我所尊敬數念的師友
Goá só͘ chun-kèng siàu-liām ê su-iú
文獻資訊
| 項目 | 資料 |
|---|---|
| 作者 | 王占魁 Ông Chiàm-khoe |
| 卷期 | 台灣教會公報 |
| 卷期 | 第942號 |
| 日期 | 1964/9 |
| 頁數 | 6-7 |
白話字（原文數位化）
GOÁ SÓ͘ CHUN-KÈNG SIÀU-LIĀM Ê SU-IÚ
LŪN LÎM HA̍K-KIONG BO̍K-SU
Ông Chiàm-khoe
1964.09.15 942 kî P.6-7
Chiū kā pa̍k, tiàu tī tē jī ki îⁿ-á, koh lâu ki-hoē hō͘ i hoán-hoé, lí nā beh sìⁿ-miā, lâi pàng-sak Iâ-so͘, lí kóng chi̍t-ē chiū kā lí tháu, nā bô, beh kā lí tiàu kàu sí. Lîm Bo̍k-su bô kè-kàu, kam-goān siū pa̍k, siū tiàu, mn̂g chiū koaiⁿ, ì-sù chiū-sī choa̍t-tuì bô beh hō͘ lâng kiù i, chóng-sī iáu ū lâu ki-hoē hō͘ i hoán-hoé, kóng ài sìⁿ-miā beh hòng-khì Iâ-so͘, nā kóng chi̍t kù, chiū liâm-piⁿ beh kā i tháu-khui. Só͘-í ū lâng mn̄g Ha̍k-kiong oē kan-khó͘ boē? Ū ài sìⁿ-miā bô? ìn kóng, Iâ-so͘ kap goá tī-teh. Kàu tē saⁿ sì ji̍t, chiū ìn liáu khah soè siaⁿ, in a-hiaⁿ siūⁿ sī beh sí lah, iā ū kiò thó͘-kong piān, nā sí, thang chhìn-chhái kā iám-iám leh. Lîm Bo̍k-su i put-sî kî-tó, i m̄-sī kiû Siōng-tè hō͘ i boē sí, boē kan-khó͘, i sī kiû Siōng-tè hō͘ i ū le̍k-liōng thang jím-siū chit ê khó͘-poe. iā siūⁿ tio̍h Mô͘-se ê oē kóng, Lia̍h choè ū hūn tī Ki-tok ê lêng-jio̍k, pí Ai-ki̍p ê châi-pó khah kuì-khì (Hi-pek-lâi 11:25). Koh Chú Iâ-so͘ ê oē kóng, Kìⁿ-nā tī lâng ê bīn-chêng jīn goá ê, goá iā tī thiⁿ-nih ê Pē ê bīn-chêng beh jīn i, kìⁿ-nā tī lâng ê bīn-chêng m̄-jīn goá ê, goá iā beh tī thiⁿ-nih ê Pē ê bīn-chêng m̄-jīn i. án-ni hō͘ i koh-khah kian-sim sêng-jīn Chú Iâ-so͘. In-uī i bat kóng, Goá í-keng kè hō͘ Iâ-so͘ lah. Gō͘ ji̍t kú tiàu teh, bô chi̍t tih tê-thng ji̍p chhuì, si̍t-chāi ū kan-khó͘ kàu-ke̍k. Tē gō͘ ji̍t, in hiaⁿ phah-sǹg i sí lah, kiò lâng tháu lo̍h-lâi, koh bô sí, iáu teh chhoán-khuì, chiū kā thoa chhut mn̂g-goā, mn̂g chiū koaiⁿ, beh hō͘ koâⁿ sí. Chit sî sui-jiân bô sí, nā-sī chhin-chhiūⁿ sí, iau koh koâⁿ, piàn-sin bô la̍t, hit tia̍p sī àm-sî, keng-kè nn̄g tiám cheng āu, kiû Siōng-tè siúⁿ-sù i khuì-la̍t, oē tit kiâⁿ kàu Keh Séng hiaⁿ ê chhù lâi keh mî. Keh Sèng hiaⁿ-tio̍h(sic) Lîm Bo̍k-su ê siaⁿ, kín-kín kā i khui mn̂g, mn̄g i thài oē tit lâi kàu goá chia. It-it kóng bêng, in-uī gō͘ ji̍t bô lim, bô chia̍h, boē thang chi̍t-ē chiū chia̍h-pn̄g, tāi-seng lim kún-chuí, āu-lâi chia̍h ám, koh lâi chia̍h bê, chiū khoe-ho̍k goân-khì; āu-lâi chiah chhoā i khì Ka-gī kàu-hoē chhē thoân-tō-su. Kóng-khí in a-hiaⁿ, chiong chit ê poàⁿ-tiâu-miā ê sió-tī kā khǹg goā-bīn, sí-oa̍h lóng bô chhē kìⁿ. Ha̍k-tun, Ha̍k-kiong kiám m̄-sī pau-heng, pau-tē, án-choáⁿ sim-koaⁿ hiah ngī. Chhiáⁿ khoàⁿ Lō͘-ka 12: 50--53; Má-thài 10: 21, 36. Ū ê ài Iâ-so͘, ū ê m̄-ài Iâ-so͘, oē cheng-chha kàu án-ni.
4. KÁI OK CHIÔNG SIĀN: Lîm Bo̍k-su bē sìn Chú ê í-chêng ū o̍h poa̍h pháiⁿ kiáu, chiū-sī ēng lián-pó lâi chia̍h lâng, lián-pó ê jī i oē oāⁿ, nā chió chîⁿ, chiū hō͘ lâng iâⁿ; nā choē chîⁿ, i chiū kā iâⁿ--lâi, só͘-í kìⁿ poa̍h kìⁿ iâⁿ. Sìn Chú liáu-āu chiū m̄-bat poa̍h. Ū chi̍t lâng chai i m̄ ài poa̍h lah, chiū lâi ko͘-chiâⁿ Lîm Bo̍k-su kà i poa̍h-kiáu su̍t, soà ēng hit lia̍p lián-pó boē i, i beh ēng 30 kho͘ hō͘ i chia̍h tê. Lîm Bo̍k-su kóng, 300 kho͘, 3000 kho͘ goá iā m̄, ka-kī m̄-ài, bô hō͘ lâng; goá í-keng chai che sī choē-ok; che kap chián-liú chhiúⁿ- kiap ê choē sio-siāng, koh sún-hāi kian-khong(sic), chi̍t-ē jia̍t--tio̍h, liân chia̍h, khùn to boē kì-tit, poa̍h soah, chai pak-tó͘ iau, chhàu-sng pn̄g ka-kī té lâi chia̍h, liām kóng iáu sio-sio, koh ēng pháiⁿ kiáu iâⁿ lâng khûn-khûn khiām-khiām ê chîⁿ, beh boé iàu-kín ê mi̍h, kā iâⁿ--lâi, hō͘ i khang-chhiú tò khì, chîⁿ bô, mi̍h iā bô, pē-bú phah mē; bó͘, kiáⁿ-jî chhá, ū ê soà kiâⁿ té-lō͘. Koh lâng siông-siông kóng chit hō m̄-sī mn̂g-kńg chhut koāⁿ ê chîⁿ, boē thang choè ke-hé. Goá í-keng siū hāi, m̄-kam pa̍t lâng tè goá siū hāi.
Lîm Bo̍k-su m̄ chiong i siū hāi ê pháiⁿ-kiáu khì-kū lián-pó lâi hāi lâng, chiū ēng pó͘-thâu lâi tuî phoà, hiat tī chhek-só͘ ê toā-ha̍k, chám chháu tû kun.
Chú Iâ-so͘ só͘ kóng, nā chi̍t kha, á-sī chi̍t chhiú tì-kàu lí hoān-choē, tio̍h chām hiat-ka̍k, á-sī chit ba̍k hoān-choē, chiū iah khí-lâi.
5. TĪ GIÂM-CHÊNG KÀ SIÓ-O̍H: Koh chiap-soà lâi kóng Lîm Bo̍k-su kàu Ka-gī kàu-hoē chhē Gô͘ Ì Thoân-tō-su, thoân-tō chin tông-chêng, hit àm te̍k-pia̍t uī-tio̍h i khui kî-tó-hoē, kiû Thiⁿ-pē khui lō͘ hō͘ chheng-liân lâng thang an-sim choè I ê kiáⁿ-jî. Kàu thiⁿ-kng, Gô͘ Thoân-tō chiū kā Lîm Bo̍k-su kóng, Siōng-tè ū kā lí khui-lō͘ lah, tī Giâm-chêng ū beh siat sió-o̍h, ài beh chi̍t uī sian-siⁿ, goá kài-siāu lí khì. Só͘-í chiū siá phoe kiò Se-kiⁿ hiaⁿ-tī the̍h phoe, soà chhoā Lîm Bo̍k-su saⁿ-kap khì. Kiâⁿ bô joā-hn̄g, chiū tú-tio̍h hiaⁿ-tī ông Khîm, mn̄g in beh khì tó-uī, Se-kiⁿ hiaⁿ kóng, Beh chhoā chit uī hiaⁿ-tī lâi-khì Giâm-chêng kà sió-o̍h, Ông Khîm hiaⁿ khoàⁿ i thǹg chhiah-kha, chiū kóng, bô chhēng oê choè sian-siⁿ, lâng ài chhiò chhiah-kha sian-siⁿ, chiū khì in tau koāⁿ chi̍t siang pò͘-oê kap 400 chîⁿ sàng i. Kàu Giâm-chêng, chiū ēng phoe kau thoân-tō-su Chiu Pō͘-hâ, chiū-sī Ka-gī Chiu Sek-eng Tiúⁿ-ló Chiu Hok-choân Sian-siⁿ ê lēng sian-hū. chiu Thoân-tō chiū hoaⁿ-hí thoè i bō͘-chi̍p 17 miâ ha̍k-seng, chi̍t ê, chi̍t nî chi̍t kho͘ gûn, 17 miâ, chi̍t nî 17 kho͘ gûn. I chiū ēng nn̄g kho͘ gûn kià tò-khì hō͘ i ê lāu-bú, saⁿ kho͘-gûn choè saⁿ khò͘, 12 kho͘ gûn choè chi̍t nî ê hé-si̍t. Hit sî mi̍h-kiāⁿ chin sio̍k, chi̍t kho͘ gûn 5 táu bí (nā chit-chūn, 5 táu bí tio̍h 250 kho͘ gûn). I chi̍t ge̍h ji̍t saⁿ táu bí chia̍h 6 kak gûn, mi̍h-phè m̄-bián boé, tī lé-pài-ji̍t hoē-iú toà bí, kiâm-toâ lâi chú, in chia̍h chhun ê chhài-pó͘, am-koe-pó͘, tāu-sīⁿ-pô͘, khioh-khioh khí-lâi phè, só͘-í kiâm-toâ m̄-bián boé, chi̍t ge̍h ji̍t 6, 7 kak gûn chiū ū kàu. Lîm Bo̍k-su chin hoaⁿ-hí, thang choè sian-siⁿ koh ū pn̄g thang chia̍h, lé-pài-ji̍t iā thang kóng tō-lí, ū sî khì Koan-á-niá á-sī Pe̍h-chuí-khoe, iā ū Chiu Thoân-tō thang kā chí-tō. I tī hia kà saⁿ nî kú, ū chhut nn̄g uī bo̍k-su, chiū-sī Gô͘ Hi-êng kap Lîm Chhip-hi; iā ū chhut 4 ê i-seng, 4 ê tiúⁿ-ló, 3 ê chip-sū, si̍t-chāi toā sêng-kong. āu-lâi Gô͘ Bûn-pin Thoân-tō khoàⁿ-kìⁿ i oē thang choè khah toā lō͘-ēng, só͘-í chiū kí-chiàn i ji̍p Sîn-ha̍k. Tī 1887 nî, 30 hè ji̍p Sîn-ha̍k, ū thang tha̍k-chheh, ū pn̄g thang chia̍h, koh ū chîⁿ thang niá, só͘-í chin hoaⁿ-hí. Tha̍k 3 nî liáu, kàu tē 4 nî, Kàu-sū-hoē ài beh chhē chi̍t ê lâng choè bûn-jī thoân-tō, chiū-sī boē chheh, āu-lâi soán-tio̍h Lîm Bo̍k-su, kóng i siāng sek-tòng, kā i kóng, i iā bô the-sî, án-ni tē 4 nî chiū lī-khui ha̍k-hāu, choân séng ta̍k uī khì boē chheh, tng-sî bô chhia thang chē, chin chió lé-pài-tn̂g thang hioh mî, tio̍h toà hoàn-á-keng.
BOE(sic) CHHEH THOÂN-TŌ TÔ͘-TIONG Ê CHO-GŪ.
(1) oàn-hūn Iâ-so͘ ê Lîm Gû: Tī Pang-liâu teh boē chheh ê sî, ji̍p Lîm Gû io̍h-tiàm, i chin toā-pān kóng, lí só͘ boē ê chheh ta̍k iūⁿ goá lóng ài, chi̍t hāng chi̍t pún, chiū sǹg 10 goā pún, mn̄g joā-choē chîⁿ, kóng, 4 kak gûn, chiū the̍h 4 kak gûn, bô kóng kè, chin toā kò͘-kheh, chiū lâi beh the̍h chheh, khoàⁿ-tio̍h nn̄g jī Iâ-so͘, chiū tân chhè-luî, liân mē koà chhoh, jióng kóng, lí chia̍h-tio̍h hoan-á-noā, ji̍p hoan-á-kàu, boē hoan-á chheh, chiong chheh piaⁿ moá thô͘-kha, koh kha-chiⁿ kûn-thâu tuì Lîm Bo̍k-su ti̍t chàm, ti̍t làm, phah chin-choē ē, koh thó hit 4 kak gûn. Lîm Bo̍k-su jím-siū, chheh khioh-khioh leh, khì pa̍t keng koh boē, bô oàn-hūn, sim-lāi thoè i kî-tó, ǹg-bāng i ū chi̍t ji̍t oē hoán-hoé lâi tit-kiù. Bô phah-sǹg Lîm Gû hit mî khí hiong chèng, thiⁿ bē kng, chiū chi̍t miā o͘-ho͘ ai chài. Ū lâng m̄-chai Lîm bo̍k-su tī pâng-keng teh kî-tó, in tī goā-bīn teh hoē kóng, Lîm Gû chit ê lâng chin thó͘-thún, cha-ji̍t chi̍t ê lâng boē i ê chheh, khoàⁿ-tio̍h sī Iâ-so͘ ê chheh, chiū chheh kā piaⁿ hiat-ka̍k, koh ēng kha-chiⁿ that, chhiú phah; thài hêng-ge̍k chhut-goā lâng, thiⁿ kā khiàn-chek. Lîm Bo̍k-su thiaⁿ-liáu m̄-sī hoaⁿ-hí i sí, sī khó-lîn i bô hoán-hoé. Phah tio̍h Lîm Bo̍k-su, chiū sī phah-tio̍h Iâ-so͘. Lâng kap Siōng-tè choè tuì-te̍k, sī chhin-chhiūⁿ ēng ah-nn̄g beh tìm chio̍h-thâu hō͘ phoà.
(Thāi-sio̍k)
漢羅（Ùi原文改寫）
我所尊敬數念Ê師友
論林學恭牧師
王占魁
1964.09.15 942 期 P.6-7
就kā縛，吊佇第二支楹仔，閣留機會予伊反悔，你若beh性命，來放sak耶穌，你講一下就kā你tháu，若無，beh kā你吊到死。林牧師無計較，甘願受縛，受吊，門就關，意思就是絕對無beh予人救伊，總是猶有留機會予伊反悔，講愛性命beh放棄耶穌，若講一句，就連鞭beh kā伊tháu開。所以有人問學恭 oē艱苦袂？有愛性命無？應講，耶穌佮我佇teh。到第三四日，就應了較細聲，in阿兄想是beh死lah，也有叫土公便，若死，通凊彩kā掩掩leh。 林牧師伊不時祈禱，伊毋是求上帝予伊袂死，袂艱苦，伊是求上帝予伊有力量通忍受這个苦杯。也想著摩西ê話講：掠做有份佇基督ê凌辱，比埃及ê財寶較貴氣(希伯來11:25)。閣主耶穌ê話講：見若佇人ê面前認我ê，我也佇天裡ê父ê面前beh認伊，見若佇人ê面前毋認我ê，我也beh佇天裡ê父ê面前毋認伊。按呢予伊閣較堅心承認主耶穌。因為伊捌講，我已經過予耶穌lah。五日久吊teh，無一滴茶湯入喙，實在有艱苦到極。第五日，in兄拍算伊死lah，叫人tháu落來，閣無死，猶teh喘氣，就kā拖出門外，門就關，beh予寒死。這時雖然無死，若是親像死，枵閣寒，遍身無力，hit tia̍p是暗時，經過兩點鐘後，求上帝賞賜伊氣力，會得行到Keh Séng兄ê厝來隔暝。Keh Séng聽著林牧師ê聲，緊緊kā伊開門，問伊thài會得來到我遮。一一講明，因為五日無啉，無食，袂通一下就食飯，代先啉滾水，後來食ám，閣來食糜，就恢復元氣;後來chiah chhoā伊去嘉義教會揣傳道師。講起in阿兄，將這个半條命ê小弟kā囥外面，死活攏無揣見。Ha̍k-tun， 學恭 kiám毋是胞兄，胞弟，按怎心肝hiah硬。請看路加12: 50－53;馬太10: 21， 36。有ê愛耶穌，有ê毋愛耶穌，oē增差到按呢。
4。 改惡從善: 林牧師袂信主ê以前有學poa̍h歹kiáu，就是用撚寶來食人，撚寶ê字伊會換，若少錢，就予人贏;若濟錢，伊就kā贏--來，所以見poa̍h見贏。信主了後就毋捌poa̍h。有一人知伊毋愛poa̍h lah，就來ko͘-chiâⁿ 林牧師教伊poa̍h-kiáu術，紲用hit lia̍p撚寶袂伊，伊beh用30箍予伊食茶。林牧師講：300箍，3000箍我也毋，家己毋愛，無予人;我已經知這是罪惡;這佮剪紐搶劫ê罪sio-siāng，閣損害健康，一下熱--著，連食，睏都袂記得，poa̍h煞，知腹肚枵，臭酸飯家己貯來食，念講猶燒，閣用歹kiáu贏人勤勤儉儉ê錢，beh買要緊ê物，kā贏--來，予伊空手倒去，錢無，物也無，父母拍罵;某，囝兒吵，有ê紲行短路。閣人常常講這號毋是毛管出汗ê錢，袂通做家伙。我已經受害，毋甘別人綴我受害。
林牧師毋將伊受害ê歹kiáu器具撚寶來害人，就用斧頭來鎚破，hiat佇廁所ê大礜，斬草除根。
主耶穌所講：若一腳，á是一手致到你犯罪，著斬hiat-ka̍k， á是這目犯罪，就挖起來。
5.佇GIÂM-CHÊNG教小學：閣接紲來講林牧師到嘉義教會揣吳意傳道師，傳道真同情，hit暗特別為著伊開祈禱會，求天父開路予青年人通安心做伊ê囝兒。到天光，吳傳道就kā林牧師講：上帝有kā你開路lah，佇Giâm-chêng beh設小學，愛beh一位先生，我介紹你去。所以就寫批叫Se-kiⁿ兄弟提批，紲chhoā 林牧師saⁿ-kap去。行無偌遠，就拄著兄弟王琴，問in beh去tó位，Se-kiⁿ兄講：Beh chhoā這位兄弟來去Giâm-chêng教小學，王琴兄看伊褪赤腳，就講：無穿鞋做先生，人愛笑赤腳先生，就去in兜捾一雙布鞋佮400錢送伊。到Giâm-chêng，就用批交傳道師Chiu Pō͘-hâ，就是嘉義周 Sek-eng長老周福全先生ê令先父。周傳道就歡喜替伊募集17名學生，一个，一年一箍銀，17名，一年17箍銀。伊就用兩箍銀寄倒去予伊ê老母，三箍銀做衫褲， 12箍銀做一年ê伙食。 Hit時物件真俗，一箍銀5斗米 (若這陣， 5斗米著250箍銀)。伊一月日三斗米食6角銀，物配毋免買，佇禮拜日會友帶米，鹹toâ來煮，in食賰ê菜脯，醃瓜脯，豆豉pô͘，抾抾起來配，所以鹹toâ毋免買，一月日6， 7角銀就有夠。林牧師真歡喜，通做先生閣有飯通食，禮拜日也通講道理，有時去關仔嶺á是Pe̍h-chuí-khoe，也有Chiu傳道通kā指導。伊佇遐教三年久，有出兩位牧師，就是Gô͘ Hi-êng佮林 Chhip-hi;也有出4个醫生，4个長老，三个執事，實在大成功。後來Gô͘ Bûn-pin傳道看見伊會通做較大路用，所以就舉薦伊入神學。佇1887年，30歲入神學，有通讀冊，有飯通食，閣有錢通領，所以真歡喜。讀3年了，到第4年，教士會愛beh揣一个人做文字傳道，就是賣冊，後來選著林牧師，講伊上適當，kā伊講，伊也無推辭，按呢第4年就離開學校，全省逐位去賣冊，當時無車通坐，真少禮拜堂通歇暝，著販仔間。
賣冊傳道途中Ê遭遇。
(1)怨恨耶穌ê 林 Gû：佇Pang-liâu teh賣冊ê時，入林 Gû藥店，伊真大範講：你所賣ê冊逐樣我攏愛，一項一本，就算10外本，問偌濟錢，講：4角銀，就提4角銀，無講價，真大顧客，就來beh提冊，看著兩字耶穌，就tân脆雷，連罵掛chhoh，嚷講：你食著番仔瀾，入番仔教，賣番仔冊，將冊piaⁿ滿土跤，閣跤chiⁿ拳頭對林牧師直chàm，直làm，拍真濟ē，閣討hit 4角銀。林牧師忍受，冊抾抾leh，去別間閣賣，無怨恨，心內替伊祈禱，向望伊有一日oē反悔來得救。無拍算林Gû hit暝5起兇症，天未光，就一命烏乎哀哉。有人毋知林牧師佇房間teh祈禱，in佇外面teh會講：林Gû這个人真土thún，昨日一个人賣伊ê冊，看著是耶穌ê冊，就冊kā piaⁿ hiat-ka̍k，閣用跤chiⁿ踢，手拍; thài橫逆出外人，天kā譴責。林牧師聽了毋是歡喜伊死，是可憐伊無反悔。拍著林牧師，就是拍著耶穌。人佮上帝做對敵，是親像用鴨卵beh tìm石頭予破。
(待續)