代表團母會訪問記(2)
TĀI-PIÁU-THOÂN BÚ-HOĒ HÓNG-BŪN-KÌ(2)
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第949號 |
| 日期 | 1965/1 |
| 頁數 | 12 |
白話字（原文數位化）
TĀI-PIÁU-THOÂN BÚ-HOĒ HÓNG-BŪN-KÌ(2)
N̂g Eńg-chhiong
1965.01.01 P12-13
Poeh ge̍h 30 ji̍t, téng po͘ 8 tiám, goán ū chē choan-chhia (Eng chóng-hoē sū-bū-só͘ thoè goán siat-hoat ê). àn-nāi goán beh khì coventry ê só͘-chāi, ài beh kàu hia chi̍t ê Tiúⁿ-ló-hoē ê pài-tn̂g saⁿ-kap choè lé-pài, chhia chē nn̄g tiám goā cheng kú chiah kàu. Lé-pài liáu, chiū siū àn-nāi chia̍h tiong-chhan, āu-lâi chham-koan chi̍t keng chin chhut-miâ ê ha̍p-it ê kàu-hoē. Chit keng kàu-hoē ti 1962 nî 5 ge̍h, tit-tio̍h Eng-kok lú-ông ê lîm-kà hiàn-tn̂g ê chi̍t keng chin toā keng koh chip hiān-tāi bí-su̍t ê cheng-chhé lâi khí--ê. Chit keng Coventry Cathedral bô sio̍k tó-uī chi̍t ê kàu-phài, chiū-sī beh hō͘ choân sè-kài sím-mi̍h kok-bîn thang ji̍p lâi saⁿ-kap choè lé-pài, iā ta̍k só͘-chāi ê kàu-hoē chheng-liân lóng thang choè ho̍k-bū ê kang. Tī 14 sè-kí só͘ khí ê kū ê Coventry ê pài-tn̂g, tī tē 2 chhù sè-kài tāi-chiàn ê bó͘ chi̍t àm, siū Tek-kok khong-kun ê sio-î-toâⁿ sio kàu chhun 4 phìⁿ piah. āu-lâi bo̍k-su khioh nn̄g ki sio o͘-o͘ ê chhâ lâi pa̍k chi̍t ê si̍p-jī-kè tī hia kuī-lo̍h kî-tó, kiû Siōng-tè sià-bián, in-uī chiàn-cheng tì-kàu Siōng-tè ê tiān siū sio hō͘ Siōng-tè kan-khó͘. Chiàn-cheng kiat-sok liáu, Eng-kok kap Tek-kok kap choē-choē kok saⁿ-kap chhut chîⁿ lâi khí sin ê chit keng pài-tn̂g. iā chiū-sī beh piáu-hiān ha̍p-it. Pài-tn̂g ê goā-koan kap lāi-bīn lóng kap pa̍t-uī ê bô siāng-khoán. Tī ǹg kū pài-tn̂g toē ê sai-pêng, ū chi̍t phìⁿ piah lóng ēng po-lê choè choē-choē khoán thiⁿ-sài kap sìn-tô͘ ê le̍k-sú ê siōng. Ti lāi-bīn chiàⁿ-pêng, ū chi̍t tè chio̍h-thâu té chuí, sī kiâⁿ soé-lé teh ēng ê. Chit tè chio̍h-thâu sī tuì Pek-lī-hêng hū-kūn ê soaⁿ the̍h lâi ê Chiàⁿ-bīn ū soè tè huî-chng liâm Chú Iâ-so͘ ê siōng. Put-chí ū gē-su̍t ê kè-ta̍t. (Lán Ka-gī Phok-ài kàu-hoē iā ū chi̍t khoán ê Iâ-so͘ ê mosaic). Tang sai ū choē-choē ū sek ê po-lê thang, ū piáu-hiān choē-choē Sèng-keng ê kò͘-sū. Ū chhì-á bián-liû ēng thi̍h choè--ê, iā ū thiⁿ-sài phâng poe piáu-hiān khó͘-thàng hi-seng ê mosaic, muí ê tiau-khek á-sī tô͘-iūⁿ lóng ū chhim-chhim ê ì-sù. Khoàⁿ kàu liáu ài chi̍t tiám cheng kú, put-chí chiū kám-kek. Khoàⁿ-liáu chiū kàu chá-khì choè lé-pài ê Tiúⁿ-lō-hoē ê bo̍k-su ê kuì-hú siū chhiáⁿ tê-tiám, kàu 4.40 P.M chiah saⁿ-sî lī-khui Coventry ê siâⁿ-chhī tńg-khì Lûn-tun.
Poeh ge̍h 31 ji̍t, chiū-sī lâi kàu Lûn-tun ê tē 5 ji̍t, Bú-hoē kā goán pâi ji̍t-thêng-pió sī beh khì Kiám-kiô(Cambridge), chiū-sī Kiàm-kiô Tāi-ha̍k ê só͘-chāi. Chá-khí-sî 7.30 chhia kap chi̍t uī oē Ko͘-niû lâi lú-koán àn-nāi goán, chē kàu Lûn-tun ê chū-the̍h-khu, chêng Lú-o̍h hāu tiúⁿ Gô͘ Ko͘-niû ū khí-lâi saⁿ-kap chē chhia. Tī chhia lāi Gô͘ Ko͘-niû ū mn̄g N̂g Luí-hoa, iā tuì Lô͘ Bān-tit tiúⁿ-ló iā chiū mn̄g i só͘ bat ê lâng, in-uī goán nn̄g lâng tī Bān Hāu-tiúⁿ hia 3 ji̍t, tú-tú tī chit ê sî-kan gô͘ Ko͘-niû chiah khoàⁿ tio̍h goán nn̄g lâng. Chhia teh cháu ê tiong-kan, Gô͘ Ko͘-niû lûn-liû kap goán muí chi̍t ê lâng kóng oē, iā chiong só͘ chún-pī ê thn̂g-kó the̍h chhiáⁿ goán, tuì án-ni goán kám-kak khoài-khoài chiū kàu Kiàm-kiô. Chhia kàu chi̍t ê só͘-chāi, chiū lo̍h chhia soé chhiú, iā siū soat-bêng chiū-sī Kiàm-kiô Sîn-ha̍k-īⁿ. Liâm-piⁿ koh chē chhia kàu tī khah nāu-jia̍t ê só͘-chāi, iā ji̍p chi̍t keng pn̄g-tiàm, tī hia kap thâu chi̍t tāi lāu Má i-seng ê cha-bó͘-sun kap i ê tiōng-hu, chhian-kim, iáu chi̍t uī lāu Hoâi Bo̍k-su (tī san-toē choè kang ê Hoâi Bo̍k-su ê lēng-chun) sio bat; iā chiū saⁿ-kap chia̍h tàu. Goán-ū lâng khì oāⁿ chîⁿ ài beh pī-pān thang la̍p pn̄g chîⁿ, chóng-sī m̄ hō͘ goán la̍p, chit tǹg sī Má I-seng ê sun-lú choè tong chhiáⁿ goán. Chia̍h pá chi̍t tīn khì koe-nih khoàⁿ suí mi̍h, chi̍t tīn chham-koan Kiàm-kiô Tāi-ha̍k. Hāu-sià chi̍t-tòng chi̍t-tòng, lóng ēng chio̍h lâi khí, sī kuí-nā pah nî chêng ê kū-sek ê, iā hāu-tiâⁿ lóng sī chèng chháu, chián kàu pîⁿ-pîⁿ chhin-chhiūⁿ chhiⁿ thán. Ū khoe, ū kiô, khoe-nih ū lâng teh kò chûn-á, iā ū chhiū-á, put-chí chin toā. Kiàm-kiô chhī chiū-sī tāi-ha̍k chhī, goán kiâⁿ liáu kám-kak kha ià-siān, chiū koh tò-tńg lâi chá-khí lâi ê Sîn-ha̍k-īⁿ. Sî-kan iā oá tê-tiám ê sî-kan, chiū tī ha̍k-īⁿ ê īⁿ-tiúⁿ ê kheh-thiaⁿ thiaⁿ ha̍k-īⁿ-tiúⁿ kóng hoan-gêng-sû. Hi Bo̍k-su (Rev. Heeley) kap Bo̍k-su-niû iā tī tê-hoē choè chú-lâng, kî-thaⁿ iáu ū kuí-nā uī ha̍k-īⁿ ê sian-siⁿ iā lâi kap goán kóng oē. āu-lâi chhoā goán khoàⁿ lé-pài-thiaⁿ, àn-nāi ê īⁿ-tiúⁿ kóng Tâi-lâm Sîn-ha̍k-īⁿ ê lé-pài-thiaⁿ sī hóng chit ê khí ê, put-kò Kiàm-kiô ê soè keng, ha̍k-seng bô kuí cha̍p ê. Kàu tô͘-su-sek chiū pò goán khoàⁿ choè chá ê kū Sèng-keng, sī Chú-āu kuí nî chhut-pán ê, goá boē kì-tit lah, Koh kàu chi̍t keng phok-bu̍t-koán, ū khoàⁿ-tio̍h tī tiong-tàu kap goán saⁿ-kap chia̍h-pn̄g ê lāu Hoâi Bo̍k-su ê siōng, thiaⁿ kóng sī Sîn-ha̍k-īⁿ kong-lô-chiá, taⁿ-chiah thè-hiu bô joā kú. āu-lâi īⁿ-tiúⁿ tī chi̍t ê cháu-lông pò goán khoàⁿ in ê ha̍k-seng pit-gia̍p ê kì-liām-siōng, pò kuí-nā ê lâng khoàⁿ goán oē jīn-tit á boē? Sui-bóng liân-chheng iū-koh chin chá ê, goán lóng oē jīn-tit An bo̍k-su, N̂g Chiong-hui Bo̍k-su, Bí Bo̍k-su ê siōng. Bān En̂g-hoâ Bo̍k-su (Bān Hāu-tiúⁿ) ê siōng khoàⁿ boē tio̍h, chóng-sī īⁿ-tiúⁿ iā ū kóng bêng Bān hāu-tiúⁿ iā sī Kiàm-kiô ê hāu-iú, sī chi̍t uī toā sian-poè. Sî í-keng 5 tiám, goán chiū saⁿ-sî tńg-lâi Lûn-tun. án-ni lóng chóng 5 ji̍t ê tiong-kan, Bú-hoē kā goán pâi ji̍t-thêng, hō͘ goán thang khoàⁿ kap lán Tâi-oân kàu-hoē chin chhim, chin-choē kòng-hiàn ê soan-kàu-su; chi̍t hong-bīn tian-tò hō͘ in chin bô-êng, kā in chak-chō.
Bat lâi Tâi-oân choè-kang ê soan-kàu-su Bān Hāu-tiúⁿ hiān sî 80 hè, í-keng teh kò͘-ló, kuì-thé ióng-ióng, kàu taⁿ huih-ap koân, bo̍k-su-niû khûn-khûn teh chiàu-kò͘ i. Bo̍k-su ê kong-chú ki̍p chhian-kim lóng tī pa̍t-uī teh ho̍k-bū, bô khiā choè-hoé. Sím Gē-tun Sian-siⁿ, sió-tī bô gū-tio̍h, iā 9 ge̍h 1 ji̍t chiū tio̍h chē hui-ki khì Ka-ná-tiā, só͘-í taⁿ iā bô sî-kan thang pài-thok lâng chí-sī lō͘-chām. Gô͘ Ko͘-niû, oē Ko͘-niû lóng iáu teh choè kàu-hoē ê kang. An Bo̍k-su sī Bú-hoē ê Hái-goā Soan-tō-hoē ê chóng-kàn-sū, sī lán só͘ chāi ê. Kàu ge̍h 1 ji̍t téng-po͘ 9 tiám, An bo̍k-su, Miss Evans Kàn-sū, Muî Ko͘-niû ū lâi ki-tiûⁿ chhia-chām sàng goán, goán ê hui-ki chi̍t lō͘ pêng-an, ē po͘ nn̄g tiám goā (Ka-ná-tāi sî-kan) chiū kàu Toronto ê ki-tiûⁿ.
(Thāi-sio̍k).
漢羅（Ùi原文改寫）
代表團母會訪問記(2)
八月30日， 頂晡 8點，阮有坐專車(英總會事務所替阮設法ê)。 案內阮beh去coventry ê所在， ài beh到hia一個長老會ê拜堂相kap做禮拜， 車坐兩點外鐘久chiah到。禮拜了，就受案內食中餐，後來參觀一間真出名ê合一ê教會。 這間教會tī 1962年5月，得著英國女王ê 臨駕獻堂ê一間真大間koh 集現代美術 ê 精髓來起--ê。 這間Coventry Cathedral無屬tó位一個教派，就是beh hō͘全世界甚麼國民thang入來相kap做禮拜，也逐所在ê教會青年攏thang做服務ê工。 Tī 14世紀所起ê 舊ê Coventry ê拜堂， tī第2次世界大戰ê 某一暗，受德國空軍ê燒夷彈 燒到chhun 4 片壁。後來牧師khioh兩支燒烏烏ê柴來縛一個十字架tī hia跪落祈禱，求上帝赦免，因為戰爭致到上帝ê殿受燒hō͘上帝艱苦。戰爭結束了，英國kap德國kap 濟濟國相kap出錢來起新ê這間拜堂。也就是beh表現合一。拜堂ê 外觀 kap內面攏kap別位ê無相款。 Tī ǹg 舊拜堂地ê西旁，有一片壁攏用玻璃做濟濟款天使kap信徒ê歷史ê像。 Tī內面正旁，有一塊石頭té水，是行洗禮teh用ê。 這塊石頭是對伯利恆附近ê 山 the̍h來ê正面有細塊 瓷磚 黏主耶穌ê像。不止有藝術ê價值。 (咱嘉義博愛教會也有一款ê耶穌ê mosaic)。 東西有濟濟有色ê玻璃窗，有表現濟濟聖經ê故事。有刺á冕旒用thi̍h做--ê，也有天使捧杯表現苦痛犧牲ê mosaic，每ê雕刻 á是圖樣攏有深深ê意思。看到了ài一點鐘久，不止就感激。看了就到chá-khì做禮拜ê 長老會 ê牧師ê 貴府受請茶點，到4.40 P.M chiah相辭離開Coventry ê城市tńg去倫敦。
八月31日，就是來到倫敦 ê地5日， 母會 kā阮排日程表是beh去劍橋(Cambridge)，就是劍橋大學ê所在。早起時7.30 chhia kap一位oē 姑娘來旅館案內阮，坐到倫敦ê 住宅區，前女學校長 Gô͘ 姑娘有起來相kap坐車。 Tī 車內Gô͘ 姑娘有問N̂g Luí-hoa，也對Lô͘ Bān-tit長老也就問伊所bat ê人，因為阮兩人tī Bān校長hia 3日， tú-tú tī 這個時間Gô͘ 姑娘 chiah看著阮兩人。 車 teh走ê中間， Gô͘ 姑娘輪流kap阮每一個人講話，也將所準備ê糖果 the̍h請阮， 對 án-ni阮感覺快快就到劍橋。 車到一個所在，就落車洗手，也受說明就是劍橋神學院。 連鞭koh坐車到tī khah鬧熱ê所在，也入一間飯店， tī hia kap頭一代老馬醫生ê 查某孫kap伊ê丈夫， 千金， iáu一位老懷牧師(tī 山地做工ê 懷牧師ê 令尊) 相 bat；也就相kap食晝。阮有人去換錢ài beh備辦thang la̍p 飯錢，總是m̄ hō͘阮la̍p， 這頓是馬醫生ê孫女作東請阮。食飽一陣去街裡看suí物，一陣參觀劍橋大學。 校舍一棟一棟，攏用石來起，是幾nā百年前ê 舊式ê，也校埕攏是種草， 剪到平平親像青毯。有溪，有橋，溪裡有人teh kò船á，也有樹á，不止真大。劍橋市就是大學市，阮行了感覺kha厭倦，就koh 倒-tńg來早起來ê神學院。時間也oá 茶點ê時間，就tī學院ê院長 ê客廳聽學院長講歡迎詞。 Hi牧師(Rev. Heeley) kap牧師娘iā tī 茶會做主人，其他iáu有幾-nā 位學院ê先生也來kap阮講話。後來chhoā阮看禮拜廳， 案內 ê 院長講台南神學院ê禮拜廳是仿這個起ê，不過劍橋ê 細間，學生無幾十個。到圖書室就報阮看最早ê 舊聖經，是主後幾年出版ê，我boē記得lah， Koh到一間博物館，有看著 tī中晝kap阮相kap食飯ê老懷牧師ê像，聽講是神學院功勞者， taⁿ-chiah退休無joā久。後來院長 tī一個走廊報阮看in ê學生畢業ê紀念上，報幾-nā ê人看阮會認得á boē？雖罔年輕又koh真早ê，阮攏會認得An牧師， N̂g Chiong-hui牧師， Bí牧師ê像。 Bān榮華牧師(Bān校長) ê像看boē 著，總是院長也有講明Bān校長也是劍橋ê 校友，是一位大先輩。時已經5點，阮就相辭tńg來倫敦。 án-ni 攏總5日ê中間， 母會 kā阮排日程， hō͘阮thang看kap咱台灣教會真深，真濟貢獻ê宣教師；一方面顛倒hō͘ in真無閒， kā in chak-chō。
Bat來台灣做工ê宣教師Bān校長現時80 歲，已經teh kò͘-ló， 貴體勇勇，到taⁿ血壓 koân，牧師娘勤勤teh照顧伊。牧師ê 公子 及 千金攏tī別位teh服務，無khiā做夥。 Sím Gē-tun先生，小弟無遇著，也9月1日就著坐飛機去加拿大，所以taⁿ也無時間thang拜託人指示路站。 Gô͘ 姑娘， oē 姑娘攏iáu teh做教會 ê工。 An牧師是母會ê海外宣道會ê總幹事，是咱所在ê。九月1日頂晡9點， An牧師， Miss Evans 幹事， Muî 姑娘有來機場車站送阮，阮ê飛機一路平安， 下晡兩點外 (加拿大時間)就到Toronto ê機場。
(待續)。