數念Sú Hoâi-chek博士
Siàu-liām Sú Hoâi-chek Phok-sū
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第966號 |
| 日期 | 1965/9 |
| 頁數 | 2 |
白話字（原文數位化）
Siàu-liām Sú Hoâi-chek Phok-sū
Táng Eng-gī.
1965.09.15 P.2
Bat tit-tio̍h Lo̍k-poè-ní chióng-kim (Nobel Prizer) ê sîn-ha̍k-ka Sú Hoâi-chek Pok-sū (Albert Schweitzer), tī pún ge̍h 4 ji̍t bông Cú un-tiàu, keng-kè 16 tiám-cheng āu, i hō͘ lâng bâi-chòng tī i só͘ chhòng-sit ê Hui-chiu sim-lîm-tiong ê pīⁿ-īⁿ ê bōng-toē.
Sú Phok-sū tiàm sè-kan 90 nî kú, i sui-jiân ū tit-tio̍h Sîn-ha̍k, Tiat-ha̍k kap I-ha̍k Phok-sū ê ha̍k-uī, tān-sī i ê it-seng iû-goân toā-pō͘-hūn sî-kan lóng iōng tī Hui-chiu ê só͘-chāi, uī-tio̍h Hui-chiu ê lâng siat-li̍p pīⁿ-īⁿ, uī kan-khó͘ ê lâng khoàⁿ-pīⁿ. Sú Phok-sū thang kóng sī chi̍t uī ki-tok phok-ài cheng-sîn ê si̍t-hêng-chiá.
Tng i kè-sin ê siau-sit thoân kàu choân sè-kài ê sî, tāi-ke siàu-liām i sī chi̍t uī 20 sè-kí ê uí-jîn.
Sú Phok-sū tī Chú-āu 1875 nî 1 ge̍h 14 ji̍t chhut-sì tī Tek-kok ê A-ní-sat-su（阿爾薩斯）ê só͘-chāi, i ê lāu-pē sī hit só͘-chāi ê bo̍k-su, i teh tha̍k Tiong-o̍h ê sî, in-uī ka-têng keng-chè ê koan-hē, ko͘-put-chiong tio̍h iau-kiû i ê a-peh kā i pang-chān, hō͘ i tha̍k chheh. Tāi-ha̍k pit-gia̍p liáu-āu, i ū tit-tio̍h chióng-ha̍k-kim chìn ji̍p gián-kiù-īⁿ, i só͘ gián-kiù ê sī Sîn-ha̍k kap Tiat-ha̍k, tān-sī i tī khò-goā ê sî-kan, iáu-kú gián-kiù im-ga̍k. Chú-āu 1899 nî ū tit-tio̍h Tiat-ha̍k Phok-sū ha̍k-uī, lâu tī ha̍k-hāu choè kàu-siū.
Sú Phok-sū 30 hè ê siⁿ-ji̍t ê sî, i ū khoàⁿ-tio̍h chi̍t pún Hoat-gú ê “Thoân-tō cha̍p-chì,” hit pún cha̍p-chì ê tiong-kan ū chi̍t phiⁿ teh kóng siū-tio̍h Siōng-tè chín-tiàu ê lâng tio̍h eng-kai koat-sim khì Hui-chiu ê só͘-chāi thoân hok-im. I chiū li̍p-chì beh khì Hui-chiu thoân hok-im, tong-sî i koat-tēng beh choè chi̍t uī i-seng, choè i-liâu thoân-tō ê kang, in-uī i kám-kak i-liâu thoân-tō oē hō͘ i choè chi̍t uī Ki-tok phok-ài cheng-sîn ê si̍t-hêng-chiá, i chai-iáⁿ Hui-chiu ê lâng siông-siông ū pīⁿ khì chhē soan-kàu-su ê sî, boē thang tit-tio̍h i-liâu, só͘-í i chiah koat-tēng choè in lêng-hûn kap jio̍k-thé ê i-seng-bo̍k-su kap i-seng.
I uī-tio̍h koh tha̍k I-ha̍k-īⁿ, só͘-í hòng-khì To-má Sîn-ha̍k īⁿ-tiúⁿ ê chit-uī, koh chìn-ji̍p i-ha̍k-īⁿ tha̍k-chheh.
Tng i 38 hè ê sî, i kap i kiat-hun bô joā-kú ê hū-jîn-lâng khì Hui-chiu tiàm Long-pa-sui-ni ê só͘-chāi, uī-tio̍h Hui-chiu ê kan-khó͘ lâng kiàn-li̍p chi̍t keng pīⁿ-īⁿ, i tī hit keng pīⁿ-īⁿ ê tiong-kan i-tī 6 bān goā ê Hui-chiu ê pīⁿ-lâng.
In-uī i it-seng ê tiong-kan lóng hoat-hui Ki-tok phok-ài ê cheng-sîn, koh tiàm Hui-chiu si̍t-hêng jîn-tō chú-gī, só͘-í tī 1952 nî ū tit-tio̍h Lo̍k-poé-ní hô-pêng chióng-kim, i iû-goân bô êng thang khì niá chióng-kim, āu-lâi i ū chiong chit ê chióng-kim choân-pō͘ choè kiàn-tiok bâ-hong pīⁿ-īⁿ ê lō͘-ēng. I kám-kak he̍k-chú bú-khì tuì jîn-luī ê sún-sit chin toā, só͘-í i ū iau-kiû tāi-ke tio̍h eng-kai khí-lâi tok-chhiok chèng-hú kiōng-tông chhiam-tēng hia̍p-iok, thêng-chí chhì-giām he̍k-chú bú-khì.
Chit ê tāi-chì ín-khí sè-kài kok-kok ê chù-ì, āu-lâi chiah ū kìm-chí he̍k-chú chhì-giām hia̍p-tēng.
Chóng kóng, Sú Phok-sū it-seng uī-tio̍h Chú choè kang, tiàm Hui-chiu ê só͘-chāi chhin-sin chiông-sū i-liâu thoân-tō, chhiong-hun hoat-siā ki-tok phok-ài ê kong-hui（光輝）chiò kng hit ê o͘-àm Hui-chiu ê só͘-chāi, hō͘ lâng jīn-tēng i sī 20 sè-kí ê uí-jîn, ia̍h hō͘ Ki-tok ê miâ ko-kú tī toē-chiūⁿ.
漢羅（Ùi原文改寫）
數念Sú Hoâi-chek博士
Bat得著 Lo̍k-poè-ní獎金(Nobel Prizer) ê神學家Sú Hoâi-chek 博士(Albert Schweitzer)，tī本月4日蒙主恩召，經過16點鐘後，伊 hō͘人埋葬tī 伊所創設 ê 非洲森林中ê病院ê墓地。
Sú博士tiàm世間90年久，伊雖然有得著神學，哲學kap醫學博士ê 學位，但是伊ê一生猶原大-部分時間攏用 tī 非洲 ê所在，為著 非洲 ê人設立病院，為艱苦ê人看病。Sú博士thang講是一位基督博愛精神ê實行者。
當伊過身ê消息傳教全世界ê時，大家數念伊是一位20世紀ê偉人。
Sú博士tī主後1875年1月14日出世 tī 德國 ê A-ní-sat-su（阿爾薩斯）ê所在，伊ê老父是hit所在ê牧師，伊 teh讀中學ê時，因為家庭經濟ê關係，姑不將著要求伊ê 阿伯 kā 伊幫贊，hō͘ 伊讀冊。大學畢業了後，伊有得著獎學金進入研究院，伊所研究ê是神學 kap哲學，但是伊 tī 課外 ê時間，iáu-kú研究音樂。主後1899年有得著哲學博士學位， 留 tī學校做教授。
Sú博士30 歲 ê生日ê時，伊有看著一本法語 ê「傳道雜誌，」hit本雜誌ê 中間有一篇teh講受著上帝chín-召ê人著應該決心去非洲 ê所在傳福音。伊就立志beh去非洲傳福音，當時伊決定beh做一位醫生，做醫療傳道ê 工，因為伊感覺醫療傳道會 hō͘伊做一位基督博愛精神ê實行者， 伊知影 非洲 ê人常常有病去chhē宣教師ê時，boē-thang得著醫療，所以伊chiah決定做in靈魂kap肉體ê醫生-牧師kap醫生。
伊為著 koh讀伊學院，所以放棄多馬神學院長ê 職位， koh進入醫學院讀冊。
當伊 38 歲 ê時，伊 kap 伊結婚無joā久ê婦人人去非洲 tiàm Long-pa-sui-ni ê所在，為著 非洲 ê艱苦人建立一間病院，伊 tī hit 間病院ê 中間醫治6 萬外個非洲 ê病人。
因為伊一生ê中間攏發揮基督博愛ê精神，koh tiàm 非洲實行人道主義，所以tī 1952年有得著 Lo̍k-poé-ní和平獎金，伊猶原無閒thang去領獎金，後來伊有將這個獎金全部做建築痲瘋病院ê路用。伊感覺核子武器對人類ê損失真大，所以伊有要求大家著應該起來督促政府共同簽訂協約，停止試驗核子武器。
這個代誌引起世界各國ê注意，後來chiah有禁止核子試驗協定。
總講：Sú博士一生為著主做工，tiàm 非洲 ê所在親身從事醫療傳道，充分發射基督博愛ê光輝（光輝）照光 hit個烏暗非洲 ê所在，hō͘人認定伊是20世紀ê偉人，亦hō͘基督ê名高舉tī地上。