我所尊敬數念ê 師友
GOÁ SÓ͘ CHUN-KÈNG SIÀU-LIĀM Ê SU-IÚ
文獻資訊
| 項目 | 資料 |
|---|---|
| 作者 | 王占魁 Ông Chiàm-khoe |
| 卷期 | 台灣教會公報 |
| 卷期 | 第949號 |
| 日期 | 1965/1 |
| 頁數 | 11 |
白話字（原文數位化）
GOÁ SÓ͘ CHUN-KÈNG SIÀU-LIĀM Ê SU-IÚ
LŪN LÎM HA̍K-KIONG BO̍K-SU
Ông Chiàm-khoe
1965.01.01 P.11、13
- Tuì kang-iú:
I m̄-nā sī hu-hū hô-ài, chú-lú ài-sioh, tuì kang-iú iā khoán-thāi in choè ke-lāi ê lâng, kang-chok, chia̍h-si̍t lóng ū thiàⁿ-sim, só͘-í Chiong-hoà só͘ chhiàⁿ chi̍t ê kiò-choè A-kun, toà kàu toā-hàn soà kā kè. Táu-la̍k chi̍t ê Chhiu-goa̍t tuì 6 hè toà kàu 23 hè soà kā kè, khoán-thāi i chhin-chhiūⁿ kiáⁿ, chhin-chhiūⁿ sun. Ū lâng kap lâng toà, chit nî toà 24 ê thâu-ke; ū lâng chhiàⁿ lâng, chit nî chhiàⁿ kuí-nā ê. Lîm Bo̍k-su m̄-nā thiàⁿ chhiàⁿ kang ê lâng, liân chhù-piⁿ ê lâng i iā thiàⁿ.
- Gâu kî-tó:
I iáu chi̍t hāng te̍k-sek, chiū-sī kî-tó. Choē-choē lâng ê su-jîn kî-tó, á-sī chia̍h-pn̄g ê kám-siā, kan-ta ēng sim kî-tó, nā-sī Lîm-Bo̍k-su i kóng, che sī kong-bêng chèng-tāi ê, m̄-thang kan-ta tiàm chhuì-lāi kî-tó, iā tio̍h chhut siaⁿ. M̄-nā tī jîn-ke, tī pn̄g-tiàm, á-sī kàu-hoē ê lâng chú-chhui ê iàn-hoē tiûⁿ-só͘, bô-lūn tī tó-uī khai-iàn ê chìn-chêng, i chiū thoè chú-lâng chhiáⁿ chèng-lâng tāi-ke kám-siā.
- Te̍k-pia̍t ê tiông-siū:
I chia̍h 86 hè, m̄-sī kóng chin tn̂g hè-siū, lūn i ê sin-thé chiàu lâng khoàⁿ, sī boē thang chia̍h kàu 86 hè, sin-thé bô ióng, sî-siông khí toā pīⁿ, koh i iā bô hù-jū ê keng-chè thang tiâu-ióng, oē tit kàu 86 hè sī Siōng-tè te̍k-pia̍t ê un-tián. Goá ì-sù m̄-sī kóng tiông-siū sī hēng-hok, i ná lāu ná ióng, che sī Siōng-tè ê chiok-hok. Nn̄g ê lāu-lâng boán-kéng ê sî-chūn ū khoài-lo̍k kè ji̍t, beh kè-sin ê sî-chūn chí-ū pak-tó͘ thiàⁿ 8 tiám cheng kú nā-tiāⁿ, chiū pêng-an kè-sì.
- Hō͘ lâng kò:
1905 nî, Chiong-hoà boé pài-tn̂g toē, lâng tuì Muî Bo̍k-su kò i àm-kè chia̍h chîⁿ, Muî bo̍k-su ū kiò i lâi mn̄g. Ū, bô, Muî Bo̍k-su m̄-chai, lí, goá lóng m̄-chai, tān-sī goá kóng kuí hāng hō͘ tāi-ke choè chham-khó: (1) Tng-sî in hiaⁿ kā i kóng, bú-kū tī Lí-káng siat kong-koán, kiò i khì hoāⁿ, ún-tàng oē hoat-châi, i m̄. (2) Tng-sî Lîm bo̍k-su chhoā Ji̍t-pún kun ji̍p Tâi-lâm siâⁿ, Ji̍t-pún bú-koaⁿ kiò i sî thoân-tō tiàm Tâi-lâm, beh hō͘ i hoat-châi, i iā m̄. (3) Tī 13 nî chêng-chi̍t nî thàn 17 kho͘, kin-á-ji̍t chi̍t ge̍h ji̍t thàn 16 kho͘, án-ni ke 10 goā pē choē. Só͘-í ke̍k-kî boán-chiok. (4) Koh sī beh khí Sèng-tiān ê toē, kiám ū àm-kè chia̍h chîⁿ ê mah? (5) Muî Bo̍k-su sìn-iōng i boé thó͘-toē. (1905-1918) 13 nî kú ê saⁿ-kap choè kang, sui-jiân tò-khì pún-kok, iáu-kú tiāⁿ-tiāⁿ siá phoe hō͘ i, goá khoàⁿ Tâi-oân lâng choè tē it hō͘ Muî Bo̍k-su sìn-iōng, hō͘ Kàu-sū-hoē khoàⁿ tāng ê, chiū-sī Lîm Bo̍k-su.
1) In-uī i choè chi̍t ê Tâi-oân lâng hō͘ Kàu-sū-hoē khí chhù hō͘ i toà.
2) Muí ge̍h 10 kho͘ hō͘ i niá kàu sí.
3) It-sî-kim 100 kho͘ koh chi̍t tiúⁿ siúⁿ-chn̄g, Tâi-oân lâng tit-tio̍h Kàu-sū-hoē chit khoán un-tián chí-ū i. Ū lâng kóng, siá chi̍t kù hō͘ lâng kò, tuì Lîm Bo̍k-su khah bô lī-ek; chóng-sī hō͘ lâng kò m̄-sī choē, nā ū iáⁿ oai-ko chiah ū choē. Goá kóng chit kuí hāng, chiū-sī beh chèng-bêng i bô chhò-gō͘. Si-phian kóng, Tī tuì-te̍k ê bīn-chêng ū kā goá pâi-siat iân-sia̍h, ēng iû boah i ê thâu-khak, hō͘ i ê poe moá chhut-lâi. Bô chi̍t ê lâng bô tuì-te̍k, nā bô hoān-choē, tek-khak lán ê Chú oē án-ni pó-hō͘.
- uī tuì-tek kî-tó:
I ê hiaⁿ beh hāi sí i ê seng-khu, i m̄-nā bô oàn-hūn, thiàⁿ i ê a-hiaⁿ ê lêng-hûn, 15 nî kú thoè i ê hiaⁿ kî-tó, Siōng-tè ū thiaⁿ i ê kî-tó, hō͘ i ê hiaⁿ hoán-hoé.
Thài-pêng-kéng kàu-hoē thiaⁿ-kìⁿ i í-keng sìn Chú, chiū chhiáⁿ i lâi Tâi-lâm Jîn-siū-kéng(Goân-hoē-kéng keh-piah) kà Sió-o̍h, kî-tiong Tiō Thian-chû, chiū-sī Tiong-êng tiong-ha̍k ê bêng-ū hāu-tiúⁿ, sī i ê ko-tē. Tha̍k-chheh ê tāi-seng ū lé-pài khui-hoē, Lîm-Ha̍k-tun Sian-siⁿ choè chú-lí, hian Si chiū tha̍k, tha̍k liáu, ha̍k-seng teh thèng-hāu sian-siⁿ khí si-tiāu, thèng-hāu chin kú, thèng-hāu lóng bô, i kî-si̍t sī boē hiáu gîm, iā bô kiò lâng khí tiāu. Thêng tiap-á-kú kóng, Taⁿ m̄ tio̍h tha̍k khì, taⁿ m̄ tio̍h tha̍k khì; liân gîm to boē hiáu kóng, ha̍k-seng sī thiaⁿ bô. Koh hā-khò ê sî, ha̍k-seng chin hoaⁿ-hí beh kín cháu tńg-khì, sian-siⁿ kia̍h pán-poe phah toh-téng kóng, Tha̍k-chheh lâng boē ēng-tit cháu, kiâⁿ lō͘ tio̍h tāi-hong, pat jī kha lâi kiâⁿ, chhiú-ńg tio̍h khàm chhiú-chiúⁿ chi̍t poàⁿ, gō͘ ki chńg-thâu-á, tiong-ng chit saⁿ ki tio̍h mi oá, toā-thâu-bú kap bé-cháiⁿ-á pàng ti̍t, án-ni iô, lâi kiâⁿ chiah ū su-bûn.
āu-lâi Lîm Sian-siⁿ beh kè-sin ê sî, bián-lē i ê kiáⁿ-jî jia̍t-sim pài Siōng-tè, khoàⁿ lín a-chek ê hó bô͘-iūⁿ.
(Choân-bûn oân)
漢羅（Ùi原文改寫）
我所尊敬數念ê 師友
論林學恭牧師
王占魁
1965.01.01 P.11、13
- 對工友：:
伊m̄-nā是夫婦和藹， 子女愛惜，對工友也款待in做家內ê人，工作，食食攏有疼心，所以彰化所倩一個叫做阿君，帶到大漢soà kā 嫁。 斗六一個Chhiu-goa̍t 對 6 歲帶到23 歲soà kā 嫁，款待伊親像囝， 親像孫。有人kap人toà， 這年toà 24 個頭家，有人倩人，這年倩幾-nā個。 林牧師m̄-nā疼倩工 ê人，連厝邊ê人伊也疼。
- Gâu祈禱：
伊 iáu一項特色，就是祈禱。濟濟人ê私人祈禱，抑是食飯 ê感謝，kan-ta用心祈禱，若是林牧師伊講：這是光明正大 ê， m̄-thang kan-ta tiàm嘴內祈禱，也著出聲。M̄-nā tī人家，tī 飯店， 抑是教會ê人chú-chhui ê 宴會場所，無論tī tó位開宴ê進前，伊就替主人請眾人大家感謝。
6.特別ê 長壽：:
伊食86 歲， m̄是講真長歲壽，論伊ê身體照人看，是boē-thang食到 86 歲，身體無勇，時常起大病，koh 伊也無富裕ê經濟thang 調養，會得kàu 86 歲是上帝特別ê恩典。我意思m̄是講長壽是幸福，伊ná老ná 勇，這是上帝ê祝福。兩個老人晚景ê時陣有快樂過日，beh過身ê時陣只有腹肚疼8點鐘久nā-tiāⁿ,就平安過世。
- hō͘人告：
1905年，彰化買拜堂地，人對梅牧師告伊暗計食錢，梅牧師有叫伊來問。有，無，梅牧師m̄知，你，我攏m̄知，但是我講幾項hō͘大家做參考： (1)當時in 兄 kā伊講，母舅tī里港設公館，叫伊去hoāⁿ，穩當會發財，伊m̄。 (2)當時林牧師chhoā日本軍入台南城，日本武官叫伊辭傳道tiàm 台南， beh hō͘ 伊發財，伊也m̄。 (3) Tī 13年前一年趁 17 箍，今á日一月日趁 16 箍， án-ni 加 10 外 倍濟。所以極其滿足。(4) koh是beh 起聖殿ê 地， kiám有暗計食錢ê mah？ (5) 梅牧師信用伊買土地。(1905-1918) 13年久ê相kap做工，雖然倒去本國，iáu-kú定定寫批 hō͘ 伊，我看台灣人最第一hō͘ 梅牧師信用，,hō͘ 教士會看重ê，就是林牧師。
1)因為伊做一個台灣人hō͘ 教士會起厝hō͘ 伊 toà.
2)每月10 箍 hō͘ 伊領到死。
3) It-sî-kim 100箍 koh一tiúⁿ siúⁿ-chn̄g，台灣人得著教士會這款恩典只有伊。有人講：寫一句hō͘人告，對林牧師khah無利益；總是hō͘人告m̄是濟，若有影 歪哥 chiah有濟。我講這幾項，就是beh證明伊無錯誤。詩篇講：Tī對敵ê面前有kā我排設筵席，用油抹伊ê頭殼，hō͘伊ê 杯滿出來。無一個人無對敵，若無犯罪，的確咱ê主會 án-ni保護。
- 為對敵祈禱：
伊ê 兄 beh 害死伊ê身軀，伊m̄-nā無怨恨，疼伊ê 阿兄 ê靈魂，15年久替伊ê 兄祈禱，上帝有聽伊ê祈禱，hō͘伊ê 兄反悔。
太平境教會聽見伊已經信主，就請伊來台南仁壽境(元會境隔壁)教小學，其中趙 Thian-chû,就是長榮中學ê 名譽校長，是伊ê 高弟。讀冊ê事先有禮拜開會， 林 Ha̍k-tun先生做主理，hian 詩就讀，讀了，學生teh 聽候先生起詩調， 聽候真久，聽候攏無，伊其實是boē曉吟，也無叫人起調。停霎-á-久講：Taⁿ m̄ 著讀去，taⁿ m̄ 著讀去；連吟to boē曉講：學生是聽無。Koh 下課 ê時，學生真歡喜beh 緊走tńg去，先生kia̍h pán-poe 拍桌頂講：讀冊人boē用得走，行路著大方，八字腳來行，手-ńg 著蓋手-chiúⁿ一半，五隻指頭á，中央這三隻著mi oá，大頭姆 kap 尾節-á放直，án-ni 搖，來行chiah有斯文。
後來林先生beh過身ê時，勉勵伊ê 囝兒熱心拜上帝，看恁 阿叔 ê好模樣。
(全文完)