鄉村ê傳教者
Hiong-chhoan ê Thoân-kàu-chiá
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第962號 |
| 日期 | 1965/7 |
| 頁數 | 8 |
白話字（原文數位化）
Hiong-chhoan ê Thoân-kàu-chiá
Teng En̂g-lîm
1965.07.15 P.8-14
Lé-pài ê jîn-sò͘ ti̍t-ti̍t kiám-chió, chū-hoē chiām-chiām léng-tām.
—-Chit keng hiong-chhoan ê T. M. kàu-hoē tī chiâⁿ cha̍p nî chêng hō͘ lâng khoàⁿ choè sī hoē-iú choē, keng-chè hó, sìn-tô͘ jia̍t-sim ê kàu-hoē; nā-sī kūn-lâi hián-jiân teh soe-thè lah.
Lîm Tiong-iông Thoân-tō kuī tī pài-tn̂g ê káng-tâi chêng teh kî-tó; kau-chi̍p tī i sim-lāi ê thòng-khó͘ thang tuì chhuì-nih ê thó͘-khuì chhám-chhoeh, sīm-chì lâu ba̍k-sái ê siaⁿ piáu-hiān chhut-lâi. Kî-tó soah, chhin-chhiūⁿ chin ià-siān ê khoán-sit, ji̍p-lâi chē tī tha̍k-chheh uī, chhi̍h toh-téng ê ji̍t-kong-teng to̍h, chhiú lám-heng, thâu-khak kia̍h koâiⁿ teh tîm-su; chi̍t-bō͘ chi̍t-bō͘ ê hoê-ek tuì i ê náu-lāi cháu kè-khì.
Nn̄g nî chêng: I chhoā hū-jîn-lâng Siok-cheng kap nn̄g ê kiáⁿ-jî Kèng-it, Sìn-it lâi kàu chit keng kàu-hoē hù-jīm. Hu-hū lóng phāu tio̍h moá-hoâi ê jia̍t chêng beh uī Chú chè kang, sū-si̍t iā án-ni; in ū choân-sim piàⁿ-miā tī só͘ kau-tāi ê chit-hūn. I tek-pia̍t ū pò͘-tō ê un-sù, só͘-í tuì goā ê kang-chok; bô-lūn tāi-chiòng pò͘-tō, á-sī kò-jîn pò͘-tō lóng chīn só͘ oē ê teh choè. àm-sî nā bô chū-hoē, chiū chio hoē-iú, tióng-chip khì ta̍k chng-siā pò͘-tō, choè hoàn-teng, pun pò͘-tō-toaⁿ. Ū sî i ka-kī chi̍t ê lâng khì kap hiah ê boē io̍h-á ê ông-lo̍k-sian chē, tī koe-lō͘ piⁿ káng-kái hok-im, chio lâng lâi tit pêng-an io̍h, hit ê jia̍t-chêng bô khah su hiah ê lâng. Ji̍t-sî tī lō͘-nih, á-sī kok ka-têng khì kap siā-hoē kok-sek, kok-iūⁿ ê bī-sìn-chiá chiap-chhiok tâm-tō…… I án-ni choè, chiū-sī i chai-iáⁿ che sī kin-á-ji̍t hiong-chhoan kàu-hoē bán-kiù thè-pō͘ ê î-it hong-hoat. Ū-iáⁿ! lâng sui-jiân ngī-sim bô hiah khoài lâi sìn, m̄-kú ū choè kang pit-tēng ū siu-sêng, tī chi̍t nn̄g nî bô ià-siān ê kag-chok hā, iā tit-tio̍h 5 hō͘ ê choân ke kap kuí-nā ê chheng-liân lâi bō͘-tō, ū ê iā siū soé-lé, nā-sī án-ni iáu bô hoat-tō͘ thang èng-hù to͘-chhī ê siau-lō͘（供不應求）. Nn̄g nî chêng i lâi hù-jīm ê sî kàu-hoē ū 30 hō͘, taⁿ ū ke-thiⁿ 5 hō͘, eng-kai sī 35 hō͘ chiah tio̍h, m̄-kú si̍t-chāi chiah chhun 20 goā hō͘ nā-tiāⁿ, só͘ bô khì ê lâng tong-jiân lóng sī siū sî-tāi ê kip-piàn, kang-gia̍p siā-hoē ê éng-hióng lâu chhut-khì tī goā-bīn lah; jî-chiáⁿ chiah ê lâng toā-pō͘-hūn sī khah jia̍t-sim, keng-chè iā pí-kàu khah hó ê lâng. Chhin-chhiūⁿ choè I-seng ê Lâu Tiúⁿ-ló; choè toā sū-gia̍p ê Tân Tiúⁿ-ló; choè seng-lí ê Ông Chip-sū, á-sī kong-bū-oân Sím Kho-tiúⁿ, Lô͘ Lāu-su téng-téng, in lóng sī kàu-hoē ê toā thiāu-chio̍h. In ê lī-khui ná chhin-chhiūⁿ chi̍t keng chhù ê tòng-liông chiām-chiām siū thiah cháu chi̍t-iūⁿ. Sui-jiân in tī to͘-chhī ê kàu-hoē iû-goân iā kè-sio̍k in ê jia̍t-sim, nā-sī chhân-chng ê kàu-hoē ná lâi ná giâm-tiōng. Lé-pài-ji̍t khoàⁿ-kìⁿ cheng-chheng（清清）bān-bān（慢慢）ê hoē-iú teh choè lé-pài, lāi-bīn 40 liâu í-á kàu-gia̍h hō͘ chi̍t lâng chē chi̍t liâu koh ū chhun. I siu-éng bûn-ngá ê káng-tō hong-sek, boē thag chhì-khek chiah ê lāu-lâng kap kū-jîn-lâng ê siau-hoà; ū sî chí-ū chiâⁿ-hoè chi̍t tiûⁿ ê chhui-bîn-khiok chhiùⁿ hō͘ in an-bîn ji̍p thian-kok nā-tiāⁿ; hoē-iú chi̍t phiàn jia̍t-sêng ê hé ji̍p-lâi kèng-pài, hoán-tg2 toà tio̍h chi̍t tè léng-tām ê peng tńg-khì. In ê sìn-sim kiám-chhái chiū tī chit khoán ê khong-khì tiong léng-tām lah.
Kūn-lâi i chai-iáⁿ hoē-iú chiām-chiām teh bô hoan-gêng i. Che thang tuì tī kî-tó-hoē in ê kî-tó khoàⁿ--chhut-lâi:
“Siōng-tè ah! kiû Lí ê Sèng Sîn chhiong-moá Lí ê kang-lâng, hō͘ i gâu choè kang, hō͘ goán ê kàu-hoē chhin-chhiūⁿ í-chêng ê khoán-sit……”
Kim ē-àm sī i choè kan-khó͘ sim, choè siū chhì-khek ê chi̍t àm, in-uī kî-tó-hoē soah, nî lāu ê Bo̍k Tiúⁿ-ló khoàⁿ tio̍h kî-tó-hoē ê jîn-sò chió kàu chhiⁿ-chhìn, the̍h chhut i ê chèng-gī-kám, tng i ê bīn-chêng bô soè-jī kóng:
“Sian-siⁿ ah! khoàⁿ-māi leh, chiah-nih chió lâng teh chū-hoē, lí kiám bô khoàⁿ-tio̍h?”
“Goá chai, nā-sī goá pí lín khah kan-khó͘ sim, goá pèng m̄-sī bô chīn goá ê khuì-la̍t, chóng-sī m̄-chai goá tio̍h cháiⁿ-iūⁿ choè?”
“Goá ê iau-kiû sī : chí iàu lí hoê-ho̍k chhin-chhiūⁿ nn̄g nî chêng ê chêng-hêng chiū hó.”
“Bo̍k Tiúⁿ-ló, kàu-hoē soe-thè ê goân-in, m̄-thang lóng-chióng koài goá, che sī sî-tāi ê hiān-siōng, kin-á-ji̍t ê hiong-chhoan kàu-hoē tāi-pō͘-hūn lóng siāng khoán ê kéng-gū. Kàu-hoē pún-lâi hiah ê toā-chiāu lóng chhut-khì lah, sin lâi ê hoē-iú beh chō-chiū kàu chhin-chhiūⁿ hiah ê lâng, m̄-sī chin khoài ê sū.”
“Che sī sū-si̍t, goá m̄-káⁿ hó͘-jīn; m̄-kú lán khoàⁿ chá-sî ê thoân-kàu-chiá uī sím-mi̍h oē thang hō͘ kàu-hoē tit-tio̍h heng-ōng, jî kin-á-ji̍t ê thoân-tō-chiá boē tàng nih? Goá ê ì-sù, sī lán eng-kai tio̍h koh hùn-hoat chiah tio̍h.”
“To-siā, goá chiah chīn só͘ oē ê lâi phah-piàⁿ, chhiáⁿ lín iā kap goá ha̍p-chok.”
X X X X X
Siok-chēng ê àm-mî ti̍t-ti̍t tò-oá, goā-bīn ê hong hū-hū-háu, nā-sī i lóng bô kám-kak. Hut-jiân i thó͘ chi̍t ê toā-khuì ê siaⁿ kiaⁿ-chhíⁿ teh khùn ê hū-jîn-lâng Siok-cheng.
“ÊN! Tiong-iông, lí iáu-bē khùn, hiān-chāi í-keng sī poàⁿ-mî lah.” Siok-cheng tuì bîn-chhn̂g peh khí-lâi, lâi chē tī i ê sin-piⁿ, koh kóng, “Ū sím-mi̍h tāi-chì hō͘ lí sit-bîn?”
“Siok-cheng, goá siūⁿ beh lī-khui thoân-tō ê kang.”
“Lí m̄-thang uī-tio̍h Bo̍k Tiúⁿ-ló só͘ kóng hiah ê oē lâi sit-chì.” Siok-cheng an-uì i kóng, “Bo̍k Tiúⁿ-ló ê oē sui-jiân ū khah bô kheh-khì, m̄-kú i só͘ kóng ê pèng m̄-sī m̄-tio̍h. I sī lāu toā-lâng, lán sī chheng-liân lâng, i tuì lán ê kéng-kò, sī hō lán khah oē kín-sīn kap kek-khí lán choè kang ê jia̍t-sêng, che tuì lán sī ū lī-ek ê.”
“Goá m̄-sī siong-sim Bo̍k Tiúⁿ-ló ê oē, goá sī kám-kak goá bô kàu khuì-la̍t thang hō͘ Chú ēng, m̄-thang khang chiàm thó͘-toē, put-jû lī-khui kàu-kài lâi khì choè pa̍t khoán ê kang-chok. iā ēng lán só͘ choè oē tit kàu ê sî-kan kap kim-chîⁿ lâi hōng-hiàn hō͘ Chú, che kap choè thoân-tō pîⁿ-pîⁿ siāng khoán, jī-chhiáⁿ tuì Siōng-tè kap lâng lóng khah pêng-an.”
“án-ni, lí sī m̄ kam-goān kā Chú choè kang, beh tô-pī sù-bēng sī bô?”
“M̄-sī, goá chin chū-kak; goān choè lô͘-po̍k tio̍h siū lâng siat-to̍k chit kù oē.”
“Lí ê oē ū mâu-tún.” Siok-cheng chhiò-chhiò kóng, “Lí kì-jiân goān choè lô͘-po̍k, lim chit ê khó͘-poe, uī sím-mi̍h iū-koh siūⁿ beh lī-khui sù-bēng khì choè pa̍t khoán ê kang?”
“In-uī goá kám-kak boē thang êng-kng Siōng-tè lī-ek lâng ah.”
“Nā-sī án-ni bô iàu-kín, lán ê Chú sī ài mn̄g lán ū teh choè bô? I bô mn̄g choè liáu án-choáⁿ, chí iàu lán tī Siōng-tè ê bīn-chêng bô kiàn-siàu I ê kang, án-ni chiū hó. chóng-sī ká-sú lán nā siam-pi chit ê sù-bēng, it-tēng boē thang tit-tio̍h chiok-hok. Goá siông-siông tian kóng í-chêng poàn-tô͘ jî-hoè ê kang-lâng, kàu bé lóng hō͘ Siōng-tè bô hoaⁿ-hí, tú-tio̍h bô hó kiat-kó.”
“Siok-cheng, lí ê kiàn-kài ū tām-po̍h chhò-gō͘, lí kóng nā bô choè thoân-tō, Siōng-tè bô chiok-hok, goá bô chàn-sêng lí chit kù oē. “Thoân-tō chit nn̄g jī m̄-sī pau-hâm ū chip-chiàu ê bo̍k-su, thoân-tō nā-tiāⁿ. Hiān-chāi lán teh kiông-tiau”Sìn-tô͘ kai-peng,” “Kang-gia̍p chit-he̍k thoân-tō.” Chit ê ì-sù sī kóng “Muí chi̍t ê hoē-iú lóng sī thoân-tō-jîn.” Choè chi̍t ê kàu-tn̂g, chhin-chhiūⁿ biō-kong chú-chhî lé-pài, chū-hoē, sûn hoē-iú nā-tiāⁿ, kî-thaⁿ ê ji̍t êng-êng bô choè sū. Kin-á-ji̍t ê sìn-tô͘ eng-kai tio̍h khiā tī ka-kī ê kong-uī siōng lâi choè kng, choè iâm ê sù-bēng, kiàn-chèng Ki-tok. Só͘-í goá siūⁿ hiah ê pêng-sî tī siā-hoē teh ho̍k-bū jîn-kûn, iā siāng-sî tī kàu-hoē teh choè kang ê sìn-tô͘ chiah sī sî-tāi ê thoâng-tō-chiá. Nā án-ni beh án-choáⁿ kóng Siōng-tè bô hoan-hí, hoán-tńg sī hō͘ Siōng-tè toā chiok-hok chiah tio̍h; sū-si̍t goá mā khoàⁿ chit khoán ê lâng chin chiàⁿ hō͘ Siōng-tè chiok-hok ê lâng chin-choē. Put-kò iā ū chin-choē lī-khui kàu-kài liáu-āu, soà lī-khui Siōng-tè ê lâng, goá to m̄-káⁿ kóng.”
“Goá chàn-sêng lí chiâⁿ-choè chi̍t ê sî-tāi ê thoân-kàu-chiá, nā-sī bô chàn-sêng lí lī-kui kàu-kài, in-uī goá kiaⁿ-liáu lí chit khoán ê lí-sióng, kàu ū chi̍t ji̍t phian-tiōng tī sè-kan lâi lī-khui Siōng-tè iā bô tek-khak.”
“Hó! goá chai lí ê ì-sù, goá goān pē chit ki sî-tāi ê si̍p-jī-kè.” Tiong-iông hut-jiân khoàⁿ-kìⁿ nn̄g ê kiáⁿ-jî khùn kàu chin suí, soà kóng, “M̄-kú lán ê kiáⁿ-jî chiong-lâi m̄-thang koh hō͘ in ū hūn chit ê kan-khó͘; goá hiān-chāi chiah chai, uī sím-mi̍h chin-choē thoân-kàu-chiá ê chú-tē chin chió lâng kè-sêng chit ê kang-chok ê goân-in lah.”
“Soè-kiáⁿ iáu-bē toā-hàn, lán m̄-chai Siōng-tè chiong-lâi jû-hô kā in an-pâi, lán boē thang kóng sím-mi̍h; put-kò bô-lūn in chiong lâi ū choè thoân-tō-chiá, á-sī choè pa̍t khoán ê kang, lán tī chit ê sî lóng tio̍h hó-hó chai-poê in tuì Siōng-tè eng-kai ū ê sù-bēng-kám chiah tio̍h.”
Siok-cheng kóng liáu, Tiong-iông put chí kám-kek i ê sìn-sim, tuì i ê chhiú khan leh, nn̄g lâng chiū kuī tī bîn-chhn̂g téng kî-tó.
Kî-tó soah, khoàⁿ goā-bīn ê thang-á, tuì tang-pêng siā-ji̍p chi̍t tiâu kng-soàⁿ, chiah chai thiⁿ í-keng kng lah.
X X X X X
Kin-á-ji̍t í-keng sī ge̍h-té lah, koè-kè Lô Chip-sū iáu-bē the̍h sin-kim lâi, chiàu í-chêng lóng tī ge̍h-tiong chiū oē the̍h--lâi, sui-jiân boē thang it-tēng ê ji̍t-kî chheng-chhó, iáu kú boē chhin-chhiūⁿ chit pái keng-kè beh 10 ji̍t kú lah. Chá-khí Siok-cheng beh chhut-khì boé chhài, chîⁿ-tē-á lāi péng-lâi péng-khì, chhun 5 kak gûn nā-tiāⁿ, bô hoat-tō͘ thang chhut mn̂g; tī lāi-bīn kiâⁿ-lâi kiâⁿ-khì, sim-lāi iā tio̍h-kip, iā kî-tó nn̄g ê kiáⁿ Kèng-it, Sìn-it ti̍t-ti̍t chhá ma-ma tio̍h koáⁿ-kín khì.
“Ma-ma, kin-á-ji̍t tio̍h kā goán boé bah tńg-lâi o͘h, goán chin kú lóng bô phè bah lah,” Kèng-it khiú lāu-bú ê saⁿ-á kóng.
“Ma-ma, tio̍h kā goá boé Tomato tńg-lâi o͘h,” Sìn-it iā kóng.
“Hó! Hó! tán chi̍t-ē, ma-ma it-tēng kā lín boé”
Tiong-iông khoàⁿ tio̍h nn̄g ê káⁿ teh chhá lāu-bú, khoàn liáu sim kan-khó͘, chiah tuì Siok-cheng kóng,
“Goá siūⁿ, tio̍h tńg-lâi kā pa-pa chhun tn̂g-chhiú chiah tio̍h.”
“M̄-kú chhun 5 kak gûn, beh án-choáⁿ chē chhia tńg-khì the̍h.”
“ia̍h bô mā tio̍h siá phoe kiò pa-pa kià 100 kho͘ lâi.”
“Tī chîⁿ iáu-bē lâi ê chitⁿg7, saⁿ ji̍t beh án-choáⁿ kè.”
“Ū-iáⁿ to tio̍h.” Tiong-iông thâu-khak khi-khi teh siūⁿ bô pān-hoat, chin kú chiah siūⁿ-tio̍h.
“Ah! Bêng-jîn hiaⁿ pêng-sî kap lán chin hó, lí seng khì kā i chioh 20 kho͘ hó bô?”
“M̄-thang, choa̍t-tuì m̄-thang; choè thoân-kàu-chiá bô-lūn jû-hô boē ēng-tit kā hoē-iú chioh chîⁿ, oē éng-hióng lán ê jîn-keh.”
“Á-sī lâi-khì kā tâng-kang ê Liāu Sian-siⁿ chioh hó bô?”
“Kuí ji̍t chêng i chiah cháu lâi kā lán chioh bô leh, lí soà boē kì-tit.”
“Lô Chip-sū kūn-ji̍t tit-tio̍h chi̍t ê eⁿ-á, tāi-khài sī bô-êng kàu boē kì-tit. Goá lâi-khì in tau, chi̍t bīn khoàⁿ i ê eⁿ-á, chi̍t bīn khoàⁿ i oē sūn-soà the̍h hō͘ goá boē?”
“Chit ê pān-hoat hó, chóng-sī i ê chhù chin hn̄g, khì koh tńg-lâi í-keng kè tàu lah, tiong-tàu m̄ tio̍h hō͘ iau?”
“Mā bô hoat-tō͘, goá chiah khiâ chhia khah kín leh, khoàⁿ oē thang tńg-lâi hù tàu boē?”
I ê chhia tú-á beh khiâ chhut-khì, Lô Chip-sū iā tú-hó khiâ chhia ji̍p-lâi.
“Lô Chip-sū pêng-an.”
“Pêng-an, sian-siⁿ-niû pêng-an,”
“Pêng-an, chhiáⁿ ji̍p-lâi chē.” Siok-cheng ná kóng ná giâ í, 3 ê lâng lóng ji̍p-lâi chē lâng-kheh-hiaⁿ.
“Chin kiong-hí, kám-siā Chú siúⁿ-sù lí koh tit-tio̍h chi̍t ê kong-chú, goá tú-tú be lâi-khì kā lí pài-hóng. Taⁿ Chip-sū-niû kap eⁿ-á lóng pêng-an ho͘N3?”
“Sī lah, tāi-khài koh nn̄g ge̍h-ji̍t.”
“Hāi lah, lán kàu-hoē ê keng-chè ná lâi ná bái, chit ge̍h-ji̍t kā lí thoa kè chiah kú, si̍t-chāi chin pháiⁿ-sè; sī in-uī khêng bô kàu thang hō͘ lí, khì tuì hoē-iú ê chhù kā in bō͘-koan, chiah bān kàu kin-á-ji̍t.”
“Boē lah, lí hiah-nih bô-êng, koh hō͘ lí tio̍h-boâ, chin to-siā.” Lô Chip-sū tuì choá tē-á piàⁿ chhut chi̍t tui ê chîⁿ, ū 10 kho͘--ê 5 kho͘--ê , chi̍t kho͘--ê, 5 kak--ê, iā ū nn̄g kak, chi̍t kak--ê.
“Lâi, lán lâi tàu sǹg, chiah ê sī tēng-kî hiàn-kim, lé-pài hiàn-kim, iā tuì Chú-ji̍t-o̍h hit pêng chioh lâi saⁿ-thiⁿ, khêng-khêng leh tú-á hó.”
“Ah! chiah choē chîⁿ, ma-ma, lán ū thang boé chhài lah.” Hut-jiân Sìn-it toā siaⁿ hoah chhut-lâi, hō͘ Tiong-iông, Siok-cheng ê bīn lóng âng--khí-lâi.
“Chit ge̍h-ji̍t ê bí, chi̍t kun sī 3 kho͘ poàⁿ; 4 ê lâng 160kun, tú-hó sī 560 kho͘, ha̍p pún-hōng 550 kho͘, lóng-chóng sī 1110 kho͘, lí sǹg khoàⁿ ū bô?”
“M̄-bián, chin to-siā.” Tiong-iông chiap hiah ê chîⁿ chiū suî-sî tuì 10 kho͘--ê the̍h 10 tiuⁿ khí-lâi, kóng, “Lô Chip-sū, chit ge̍h-ji̍t ê cha̍p-hūn-chi̍t hōng-hián, goá soà hō͘ lí, chin sit-lé kàu hiān-chāi chiah the̍h hō͘ lí.” Jiân-āu chiong hiah ê chîⁿ kau hō͘ Siok-cheng.
“Ah! hó! hó! án-ni chin tú-hó, chiah ê chîⁿ thang the̍h lâi-khì la̍p pún-ge̍h hūn ê tiān-huì, kā lâng khiàm kuí-nā ji̍t, hō͘ lâng lâi chhui kuí-nā pái.” Hut-jiân Lô Chip-sū ê bīn pìⁿ giâm-siok khí-lâi, chhin-chhiūⁿ ū oē beh kóng, m̄-káⁿ khui-chhuì, kám-kak chin pháiⁿ-sek3 ê khoán-sit, chin kú chiah kóng.
“Lîm Sian-siⁿ, ū chi̍t hāng tāi-chì chin pháiⁿ-sè kóng, m̄-kú sī siū tio̍h tióng-chip ê kau-tāi, bô kóng iā boē ēng-tit.”
“Bô iàu-kín, chí iàu choè oē tit kàu, goá goān chiap-siū lín ê ì-kiàn, chhiáⁿ lí kóng.”
“Lô Chip-sū goá seng sit-lé, goá tio̍h lâi-khì boé chhài, chhiáⁿ lí hia chē.” Siok-cheng tuì í-á peh khí-lâi.
“Hó! hó! chhiáⁿ lí bô-êng.” Lô Chip-sū tàm-thâu liáu-āu chiah ǹg Tiong-iông kóng,
“Cha hng chin àm, goán kuí-nā ê tióng-chip tī Bo̍k Tiúⁿ-ló ê chhù chham-siông kàu-hoē keng-chè ê būn-toê, in lóng kám-kak tio̍h kàu-hoē keng-chè chiah khùn-lân, m̄-chai lí oē thang chiong “pān-kong-huì” hit tiâu 5 chi-chhut siūⁿ pān-hoat khah chiat-séng leh boē?”
“Chit ê ì-sù sī án-choáⁿ, goá bô sím-mi̍h bêng-pe̍k.”
“Phì-jū lâi kóng: siok-sià lāi-bīn ê ēng tiān, chhin-chhiūⁿ chú-pn̄g ēng tiān-ko; joa̍h-thiⁿ ēng tiān-hong; àm-sî ê teng tiám chin àm, chiah ê khoàⁿ oē thang khah séng á boē?”
Tiong-iông chai-iáⁿ chit ê ì-sù, nā-sī i tiām-tiām lóng bô ìn, Lô Chip-sū koh kè-sio̍k kóng,
“In iā kóng, chhin-chhiūⁿ it-poaⁿ ê pò-choá, á-sī kàu-hoē ê XX pò, chiah ê lán 5 hoē-iú lóng ū lâng tēng-ia̍t, chiah mâ-hoân lí khì in chhù khoàⁿ; kan-ta Kàu-hoē Kong-pò kap En̂g-kong pò chiū hó, in-uī chit nn̄g ê khan-bu̍t sī lán Tiúⁿ-ló Kàu-hoē bô boē ēng-tit ê; nā án-ni, chi̍t nî oē thang séng kuí-nā pah kho͘, m̄-chai lí ê ì-kiàn án-choáⁿ?”
Hut-jiân lāi-bīn ê khong-khì chin an-chēng, cin kú Tiong-iông chiah chin soè-siaⁿ ìn-tap.
“àm-sî ê teng tiám chin àm, sī goá ê toh-téng hit ki 10 w ê ji̍t kong teng nā-tiāⁿ…… goá m̄-chai be án-choáⁿ. Kì-jiân choè chi̍t ê Siōng-tè ê lô͘-po̍k, boē thang hióng-siū goá só͘ ū ê koân-lī, goá iā m̄-káⁿ ke kóng sím-mi̍h. Put-kò lín eng-kai chai-iáⁿ, hō͘ chi̍t ê thoân-kàu-chiá boē thang koáⁿ tio̍h sî-tāi, hit ê sòng-sit m̄-nā i pún-sin nā-tiāⁿ, chéng-kò kàu-hoē ê sòng-sit koh-khah toā.” Chit sî Tiong-iông chin kek-tōng, ná lâi ná toā siaⁿ, ti̍t-ti̍t kóng.
“Goá bat thian tio̍h bó͘ tióng-chip chhin-sin tuì goá kóng, kūn-lâi ê sian-siⁿ, bo̍k-su sī teh thoân-tō͘, m̄-sī teh thoân-tō; khoàⁿ i lāi-bīn ê tiān-khì siat-pī, chhēng-chhah…… nā kap nn̄g chheng nî chêng ê Chú Iâ-so͘, kiâⁿ soé-lé Iok-hān, á-sī Pó-lô in pí-kàu khí-lâi, si̍t-chāi chha thiⁿ kàu toē. M̄-kú bô kuí-ji̍t āu chit ê tióng-chip koh khoàⁿ tio̍h chi̍t ê thoân-tō sian-siⁿ chhēng kah chin kán-tan, i mā kóng, choè kah chi̍t ê thoân-tō, bô sêng chi̍t ê sian-siⁿ pān, i kóng tō-lí mā bô lâng beh thiaⁿ. Lí siūⁿ, beh kiò sian-siⁿ sī choè sî-tāi ê lo̍k-ngō͘-chiá á-sī chiân-hong?”
Chit sî lán teh ko-chhiùⁿ “ Hok-im put-piàn, sî-tāi th piàn, thoân-tō tio̍h piàn” ê sî-tāi. Lán ê tióng-chip sī ài-goá khiā tī sím-mi̍h li̍p-tiûⁿ? oē kì-tit goá hù-jīm ê sî, ài lín chhoā goá lâi-khì kap toē-hng ê kok ki-koan siú-tiúⁿ se̍k-sāi; lín kóng kàu-hoē m̄-thang kap sè-kan chham-chhap, āu-lâi goá ka-kī khì chhē in, in ta̍k ê to chin hoan-gêng goá thoân hok-im hō͘ in thiaⁿ. Goá beh chhiáⁿ in lâi káng-ián; lín kóng-m̄-bián thiaⁿ hit khoán sio̍k-sū. Goá beh chio lín chhut-lâi pò͘-tō, lín kóng tāi-seng hō͘ kàu-hoē khah jia̍t-sim chiū hó. chêng-pái goá beh chhiáⁿ lán hiong ê oē-seng-só͘ sán-pô lâi tuì Lú soan káng-ián ka-têng “Chiat-io̍k” būn-toê, hō͘ hiah ê lāu-lâng toā-toā hoán-tuì, kóng goá bô sìn-gióng. Goá beh khui Iù-tī-hn̂g（幼稚園）; lín phoe-phêng goá ài beh hō͘ sian-siⁿ-niû choè pó-bó ke thàn chîⁿ. Goá beh khui pó͘-si̍p-pan, gī-bū kà ha̍k-seng; lín kóng goá sī teh tián phòng-hong, ài miâ-siaⁿ, ū ê kóng goá sī teh choè piàn-siòng ê ok-sèng pò͘-si̍p thàn-chîⁿ. Goá kóng lán kàu-hoē tio̍h koan-sim siā-hoē ho̍k-bū siā-hoē lín kóng goá teh thoân siā-hoē hok-im. Goá tī káng-tō kiông-tiau sìn-tô͘ eng-kai tio̍h ēng “Thiàⁿ kap ho̍k-bū lâi kiàn-siat Siōng-tè kok tī toē ná chhin-chhiūⁿ tī thiⁿ-nih; lín kóng goá teh kóng sin Sîn-ha̍k, lóng bô sio̍k-lêng ê seng-oa̍h…… Goá m̄-chai beh án-choáⁿ choè?” Kóng kàu chia i thó͘ chi̍t ê khuì.
“Lîm Sian-siⁿ, chhiáⁿ lí m̄-thang gō͘-hoē goá; tú-chiah ê oē, sī goá khah ke-pô kā lí choán-ta̍t ê, m̄-sī goá ê ì-sù.”
“Goá chai-iáⁿ, chin sit-lé; chhiáⁿ goân-liōng goá ê kek-tōng.” Siok-cheng tú-á boé chhài tńg-lâi, í-keng 11 tiám lah.
“ia̍h bô, goá khah sit-lé, sî-kan bô chá, tio̍h tńg-lâi khì,” Lô Chip-sū tuì í-á peh khí-lâi, saⁿ-sî chiū tńg-khì.
X X X X X
Hit ê-tàu chia̍h-pn̄g, nn̄g ê kiáⁿ khoàⁿ tio̍h toh-téng ū bah, chin hoan-hí, soè-hàn ê Sìn-it phah pho̍k-á kóng,
“Ē-tàu goá beh kám-siā.” Sì ê lâng ba̍k-chiu khoeh-khoeh.
“Kám-siā Thiⁿ-pē, siúⁿ-sù bí-niû, koh ū bah hō͘ goán chia̍h, khò Iâ-so͘ ê miâ. A-men.”
Nn̄g ê kiáⁿ-jî ná chhin-chhiūⁿ kaⁿ-siû, chia̍h kah chin hoaⁿ-hí; nā-sī Tiong-iông phâng hit oáⁿ pn̄g khí-lâi, khoàⁿ tio̍h Siok-cheng ê pak-tó͘, iû-jiân ba̍k-sái lâu chhut-lâi, nn̄g ê gín-ná lóng bo̍k-bêng kî-biāu, sì luí ba̍k-chiu ti̍t-ti̍t kā i siòng, toā-hàn ê Kèng-it kā lāu-bú kóng,
“Ma-ma, lí kā pa-pa pun siuⁿ chió mi̍h-phè teh háu-à lah.,” hit sî Siok-cheng ê ba̍k-sái iā lâu chhut-lâi, nā-sī chhuì soà ài-chhiò.
Hit ê-tàu bô chia̍h pn̄g, Tiong-iông khiâ chi̍t tiám goā cheng ê chhia lâi kàu chhī-lāi chhē i choè hó ê lāu-su, choè oē pang-chān i ê Lí Khí-bêng Bo̍k-su, kìⁿ tio̍h bīn khui chhuì chiū kóng,
“Lí Bo̍k-su, goá bô hoat-tō͘ thang koh jím-siū tī chit keng kàu-hoē choè kang; goá koat-tēng beh sin-chhéng tiāu-tōng.”
“Hó, chin hó, chhiáⁿ lí kóng, nā ū chi̍t hāng sū pí Chú Iâ-so͘ só͘ siū tio̍h ê khah toā, goá goān-ì kā lí pang-bâng.”
“Lí ê ì-sù sī bô hoaⁿ-hí goá oāⁿ uī.”
“oē thang án-ni kóng.” Lí bo̍k-su tìm-thâu, “in-uī ū chin-choē ê tông-o̍h lóng chhin-chhiūⁿ lí lâi án-ni tuì goá iau-kiû kè, nā-sī in sêng-siū goá ê khó͘-khǹg, lóng koh tò-tńg khì in ê chit-uī.”
“M̄-kú goá siong-sìn, goá nā kóng hō͘ lí thiaⁿ liáu-āu, lí ún-tàng boē chó͘-tòng goá ê iau-kiû.”
“Chhiáⁿ lí kóng khoàⁿ-māi.”
Tiong-iông chiū ēng kek-tōng koh hùn-khài ê oē tuì lí Bo̍k-su ti̍t-ti̍t kóng, nā chhin-chhiūⁿ chi̍t ê siū un-khut 5 lâng tuì hoat-koaⁿ teh hun-sò͘ chi̍t-iūⁿ, i àn-sǹg chē tī bīn-chêng ê lāu-su oē kap i saⁿ-kap hùn-khài, nā-sī Lí Bo̍k-su thiaⁿ liáu put-tān bô tōng-iông, hoán-tńg ha-ha toa chhiò kóng,
“Lí iáu pí Tiuⁿ Ta̍t-în tông-o̍h khah thang kám-siā, i hō͘ chèng hoē-iú beh koáⁿ chhut-khì, koh kuí-nā ge̍h-ji̍t ê sin-kim bô thang hō͘ i lah.”
Pí siōng put-chiok, pí hā iú û（比上不足，比下有餘）. Tiong iông ka-kī kám-kak, án-ni goá iáu thang kám-siā, sim chiah tām-po̍h an-uì, m̄-kú i ê sim-lāi iáu chhiong-moá chin-choē gî-bûn, tuì Lí bo̍k-su kóng,
‘uī sím-mi̍h choè chi̍t ê kang-lâng tio̍h án-ni siū-khó͘? uī sím-mi̍h sìn-tô͘ boē thang thé-liōng lán kap lán tâng-sim ho̍k-heng kàu-hoē? uī sím-mi̍h lán boē thang hióng-siū tio̍h sî-tāi ê koân-lī? uī sím-mi̍h lán ê ka-têng boē thang kap in pîⁿ-téng ê thāi-gū, uī sím-mi̍h……”
“Chhiáⁿ lí m̄-thang ti̍t-ti̍t kóng uī sím-mi̍h.” Lí Bo̍k-su chám-tn̄g i ê uī sím-mi̍h chiap lâi kóng, “Boē ēng-tit mn̄g Siōng-tè,”
uī sím-mi̍h tio̍h tuì Siōng-tè mn̄g kóng, “Goá tio̍h choè sím-mi̍h?” á-sī kóng, “Lí kā goá hē tī chia sī ài goá choè sím-mi̍h?”
Tiong-iông hō͘ Lí Bo̍k-su kóng án-ni, chhì-chha̍k i ê sim, soà kám-kak chin kiàn-siàu, Lí Bo̍k-su iā bô soè-jī kè-sio̍k kóng,
“Tiong-iông kun, kin-á-ji̍t hiong-chhoan kàu-hoē ê kéng-gū, goá hui-siông ê liáu-kái kap tông-chêng, te̍k-pia̍t sī chiah ê tâng-kang, put-kò goá ū 3 tiám ê kiàn-gī kóng hō͘ lí choè chham-khó, chhiáⁿ lí chiah siông-sè siūⁿ khoàⁿ-māi.”
1) Choè chi̍t ê chheng-liân ê thoân-kàu-chiá, tio̍h tāi-seng chū-kak chiah ê tāi-chì sī it-tēng oē pōng-tio̍h ê chhì-phiè. M̄-bián kóng kàu Sèng-keng tiong hiah ê sian-ti, sù-tô, te̍k-pia̍t sī Chú Iâ-so͘, chiū-sī lán hiān-chāi chiah ê toā bo̍k-su chu sian-poè, in ê sêng-kong lóng sī tī chit khoán ê hé-iām tiong jím-siū sêng-kong ê. Chóng-sī kūn-lâi ê kang-lâng ná chhin-chhiūⁿ tuì chit khoán ê khó͘-lān khoàⁿ choè boē koàn-sì, bô eng-kai. Goá jim-uî jú ū chit khoán ê khó͘-lān jú oē thang hián-bêng Siōng-tè tuì lí ê khì-tiōng. Só͘ uī “ pi-ài ê só͘-chāi chiū-sī Sèng ê toē.” Lí iā chai-iáⁿ sè-kài chhut-miâ ê Sèng-koa:
Goá só͘ sī 5 khó͘-lān, bô lâng chai-iáⁿ,
————En̂g-iāu Ha-le-lú-iah.
Sī chiah ê o͘-lâng tiàm tī chit khoán thòng-khó͘ ê pi-ai só͘ chhiùⁿ-chhut sèng-lī ê im-ga̍k, só͘-í chhiáⁿ lí m̄-thang tí-khòng būn-toê.
2) Kàu-hoē boē chìn-pō͘, sìn-tô͘ boē thang liáu-kái, keng-chè ê khùn-lân, che sī kin-á-ji̍t hiong-chhoan kàu-hoē pit-jiân ê hiān-siōng, só͘-í m̄-bián kè-thâu siong-sim, chí iàu tī Siōng-tè ê bîn-chêng chin pún-hūn khì choè chiū hó. Lán eng-kai tio̍h ēng tông-chêng ê gán-kong chhè chhut goân-in liáu-kái in chiah tio̍h. Sū-si̍t-siōng chiah ê sìn tô͘ ê sìn-sim á-sī hōng-hiàn, lóng bô khah su tī chho͘-tāi ê sìn-tô͘, put-kò sī sim iú û le̍k put-chiok（心餘力拙）nā-tiāⁿ. Goá khoàⁿ in chin-choē sìn-tô͘ ê keng-chè hiah-nih khùn-lân, sīm-chì bô thang chia̍h, bô thang chhēng, nā-sī khoàⁿ in chi̍t nî ê hōng-hiàn ê sò͘-jī hui-siông ê kiaⁿ lâng, kàu-gia̍h hō͘ siâⁿ-chhī ê sìn-tô͘ kiàn-siàu, hō͘ goá hui-siông ê kám-kek, só͘-í lán tio̍h ū hūn tī in ê kan-khó͘, iā sī eng-kai ê.
3) Choè iàu-kín ê chi̍t hāng: m̄-thang tô-pī sù-beng, choa̍t-tuì m̄-thang uī-tio̍h chiah ê khùn-lân lâi siūⁿ beh tiāu-tōng, án-ni sī hián-bêng lán sī sèng-kang siōng ê pāi-pok-chiá（敗北者）. Lán teh kó͘-bú lán ê sìn-sô͘ tī chit ê sî-tāi tio̍h o̍h Chú ê khoán-sit; “Tuì-thiⁿ lâi kàu choē-ok ê sè-kài choè I chín-kiù lâng, thiàⁿ lâng ê kang, sīm-chì chiong chit ki chân-jím khó-phàⁿ ê si̍p-jī-kè pìⁿ-chiâⁿ êng-kng chhàn-lān ê kì-hō, só͘-í tio̍h tī chi̍t ê o͘-àm ê sè-kan choè kng, choè iâm ê sù-bēng.” Sū-si̍t chit ê chek-jīm tú-á sī lán tiàm tī hiong-chhoan kàu-hoē Siōng-tè só͘ hō͘ lán thoân-kàu-chiá kim-ji̍t ê khò-toê. Beh án-choáⁿ tiông-sin keng-êng chit keng kàu-hoē hoê-ho̍k chhin-chhiūⁿ í-chêng hiah-nih chhàn-lān ê le̍k-sú? Beh án-choáⁿ kiáu-chèng（矯正）sìn-tô͘ ê kū koan-liām, saⁿ-kap tī sin sî-tāi tâng hū-khí Chú ê kok? che chiah sī kin-á-ji̍t lán tio̍h siūⁿ, tio̍h choè ê būn-toê. Tong-jiân būn-toê m̄-sī hiah-nih kán-tan, iā m̄-sī it-sî chiū oē thang sêng-kong ê, nā-sī chit ê sî-tāi tú-tú sī kū ê beh kè-khì, sin ê teh beh lâi ê chin-khong chōng-thài（真空狀態）hā, chiàⁿ-sī lán choè kang ê hó-ki-hoē, lán nā oē thang tu̍t-phoà ba̍k-chêng ê lân-koan, pâi tī bīn-chêng ê sī sèng-lī kap sêng-kong lah. Goá ê oē lí thiaⁿ liáu oē liáu-kái boē?
Tiong-iông bô ìn, ti̍t-ti̍t tàm-thâu, bīn lō͘ chhut chhiò-iông, thang chai i chi̍t phiàn iu-ut, giâu-gî ê sim ì-keng hō͘ bo̍k-su ê oē chhiong-phoà.
“Bo̍k-su, nā-sī án-ni, ba̍k-chêng choè iàu-kín ê kang-chok sī sím-mi̍h?”
“Hiān-chāi choè iàu-kín ê kang-chok ū nn̄g hāng: Tē 1, tuì goā eng-kai siūⁿ chhut biāu-hoat “Thoân-tō,” tú-tú chiàu lí só͘ teh choè ê kè-sio̍k khì choè, m̄-thang ià-siān. Tē 2, tuì lāi, “Kàu-io̍k,” sìn-tô͘ ê gō͘-kái kap sêng-kiàn lóng sī khoat-hoa̍t kàu-io̍k ê goân-in.”
“M̄-kú pâi tī bīn-chêng ê seng-oa̍h būn-toê boē thang kái-koat, beh kiò lâng án-choáⁿ jím-siū?”
“Sī, che sī choè toā ê būn-toê, goá teh siūⁿ eng-kai tuì 3 hong-bīn lâi kái-koat: Tē 1, tiong-hoē eng-kai koan-sim. Tē 2, to͘-chhī kàu-hoē iā chhiáⁿ chhun-chhut pang-chān ê chhiú lâi. Tē 3, chhut goā ê hoē-iú eng-kai tī keng-chè tńg-lâi oān-chō͘ bú-hoē chiah tio̍h.”
“Che sī chin hó ê hong-hoat, m̄-chai in goān-ì kè-lâi pang-chān goán bô?”
“Goá oē chīn só͘ oē ê lâi ho͘-io̍k chit ê kang-chok.”
“To-siā bo̍k-su ê chí-sī, taⁿ goá bô beh tô-pī Chú ê sù-bēng, goān giâ chit ki si̍p-jī-kè, lim chit ê khó͘-poe lâi hū-khí sî-tāi ê chek-jīm. Chhiáⁿ bo̍k-su siông-siông thoè goá kî-tó.”
Ji̍t-thâu í-keng lo̍h-soaⁿ, chhù-lāi ê tiān-hé to̍h khí-lâi. àm-tǹg hō͘ Lí bo̍k-su chhiáⁿ liáu-āu, i chiū suî-sî lī-pia̍t bo̍k-su.
X X X X X
Goā-bīn sui-jiân àm, lō͘ sui-jiân hn̄g, nā-sī i khiâ hit tiuⁿ phoà-kū ê chū-choán-chhia, chhiong-moá tio̍h bē bat ū ê hoaⁿ-hí kap ǹg-bāng, ti̍t-ti̍t ǹg chhù teh khiâ, lóng bô kám-kak kiaⁿ-hiâⁿ. I ê kha ná teh ta̍h, chhuì ná liām i pêng-sî só͘ ài liām ê chi̍t chat si:
Tī iu-ut hong liâng ê chhiū-nâ lāi,
Bô chhàn-lān ê ji̍t-kng teh chiò;
Chhiⁿ-chhìn ê o͘-iáⁿ kui ji̍t teh tà-oá,
Sìⁿ-miā hoa̍t-phoat ê kì-hō bô lâng khoàⁿ tio̍h.
○○○ ○○○ ○○○ ○○○
Siok-chēng ê lō͘-piⁿ, siⁿ-chhut chi̍t luí kiau-nńg ê hoe-luí;
I m̄-kiaⁿ pháiⁿ ê khoân-kéng pau-uî sin-piⁿ
I chīn só͘ oē chhèng chhut hun-hong ê phang-bī,
iā tián-khui bí-lē ê gân-sek;
Hō͘ kè-lō͘ ià-siān ê lú-kheh,
Tit-tio̍h un-loán in sim-lêng;
iā pàng-khin in tîm-tāng ê kha-pō͘.
Kha ná ta̍h ná kín, i koh siūⁿ-khí Dant ê Sîn-khiok（神曲）khai-thâu ê chi̍t kù oē:
Tī goá jîn-seng ê lú-hêng tiong,
Tī chit ê o͘-àm ê chhiū-nâ-lāi;
Goá chhē tio̍h goá ka-kī.
Put-ti put-kak ê tiong-kan kàu chhù-lah, chhù-lāi ê tiān-hé to̍h chin kng; thiaⁿ-kìⁿ Siok-cheng teh toâⁿ-khîm kà nn̄g ê kiáⁿ chhiùⁿ-koa. I khiā tī mn̂g-khá, tiām-tiām thiaⁿ kàu chhiùⁿ liáu, chiah ēng i ê chhiú phah pho̍k-á chhut siaⁿ kóng,
“Chin gâu chhiùⁿ, chin hó-thiaⁿ.”
Nn̄g ê kiáⁿ, chi̍t ê thiaⁿ-tio̍h lāu-pē tńg-lâi, hoaⁿ-hí kàu ke̍k, cháu chhut-lâi hō͘ i phō, chi̍t chhiú phō chi̍t ê; in iā tuì i ê thâu-khak lám-leh, chi̍t ê chhuì-phoé ti̍t-ti̍t kā i chim. Chin kú soè-kiáⁿ Sìn-it chiah khí-thâu sai-nai kóng,
“Pa-pa! ma-ma kóng beh siⁿ chi̍t ê me-me hō͘ goán neh, lán lâi lé-pài, kā Siōng-tè thó khah kín hō͘ lán.”
“Tio̍h! hó! taⁿ chē hō͘ hó, lâi choè lé-pài.”
(Oân).
漢羅（Ùi原文改寫）
鄉村ê傳教者
禮拜ê人數直直減少，聚會漸漸冷淡。
—-這間鄉村ê T. M.教會tī成十年前hō͘人看做是會友濟，經濟好，信徒熱心ê教會；若是近來顯然teh衰退lah.
Lîm Tiong-iông傳道歸 tī 拜堂ê 講台前teh祈禱， 教執tī 伊心內ê痛苦thang 對嘴裡 ê吐氣慘慼，甚至流目屎ê 聲表現出來。祈禱soah，親像真厭倦ê款式，入來坐tī讀冊位， chhi̍h桌頂ê日光燈 to̍h，手攬胸，頭殼kia̍h高teh沉思；一幕一幕ê回憶對伊ê 腦內走過去。
兩年前：伊 chhoā婦人人Siok-cheng kap兩個囝兒Kèng-it，Sìn-it來到這間教會赴任。夫婦攏抱著滿懷ê熱情beh 為主做工，事實也án-ni； in有全心拚命 tī所交代ê職份。伊特別有佈道ê恩賜，所以對外ê工作；無論大眾佈道，抑是個人佈道攏盡所會ê teh做。暗時若無聚會，就招會友，長執去逐 庄舍佈道，做幻燈，分佈道單。有時伊家己一個人去kap hiah ê 賣 藥-á ê王祿仙坐，tī街路邊講解福音，招人來得平安藥, hit個熱情無khah 輸 hiah ê人。日時tī路裡，抑是各家庭去kap社會各式，各樣ê未信者接觸談道。伊 án-ni做，就是伊知影這是今á日鄉村教會挽救退步 ê 唯一方法。有影！人雖然硬心無hiah快來信，m̄-kú有做工必定有收成，tī一兩年無厭倦ê 工作下，也得著5戶 ê全家kap 幾-nā個青年來bō͘-tō，有ê也受洗禮，若是án-ni iáu無法度thang應付都市ê 銷路（供不應求）。兩年前伊來赴任 ê時教會有30 戶, taⁿ有加添5 戶，應該是35 戶 chiah 著， m̄-kú實在chiah chhun 20 外戶nā-tiāⁿ，所無去ê人當然攏是受時代ê 急變，工業社會ê影響流出去tī外面lah； 而且 chiah ê人大部分是khah熱心，經濟也比較khah好ê人。親像做醫生ê Lâu長老；最大事業ê Tân長老；做生理ê王執事，抑是公務員Sím Kho-tiúⁿ， Lô͘老師等等，in攏是教會 ê大柱石。In ê離開ná親像一間厝ê 棟樑漸漸受拆走一樣。雖然in tī都市ê教會猶原也繼續in ê熱心，若是田庄 ê教會ná來ná嚴重。禮拜日看見清清（清清）慢慢（慢慢）ê會友teh做禮拜，內面40條椅-á夠額hō͘一人坐一條 koh有chhun。 伊siu-éng文雅ê講道方式，boē thang 刺激 chiah ê老人kap 婦人人ê 消化；有時只有成歲一場ê 催眠曲唱hō͘ in安眠入天國nā-tiāⁿ;會友一片熱誠 ê 匯入來敬拜，反-tńg toà 著一塊冷淡ê 冰 tńg去。In ê信心kiám-chhái就tī 這款ê空氣中冷淡lah.
近來伊知影會友漸漸teh無歡迎伊。這thang對tī祈禱會 in ê祈禱看--出來：
「上帝ah！求你ê聖神充滿你ê工人，hō͘ 伊 gâu做工，hō͘阮ê教會親像以前ê 款式……」
Kim ē-暗是伊最艱苦心，最受刺激 ê一暗，因為祈禱會soah，年老ê Bo̍k長老看著祈禱會 ê 人數少到悽凊，the̍h出伊ê正義感，當伊ê面前無細膩講：
「先生ah！看覓leh， chiah-nih少人teh聚會，你kiám無看著？」
「我知，若是我比恁 khah艱苦心，我並 m̄是無盡我ê氣力，總是m̄知我著怎樣做？」
「我ê要求是：只要你回復親像兩年前ê情形就好。」
「Bo̍k長老，教會衰退ê原因，m̄-thang攏總怪我，這是時代ê現象，今á日ê鄉村教會大部分攏相款ê境遇。教會本來hiah ê大柱攏出去lah，新來ê會友beh 造就到親像hiah ê人，m̄-是真快ê事。」
「這是事實，我m̄敢否認; m̄-kú咱看早時ê傳教者為甚麼會 thang hō͘教會得著興旺，而今á日ê傳道者boē tàng nih？我ê意思，是咱應該著 koh 奮發 chiah tio̍h.」
「多謝，我chiah盡所會ê來拍拚，請恁也kap我合作。」
X X X X X
肅靜ê暗暝直直tò-oá,外面ê 風 hū-hū-哮，若是伊攏無感覺。忽然伊吐一個大氣ê 聲驚醒teh睏ê 婦人人 Siok-cheng.
「ÊN！Tiong-iông，你iáu未睏，現在已經是半暝lah。」Siok-cheng 對眠床peh起來，來坐tī伊ê身邊，koh講：「有甚麼代誌hō͘你失眠？」
「Siok-cheng，我想beh離開傳道ê 工。」
「你m̄-thang為著 Bo̍k長老所講hiah ê話來失志。」Siok-cheng安慰伊講：「Bo̍k長老ê話雖然有khah無客氣，m̄-kú伊所講ê 並 m̄是m̄-tio̍h。 伊是老大人，咱是青年人，伊對咱ê警告，是hō͘咱khah 會謹慎kap激起咱做工ê熱誠，這對咱是有利益ê。」
「我m̄是傷心Bo̍k長老ê話，我是感覺我無夠氣力thang hō͘主用，m̄-thang 空佔土地，不如離開教界來去做別款ê工作。也用咱所做會得到 ê時間kap金錢來奉獻hō͘主，這kap做傳道平平相款，而且對上帝kap人攏khah平安。」
「án-ni,你是m̄甘願kā主做工，beh逃避使命是無？」
「m̄是，我真自覺；願做奴僕著受人褻瀆這句話。」
「你ê話有矛盾。」Siok-cheng笑笑講：「你既然願做奴僕，lim 這個苦杯，為甚麼又koh想beh離開使命去做別款ê 工？」
「因為我感覺boē-thang榮光上帝利益人ah。」
「若是án-ni無要緊，咱ê主是ài問咱有teh做無？伊無問做了按怎， 只要咱tī上帝ê面前無見笑伊ê 工，án-ni就好。總是假使咱若siám-pi 這個使命，一定boē-thang得著祝福。我常常聽講以前半途而廢ê工人，到尾攏hō͘上帝無歡喜，tú-著無好結果。」
「Siok-cheng，你ê 見解有淡薄錯誤，你講若無做傳道，上帝無祝福，我無贊成你這句話。「傳道這兩字 m̄是包含有執照ê 牧師，傳道nā-tiāⁿ。現在咱teh 強調「信徒皆兵」「工業chit-he̍k傳道。」這個意思是講「每一個會友攏是傳道人。」做一個教長，親像廟公主持禮拜，聚會，巡會友nā-tiāⁿ, 其他ê日閒閒無做事。今á日ê信徒應該著 khiā tī家己ê kong-uī上來做光，做鹽ê使命，見證基督。所以我想hiah ê平時tī社會teh服務人群，也siāng-時tī教會teh做工ê信徒chiah是時代ê 傳道者。 若 án-ni beh 按怎講上帝無歡喜，反tńg是hō͘上帝大祝福chiah tio̍h；事實我mā 看這款ê人真正hō͘上帝祝福ê人真濟。不過也有真濟離開教界了後，soà離開上帝ê人，我to m̄敢講。」
「我贊成你成做一個時代ê傳教者，若是無贊成你離開教界，因為我驚了你這款ê理想，到有一日偏重 tī世間來離開上帝也無的確。」
「好！我知你 ê意思，我願背這隻時代ê十字架。」Tiong-iông忽然看見兩個囝兒睏到真suí，續講：”M̄-kú咱ê 囝兒將來m̄-thang koh hō͘ in有份這個艱苦，我現在chiah知，為甚麼真濟傳教者 ê子弟真少人繼承這個工作ê原因lah。」
「細囝iáu未大漢，咱m̄知上帝將來如何kā in安排，咱boē-thang講甚麼，不過無論in將來有做傳道者，抑是做別款ê 工，咱tī 這個時攏著好好栽培in 對上帝應該有ê使命感 chiah tio̍h。」
Siok-cheng講了，Tiong-iông 不止感激伊ê信心，對伊ê手牽 leh,兩人就跪 tī眠床頂祈禱。
祈禱soah，看外面ê窗á，對東旁射入一條光線，chiah知天已經光lah.
X X X X X
今á日已經是月底 lah， 會計 羅執事iáu未the̍h 薪津來，照以前攏tī月中就會the̍h--來，雖然boē-thang一定ê日期清楚，iáu-kú boē親像這擺經過beh 10日久lah。早起Siok-cheng beh出去買菜，錢袋-á內péng-來péng-去，chhun 5 角銀nā-tiāⁿ，無法度thang出門； tī內面行來行去，心內也著急，也祈禱兩個囝Kèng-it，Sèng-it直直吵媽媽著趕緊去。
「媽媽，今á日著kā阮買肉tńg來o͘h，阮真久攏無配肉lah，」Kèng-it khiú老母ê衫-á講。
「媽媽，著 kā我買 Tomato tńg來o͘h,」Sèng-it也講。
「好！好！等一下，媽媽一定kā 恁買」
Tiong-iông看著兩個囝teh 吵老母，看了心艱苦，chiah 對 Siok-cheng講：
「我想，著 tńg來kā 爸爸 chhun 長手chiah tio̍h.」
「M̄-kú chhun 5 角銀，beh 按怎坐車 tńg去the̍h.」
「亦無mā 著寫批叫爸爸寄100 箍來。」
「Tī錢iáu未來ê 這兩，三日beh 按怎過。」
「有影to tio̍h.」Tiong-iông頭殼khi-khi teh想無辦法，真久chiah想著。
「Ah! Bêng-jîn 兄平時kap咱真好，你先去kā 伊借20 箍好無？」
「M̄-thang，絕對m̄-thang；做傳教者無論如何boē用得kā會友借錢，會影響咱ê 人格。」
「抑是來去kā同工ê 廖先生借好無？」
「幾日前伊 chiah走來kā咱借無leh,你soà boē記得。」
「羅執事近日得著一個嬰á，大概是無閒到 boē記得。我來去in 兜，一面看伊ê嬰á，一面看伊會順續the̍h hō͘我boē？」
「這個辦法好，總是伊ê厝真遠，去koh tńg來已經過晝 lah,中晝m̄ 著 hō͘ iau？」
「Mā無法度，我chiah騎車 khah 緊 leh，看會 thang tńg來赴晝 boē？」
伊ê 車 tú-á beh騎出去，羅執事也tú-好騎車入來。
「羅執事平安。」
「平安，先生娘平安，」
「平安，請入來坐。」Siok-cheng ná講ná giâ 椅，三個人攏入來坐人客廳。
「真恭喜，感謝主賞賜你koh得著一個公子，我tú-tú be來去kā你拜訪。Taⁿ執事娘 kap嬰á攏平安好？」
「是lah，大概koh兩月日。」
「害 lah，咱教會ê經濟ná來ná bái， 這月日kā你拖過chiah久，實在真歹勢; 是因為khêng無夠thang hō͘你，去對會友ê厝kā in 募款， chiah 慢到今á日。」
「Boē lah， 你 hiah-nih無閒，koh hō͘你著磨，真多謝。」羅執事對紙袋-á piàⁿ出一堆 ê錢，有10 箍--ê 5 箍--ê，一箍--ê, 5 角--ê，也有兩角，一角--ê。
「來，咱來鬥算，chiah ê是定期獻金，禮拜獻金，也對主日學hit 旁借來相添， khêng-khêng leh tú-á好。」
「Ah！ chiah濟錢，媽媽，咱有thang 買菜 lah.」忽然Sèng-it大聲hoah出來，hō͘ Tiong-iông， Siok-cheng ê面攏紅--起來。
「這月日ê 米，一斤是3 箍半， 4 個人160斤， tú-好是560 箍，合本奉550 箍，攏總是1110 箍，你算看有無？」
「m̄免，真多謝。」Tiong-iông 接 hiah ê錢就隨時對 10 箍--ê the̍h 10 張起來，講：「羅執事，這月日ê十份一奉獻，我續hō͘你，真失禮到現在chiah the̍h hō͘你。」然後將hiah ê錢交hō͘ Siok-cheng。
「Ah！好！好！án-ni真tú-好，chiah ê錢thang the̍h來去la̍p本月份 ê 電費， kā人欠幾-nā日，hō͘人來催幾-nā擺。」忽然羅執事ê面變嚴肅起來，親像有話 beh講：m̄敢開嘴，感覺真歹勢ê 款式，真久chiah講。
「林先生，有一項代誌真歹勢講：m̄-kú是受著長執 ê交代，無講也boē用得。」
「無要緊，只要做會得到，我願接受恁 ê意見，請你講。」
「羅執事我先失禮，我著來去買菜，請你hia坐。」Siok-cheng 對椅-á peh起來。
「好！好！請你無閒。」羅執事tàm-頭了後chiah ǹgTiong-iông講：
「Cha 昏真暗，阮幾-nā ê長執 tī Bo̍k 長老 ê 厝參詳教會經濟ê 問題， in攏感覺著教會經濟chiah困難，m̄知你會thang將「辦公費」 hit 條 ê 支出想辦法khah 節省 leh boē？」
「這個意思是按怎，我無甚麼明白。」
「譬喻來講:：宿舍內面ê用電，親像煮飯用電鍋；熱天用電風，暗時ê 燈點真暗，chiah ê看會 thang khah 省 á boē？」
Tiong-iông知影這個意思，若是伊恬恬攏無應， 羅執事koh繼續講：
「In也講：親像一般ê報紙，抑是教會ê XX報, chiah ê咱ê會友攏有人訂閱， chiah麻煩你去in厝看； kan-ta教會公報kap 榮光報就好，因為這兩個刊物是咱長老教會無boē用得ê；若án-ni，一年會 thang 省幾-nā 百箍， m̄知你ê意見按怎？」
忽然內面ê空氣真安靜，真久Tiong-iông chiah真細聲應答。
「暗時ê燈點真暗，是我ê桌頂hit 支 10 w ê日光燈nā-tiāⁿ……我m̄知be 按怎。既然做一個上帝ê奴僕，boē-thang享受我所有ê權利，我也m̄敢加講甚麼。不過恁應該知影，hō͘一個傳教者 boē-thang趕著時代，hit ê喪失m̄-nā伊本身nā-tiāⁿ， 整個教會ê喪失koh-khah大。」這時Tiong-iông真激動， ná來ná大聲，直直講。
「我bat 聽著某長執親身對我講，近來ê先生，牧師是teh傳道， m̄是teh傳道；看伊內面ê 電器設備，穿插……若kap兩千年前ê主耶穌，行洗禮約翰，抑是保羅in比較起來，實在差天到地。 M̄-kú無幾日後這個長執koh看著一個傳道先生穿 kah真簡單，伊mā講：做kah一個傳道，無sêng一個先生扮，伊講道理mā無人 beh聽。你想，beh叫先生是做時代ê 落伍者抑是前鋒？」
這時咱teh 高唱「福音不變，,時代teh變，傳道著變」 ê時代。咱ê長執是ài 我khiā tī甚麼立場？會記得我赴任 ê時，ài 恁 chhoā我來去kap地方ê 各機關首長熟識； 恁講教會m̄-thang kap世間chham-chhap，後來我家己去chhē in， in 逐個to真歡迎我傳福音hō͘ in 聽。我beh請in來講演； 恁講m̄免聽hit款屬事。我beh 招恁出來佈道，恁講事先hō͘教會khah熱心就好。前擺我beh請咱鄉 ê衛生所產婆來對女宣講演家庭「節育」問題， hō͘ hiah ê老人大大反對，講我無信仰。我beh 開幼稚園（幼稚園）； 恁批評我ài beh hō͘先生娘做保母 加趁錢。我beh 開補習班，義務教學生； 恁講我是teh 展膨風， ài名聲，有ê講我是teh做變相 ê 惡性補習趁錢。我講咱教會著關心社會服務社會恁講我teh傳社會福音。我tī講道強調信徒應該著用「疼kap服務來建設上帝國tī 地 ná親像tī 天裡； 恁講我teh講新神學，攏無屬靈ê生活……我m̄知beh 按怎做？」講到chia 伊吐一個氣。
「林先生，請你m̄-thang誤會我； tú-chiah ê話，是我khah 雞婆 kā你轉達 ê， m̄-是我ê意思。」
「我知影，真失禮；請原諒我ê激動。」Siok-cheng tú-á 買菜tńg來，已經11點lah.
「亦無，我khah 失禮，時間無早，著 tńg來去，」羅執事對椅-á peh起來，相辭就tńg去。
X X X X X
hit-ê-晝食飯，兩個囝看著桌頂有肉，真歡喜，細漢ê Sèng-it 拍 pho̍k-á講：
「下晝我beh感謝。」四個人目睭khoeh-khoeh。
「感謝天父，賞賜米糧，koh有肉hō͘阮食， 靠耶穌ê名。A-men。」
兩個囝兒ná親像監囚，食kah真歡喜；若是Tiong-iông 捧hit碗飯起來，看著 Siok-cheng ê腹肚，油然目屎流出來，兩個囡仔攏莫名其妙，四蕊目睭直直kā 伊siòng，大漢ê Kèng-it kā老母講：
「媽媽，你kā 爸爸分siuⁿ少物配 teh哮-à lah.，」hit時Siok-cheng ê目屎也流出來，若是嘴soà ài-笑。
hit-ê-晝無食飯，Tiong-iông騎一點外鐘ê 車來到市內chhē 伊最好ê老師，最會幫贊伊ê李Khí-bêng牧師，見著面開嘴就講：
「李牧師，我無法度thang koh忍受tī 這間教會做工；我決定beh 申請調動。」
「好，真好，請你講：若有一項事比主耶穌所受著 ê khah大，我願意kā你幫忙。」
「你ê意思是無歡喜我換位。」
「會 thang án-ni講。」你牧師tìm-頭，「因為有真濟ê 同學攏親像你來án-ni 對我要求過，若是in承受我ê苦勸，攏koh 倒-tńg去in ê 職位。」
「M̄-kú我相信，我若講hō͘你聽了後，你穩當boē 阻擋我ê要求。」
「請你講看覓。」
Tiong-iông就用激動koh 憤慨 ê話對李牧師直直講：若親像一個受冤屈ê人對 法官 teh分訴一樣，伊按算坐tī面前ê老師會 kap 伊相kap 憤慨；若是李牧師聽了不但無動容，反tńg 哈哈大笑講：
「你iáu 比張Ta̍t-în 同學khah thang感謝，伊 hō͘眾會友beh 趕出去，koh 幾-nā月日ê 薪津無thang hō͘ 伊 lah.」
比上不足，比下有餘（比上不足，比下有餘）。Tiong-iông 家己感覺，án-ni我iáu thang感謝，心chiah淡薄安慰，m̄-kú伊ê心內iáu充滿真濟疑問， 對你牧師講：
「為甚麼做一個工人著 án-ni受苦？為甚麼信徒boē-thang體諒咱kap 咱同心復興教會？為甚麼咱boē-thang享受著時代ê權利？為甚麼咱ê家庭boē-thang kap in平等ê 待遇，為甚麼……」
「請你m̄-thang直直講為甚麼。」你牧師斬斷伊ê為甚麼接來講：”Boē用得問上帝，」
為甚麼著對上帝問講：「我著做甚麼？」抑是講：「你kā我下 tī chia是ài我做甚麼？」
Tiong-iông hō͘李牧師講án-ni，刺鑿伊ê心，soà感覺真見笑，李牧師也無細膩繼續講：
「Tiong-iông 君，今á日鄉村教會ê境遇，我非常ê了解kap同情，特別是chiah ê同工，不過我有3點ê建議講hō͘你做參考，請你chiah詳細想看覓。」
1)做一個青年ê傳教者，著事先自覺 chiah ê代誌是一定會 pōng-著 ê 刺-phè. m̄免講到聖經中hiah ê先知，使徒，特別是主耶穌，就是咱現在chiah ê大牧師諸先輩， in ê成功攏是tī 這款ê火燄中忍受成功ê.總是近來ê工人ná親像對這款ê苦難看做boē慣勢，無應該。我jim-uî jú有這款ê苦難jú 會 thang顯明上帝對你ê器重。所謂「悲哀 ê所在就是聖ê地。」你也知影世界出名ê聖歌：
我所是5苦難，無人知影，
————榮耀Ha-le-lú-iah：
是chiah ê烏人tiàm tī 這款痛苦ê悲哀所唱出勝利ê音樂，所以請你m̄-thang抵抗問題。
2) 教會boē進步，信徒boē-thang了解，經濟ê困難，這是今á日鄉村教會必然 ê 現象，所以m̄免過頭傷心，只要 tī上帝ê 面前真本份去做就好。咱應該著用同情 ê眼光chhè出原因了解in chiah tio̍h。事實上chiah ê信徒 ê信心抑是奉獻，攏無khah 輸 tī初代ê信徒，不過是心有餘 力不足（心餘力拙）nā-tiāⁿ。我看in真濟信徒ê經濟hiah-nih困難，甚至無thang食，無thang穿，若是看in一年ê奉獻ê數字非常ê 驚人，夠額hō͘城市ê信徒見笑，hō͘我非常ê感激，所以咱著有份tī in ê艱苦，也是應該ê。
3)最要緊ê 一項： m̄-thang逃避sù-beng，絕對m̄-thang為著 chiah ê困難來想beh tiāu-tōng， án-ni是顯明咱是聖工上 ê 敗北者（敗北者）。咱teh 鼓舞咱ê信徒 tī 這個時代著學主ê款式; 「對天來到罪惡ê世界做伊拯救人，疼人ê 工，甚至將這支殘忍可怕ê十字架變成榮光燦爛ê記號，所以著 tī一個烏暗ê世間做光，做鹽ê使命。」事實這個責任tú-á是咱tiàm tī鄉村教會上帝所hō͘咱傳教者今日ê 課題。 Beh 按怎重新經營這間教會回復親像以前hiah-nih燦爛ê歷史？Beh 按怎矯正（矯正）信徒ê 舊觀念，相kap tī 新時代同負起主ê國？這chiah是今á日咱著想，著做ê 問題。當然問題 m̄是hiah-nih簡單，也m̄是一時就會thang成功ê，若是這個時代tú-tú是舊 ê beh過去，新 ê teh beh來ê真空狀態（真空狀態）下，正是咱做工ê好機會，咱若會thang突破目前ê 難關， 排 tī面前 ê是勝利kap成功lah。我ê話你聽了會了解boē？
Tiong-iông無應，直直tàm-頭，面露出笑容，thang知伊一片憂鬱，僥疑ê心已經 hō͘牧師ê話衝破。
「牧師，若是án-ni， 目前最要緊ê工作是甚麼？」
「現在最要緊ê工作有兩項： 第1， 對外應該想出妙法「傳道，」tú-tú照理所teh做ê繼續去做，m̄-thang厭倦。第 2，對內，「教育，」信徒ê誤解kap 成見攏是缺乏教育ê原因。」
「M̄-kú 排 tī面前ê生活問題 boē-thang解決，beh叫人按怎忍受？」
「是，這是最大ê 問題，我teh想應該對 3 方面來解決： 第 1，中會應該關心。第 2， 都市教會也請伸出幫贊ê手來。第 3，出外 ê會友應該tī經濟tńg來援助母會 chiah tio̍h.」
「這是真好ê方法，m̄知in願意過來幫贊阮無？」
「我會盡所會 ê來呼籲這個工作。」
「多謝牧師ê指示，taⁿ我無beh逃避主ê 使命，願giâ 這隻十字架，lim 這個苦杯來負起時代ê責任。請牧師常常替我祈禱。」
日頭已經落山，厝內ê電火to̍h起來。暗頓hō͘李牧師請了後，伊就隨時離別牧師。
X X X X X
外面雖然暗，路雖然遠，若是伊騎hit 張破舊 ê 自轉車，充滿著未bat有ê歡喜kap ǹg望，直直ǹg厝teh騎，攏無感覺驚-hiâⁿ。伊ê 腳ná teh踏，嘴ná念伊平時所愛念ê一節詩：
Tī 憂鬱風涼ê樹林內，
無燦爛ê日光teh照;
悽凊ê 烏影歸日teh罩-oá，
性命活潑 ê記號無人看著。
○○○ ○○○ ○○○ ○○○
肅靜ê路邊，生出一蕊嬌軟ê花蕊;
伊m̄驚歹 ê 環境包圍身邊
伊盡所會chhèng出芬芳ê芳味，
也展開美麗ê 顏色；
Hō͘ 過路厭倦ê旅客，
得著溫暖in心靈；
也放輕 in沉重ê腳步。
腳 ná踏ná 緊， 伊 koh想起Dant ê神曲（神曲）開頭ê一句話：
Tī我人生ê旅行中，
Tī 這個烏暗ê樹林內；
我chhē 著我家己。
不知不覺 ê 中間到厝 lah，厝內ê電火to̍h真光；聽見Siok-cheng teh彈琴教兩個囝唱歌。伊 khiā tī門口，恬恬聽到唱了，chiah用伊ê手拍 pho̍k-á出聲講：
「真gâu唱，真好聽。」
兩 個囝，一個聽著老父tńg來，歡喜到極，走出來hō͘ 伊抱，一手抱一個； in也對伊ê頭殼攬-leh，一個嘴phoé直直 kā 伊 chim。真久細囝Sèng-it chiah起頭sai-nai講：
「爸爸！ 媽媽講beh 生一個妹妹 hō͘阮neh，咱來禮拜， kā上帝討khah 緊 hō͘咱。」
「Tio̍h！好！taⁿ坐hō͘好，來做禮拜。」 (完)。