我所尊敬數念的師友
Goá só͘ chun-kèng siàu-liām ê su-iú
文獻資訊
| 項目 | 資料 |
|---|---|
| 作者 | 王占魁 Ông Chiàm-khoe |
| 卷期 | 台灣教會公報 |
| 卷期 | 第936號 |
| 日期 | 1964/6 |
| 頁數 | 11 |
白話字（原文數位化）
GOÁ SÓ͘ CHUN-KÈNG SIÀU-LIĀM Ê SU-IÚ
NIÛ TÎM KAP I Ê THÀI-THÀI
Ông Chiàm-khoe
1964.06.15 936 kî P.11
Niû Tîm, chheh-miâ sī Chiam-tek, sī Chiong-hoà koān Siù-chuí hiong lâng, Chiong-hoà kàu-hoē chhut-sin-chiá, tī 1901 nî ji̍p Sîn-ha̍k-hāu, 1905 nî pit-gia̍p, tī Lo̍k-káng kap Cha̍p-gō͘-chng (Jī-chuí) choè thoân-tō put-kò sì nî kú nā-tiāⁿ, chiū tī 1908 nî 29 hè kè-sin, uī-tio̍h i choè thoân-tō bô kú, só͘-í bat i ê lâng chin chió, hiah chió lâng bat ê lâng lâi kóng khí i ê lâi-le̍k kiám m̄-sī lâng khah boē chù-ì, khiok ū-iáⁿ, bô kóng bô lâng bat, ǹg-bāng kóng liáu m̄-nā bat i, koh oē khim-gióng i.
1. Ji̍p Sîn-ha̍k-hāu ê í-chêng.
Tī beh ji̍p Sîn-ha̍k-hāu ê goān-su nih ū mn̄g:
1) Lí ū tit-kiù têng-thâu-siⁿ ê thé-giām á bô?
2) Lí ū kiù lâng ê sù-bēng kám á bô?
3) Lí tī kàu-hoē ū sím-mi̍h hōng-sū á bô?
Chit saⁿ hāng, Niû Sian-siⁿ ún-tàng chin hó-táⁿ bô tiû-tû lâi ìn. 1) Ū tit-kiù têng-thâu-siⁿ ê thé-giām, in-uī i tuì sìn tō-lí liáu-āu, chiū 180 tō͘ ê choán-hiòng, hun chiú kap sèng-tē hoàn-jiân it sin. 2) I ū siông-siông kun-suî Muî Bo̍k-su kap Lîm Bo̍k-su sì-koè pò͘-tō, chiah chai ū kiù lâng ê pit-iàu. 3) I tī 18 hè chiū siū soán choè tiúⁿ-ló, lâi pang-chān bo̍k-su chiàu-kò͘ kàu-hoē. 18 hè choè tiúⁿ-ló ê phah-sǹg sī bô chin-choē, 18 hè si̍t-chāi sī gín-ná, kàu-hoē kéng i choè tiúⁿ-ló, thang chai liân-lêng sui-jiân sī chió, iáu-kú choè tāi-chì ún-tàng sī ló-sêng, tuì hoē-iú ū chhin-chhiat, ū thiàⁿ-sim, gâu chio-ho͘ hiaⁿ-tī chí-bē, jia̍t-sim kèng-pài Siōng-tè, i ài beh choè chi̍t ê oân-choân ê thoân-tō-ka chiū boē kì-tit i sī bô tha̍k-chheh ê sò͘-ióng, koh kiat-hun bô joā kú ê thài-thài kā khǹg tī chhù-nih, chiū kàu Tâi-lâm ji̍p Sîn-ha̍k-hāu, in-uī bô chheh té, beh bián-kióng tè lâng kàu tio̍h, só͘ í tio̍h te̍k-pia̍t ló͘-le̍k.
2. Chāi Sîn-ha̍k-hāu tha̍k-chheh tiong.
Niû Sian-siⁿ teh tha̍k Sîn-ha̍k-hāu ê sî; i nā hioh-joa̍h, hioh-koâⁿ tò-lâi ê sî, i sī goá ê chí-hu ê chek-peh sió-tī, goá khì goá ê a-chí hia ê sî, chin ài thiaⁿ i kóng-khí i tha̍k-chheh ê sū, khoàⁿ tio̍h i joa̍h-thiⁿ chhēng pe̍h-saⁿ, mn̂g-bé pàng ti̍t-ti̍t ná chhin-chhiūⁿ thiⁿ-sài tuì thiⁿ lo̍h-lâi. I teh kóng tha̍k-chheh ê sū, chhin-chhiūⁿ teh kóng thiⁿ-téng ê kò͘-sū, goá sī tè-chêng tè-āu chin ài thiaⁿ, i chē koân-í, goá chē kē-í, ná chhin-chhiūⁿ Má-lī-a teh thiaⁿ Iâ-so͘ kóng tō-lí ê khoán. Goá oē tha̍k sîn-ha̍k-hāu ê hèng-bī, chi̍t pō͘-hūn iā sī tuì chia khí, kóng-khí in teh tha̍k-chheh joā-nih teh sim-sek, hoaⁿ-hí; sian-siⁿ, ha̍k-seng hô-khì ái-ái, sio̍k-sià(sic) sī lâu-téng, soè keng ê chi̍t-keng toà chi̍t-lâng, toā keng ê chi̍t keng toà nn̄g ê lâng, thih bîn-chhn̂g joā-nih teh chheng-sóng, nā hioh-khùn, tāi-ke tâm-oā kóng chhiò, joā-nih teh sim-sek sóng-khoài kè ji̍t, nā pài la̍k á lé-pài-ji̍t, chiū khì chng-kha pò͘-tō, á-sī choè chú-lí. Pò͘-tō ê sî the̍h chhiú-khîm, ná kiâⁿ ná gîm-si, gîm kóng, “Thàu-chá khì iā hó chéng, ēng chû-pi kap khiân-sêng, ji̍t-tàu khì iā hó chéng, poàⁿ-po͘ ia̍h bô thêng.” I iā kóng iā gîm, 60 goā nî chêng thiaⁿ tio̍h si̍t-chāi sī hui-siông ê hó thiaⁿ, sim-lāi ti̍t-ti̍t khí kiong-kèng him-soān khí-lâi.
待續
漢羅（Ùi原文改寫）
我所尊敬數念ê師友
梁TÎM佮伊Ê太太
王占魁
1964.06.15 936期 p.11
梁Tîm，冊名是占德，是彰化縣秀水鄉人，彰化教會出身者，佇1901年入神學校，1905年畢業，佇鹿港佮十五莊 (二水)做傳道不過四年久nā-tiāⁿ，就佇1908年29歲過身，為著伊做傳道無久，所以捌伊ê人真少，hiah少人捌ê人來講起伊ê來歷kiám毋是人較袂注意，卻有影，無講無人捌，向望講了毋若捌伊，閣會欽仰伊。
1.入神學校ê以前。
佇beh入神學校ê願書裡有問：
1)你有得救重頭生ê體驗á無？
2)你有救人ê使命感á無？
3)你佇教會有甚物奉仕á無？
這三項，梁先生穩當真好膽無躊躇來應。 1)有得救重頭生ê體驗，因為伊對信道理了後，就180度ê轉向，薰酒佮性地煥然一新。2)伊有常常跟隨梅牧師佮林牧師四界佈道，chiah知有救人ê必要。3)伊佇18歲就受選做長老，來幫贊牧師照顧教會。18歲做長老ê拍算是無真濟，18歲實在是囡仔，教會揀伊做長老，通知年齡雖然是少，猶過做代誌穩當是老成，對會友有親切，有疼心，gâu招呼兄弟妹姊，熱心敬拜上帝，伊愛beh做一个完全ê傳道家就袂記得伊是無讀冊ê素養，閣結婚無偌久ê太太kā勸佇厝裡，就到台南入神學校，因為無冊底， beh勉強綴人到著，所以著特別努力。
2.在神學校讀冊中。
梁先生teh讀神學校ê時；伊若歇熱，歇寒倒來ê時，伊是我ê姊夫ê叔伯小弟，我去我ê阿姊遐ê時，真愛聽伊講起伊讀冊ê事，看著伊熱天穿白衫，毛尾放直直ná親像天使對天落來。伊teh講讀冊ê事，親像teh講天頂ê故事，我是綴前綴後真愛聽，伊坐懸椅，我坐低椅， ná親像馬利亞teh聽耶穌講道理ê款。我會讀神學校ê興味，一部份也是對遮起，講起in teh讀冊偌呢teh心適，歡喜；先生，學生和氣靄靄，宿舍是樓頂，細間ê一間蹛一人，大間ê一間蹛兩个人，鐵眠床偌呢teh清爽，若歇睏，大家談話講笑，偌呢 teh心適爽快過日，若拜六仔禮拜日，就去庄腳佈道，á是做主理。佈道ê時提手琴，ná行ná吟詩，吟講：「透早去撒好種，用慈悲佮虔誠，日晝去撒好種，半晡亦無停。」伊也講也吟，60外年前聽著實在是非常ê好聽，心內直直起恭敬欣羨起來。
待續