故李Ta̍t-chong博士
KÒ͘ LÍ TA̍T-CHONG PHOK-SŪ
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第967號 |
| 日期 | 1965/10 |
| 頁數 | 19 |
白話字（原文數位化）
KÒ͘ LÍ TA̍T-CHONG PHOK-SŪ
Khó͘ Chuí-lō͘
1965.10.01 P19-20
Kò͘ Lí Tiúⁿ-ló Ta̍t-chong Phok-sū, tī A. D. 1889 nî 2 ge̍h 20 ji̍t, chhut-sì tī Pîn-tong koān Tang-káng tìn, kò͘ Lí Hoai peh ê lēng tióng-lâm. Lí Tiúⁿ-ló ê thian-chu chhong-bêng, hô-khì. Tī Tang-káng kok-hāu sêng-chek iu-liông, tē 1 miâ pit-gia̍p, chiū khó tiâu Tâi-pak I-choan (hiān-sî ê Tâi Tāi I-ha̍k-īⁿ). Pit-gia̍p āu, siū phèng choè Tām-suí Má-kai pīⁿ-īⁿ ê i-su, chāi-jīm tiong pang-chān Sòng Ngá-kok I-seng Lâi Tâi-pak kiàn-siat Má-kai pīⁿ-īⁿ. Chāi-jīm nn̄g nî, jiân-āu tò-khì kò͘-hiong Tang-káng, khai-gia̍p Ta̍t-chong I-īⁿ 20 goā nî. Khai-gia̍p-tiong ū hoat-chhut 10000 tiuⁿ ê si-liâu-kǹg, si-liâu sòng-hiong hoān-chiá, tāi-ke chin o-ló i ê i-tek ko-bêng kap chû-sim. Hoān-chiá ji̍t-ji̍t choē, ná Hoâ-tô chài-sè. Lāi-goā hong-phêng chin hó.
Lí Tiúⁿ-ló tī Tang-káng kàu-hoē, tam-jīm Chú-ji̍t-o̍h ê Hāu-tiúⁿ kap Tiúⁿ-ló 20 goā nî kú. Pang-chān bo̍k-tióng heng-khí kàu-hoē, chhut kang, chhut chîⁿ, sìn-tek khó-ka, choân-ke jia̍t-sim kèng-uì Siōng-tè. I iā choè Tāi, Tiong-hoē ê tāi-gī tiúⁿ-ló chin kú, tiong-sêng chīn chit, hia̍p-chō͘ Tāi, Tiong-hoē, heng-khí sèng-kok, kong-chek chin toā.
Lí Tiúⁿ-ló khai-gia̍p tiong, jia̍t-sim gián-kiù i-ha̍k, siū Tō͘ Chhong-bêng Phok-sū ê chí-tō hā, tī 1943 nî tit-tio̍h I-ha̍k phok-sū ê ha̍k-uī. Kám-siā Chú, chiàu sio̍k-gú só͘ kóng, “Thiⁿ pang-chān ka-kī pang-chān ê lâng.”
Lí Phok-sū tī 1945 nî kong-ho̍k chho͘-chho͘ siū Pak-pō͘ Tāi-hoē ê uí-thok, ke̍k-le̍k tuì Ji̍t-kun chiap-siu phò-hoāi ê Má-kai pīⁿ-īⁿ. Siū Pak Tāi phèng-jīm choè Má-kai pīⁿ-īⁿ īⁿ-tiúⁿ, chiân-āu kuí-nā jīm choè īⁿ-tiúⁿ kiam Ngāu-san-oân thái-ko pīⁿ-īⁿ īⁿ-tiúⁿ. Chāi-jīm tiong, hoaⁿ-hí hiàn chîⁿ khí chi̍t keng nāi-pēng hoān-chiá ê siok-sià, hiàn hō͘ pīⁿ-īⁿ.
I it-seng uī má-kai pīⁿ-īⁿ kap Ngāu-san-oân pīⁿ-īⁿ, chīn-sim, chīn-la̍t, hōng-hiàn kim-chîⁿ kap sim-sîn lâi keng-êng. Si̍t-chāi i ê kòng-hiàn chin uí-tāi. I chāi-jīm tiong, tuì hoān-chiá chhin-chhiat, tuì-chèng hā-io̍h. Tuì tâng-kang hô-bo̍k, tuì siā-hoē ū sìn-iōng, koh hó miâ-siaⁿ. Tuì kok-ka ho̍k-bū, tuì Tāi, Tiong-hoē hia̍p-chō͘, só͘-í lāi-goā hong-phêng chin hó.
I ióng-thè āu, tī Koan-á-niá, jia̍t-sim gián-kiù Sèng-keng kiam I-liâu thoân-tō, chin chió khai-gia̍p-i tè i oē tio̍h. āu-lâi tò-lâi Tâi-pak chhī Saⁿ-tiuⁿ-lê ka-kī ê chhù, khai-siat Saⁿ-tiuⁿ-lê kàu-hoē (chiū-si大安教會), āu-lâi choè 東門教會的支會. Choè i-seng lâi siat kàu-hoē, iā sī chin chió lâng tè oē tio̍h. Chóng kóng, i sī chi̍t ê kèng-uì Siōng-tè kiam thiàⁿ sè-jîn ê bô͘-hoān-chiá.
Lí Phok-sū, tī 1960 nî, sin-thé khiàm-an, ji̍p Tâi Tāi pīⁿ-īⁿ tī-liâu. Jiân-āu tò-khì Saⁿ-tiuⁿ-lê choán-toē liâu-ióng, kiōng 5 nî kú. Bô phah-sǹg, tī 1965 nî 6 ge̍h 21 ji̍t, tiong-ngó͘ 12 tiám 25 hun siū Chú kéng-tiàu kui thian, hióng-siū 76 hè. I kui-thian ê sî, Lí Tiúⁿ-ló-niû kap ka-cho̍k toā-soè lóng tī i ê sin-piⁿ, kî-tó gîm-si. Lí Tiúⁿ-ló bô hoân bô ló, bīn chhiò-iông, an-jiân kui thian-hú. Tāi-ke lâu m̄-kam ê ba̍k-sái. Sàng chit uī Siōng-tè uí-tāi ê tiong-po̍k, Su-tîn kui Tè-hiong, lī sè seng thian-tông（辭塵歸帝鄉，離世升天堂）.
Lí Phok-sū ê ji̍p-bo̍k lé-pài, tī 6 ge̍h 22 ji̍t ē-po͘ 5 tiám kú-hêng, uî-cho̍k lí hu-jîn Lē-chu lú-sū, kap nn̄g lâm 7 lú, lú-sài, lāi-goā sun, sun-lú, kap chhin-iú, hoē-iú téng, uî-luî tī sin-piⁿ, liông-tiōng kú-hêng.
Lí Phok-sū ê kò-pia̍t-sek lé-pài, tī 6 ge̍h 28 ji̍t ē-po͘ nn̄g tiám khí, tī Siang-liân lé-pài-tn̂g kú-hêng, Kàu-sî Chóng-hoē, Pak Tāi, Chhiⁿ Tiong, Pak Tiong, Má-kai Pīⁿ-īⁿ téng ê tāi-piáu, kap kok kàu-hoē, ki-koan thoân-thé ê bo̍k-tióng, hiaⁿ-chí, lâi-pin, kiōng ū 300 goā lâng chhut-se̍k. Gî-sek liông-tiōng kù-hêng. Gô͘ Thian-pó Kàu-su su-gî, Chiu Khèng-ian Sian-siⁿ chàu-ga̍k. Tiuⁿ Hông-chhiong Bo̍k-su tha̍k Si-phian 116 phiⁿ, Lîm Pó-siông Bo̍k-su kî-tó, Khó͘ Chuí-lō͘ Bo̍k-su kóng kò͘-jîn lio̍k-le̍k. Tân Khoe-chùn Bo̍k-su ēng “Pó-kuì ê sí” choè toê káng-tō. Jiân-āu Chóng-hoē tāi-piáu N̂g Chóng-kàn-sū Bú-tong Bo̍k-su, Pak Tāi Gī-tiúⁿ N̂g La̍k-tiám Bo̍k-su, Ghhiⁿ Tiong Gī-tiúⁿ kiam Má-kai Pīⁿ-īⁿ ê Táng-sū-tiúⁿ Khó͘ Gông-bô͘ Bo̍k-su, Pak Tiong Gī-tiúⁿ Tân Huī-chhiong Bo̍k-su, Ko-hiông I-ha̍k-īⁿ ĪN-tiúⁿ Tō͘ Chhong-bêng Phok-sū, kap Má-kai Pīⁿ-īⁿ Lô͘ Chóng-bū chú-jīm téng tāi-piáu Chóng-hoē, Tāi-hoē, Tiong-hoē, Ha̍k-īⁿ, pīⁿ-īⁿ lâi kóng tiàu-sû. Po-chióng Lí Tiúⁿ-ló Ta̍t-chong Phok-sū ê sìn-tek, tiong-sêng chīn-chit kap gâu choè lâng, chin-choē hó-sū, thang choè lán ê bô͘-iūⁿ kap an-uì uî-cho̍k. uī-tio̍h sî-kan ê chè-hān, iáu ū chin-choē lâi-pin kap chin-iú soà bô sî-kan thang kóng tiàu-sû, chin uî-hām. Khó͘ Pin-se̍k Bo̍k-su tha̍k tiàu-tiān, āu-lâi Má-kai Pīⁿ-īⁿ, Siang-liân kàu-hoē, Tiong-chèng kàu-hoē téng ê Sèng-koa-tuī ê tiàu-koa. Jiân-āu hoē-chiòng khí-li̍p be̍k-tó nn̄g hun cheng tui-liām Lí Tiúⁿ-ló. Khó͘ Chuí-lō͘ Bok7-su tāi-piáu uî-cho̍k kóng siā-sû, choè-āu chhiáⁿ 89 hè Ia̍p Kim-bo̍k Bo̍k-su chiok-tó pì-hoē. Suî-sî hō͘-sàng lêng-khū kàu Tâi-pak koān ê Koan-im-soaⁿ kong-thióng an-chòng.
Lí Tiúⁿ-ló Ta̍t-chong Phok-sū, uî-hè 3 lâm 7 lú, 7 lú-sài kap 46 miâ ê lāi-goā sun kap ka-ná-sun. I tit Chú ê sù-hok, to-siū, to-châi, to chú-sun.
Lí Tiúⁿ-ló ê toā kong-chú kò͘ Khé-hui kun, pit-gia̍p Tang-kiaⁿ Jit-pún Tāi-ha̍k hoat-kho. Chhù-lâm Tek-hui kun, pit-gia̍p Ji̍t-pún Kiaⁿ-to͘ Kang-gia̍p Tāi-ha̍k, ho̍k-bū Sūn-thian-tông chè-io̍h-chhiúⁿ. Sam-lâm Tong-hui kun, pit-gia̍p Tang-kiaⁿ Ji̍t-pún Tāi-ha̍k keng-chè-kho, keng-êng khì-chhia pó͘-si̍p-pan（中英汽車補習班）. Lēng-ài Kím-lân sàng, Kiok-hun sàng, Chhái-bî sàng, lóng pit-gia̍p Séng-li̍p Tâi-lâm it Ko Lú, Gio̍k-sian sàng, pit-gia̍p Ji̍t-pún Chiau-hô Lú-chú io̍h-choan, Sò͘-sian sàng, oán-sian sàng, Poē-sian sàng téng, pit-gia̍p Tām-kang Lú Tiong Ko-tiong pō͘.
Lí Tiúⁿ-ló Ta̍t-chong Phok-sū ê chhit ê lú-sài, ta̍k ê to Tāi Choan pit-gia̍p. Toā lú-sài Gô͘ Lâi-sêng Hoat-ha̍k-sū, pit-gia̍p Ji̍t-pún Tiong-iong Tāi-hak Hoat-kho, hōng-chit tī Chiong-hoà gûn-hâng choè keng-lí. Tē 2 lú-sài Lîm Chài-heng I-ha̍k-sū, pit-gia̍p Tâi Tāi I-ha̍k-īⁿ, tī Lâm-chú khai-gia̍p, tī Lâm-chú kàu-hoē choè tiúⁿ-ló, Lîm Tiúⁿ-ló niû Kiok-hun sàng, iā sī Lâm-chú kàu-hoē ê tiúⁿ-ló, chin jia̍t-sim, hoaⁿ-hí hiàn kang, hiàn chîⁿ. Tē saⁿ lú-sài Âng kim-lêng I-ha̍k-sū, pit-gia̍p Tâi Tāi I-ha̍k-īⁿ, tī Bān-hêng khai-gia̍p, Âng Thài-thài Chhái-bî sàng choè Bān-hêng kàu-hoē ê chip-sū, hu-hū lóng jia̍t-sim, hoaⁿ-hí hiàn-kang kap hiàn chîⁿ. Toā lú-sài Gô͘ Lâi-sêng Keng-lí kap thài-thài lóng chin jia̍t-sim sìn Chú, tuì kàu-hoē hoaⁿ-hí hiàn kang kap hiàn chîⁿ.
Lú-sài Lâu Khek-chiau I-ha̍k-sū, pit-gia̍p Tâi Tāi I-ha̍k-īⁿ, ka-kī khai-gia̍p tī Tâi-pak, hu-hū lóng jia̍t-sim sìn Chú, ho̍k-bū kàu-hoē. Lú-sài Lîm Sek-sî, pit-gia̍p Tang-kiaⁿ Lông-gia̍p Tāi-ha̍k (Lông-ha̍k-īⁿ), hiān-jīm Niû-si̍t-kio̍k ki-chèng. Lú-sài Tiuⁿ Kiam-hong Sian-siⁿ, pit-gia̍p Chham-bô͘ Tāi-ha̍k, hiān-jīm Tiong-chò（中校）, Thoân-koán-khu ê Khò-tiúⁿ. Lú-sài Tân Chheng-hong Sian-siⁿ pit-gia̍p Ko Siong, chū-kí êng-siong (choè seng-lí).
Lí Tiúⁿ-ló ê lāi-goā sun, lóng kiōng 46 miâ, kî-tiong 3 ê tī Tâi Tāi I-ha̍k-īⁿ, kî thaⁿ tī Tāi Choan, Ko Tiong, Chho͘ Tiong, Kok-hāu chāi-ha̍k tiong. Goān Chú si-un sù-hok uî-cho̍k sin, sim, lêng tit kiān-khong.
漢羅（Ùi原文改寫）
故李Ta̍t-chong博士
故李長老Ta̍t-chong博士，tī A. D. 1889年2月20日，出世tī 屏東縣 東港 鎮， 故李Hoai peh ê 令長男。李長老ê 天資聰明，和氣。Tī 東港國校成績優良， 第 1名畢業，就考tiâu台北醫專 (現時ê 台大醫學院)。畢業後，受聘做淡水馬偕病院ê 醫師，在任中幫贊宋雅各醫生來台北建設馬偕病院。在任兩年，然後倒去故鄉東港， 開業Ta̍t-chong 醫院 20 外年。開業中有發出10000 張 ê 施療券， 施療宋鄉患者，大家真o-ló伊ê 醫德 高明 kap慈心。患者日日濟，ná 華陀再世，內外風評真好。
李長老tī 東港教會，擔任主日學ê校長kap長老20 外年久。幫贊牧長興起教會，出工，出錢，信德可嘉，全家熱心敬畏上帝。伊也做大，中會 ê 代議長老真久，忠誠盡職，協助大，中會，興起聖國， 功績真大。
李長老開業中，熱心研究醫學，受杜聰明博士ê指導下， tī 1943年得著醫學博士ê 學位。感謝主，照俗語所講：「天幫贊家己幫贊ê人。」
李博士tī 1945年光復初初受北部大會 ê 委託，極力 對日軍接收破壞ê 馬偕病院。受北大聘任做馬偕病院院長， 前後幾若任做院長兼 Ngāu-san-oân thái-ko病院院長。在任中，歡喜獻錢起一間nāi-pēng 患者 ê 宿舍，獻hō͘病院。
伊一生為馬偕病院kap Ngāu-san-oân病院，盡心，盡力，奉獻金錢kap心神來經營。實在伊ê貢獻真偉大。伊在任中，對患者親切，對症下藥。 對同工和睦，對社會有信用， koh好名聲。對國家服務，對大，中會協助，所以內外和平真好。
伊 勇退後，tī 關仔嶺，熱心研究聖經兼醫療傳道，真少開業醫 tè伊會著。後來倒來台北市三張犁家己ê厝，開設三張犁教會(就是大安教會)，後來做東門教會的支會。做醫生來設教會，也是真少人tè 會著。總講：伊是一個敬畏上帝兼疼世人ê 模範者。
李博士，tī 1960年，身體欠安，入台大病院治療。然後倒去三張犁choán-toē 療養，共5年久。無拍算，tī 1965年6月21日，中午 12點25 分受主揀召歸天，享壽76 歲。 伊歸天 ê時，李長老娘 kap家族大細攏tī伊ê身邊，祈禱吟詩。李長老無煩無惱，面笑容，安然歸天府。大家流 m̄-kam ê目屎。送這位上帝偉大ê忠僕，辭塵歸帝鄉，離世升天堂（辭塵歸帝鄉，離世升天堂）。
李博士ê入墓禮拜，tī 6月22日下晡5點舉行，遺族李夫人 Lē-chu 女士，kap兩男 7 女， 女婿，內外孫， 孫女， kap 親友，會友等，圍纍tī身邊，隆重舉行。
李博士ê告別式禮拜，tī 6月28日下晡兩點起， tī雙連禮拜堂舉行，到時總會，北大， 星中，北中，馬偕病院等 ê 代表， kap 各教會，機關團體ê 牧長，兄姐，來賓，共有300 外人出席。儀式隆重 舉行。 吳 Thian-pó教師司儀， 周 Khèng-ian先生奏樂。 張 Hông-chhiong牧師讀詩篇116篇，林 Pó-siông牧師祈禱，許Chuí-lō͘牧師講故人略歷。 陳 Khoe-chùn牧師用「寶貴ê死」做題講道。然後總會代表黃總幹事Bú-tong牧師，北大議長黃La̍k-tiám牧師，星中議長兼馬偕病院ê 董事長 許 Gông-bô͘牧師，北中議長 陳 Huī-chhiong牧師，高雄醫學院院長杜聰明博士，kap 馬偕病院羅總務主任 等 代表總會， 大會，中會，學院，病院來講悼詞。 褒獎李長老Ta̍t-chong博士ê信德，忠誠盡職kap gâu做人，真濟好事，thang做咱ê模樣kap安慰遺族。為著時間ê 制限， iáu有真濟來賓 kap真友soà無時間thang講悼詞，真遺憾。許 Pin-se̍k牧師讀悼電，後來馬偕病院，雙連教會，中正教會等 ê聖歌隊ê悼歌，然後會眾起立默禱兩分鐘追念李長老。許Chuí-lō͘牧師代表遺族講謝辭，最後請89 歲 Ia̍p Kim-bo̍k牧師祝禱閉會。隨時護送靈柩到台北縣 ê 觀音山 公塚安葬。
李長老Ta̍t-chong博士，uî-hè 3 男 7 女， 7 女婿 kap 46名ê內外孫 kap ka-ná-孫。 伊得主ê賜福，多壽，多才， 多子孫。
李長老ê大公子故 Khé-hui 君，畢業東京日本大學法科。次男 Tek-hui 君，畢業日本京都工業大學，服務順天堂製藥廠。三男 Tong-hui 君，畢業東京日本大學經濟科，經營汽車補習班（中英汽車補習班）。令嬡Kím-lân 桑，Kiok-hun桑，Chhái-bî桑，攏畢業省立台南一高女， Gio̍k-sian桑，畢業日本昭和女子 藥專， Sò͘-sian桑，oán-sian桑，Poē-sian桑等，畢業淡江女中高中部。
李長老Ta̍t-chong博士ê七個女婿， 逐個 to 大專畢業。大女婿 吳Lâi-sêng 法學士，畢業日本中央 大學法科，奉職 tī彰化銀行做經理。第2 女婿林Chài-heng醫學士，畢業台大學院，tī 楠梓開業，tī 楠梓教會做長老， 林長老娘 Kiok-hun桑，也是楠梓教會ê長老，真熱心，歡喜獻工，獻錢。第三女婿 洪 kim-lêng醫學士，畢業台大醫學院，tī Bān-hêng 開業，洪太太 Chhái-bî桑做Bān-hêng教會ê執事，夫婦攏熱心，歡喜獻工 kap獻錢。大女婿 吳Lâi-sêng 經理kap太太攏真熱心信主，對教會歡喜獻工 kap獻錢。
女婿劉 Khek-chiau醫學士，畢業台大醫學院，家己開業tī台北，夫婦攏熱心信主，服務教會。女婿 林 Sek-sî，畢業東京農業大學(農學院)，現任 糧食局稽正。女婿 張 Kiam-hong先生，畢業參謀大學，現任中-chò（中校），團管區ê 課長。 女婿陳 Chheng-hong先生畢業高商， 自己營商 (做生理)。
李長老ê內外孫，攏共46名，其中三個tī 台大醫學院，其他 tī 大專， 高中，初中，國校在學中。願主施恩賜福遺族身，心，靈得健康。