故李Sēng-gô牧師
Kò͘ Lí Sēng-gô Bo̍k-su
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第960號 |
| 日期 | 1965/6 |
| 頁數 | 30 |
白話字（原文數位化）
Kò͘ Lí Sēng-gô Bo̍k-su
Khu thian-teng
1965.06.15. P.30
Lí Sēng-gô Bo̍k-su tī 5 ge̍h 4 ji̍t ē-po͘ 4 tiám 40 hun, tī chū-kí ê chhù siū Chú un-tiàu sek-lô khái-soân kui thian-ke, hióng-siū 73 hè, 5 ge̍h 10 ji̍t ē-po͘ 1 tiám tī iâm-tiâⁿ kàu-hoē kú-hêng iâm-tiâⁿ kàu-hoē chòng, hoē-chòng-chiá ū 800 goā lâng.
Kò͘ Lí Bo̍k-su tī A. D. 1893 nî 11 ge̍h 12 ji̍t, chhut-sì tī Pin-tong koān Bān-tan hiong Téng-chhiong ke-lāi, ū khì Tâi-lâm Tiúⁿ-ló-kàu Tiong-o̍h tha̍k-chheh. Pit-gia̍p liáu-āu chiū chìn-ji̍p Tâi-lâm Sîn-ha̍k-īⁿ, āu-lâi chiū khì Ji̍t-pún kok, Tang-kiaⁿ-to͘ Bêng-tī ha̍k-īⁿ Sîn-ha̍k-pō͘ chhim-chō. Kai-īⁿ pit-gia̍p liáu-āu tńg-lâi Tâi-oân, siū Thoân-tō-kio̍k phài I tī Chhân-tiong kàu-hoē chi̍t nî, Kau-phiâⁿ kàu-hoē poàⁿ nî, Tiô-chiu kàu-hoē 6 nî, Bān-tan kàu-hoē chi̍t nî. Tī A. D. 1929 nî 5 ge̍h 7 ji̍t hù-jīm Ko-hiông chhī pak-iá-teng kàu-hoē bo̍k-su, (hiān-chāi ê iâm-tiâⁿ kàu-hoē) kiam-jīm Ko-hiông Tiong-hoē sûn-hoê bo̍k-su chit-bū, āu-lâi choan-jīm tī iâm-tiâⁿ kàu-hoē bo̍k-hoē, kàu 1953 nî, chīn-thêng thè-hiu. án-ni choè Chú ê kang ū 32 nî poàⁿ, kî-tiong toà iâm-tiâⁿ kàu-hoē bo̍k-hoē ū 24 nî kú.
Kò͘ Lí Bo̍k-su 1929 nî 5 ge̍h 7 ji̍t lâi ko-hiông hù-jīm hit sî, kàu-hoē sè chi̍t keng tiàm choè lé-pài-tn̂g, tong-sî hoē-iú chin chió, kàu-hoē chí-ū Kî-āu kap chia chi̍t keng nā-tiāⁿ. Lí Bo̍k-su jia̍t-sim choè kang, kàu-hoē sìn-tô͘ chiām-chiām ke-thiⁿ, chiū siat-hoat boé Pak-iá-teng ê lé-pài-tn̂g thó͘-toē, kiàn-tiok lé-pài-tn̂g kap bo̍k-su-koán. Kàu-hoē chiām-chiām ke-thiⁿ lâng-gia̍h, su-iàu Chú-ji̍t-o̍h kàu-sek, chiū chiong bo̍k-su-koán kái tha̍h jī lâu, lâu-téng choè bo̍k-su-koán, lâu-kha choè Chú-ji̍t-o̍h kàu-sek, chiū khai-pān Iù-tī hn̂g. Hit sî pān liáu chin hó sêng-chek, siū-tio̍h toē-hng ê jîn-sū chin hoan-gêng. Kàu kong-ho̍k-āu, chiū tī Loā-lâm koe 53 hō khí hiān sî tông-hông ê iâm-tiâⁿ kàu-hoē lé-pài-tn̂g, tuì án-ni kàu-hoē bêng-chheng kái-oāⁿ choè iâm-tiâⁿ kàu-hoē. Hit sî tú-á kong-ho̍k, beh khí chit keng lé-pài-tn̂g si̍t-chāi ū chin toā ê khó͘-sim, hoē-iú tuì so͘-khai-toē tú-á tńg-lâi, sū-gia̍p bē ún-tēng keng-chè bái, bu̍t-kè teh pho-tōng. chit khoán ê chêng-hêng hā, beh khí chit keng lé-pài-tn̂g kap bo̍k-su-koán si̍t-chāi chin toā khó͘-sim. Chóng-sī kò͘ Lí Bo̍k-su ê sìn-sim chin kian-tēng, khek-ho̍k tong-sî ê it-chhè ê khùn-khó͘, lâi oân-sêng chit keng tông-hông ê lé-pài-tn̂g kap bo̍k-su koán, si̍t-chāi sī chin uí-tāi. Kàu tī 1953 nî chiū thè-hiu, toà tī ka-kī ê chhù, choè chū-iû ê kang. uì-cho̍k Lí-Bo̍k-su-niû sin-thé kiān-choân, ū 3 ê hāu-siⁿ, nn̄g ê cha-bó͘ kiáⁿ, lāi-goā sun ū 12 ê. Toā-kiáⁿ Lí Sìn-hêng, tuì Bí-kok chhim-chō tńg-lâi ho̍k-bū tī Tâi-pak Bí-kok ha̍k-hāu jīm-kàu, koh kiam-jīm Tâi-oân sîn-ha̍k-īⁿ ê kàu-siū. Tē jī kiáⁿ Lí Sìn-chiong, Tâi-lâm Sêng-kong Tāi-ha̍k pit-gia̍p, sī chi̍t uī chin iu-siù ê kang-thêng-su, nā-sī siū Chú ê soán-tiàu, chiū hoan-hí hiàn-sin hō͘ Chú, hiān-sî tī oán-tong kui Chú teh uī Chú choè kang. Tē 3 kiáⁿ Lí Sìn-chō͘ bo̍k-su, Tâi-lâm Sîn-ha̍k-īⁿ pit-gia̍p, bat tī Ka-gī Tiong-hoē ê Toā-nâ kàu-hoē chiū-jīm choè bo̍k-su, hiān-sî ho̍k-bū tī oán-tong kui Chú teh choè Chú ê kang. Toā cha-bó͘-kiáⁿ Lí Siù-gio̍k, pit-gia̍p Ji̍t-pún kok Tang-kiaⁿ io̍h-choan sī chi̍t ê io̍h-che-su, kè Iûⁿ Tong-bō͘ I-seng hiān-sî tī Táu-la̍k teh khai-gia̍p. Tē-jī cha-bó͘-kiáⁿ Lí Chû-gio̍k, kè Chiam Ek-phi I-seng, hiān-sî ho̍k-bū tī Séng-li̍p ko-hiông pīⁿ-īⁿ, tam-jīm lāi-kho kap kiám-giām chú-jīm. Kò͘ Lí Bo̍k-su tī pīⁿ chhn̂g-tiong siông-siông tuì khì thàm I ê lâng kóng, I ê sim chin pêng-an, koh chin boán-chiok, kám-siū Siōng-tè ê si-un sù-hok. Koh kóng chin kám-siā Siōng-tè, kiáⁿ-jî hoaⁿ-hí soà-chiap I ê kang-chok, hiàn-sin choè Chú ê kang, kiáⁿ-jî, sim-pū lóng chin iú-hàu, só͘-í chin kám-siā Siōng-tè.
Kàu 5 ge̍h 4 ji̍t chá-khí, kā bo̍k-su-niû kap teh khoàⁿ-kò͘ ê lâng kóng, Chú lâi lah sim chiū hui-siông ê hoaⁿ-hí, án-ni keng-kè bô kú, kàu hit ē-po͘ 4 tiám 40 hun, chiū an-jiân lī-khui sè-kan.
漢羅（Ùi原文改寫）
故李Sēng-gô牧師
Khu thian-teng
1965.06.15. P.30
李Sēng-gô牧師tī 5月4日下晡4點40分， tī 自己 ê厝受主恩召sek-lô凱旋歸 天家，享受73 歲， 5月10日下晡1點tī鹽埕教會舉行鹽埕教會葬， 會葬者有800 外人。
故李牧師tī A. D. 1893年11月12日，出世tī 屏東縣萬丹鄉Téng-chhiong家內，有去台南長老教中學讀冊。畢業了後就進入台南神學院，後來就去日本國， 東京都明治學院神學部深造。 該院畢業了後tńg來台灣，受傳道局派伊 tī田中教會一年，溝坪教會半年，潮州教會6年，萬丹教會一年。Tī A. D. 1929年5月7日赴任高雄市北野町教會牧師，(現在ê鹽埕教會) 兼任高雄中會巡迴牧師職務，後來專任tī鹽埕教會牧會， 到 1953年，逕停退休。án-ni做主ê 工有32年半，其中toà鹽埕教會牧會有24年久。
顧李牧師1929年5月7日來高雄赴任 hit時，教會sè一間tiàm做禮拜堂，當時會友真少，教會只有旗後kap chia一間nā-tiāⁿ。李牧師熱心做工，教會信徒漸漸加添，就設法買 北野町ê禮拜堂土地，建築禮拜堂kap牧師館。教會漸漸加添人額，需要主日學教室，就將牧師館 改 tha̍h 二樓，樓頂做牧師館， 樓腳做主日學教室，就開辦幼稚園。Hit時辦了真好成績，受著地方ê 人事真歡迎。到 光復後，就tī 瀨南街 53號起 現時堂皇ê鹽埕教會禮拜堂，對 án-ni教會名稱改換做鹽埕教會。Hit時tú-á 光復， beh 起這間禮拜堂實在有真大ê 苦心，會友對 疏開地 tú-á tńg來，事業bē 穩定經濟bái， 物價 teh 波動。 這款ê情形下，beh 起這間禮拜堂kap牧師館實在真大苦心。總是故李牧師ê信心真堅定，克服當時ê一切ê困苦，來完成這間堂皇ê禮拜堂kap牧師館，實在是真偉大。到tī 1953年就退休，toà tī家己ê厝，做自由ê 工。
uì-cho̍k李牧師娘身體健全，有三個後生，兩個查某囝，內外孫有12 個。大囝李Sìn-hêng， 對美國深造 tńg來服務tī台北美國學校任教， koh 兼任台灣神學院ê教授。第二囝李Sìn-chiong，台南成功大學畢業，是一位真優秀ê 工程師。若是受主ê 選召，就歡喜獻身hō͘主，現時tī 莞東 歸主teh 為主做工。第 三 囝李Sìn-chō͘牧師，台南神學院畢業，bat tī 嘉義中會 ê大林教會就任做牧師，現時服務tī 莞東歸主teh做主ê 工。大查某囝李Siù-gio̍k，畢業日本國東京藥專是一個藥劑師， 嫁楊 Tong-bō͘醫生現時tī 斗六 teh 開業。第二查某囝李Chû-gio̍k， 嫁 Chiam Ek-phi醫生，現時服務tī 省立高雄病院，擔任內科 kap檢驗主任。 故李牧師tī病床中常常對去探伊ê人講：伊ê心真平安，koh真滿足，感受上帝ê施恩賜福。Koh講真感謝上帝，囝兒歡喜續接伊ê工作，獻身做主ê 工， 囝兒，新婦攏真有孝，所以真感謝上帝。
到 5月4日早起，kā牧師娘 kap teh看顧ê 人講：主來lah心就非常ê歡喜，án-ni經過無久，到 hit下晡4點40 分，就安然離開世間。