成，來得著大量 ê生產，對 án-ni也bat常常tú-著生產過多， 產物便宜 ê現象，為著 án-ni，虧損ê 前例也無少。親像舊年種馬鈴薯 ê大農，猶原tú-著跋價 ê原因來了家伙ê亦真濟。Koh 越倒-tńg來看，kap阮同等或者以下ê小農， 抑是做倩工ê人，in攏用真單純5方法teh 耕作，攏無teh著急品種改良kap增加生產，亦無競爭性，真平凡 teh生活，做工人亦無想ài 掘一角仔種菜，連青菜亦著買。雖然是án-ni， in亦真快樂，若到拜六，有ê歇睏無做工，有ê做一晡， khah 拍拚ê亦有做歸日，禮拜日是攏歇睏，總是in無teh禮拜，khah濟攏teh thit-thô。
關係巴西 ê 地質，是酸性真重，就中性保羅州 ê土地是全世界酸性第一重ê，所以著用石灰調和，機肥是用雞稠糞，koh著ài落三要素 ê 化學肥料，種菜chiah會起來，kiám-chhái是m̄-bat做風颱ê原因，病蟲害真嚴重，親像トマト，荷蘭豆， 敏豆一禮拜著 ài phū兩擺 ê待先粉，若是無，真容易發生病，幾日中間就變做收成ê ǹg望攏無-去。所以濟濟ê日本人，in 對種菜來得著資本，後來就發展對專門養雞， 或者對別款ê 職業去。阮亦有計畫到後來ài發展對養豬 kap 奶牛，肉牛ê方面去，是將來不止有ǹg望ê事業ê款式。現在巴西政府有teh 獎勵人去內陸惡地開發，就是集團ê，用400 甲做厝地 kap 起禮拜堂，學校，koh再一戶 koah-tong 100 台甲ê 未開 ê 地 thang 開墾， m̄免對政府買， ài出土地ê 測量費 kap 登記費。 Tī一禮拜前，對新竹來ê Chiam先生，伊講in 7人有去申請，已經批准了，無久會去開墾 lah。
▲ 工作精神
最後來講：beh tī 巴西經農ài有刻苦耐勞，親像咱tiàm tī狹狹ê台灣，農業方面是kan-ta 追求單位面積 ê增加生產，勞動有時連暗時續做透過，咱有這款競爭習慣，連in 日本人看了亦不止注目。Bat一位阮ê 親友池田，講阮日本人beh thài會贏恁台灣人，咱知日本人亦是不止勤勞 ê民族，tī chia全國所需要ê 菜類佔 7， 8成是in生產ê， tī聖保羅 kap Mogi (モジ) ê 市場有數百人teh 賣菜，亦佔8成是日本人，m̄-bat看著 in ê人做乞食。照看， 巴西ê 農業是將來不止有發展聖，亦hō͘咱thang勸真大ê ǹg望。現時阮無欠缺，就是行上雞舍頂，攏是聽著雞teh kho͘-toaⁿ ê 聲kap看著雞卵入去，到松茸厝內，亦是看著 純白ê 松茸漸漸teh大粒;出去到菜園，所看是青翠幼軟ê 菜類，有ê種無joā久，有ê近tī收成，攏是會得看出造物主ê施恩ê。做好ê，就是若到聖日會thang享受靈性最大ê筵席，雖然是án-ni，求主幫贊阮時刻警醒祈禱，hō͘阮無論境遇好歹，攏會用感謝kap o-ló，以及一切ê所做來榮光主ê名。
À-bēng。