出國97天
CHHUT KOK 97 THIAN
文獻資訊
項目 | 資料 |
---|---|
作者 | 無lo̍h名 |
卷期 | 台灣教會公報 |
卷期 | 第951號 |
日期 | 1965/2 |
頁數 | 6 |
白話字(原文數位化)
CHHUT KOK 97 THIAN
Lí Bêng-an
1965.02.01 P.6-8
Che oân-choân sī chhut tī Siōng-tè ê un-tián kap chiok-hok, hō͘ chi̍t ê chháu-toē kàu-hoē, iû-kî-sī ke̍k-kî sió-sò͘ tiong ê chi̍t ê lú bo̍k-su, ū ki-hoē choè Tâi-oân lú-kài tāi-piáu kàu Tek-kok Frankfurt khì chham-ka Sè-kài Tiúⁿ-ló Kàu-hoē Liân-bêng tē 19 kài Chóng-hoē, si̍t-chāi ū kóng boē chīn ê kong-êng, kám-siā kap kám-kek.
Chu-uī só͘ kèng-thiàⁿ ê thok-chiá, goá siong-sìn lín í-keng ū tha̍k kè Chóng-hoē gī-tiúⁿ Tân Huī-lâm bo̍k-su ê pò-kò, í-ki̍p tī Thian-kiâu pò-choá siōng khoàⁿ tio̍h kuí-nā uī sian-siⁿ ê pò-kò chiah tio̍h. In-uī án-ni, goá chí-ū tī chia lâi siá tām-po̍h goá kò-jîn só͘ keng-le̍k ê sū-kiāⁿ hō͘ chu-uī tho̍k-chiá chai kap choè chham-khó. Tī 1964 nî 7 ge̍h 27 ē-po͘ chi̍t tiám poàⁿ, chi̍t hâng 15 lâng tuì Tâi-pak chē C. A. T. pe kàu Hiong-káng. Tāi-seng kàu Tè-kok pn̄g-tiàm khì an-pâi pâng-keng kap hêng-lí, jiân-āu kok lâng chū-iû hêng-tōng. Chhit ge̍h 28 ji̍t tuì chá-khí kàu ē-po͘, chha-put-to choân-thé choè-tīn khì pháu só͘ beh khì ê kok-ka Tāi-sài-koán, pān-lí Visa ( ji̍p-kéng-chèng). Chóng-sī ū ê ū tit-tio̍h, ū ê pān boē hó-sè, tī bô hoat-tō͘ kap ke̍k ià-siān tiong tńg-khì lú-koán hioh-khùn. Keh ji̍t 7 ge̍h 29 ji̍t, hun choè nn̄g tuī, goán chi̍t hâng 5 ê, Tân Huī-lâm Bo̍k-su, N̂g Chú-gī Bo̍k-su, Iûⁿ Thian-hô Tiúⁿ-ló, Lū Kek-lēng Tiúⁿ-ló kap goá, tī ē-po͘ 4.30 chē B. O. A. C. seng chhut-hoat kàu Lī-pa-lùn ê Beirut, lō͘-tiong tī ìn-tō͘ ê Delhi kap I-lóng ê Teheran kok thêng-liû 40 hun cheng, tī 7 ge̍h 30 ji̍t siōng-ngó͘ lêng-sî 15 hun kàu Beirut, jiân-āu tī ki-tiûⁿ ê hāu-ki-sek tán kàu thiⁿ kng, pān-lí ki-phiò liáu-āu, chiū chhiàⁿ chhia kàu chhī-lāi khì iû-lám. Goá tī 1961 nî 10 ge̍h tuì Bí-kok beh tńg-lâi ê sî, ū hóng-būn kè Beirut kuí-nā ji̍t, só͘-í ū kóng boē chhut ê kám-khài kap heng-hùn. āu-lâi chē 10 tiám A. M. ê R. J. A. khì sèng-toē Iâ-lō͘-sat-léng, koh-khah sī kám-khài bû-liōng. Tāi-ke seng kàu Y. M. C. A. khì an-pâi pâng-keng liáu-āu, 4 uī lâm tāi-piáu kap tō-iû-chiá chiū khì iû-lám sèng-toē choē-choē chhut-miâ ê só͘-chāi. Chóng-sī goá chi̍t ê hi-seng chéng-kò ê ē-po͘ khì thoè tāi-ke pān-lí oāⁿ ki-phiò. In-uī goá í-chêng ū khì kè Iâ-lō͘-sat-léng, jî-chhiáⁿ sî-kan iā pí tāi-ke khah kú, só͘-í chit pái chí-ū thoè tāi-ke ho̍k-bū, hō͘ in 4 uī ū ki-hoē thang khì chham-koan chi̍t koá sèng-toē ê sū-bu̍t. Pān-lí hui-ki-phiò liáu-āu, goá chí-ū khì Tang-hng Khó-kó͘-ha̍k gián-kiù-īⁿ kap Y. W. C. A., khì chhē goán ê kàu-siū (Biblical Seminary in New York) kap Y. W. C. A. ê chóng-kán-sū kap pêng-iú, in-uī goá í-chêng bat toà kè Y. W. C. A., koh hit keng gián-kiù-īⁿ sī tī Y. W. C. A. keh-piah. Chóng-sī chin khó-sio̍h, só͘ beh chhē ê lâng lóng bô tī-teh, chin hō͘ goá kám-kak sit-bāng. Kin-á-ji̍t ê Iâ-lō͘-sat-léng pí 3 nî chêng goá khì ê sî ke chin-choē ê sin kiàn-tiok-bu̍t, chhī-kau ê lō͘ iā khui khah khoah, koh ū sin ê siok-sià kap kang-tiûⁿ.
Chhit ge̍h 31 ji̍t 8: A. M., chi̍t hâng koh chē hui-ki kàu Beirut choán chē pa̍t chiah hui-ki keng-iû Athens (Ngá-tián) khì Lô-má. Lô-má ê ìn-siōng kap 3 nî chêng só͘ khoàⁿ ê chha-put-to, iû-goân sī hiah-nih kó͘-kū. Só͘ put-tông ê, chiū-sī lō͘-piⁿ ê chhiū-ba̍k kap hoe-chháu, khui tit chin-chiàⁿ suí, ké-chí iā ke kuí-nā châng. In-uī goá téng piàn khì ê sî sī chhiu-thiⁿ, chit pái khì sī hē-thiⁿ. Chin kám-siā Chú, hō͘ goá ū ki-hoē thé-giām tio̍h bô saⁿ-tâng ê Lô-má khì-chiat. Goán chi̍t hâng iû-goân seng kàu Y. M. C. A. khì an-pâi pâng-keng, jiân-āu goá kap N̂g Chú-gī Bo̍k-su khì thoè tāi-ke pān-lí ki-phiò. Hit àm kàu hū-kūn ê koe-lō͘ khì kiâⁿ-kiâⁿ, keh-ji̍t hō͘ in 4 uī khì chham-ka iû-lám, goá ka-kī chiū khì lîn-kūn ê só͘-chāi kiâⁿ, kap thoè tāi-ke boé chia̍h-mi̍h. Tī Lô-má iā sī ū kū-toē tiông-iû, kám-khài bû-liōng chi kám.
Poeh ge̍h 2 ji̍t chá-khí kap tāi-ke choè-tīn khì Lô-má hui-ki-tiûⁿ, sàng in 4 uī khì Suī-se Geneva. āu-lâi ka-kī tī lô-má hui-ki-tiûⁿ teh tán hui-ki ê sî, tī bô-ì-tiong tú-tio̍h kè-khì tī Bí-kok ê sî Choè-tīn kè ê Hui-li̍p-pin tāi-piáu kap Pa-se ê tāi-piáu. In nn̄g uī lóng sī in pún-kok ê Lú Soan choân-kok hoē tiúⁿ. ĪN toē tiông hông, si̍t-chāi ū kóng boē chhut ê khoài-lo̍k.
Goán kàu Tek-kok Frankfurt ê ki-tiûⁿ í-keng sī hông-hun àm, bô siūⁿ tio̍h tī hia oē tú-tio̍h Tīⁿ Jî-gio̍k Bo̍k-su. I pún-lâi sī beh gêng-chiap N̂g Chiong-hui ĪN-tiúⁿ, in-uī tán bô, khì tán tio̍h goá. Só͘-í goá chin bān-hēng, tī chhiⁿ-so͘ ê īⁿ kok tiong tit-tio̍h Tīⁿ Bo̍k-su chhin-chiat ê pang-bâng kap àn-nāi, chhoā goá kàu só͘ ū-tēng ê lú-koán Palmenhof khì. Tuì Tâi-oân kàu Lô-má sī iām-jia̍t ê thiⁿ-khì, chóng-sī kàu Tek-kok chiū tú-tio̍h put-siông ê hân-léng khì-hāu, chiū koáⁿ-kín oāⁿ khah kāu ê saⁿ. Tuì 8 ge̍h 3 hō kàu 13 hō, chiū tī Johaⁿ Wolfgang Goethe Tāi-ha̍k chham-ka tāi-hoē. Tāi-hoē ê thêng-sū, sī tuì chá-khí 8 tiám 30 kàu àm-sî 10 tiám chó-iū, hui-siông tāng kap kiap ê program. Chóng-sī tiong-tô͘ iā ū té-té ê hiu-sek sî-kan thang khì chia̍h tê-piáⁿ, kap sin kū pêng-iú hân-tâm. Goá in-uī siū soán choè nn̄g hāng uí-oân, chi̍t ê sī Hū-lú-pō͘ ê Standing committee (lí-sū), chi̍t ê sī Committee eon Objective (Sū-kang kè-e̍k uí-oân), lēng-goā chham-ka Lú Sîn-ha̍k-ka chō-tâm-hoē. Chiah ê lóng sī tī thêng-sū goā ê sî-kan, só͘-í te̍k-pia̍t bô-êng. Chóng jî giân chi, pún-lâng tuì chit pái tāi-hoē ê kám-sióng sī sin-kî kap heng-hùn, iā sī siong-tong ê kín-tiuⁿ, m̄-bat chham-ka kè hiah-nih ū chhiong-si̍t, jīn-chin ê Sîn-ha̍k-tek tāi-hoē. Kok-kok ê tāi-piáu chha-put-to muí tiûⁿ to chāi-se̍k, pông-thèng ê lâm-lú iā sī chi̍t iūⁿ chin jīn-chin, koh hoat-giân ê chêng-hêng iā hui-siông ióng-io̍k, che si̍t-chāi thang choè lán ê chham-khó.
Tāi-hoē āu, tuì 8 ge̍h 14 khí, goá chiū siū chài kàu Tek-kok lâm-pō͘ ê Stein, Nunberg chi̍t só͘ “Kong-chok kè lô ê lāu-bú lêng-siu hoē-só͘” khì chham-koan, sī tuì Tek-kok 7 ê hū-lú thoân-thé lâi ha̍p-pān ê hoē-só͘. Lāi-bīn ê siat-pī hui-siông hó-sè, hui-siông sóng, khoân-kéng sī hui-siông ê iu-bí, tò-chhù to sī moá khai ê hoe, hoe-hn̂g, pâng-keng lāi-goā to ū kok chióng, kok sek ê hoe, hō͘ lâng kám-kak nā chhin-chhiūⁿ tī lo̍k-hn̂g nih. Kong-chok kè lô ê lāu-bú thang bián-huì, á-sī poàⁿ-kè tī chia lêng-siu nn̄g lé-pài kú, á-sī saⁿ lé-pài ê kî-kan, hō͘ sin, lêng(身,靈)tit-tio̍h hoê-ho̍k goân-khì kap chhiong-sit, liáu-āu chiah tńg-khì. lāi-bīn ū kuí-nā uī kàu-su teh chí-tō kap choè kò-jîn ê būn-toê kò͘-būn.
Poeh ge̍h 15 hō tuì Stein kàu Detmold, iân-lō͘ hóng-būn pèng chham-koan tuì-miâ ê toā keng lé-pài-tn̂g á-sī kó͘-chek, ū ê sī tē 7, 8 sè-kí ê kàu-hoē kap hiuⁿ-siā. Tī Detmold sī toà tī Sin-kàu ê Siu-lú-īⁿ (Diakonissen Mutterhaus), ji̍t-sî siū àn-nāi kàu só͘ tiāⁿ-tio̍h ê siâⁿ-chhī, á-sī hiong-tìn kàu-hoē khì tuì lîn-kūn kàu-hoē lâi ê hū-lú thoân-thé, á-sī lâm-lú hoē-iú, ū sî 1,00 ê í-siōng, ū sî 500 ê, 400 ê, hiòng in káng-to, he̍k-sī ián-káng, pèng kài-siāu Tâi-oân kàu-hoē chêng-hêng, tek-pia̍t Lú Soan kap san-toē kong-chok, í-ki̍p goá ê kong-chok. In-uī in ê hū-lú thoân-thé ū uī-tio̍h goá chhut tuì Tâi-oân kàu Tek-kok ê hui-ki-phiò, só͘-í hui-siông koan-sim ài lâi thiaⁿ kap khoàⁿ goá. Tī Tek-kok 4 lé-pài kú, tuî-khí chhut-sek Tāi-hoē ê 11 ji̍t í-goā, kiōng tī 3 ê Chú-ji̍t káng-tō, iā siū chhiáⁿ kā eⁿ-á(女嬰)soé-lé, í-ki̍p ǹg Hū-jîn-hoē kap Chheng-liân-hoē ki̍p kî-thaⁿ ê hoē ián-káng 17 tiûⁿ, kám-kak Tek-kok lâng chin hó chhin-kūn. Koh Tek-kok ê bêng-sèng kó͘-chek iā hui-siông choē. Te̍k-pia̍t Sin-kàu siu-tō-īⁿ kap só͘ pān ê siā-hoē sū-gia̍p, tuì jīm-hô hong-biān ê kòng-hiàn to chin-chiàⁿ toā. Tī 8 ge̍h 31 ji̍t kàu Lûn-tun, tī An Bo̍k-su kap Bo̍k-su-niû ê gêng-chiap hā, tī in tau kè chi̍t mî, keh chái-khí 9 ge̍h 1 ji̍t, kap An bo̍k-su khì chhia-thâu sàng Hóng-būn-thoân chi̍t hâng 13 lâng chêng-óng Ka-ná-tāi (goá tuì 8 ge̍h 13 chiū kap in lī-pia̍t).
Tī Eng-kok ê kî-kan, goá tit-tio̍h Lú Soan Hái-goā Soan-tō-hoē kàn-sū miss Edward ê hó-ì kap an-pâi toà tī in ê chhù, i ū siat-hoat hō͘ goá khì Kiàm-kiô Tāi-ha̍k hóng-būn Hi Bo̍k-su hu-hū, iā ū khì Selly Oak chham-koan Carey Hall, kap khì Coventry Cathedral, í-ki̍p khì Hampton Co͘rt Palace kap kî-thaⁿ ê só͘-chāi. iā ū chham-ka lú thoân-tō chiū-jīm-sek, hū-jîn-hoē, uī kàu-hoē goā cheng-liân oa̍h-tāng ê só͘-chāi téng. Eng-kok só͘ hō͘ goá ê ìn-siōng, chiū-sī kàu-hoē chū-hoē ê lâng chin chió, si̍t-chāi ū su-iàu lán thoè in kî-tó bô soah.
Káu ge̍h 10 ji̍t, keng-iû New York khì Ka-ná-tāi Toronto, ū Bêng Bo̍k-su-niû kap lán Lú Soan-tō chhù ê kàn-sū Keh Tì-huī lú-sū kàu ki-tiûⁿ chih goá. Jiân-āu khì toà tī Ewart College, sī soan-kàu-su hùn-liān ha̍k-hāu, pèng khì Bêng Bo̍k-su in tau hō͘ in chhiáⁿ àm-tǹg. Tī Toronto nn̄g lé-pài kú, ū khì chham-ka Lú Soan lí-sū-hoē, uí-oân-hoē, pō͘-hoē kap Ka-ná-tiā Chóng-hoē ê Chóng Uí hoē téng, pèng ǹg in ê hoē chhéng-an. Koh lé-pài-ji̍t ū khì Knox kàu-hoē kap Liân-ha̍p kàu-hoē chham-ka lé-pài, iā ū khì chhē Lia̍t Ko͘-niû kap Lū Bo̍k-su hu-hū (Rev. de Groot). Ū kìⁿ tio̍h Tông Ko͘-niû kap Lân Ko͘-niû, in tāi-ke to hui-siông siàu-liām Tâi-oân. Kàu ge̍h 23 ji̍t èng Bí-kok Liân-ha̍p Kàu-hoē Hū-lú-hoē ê iau-chhiáⁿ kàu New York khì chham-ka iú-koan Liân-ha̍p-kok ê gián-kiù-hoē . āu-lâi iû-goân siū phèng-chhiáⁿ khì Kansas chhī hù Liân-ha̍p Kàu-hoē Hū-lú-hoē tē 10 kài Chóng-hoē, lóng-chóng ū 1,500 ê hū-lú, 24 kok tāi-piáu tuì kok kàu-phài lâi chham-ka. Kî-kan sī 10 ge̍h 5 ji̍t-9 ji̍t. Chit ê hoē ê chú-toê sī “Pêng sìn-tô͘ thoân-tō͘, “ ū hun sió-cho͘ ê thó-lūn, te̍k-pia̍t chin koan-sim “O͘, pe̍h” ê būn-toê.
Tī New York ê té-té kî-kan, ū khì toà Biblical Seminary, tit-tio̍h Dr. Elen Garber kap Chiu Siok-huī lú-sū ê chiau-thāi, chin kám-siā, iā chin ナツカシイ. Kai Sîn-ha̍k-īⁿ pí goá í-chêng tī-teh ê sî ū siu-kái chin-choē, tô͘-su-sek hùn toā, sin ê chheh iā ke chin-choē, hāu-tiúⁿ, kàu-thâu iā oāⁿ pa̍t lâng, chóng-sī ū kìⁿ tio̍h chin-choē kū kàu-siū kap pêng-iú, tāi-ke chin hoaⁿ-hí.
iā ū kap chêng Tâi-pak Y. W. C. A. kò͘-būn Miss Julia White khì chham-koan Sè-kài Phok-lám-hoē. Koh tī lé-pài-ji̍t ū khì Fifth Avenue Tiúⁿ-ló kàu-hoē choè lé-pài, ū tú-tio̍h chin-choē ê kū iú.
Bē khì Kansas chhī khui-hoē í-chêng, goá ū khì Pittsburgh chham-ka Lú Soan ê Tāi-hoē kap Tiong-hoē só͘ ha̍p-pān ê Ecumenical Seminar, jiân-āu khì Cleaveland ǹg Lú Soan kap Chú-ji̍t-o̍h ián-káng, pèng hū-tam Chú-ji̍t lé-pài ê chi̍t-pō͘-hūn. Tī hia iā kìⁿ tio̍h chin-choē kū iú, tāi-ke hui-siông ê koan-sim kap khoài-lo̍k. Tī Kansas chhī khui-hoē āu khì Colorado chiu ê bo͘lder hóng-būn chêng Tâi-pak Y. W. C. A. ê chhòng-siat-chiá Miss Lelia Hinkley, tī hia chham-ka lé-pài kap kî-tó-hoē, í-ki̍p hū-jîn-hoē. iā ū khì chham-koan Colorado Tāi-ha̍k kap Tiong-kok liû-ha̍k-seng-hoē, jiân-āu kàu San Francisco, toà Miss Logan (Lô Ko͘-niû) ê chhù, ū tú-tio̍h Ko Chùn-bêng Bo̍k-su, Chu Khêng-sù Bo̍k-su, Tiuⁿ Suī-hiông Bo̍k-su. tī Kū-kim-soaⁿ kî-kan, ū khì chham-koan Tiong-kok lâng ha̍k-seng tiong-sim, sī uī hui Ki-tok-tô͘ kap pîn-bîn só͘ pān ê siā-hoē sū-gia̍p. Lô Ko͘-niû ê sió-bē tī hia hōng-sū, Lô Ko͘-niû pún-sin iā tī hia teh kà Sèng-keng. Tī 9 ge̍h 23 ji̍t kàu Hawaii, Honolulu, ū Ki-tok Kàu-hoē ê bo̍k-su-niû kap Y. W. C. A. chóng-kàn-sū kàu ki-tiûⁿ chih goá, āu-lâi chhoā goá khì chham-koan kàu-hoē, phok-bu̍t-koán, í-ki̍p khì Waikiki hái-pin. Tú-hó sī Hawaii ê Aloha week (アロハ週), só͘-í ū khoàⁿ tio̍h kok sek, kok chióng ê hoe-chhia kap hoà-chong, ga̍k-tuī, chhia-tui, bé-tuī, kok tó tāi-piáu ê hêng-lia̍t, kám-kak chin ū chhù-bī.
Kàu ge̍h 25 ji̍t (sī Ji̍t-pún ê 26 ji̍t) kàu Tang-kiaⁿ, in-uī sī Sè-ūn āu, só͘-í it-chhè to ke̍k pêng-chēng. Ū khì hóng-būn N. C. C. kap Tokyo Y. W. C. A. kap kuí-nā uī Ji̍t-pún pêng-iú kìⁿ-bīn. Tī Ji̍t-pún sǹg sī choè-āu ê chi̍t chām, chit pái kap 8 nî chêng só͘ khoàⁿ ê Tang-kiaⁿ to ū put-tông ê só͘-chāi, 8 nî chêng choē-choē só͘-chāi tú-tú teh kiàn-siat tiong. Chóng-sī kin-á-ji̍t ê Tang-kiaⁿ to hui-siông ê chìn-pō͘, put-kò in-uī seng khoàⁿ kè choē-choē Au Bí kok-ka ê kéng-sek liáu-āu ê koan-hē, só͘-í chit pái tuì Ji̍t-pún bô ū kám-kak te̍k-pia̍t ê hèng-chhù. Tang-kiaⁿ ê tiân-sek iā bô hó, koe-chhī pí goā-kok bô hó-khoàⁿ, it-chhè ná chhin-chhiūⁿ hoe-sek(灰色). Cha̍p-ge̍h 31 ji̍t chi̍t lō͘ pêng-an kàu Tâi-oân, kiat-sok 97 thian ê khoân-iû sè-kài.
漢羅(Ùi原文改寫)
出國97天
這完全是出tī上帝ê恩典kap祝福,hō͘一個草地教會,尤其是極其小數中ê一個女牧師,有機會做台灣女界代表到德國Frankfurt去參加世界長老教會聯盟第19 屆總會,實在有講boē盡ê光榮,感謝kap感激。
諸位所敬疼ê讀者,我相信恁已經有讀過總會議長陳Huī-lâm牧師ê報告,以及tī Thian-kiâu報紙上看著幾若位先生ê報告chiah著。因為án-ni,我只有tī chia來寫淡薄我個人所經歷ê事件hō͘ 諸位讀者知kap做參考。Tī 1964年7月27下晡一點半,一行15人對台北坐C. A. T. 飛到香港。事先到帝國飯店去安排房間kap行李,然後各人自由行動。七月28日對早起到下晡,差不多全體做陣去pháu所beh去ê國家大使館,辨理Visa (入境證)。總是有ê有得著,有ê辦boē好勢,tī無法度kap極厭倦中tńg去旅館歇睏。隔日7月29日,分做兩隊,阮一行5 ê, 陳 Huī-lâm牧師,黃Chú-gī牧師,楊Thian-hô長老,呂Kek-lēng長老kap我,tī下晡4。30坐B. O. A. C. 先出發到黎巴嫩 ê Beirut,路中tī印度ê Delhi kap 伊朗ê Teheran 各停留40 分鐘, tī 7月30日上午 零時15 分到 Beirut,然後tī 機場ê 飛機室等到天光,辨理機票了後,就倩車到市內去遊覽。我tī 1961年10月對美國beh tńg來ê時,有訪問過Beirut 幾若日,所以有講boē出ê 感慨 kap興奮。後來坐10點A. M. ê R. J. A.去聖地耶路撒冷,koh-khah是感慨無量。大家先到 Y. M. C. A.去安排房間了後,4 位男代表 kap導遊者就去遊覽聖地濟濟出名ê所在。總是我一個犧牲整個ê下晡去替大家辨理換機票。因為我以前有去過耶路撒冷,而且時間也比大家khah久,所以這擺只有替大家服務,hō͘ in 4 位有機會thang去參觀一寡聖地ê事物。辨理飛機票了後,我只有去東方考古學研究院 kap Y. W. C. A.,去chhē阮ê教授(Biblical Seminary in New York) kap Y. W. C. A. ê總幹事kap朋友,因為我以前bat toà 過Y. W. C. A.,koh hit 間研究院是tī Y. W. C. A.隔壁。總是真可惜,所beh chhē ê人攏無tī-teh,真hō͘我感覺失望。今á日ê耶路撒冷比 3年前我去ê時加真濟ê 新建築物, 市郊ê路也開khah闊,koh有新ê 宿舍 kap 工廠。
七月31日8: A. M.,一行koh坐飛機到Beirut轉坐別chiah 飛機經由Athens (雅典)去羅馬。羅馬ê印象kap 3年前所看ê差不多,猶原是hiah-nih古舊。所不同 ê,就是路邊ê樹木kap花草,開得真正suí,果子也加幾若叢。因為我頂遍去ê時是秋天,這擺去是夏天。真感謝主,hō͘我有機會體驗著無相同ê羅馬氣節。阮一行猶原先到Y. M. C. A.去安排房間,然後我kap 黃Chú-gī牧師去替大家辨理機票。 hit暗到附近ê街路去行行,隔日hō͘ in 4 位去參加遊覽,我家己就去鄰近ê所在行,kap替大家買食物。Tī羅馬也是有舊地重遊, 感慨無量之感。
八月2日早起kap大家做陣去羅馬飛機場,送in 4 位去瑞士Geneva。後來家己tī 羅馬飛機場teh等飛機ê時,tī無意中tú-著過去tī美國ê時做陣過ê 菲律賓代表 kap 巴西 ê 代表。 In兩位攏是in本國ê 女宣全國會長。 異地重逢,實在有講boē出ê快樂。
阮到德國Frankfurt ê 機場已經是黃昏暗,無想著tī hia 會 tú-著鄭Jî-gio̍k牧師。伊本來是beh 迎接黃Chiong-hui院長,因為等無,去等著我。所以我真萬幸, tī生疏ê 異國中得著鄭牧師親切ê幫忙kap案內, chhoā我到所預定ê 旅館Palmenhof去。對台灣到羅馬是炎熱ê天氣,總是到德國就tú-著不常ê寒冷氣候,就趕緊換khah厚ê衫。對8月3號到13號,就tī Johaⁿ Wolfgang Goethe大學參加大會。 大會ê程序,是對早起8點30到暗時10點左右,非常重kap kiap ê program。總是中途也有短短ê休息時間thang去食茶餅,kap新舊朋友寒談。我因為受選做兩項委員,一個是婦女部 ê Standing committee (理事),一個是Committee eon Objective (事工計畫委員),另外參加女神學家座談會。Chiah ê攏是tī程序外ê時間,所以特別無閒。總而言之,本人對這擺大會ê 感想是新奇kap興奮,也是相當ê緊張,m̄-bat參加過hiah-nih有充實,認真ê神學-tek 大會。各國ê 代表差不多每場to在席, pông-thèng ê男女也是一樣真認真,koh 發言ê 情形也非常踴躍,這實在thang做咱ê參考。
大會後,對8月14 起,我就受載到德國南部ê Stein, Nunberg一所「工作過勞ê老母靈修會所」去參觀,是對德國7 ê婦女團體來合辦ê會所。內面ê 設備非常好勢,非常爽,環境是非常ê優美,到處to是滿開ê花,花園,房間內外to有各種,各色ê花,hō͘人感覺若親像tī樂園nih。 工作過勞ê老母thang免費, 抑是半價 tī chia靈修兩禮拜久,抑是三禮拜ê其間, hō͘ 身, 靈(身,靈)得著回復元氣kap充實,了後chiah tńg去。內面有幾若位教師teh指導kap做個人ê 問題顧問。
八月15號對Stein 到 Detmold, 沿路訪問並參觀著名ê大間禮拜堂抑是古蹟,有ê是第7, 8世紀ê教會kap鄉社。Tī Detmold是toà tī 新教ê 修女院 (Diakonissen Mutterhaus),日時受案內到所定著ê城市,抑是鄉鎮教會去對鄰近教會來ê婦女團體,抑是男女會友,有時1,00 個以上,有時500個, 400個,向in 講道,或是演講, 並介紹台灣教會情形,特別女宣kap山地工作, 以及我ê 工作。因為in ê婦女團體有為著我出對台灣到德國ê 飛機票,所以非常關心ài來聽kap看我。Tī 德國4禮拜久,除去出席大會ê 11日以外,共tī三個主日講道,也受請kā嬰á(女嬰)洗禮,以及ǹg婦人會 kap青年會及其他ê 會演講17場,感覺德國人真好親近。Koh 德國ê 名勝古蹟也非常濟。特別新教修道院kap所辦ê社會事業,對任何方面ê貢獻to真正大。Tī 8月31日到倫敦, tī An牧師kap牧師娘 ê 迎接下, tī in 兜過一暝,隔早起 9月1日,kap An牧師去車頭送訪問團一行13人前往加拿大(我對8月13就kap in離別)。
Tī英國ê 其間,我得著女宣海外宣道會幹事miss Edward ê好意kap安排toà tī in ê厝,伊有設法hō͘我去劍橋大學訪問Hi牧師夫婦,也有去Selly Oak 參觀Carey Hall, kap去Coventry Cathedral,以及去Hampton Co͘rt Palace kap其他ê所在。也有參加女傳道就任式,婦人會, 為教會外青年活動ê所在等。英國所hō͘我ê印象,就是教會聚會ê人真少,實在有需要咱替in祈禱無soah。
九月10日,經由New York去加拿大Toronto,有明牧師娘 kap咱女宣道厝ê 幹事郭tì-huī女士到機場接我。然後去toà tī Ewart College,是宣教師訓練學校,並去明牧師in 兜hō͘ in請暗頓。Tī Toronto兩禮拜久,有去參加女宣理事會, 委員會, 部會 kap 加拿大總會ê總委會等, 並ǹg in ê 會請安。Koh禮拜日有去Knox教會kap聯合教會參加禮拜,也有去chhē Lia̍t 姑娘 kap Lū牧師夫婦(Rev. de Groot)。有見著Tông 姑娘 kap Lân 姑娘, in大家to非常數念台灣。九月23日應美國聯合教會婦女會ê邀請到New York去參加有關聯合國ê研究會。後來猶原受聘請去Kansas 市副聯合教會婦女會第10屆總會,攏總有1,500 個婦女,24 國代表對各教派來參加。期間是10月5日-9日。這個會ê主題是「評信徒傳徒,」 有分小組 ê討論,特別真關心「烏,白」ê 問題。
Tī New York ê短短期間,有去toà Biblical Seminary,得著Dr。 Elen Garber kap 周Siok-huī 女士ê招待,真感謝,也真ナツカシイ。該神學院比我以前tī-teh ê時有修改真濟,圖書室hùn大,新ê冊也加真濟,校長,教頭也換別人,總是有見著真濟舊教授kap朋友,大家真歡喜。
也有kap前台北Y. W. C. A.顧問Miss Julia White去參觀世界博覽會。 Koh tī禮拜日有去Fifth Avenue長老教會做禮拜,有tú-著真濟ê 舊友。
Bē去Kansas 市開會以前,我有去Pittsburgh參加女宣ê大會kap中會所合辦ê Ecumenical Seminar,然後去Cleaveland ǹg女宣 kap主日學演講, 並負擔主日禮拜ê一部分。Tī hia也見著真濟舊友,大家非常ê關心kap快樂。Tī Kansas 市開會後去Colorado 州 ê bo͘lder 訪問前台北Y. W. C. A. ê 創設者 Miss Lelia Hinkley, tī hia參加禮拜kap祈禱會,以及婦人會。也有去參觀Colorado大學kap中國留學生會,然後到San Francisco, toà Miss Logan (羅姑娘) ê厝,有tú-著高Chùn-bêng牧師,朱Khêng-sù牧師,張Suī-hiông牧師。tī 舊金山期間,有去參觀中國人學生中心,是為非基督徒 kap貧民所辦ê社會事業。羅姑娘ê小妹tī hia奉事,羅姑娘本身也tī hia teh 教聖經。Tī 9月23日到 Hawaii, Honolulu,有基督教會ê牧師娘 kap Y. W. C. A.總幹事到機場接我,後來chhoā我去參觀教會,博物館,以及去Waikiki海邊。 Tú-好是Hawaii ê Aloha week (アロハ週),所以有看著各色,各種ê花車 kap 化妝, 樂隊, 車隊, 馬隊, 各島代表 ê 行列,感覺真有趣味。
九月25日(是日本ê 26日)到東京,因為是世運後,所以一切to極平靜。有去訪問 N. C. C. kap Tokyo Y. W. C. A. kap 幾若位日本朋友見面。Tī日本算是最後ê一站, 這擺kap 8年前所看ê 東京 to有不同 ê所在,8年前濟濟所在tú-tú teh 建設中。總是今á日ê 東京 to非常ê進步,不過因為先看過濟濟歐美國家ê景色了後ê關係,所以這擺對日本無有感覺特別ê 興趣。東京ê田色也無好,街市比外國無好看,一切ná親像灰色(灰色)。十月31日一路平安到台灣,結束97 天 ê 環遊世界。